អតីតប្រធានអង្គការសេដាក គាំទ្រនូវយុទ្ធសាស្ត្ររបស់រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងការអភិវឌ្ឍវិស័យស្រូវអង្ករកម្ពុជាឱ្យកាន់តែមានសក្ដានុពល និងដើម្បីជួយលើកកម្ពស់ជីវភាពរបស់ប្រជាពលរដ្ឋទៅថ្ងៃមុខ។
អតីតប្រធានអង្គការសេដាក និងជាមន្ត្រីជាន់ខ្ពស់គណបក្សប្រជាធិបតេយ្យមូលដ្ឋាន (GDP) បណ្ឌិត យ៉ង សាំងកុមារ បានប្រាប់សារព័ត៌មាន The Cambodia Daily នៅថ្ងៃទី២៤ វិច្ឆិកា នេះថា នៅពេលដែលក្រសួងកសិកម្ម រុក្ខាប្រមាញ់ និងនេសាទ និងក្រសួងពាក់ព័ន្ធ អាចអនុវត្តតាមគោលការណ៍របស់រដ្ឋមន្ត្រីក្រសួងសេដ្ឋកិច្ច កសិករកម្ពុជាប្រាកដជាទទួលបានផលចំណេញច្រើនពីការប្រកបរបរកសិកម្មរបស់ខ្លួន ប្រសិនបើក្រសួងកសិកម្មអាចអនុវត្តនូវយុទ្ធសាស្ត្រទាំងនេះបានមែននោះ។
បណ្ឌិត យ៉ង សាំងកុមារ អះអាងថា ការលើកឡើងជាគោលការណ៍របស់រដ្ឋាភិបាលកន្លងមកតែងតែបរាជ័យក្នុងដំណាក់កាលអនុវត្ត ដូច្នេះជុំវិញការស្ដារឡើងវិញនៃវិស័យកសិកម្មនៅពេលនេះ បើរដ្ឋាភិបាលគ្រាន់តែនិយាយឱ្យតែពីរោះស្តាប់ នោះវិស័យស្រូវអង្កររបស់កម្ពុជាក៏នឹងជួបឧបសគ្គនៅថ្ងៃមុខដូចពេលនេះដដែល ខណៈរដ្ឋាភិបាលតែងមានហេតុផលការពារនូវកំហុសរបស់ខ្លួនជានិច្ច ប៉ុន្តែអ្នកដែលខាតបង់ គឺនៅតែជាកសិករដដែល។
ប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋានរូបនេះជំរុញឱ្យក្រសួងកសិកម្ម រុក្ខាប្រមាញ់ និងនេសាទ និងក្រសួងពាក់ព័ន្ធ លើកទឹកចិត្តដល់ម្ចាស់រោងម៉ាស៊ីនកិនស្រូវឱ្យសហការគ្នា ដើម្បីលើកកម្ពស់វិស័យស្រូវអង្កររបស់កម្ពុជាឈានទៅរកការជំរុញជីវភាពរបស់ប្រជាពលរដ្ឋឱ្យកាន់តែល្អប្រសើរឡើង ដើម្បីកុំឱ្យកសិករជួបវិបត្តិដូចពេលកន្លងមក។
កាលពីថ្ងៃទី២៣ ខែវិច្ឆិកា ឆ្នាំ២០២២ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានលើកឡើងក្នុងពិធីបិទសន្និបាតបូកសរុបការងារឆ្នាំ២០២២ របស់សហព័ន្ធស្រូវអង្ករកម្ពុជាថា ដើម្បីអភិវឌ្ឍវិស័យស្រូវអង្ករកម្ពុជាឱ្យអស់សក្ដានុពល កម្ពុជាត្រូវពង្រឹងការនាំចេញអង្ករកម្ពុជាទៅកាន់ទីផ្សារអន្តរជាតិ តាមរយៈការសហការជាមួយក្រសួងស្ថាប័នពាក់ព័ន្ធប្រកបដោយតម្លាភាព។ ជាងនេះទៀត ត្រូវបង្កើនសាមគ្គីភាពផ្ទៃក្នុង និងបង្កើនអំណាចចរចាជាមួយអ្នកបញ្ជាទិញ និងពិនិត្យលទ្ធភាពក្នុងការកំណត់ថ្លៃរួមមួយផងដែរ។
លោក អូន ព័ន្ធមុនីរ័ត្ន បញ្ជាក់ថា កម្ពុជាក៏ត្រូវបន្តពង្រឹងសមត្ថភាពរោងម៉ាស៊ីនកិនស្រូវបន្ថែមទៀត។ ក្រៅពីនេះ សហព័ន្ធស្រូវអង្ករកម្ពុជា និងរោងម៉ាស៊ីនកិនស្រូវទាំងអស់ ត្រូវសហការជិតស្និទ្ធឱ្យកាន់តែល្អជាងមុន។ លើសពីនេះ ក្រសួងកសិកម្ម រុក្ខាប្រមាញ់ និងនេសាទ និងក្រសួងពាណិជ្ជកម្ម ត្រូវជំរុញការទិញស្រូវពីកសិករក្នុងតម្លៃជាក់លាក់ និងត្រូវពង្រឹងការសម្របសម្រួលការអនុវត្តកសិកម្មតាមកិច្ចសន្យារវាងរោងម៉ាស៊ីនកិនស្រូវ ក្រុមហ៊ុននាំចេញអង្ករ និងសហគមន៍កសិកម្មផងដែរ។
រដ្ឋមន្ត្រីក្រសួងសេដ្ឋកិច្ចរូបនេះបញ្ជាក់ថា ក្រៅពីវិធីខាងលើ កម្ពុជាត្រូវពន្លឿនការនាំចេញក្នុងក្របខ័ណ្ឌកិច្ចព្រមព្រៀងពាណិជ្ជកម្មសេរីកម្ពុជា-ចិន និងកិច្ចព្រមព្រៀងនៃភាពជាដៃគូសេដ្ឋកិច្ចក្នុងតំបន់គ្រប់ជ្រុងជ្រោយ (RCEP) ជាដើម។ បន្ថែមពីនេះ ក្រសួង-ស្ថាប័នពាក់ព័ន្ធ ត្រូវផ្គត់ផ្គង់ដល់កសិករ និងសហគមន៍កសិកម្មក្នុងកម្រិតថ្លៃសមរម្យឱ្យបានច្បាស់លាស់។
ទាក់ទិននឹងបញ្ហានេះ កាលពីថ្ងៃទី២២ ខែវិច្ឆិកា ឆ្នាំ២០២២ រដ្ឋមន្ត្រីក្រសួងកសិកម្ម លោក ឌិត ទីណា បានលើកឡើងក្នុងកម្មវិធីមួយនៅខេត្តកែប ថា កំណែទម្រង់ក្នុងវិស័យទាំងមូលនៃវិស័យកសិកម្ម ត្រូវធ្វើរួមគ្នា ដោយមានយុទ្ធសាស្ត្ររួម ហើយបំបែកទៅជាការទទួលខុសត្រូវផ្សេងៗគ្នា ក្នុងនោះកសិករត្រូវមានផែនការមួយចំនួនសម្រាប់ធ្វើ ហើយកសិករណាអាចធ្វើតាមផែនការបាន នឹងមានការធានានូវតម្លៃផលិត ប៉ុន្តែកសិករដែលនៅតែបន្តធ្វើតាមទម្លាប់ចាស់ អាចនឹងប្រឈមទៅនឹងបញ្ហាទីផ្សារ និងបញ្ហាផ្សេងៗដែលធ្លាប់កើតមានដូចពេលកន្លងមក។
ទាក់ទិននឹងបញ្ហានេះ ប្រធានរាជបណ្ឌិត្យសភាកម្ពុជា បណ្ឌិត សុខ ទូច ធ្លាប់ព្រមានកាលពីអំឡុងឆ្នាំ២០២០ មុនកិច្ចព្រមព្រៀងពាណិជ្ជកម្មសេរីកម្ពុជា-ចិនចូលជាធរមានថា កម្ពុជានឹងក្លាយជាធុងសំរាមរបស់ចិន បើក្រសួងពាក់ព័ន្ធមិនរួមគ្នាពង្រីកទំហំផលិតប្រកបដោយគុណភាពតបតាមស្តង់ដារអន្តរជាតិ រួមទាំងបណ្តុះបណ្តាលជំនាញខាងធនធានមនុស្សទេនោះ។
ដោយឡែកអ្នកស្រាវជ្រាវការអភិវឌ្ឍសង្គម បណ្ឌិត មាស នី ធ្លាប់បានលើកឡើងកាលពីពេលថ្មីៗនេះថា បើវិបត្តិនេះមិនត្រូវបានដោះស្រាយទេ ហានិភ័យសន្តិសុខស្បៀងអាចនឹងកើតឡើង ហើយកសិករកាន់តែច្រើនឡើងៗនឹងបន្តបោះបង់មុខរបរកសិកម្ម ក្នុងនោះកសិករខ្លះនឹងត្រូវបង្ខំចិត្តលក់ដីដើម្បីសងបំណុលធនាគារ ជាដើម៕