អគ្គស្នងការដ្ឋាននគរបាលជាតិ អះអាងថា សមត្ថកិច្ចខេត្តព្រះសីហនុ ឃាត់ខ្លួនជនបរទេសចំនួន ២៩០នាក់ ដោយរកឃើញថាពួកគេស្នាក់នៅ និងធ្វើការខុសច្បាប់ បន្ទាប់ពីពួកគេចេញតវ៉ាប្រឆាំងជនជាតិចិន ក្នុងទំនាស់ការងារ ដោយបានវាយបំផ្លាញការិយាល័យរបស់ថៅកែជនជាតិចិន នៅ China Town។
អគ្គស្នងការដ្ឋាននគរបាលជាតិ បានឲ្យដឹងថា នៅយប់ថ្ងៃទី៤ តុលា ឈានចូលថ្ងៃទី៥ តុលា ក្រុមជនជាតិប៉ាគីស្ថាន និងបង់ក្លាដេស បាននាំគ្នាចេញតវ៉ាប្រឆាំងនឹងជនជាតិចិន ដែលប្រើពាក្យប្រមាថជាតិសាសន៍នៅកន្លែងធ្វើការ។ លុះដល់ថ្ងៃទី៦ សមត្ថកិច្ចជំនាញបានរកឃើញ និងបានឃាត់ខ្លួនជនបរទេសចំនួន ២៩០នាក់ ក្នុងនោះមានជនជាតិប៉ាគីស្ថាន ២១៦នាក់ បង់ក្លាដេស ៦៨នាក់ និងនេប៉ាល់ ៦នាក់។
ប្រភពខាងលើអះអាងថា ពួកគេពាក់ព័ន្ធករណីស្នាក់នៅ និងធ្វើការដោយខុសច្បាប់នៅកម្ពុជា។ បច្ចុប្បន្ន សមត្ថកិច្ចជំនាញកំពុងស៊ើបអង្កេតបន្ថែម ដើម្បីចាត់ការតាមនីតិវិធីលើសំណុំរឿងនេះ។
កាលពីយប់ថ្ងៃទី៤ ខែតុលា ឆ្នាំ២០២៥ ជនជាតិប៉ាគីស្ថាន និងបង់ក្លាដេស ជាច្រើននាក់ បាននាំគ្នាតវ៉ាប្រឆាំងដោយខឹងសម្បានឹងជនជាតិចិន ដែលប្រើពាក្យប្រមាថជាតិសាសន៍ខ្លួននៅកន្លែងធ្វើការក្នុងអគារមួយ ស្ថិតក្នុងក្រុងព្រះសីហនុ ខេត្តព្រះសីហនុ ធ្វើឲ្យមានការភ្ញាក់ផ្អើលដល់ពលរដ្ឋ។
ប្រធានអង្គការប្រជាធិបតេយ្យខ្មែរ ដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា លើកឡើងថា ការអនុវត្តច្បាប់អន្តោប្រវេសន៍នៅក្នុងប្រទេសកម្ពុជា នៅមានកម្រិតនៅឡើយ ដោយសារតែជនបរទេសជាច្រើនបានស្នាក់នៅខុសច្បាប់នៅកម្ពុជា ដើម្បីឆបោកតាមអនឡាញ។ លោកថា ដើម្បីទប់ស្កាត់ឲ្យមានប្រសិទ្ធភាព រដ្ឋាភិបាលត្រូវលុបបំបាត់អំពើពុករលួយ បើមិនដូច្នេះទេ បញ្ហាទាំងនេះនៅតែកើតមានដូចភ្លៀងរលឹម។
ទាក់ទងនឹងការបោកប្រាស់តាមអនឡាញនេះ អតីតអ្នកឧកញ៉ា ហេង សិទ្ធី កាលពីខែវិច្ឆិកា ឆ្នាំ២០២៤ បានប្រើប្រាស់ហ្វេសប៊ុកផ្ទាល់ខ្លួនលាតត្រដាងពីការរួមដៃគ្នារវាងមន្ត្រីរដ្ឋាភិបាលជាមួយឧក្រិដ្ឋជន បើកល្បែងអនឡាញខុសច្បាប់ ការជួញដូរមនុស្ស ការបោកប្រាស់តាមអនឡាញ និងការលាងលុយកខ្វក់។ មន្ត្រីជាន់ខ្ពស់របស់រដ្ឋាភិបាលដែលពាក់ព័ន្ធនឹងបទឧក្រិដ្ឋទាំងនោះ មានដូចជា លោក គួច ចំរើន លោក កើត រិទ្ធ និងឧកញ៉ា ហ៊ុន តូ ដែលជាបងប្អូនជីដូនមួយរបស់លោក ហ៊ុន ម៉ាណែត គឺជាឧក្រិដ្ឋជនឆបោក ការចាប់ជំរិត និងជាមេខ្លោងគ្រឿងញៀន ដែលមានការគាំទ្រពីមន្ត្រីរដ្ឋាភិបាល រួមទាំងប៉ូលិសអន្តោប្រវេសន៍ ជាដើម។
ពាក់ព័ន្ធនឹងបញ្ហានេះដែរ កាលពីខែមេសា ឆ្នាំ២០២៤ កន្លងមក អាជ្ញាធរខេត្តព្រះសីហនុ បានបណ្តេញជនជាតិវៀតណាម ចំនួន ២៣១នាក់ចេញពីប្រទេសកម្ពុជា តាមច្រកអន្តរជាតិព្រែកចាក។
ការបណ្តេញជនជាតិវៀតណាម ទាំងនោះ ក្រោយពីសមត្ថកិច្ចរកឃើញថា ពួកគេមានជាប់ពាក់ព័ន្ធនឹងបទល្មើសឆបោកតាមអនឡាញដែលប្រព្រឹត្តនៅតាម ៣ទីតាំងផ្សេងគ្នាក្នុងខេត្តព្រះសីហនុ៕
© 2025, ឌឹ ខេមបូឌា ដេលី. All rights reserved.