30 C
Phnom Penh

បណ្ដាញ​ព្រៃឡង់​ថា​ក្រុមហ៊ុន​ម៉ាខល​ឡូជីស្ទីក​កាប់​ឈើ​ជាង​៥០០​ដើម​ដោយ​គ្មាន​អាជ្ញាធរ​ទប់ស្កាត់

ដោយ ឌឹ ខេមបូឌា ដេលី

បទវិភាគ

បណ្ដាញ​សហគមន៍​ព្រៃឡង់​ខេត្ត​ព្រះវិហារ ជាង ៣០​នាក់ អះអាង​ថា ព្រៃឈើ​ជាង ៥០០​ដើម​ត្រូវ​បាន​ក្រុមហ៊ុន ម៉ាខល ឡូជីស្ទីក ឬ​ក្រុមហ៊ុន​៩៧ កាប់​បំផ្លាញ​នៅ​ក្នុង​តំបន់​ព្រៃឡង់​ដោយ​គ្មាន​ការ​ទប់ស្កាត់​ពី​សំណាក់​អាជ្ញាធរ​ណា​មួយ​នោះ​ឡើយ។

បណ្ដាញ​សហគមន៍​ព្រៃឡង់​ខេត្ត​ព្រះវិហារ បាន​សរសេរ​លើ​ទំព័រ​ហ្វេសប៊ុក​របស់​ខ្លួន​កាលពី​ថ្ងៃទី​២៨ ខែ​វិច្ឆិកា នេះ​ថា សមាជិក​សហគមន៍​ព្រៃឡង់​ចំនួន ៣៤​នាក់ បាន​ចុះ​ស្រាវជ្រាវ និង​ស៊ើបអង្កេត​បទល្មើស​ព្រៃឈើ​នៅ​ក្នុង​តំបន់​ព្រៃឡង់​រយៈពេល ៤​ថ្ងៃ ចាប់ពី​ថ្ងៃទី​២៥ ដល់​ថ្ងៃទី​២៨ ខែ​វិច្ឆិកា ឆ្នាំ​២០២២ ក្នុង​នោះ​បាន​ប្រទះ​នូវ​បទល្មើស​ព្រៃឈើ​ជាច្រើន​ដែល​ប្រព្រឹត្ត​ឡើង​ដោយ​ក្រុមហ៊ុន​រកស៊ី​ឈើ​ខុស​ច្បាប់​មួយ​ដែល​មាន​ឈ្មោះ​ថា ម៉ាខល ឡូជីស្ទីក ឬ​ក្រុមហ៊ុន​៩៧។

ប្រភព​ដដែល​អះអាង​ថា ការ​ចុះ​ស្រាវជ្រាវ​នេះ​បាន​រក​ឃើញ​គល់ឈើ​ដែល​ទើប​នឹង​កាត់​ថ្មីៗ​ចំនួន ៥១០​គល់ ដែល​ជា​សុទ្ធតែ​ជា​ដើមឈើ​សុក្រំ ដើម​ឈ្លីក ដើម​ផ្ចឹក ដើម​រាំង ដើម​ត្រាច ដើម​ឈើទាល និង​ដើម​ផ្ដៀក ជាដើម។

បន្ថែម​ពី​នេះ ពួកគេ​ក៏​បាន​ប្រទះឃើញ​គោយន្ត​ចំនួន ២​គ្រឿង និង​មនុស្ស​ពីរ​នាក់​ដឹក​ឈើ​ឃ្លុំ​ចំនួន ៧​ដុំ​ស្មើ​នឹង ៣​ម៉ែត្រ​គូប ដែល​ជា​កម្មករ​របស់​ក្រុមហ៊ុន ម៉ាខល ឡូជីស្ទីក។ ពួកគេ​ក៏​បាន​ប្រទះ​ឃើញ​ឈើ​ឃ្នាប ៧​សន្លឹក​ប្រវែង ៧​ម៉ែត្រ និង​ឈើ​ជាច្រើន​សន្លឹក​ផ្សេង​ទៀត​ផង​ដែរ​ដែល​គិត​ជា​សរុប គឺ​ស្មើ​នឹង ៤​ម៉ែត្រ​គូប។

បណ្ដាញ​សហគមន៍​ព្រៃឡង់​ខាងលើ​បញ្ជាក់​ថា ពួកគេ​ក៏​បាន​ជួប​មនុស្ស​ចំនួន ១៣​នាក់​ដែល​កំពុងតែ​សែនព្រេន​ក្នុង​រោង​ចំនួន ៤​កន្លែង ដែល​ស្ថិត​នៅ​ចំណុច​ប្រឡាយ​ធ្លក​នៅ​ខាងជើង​ស្រែ​ក្រូច ក្នុង​តំបន់​ព្រៃឡង់។ ក្នុង​ចំណោម​អ្នក​ទាំងនោះ​មាន​ម្នាក់​ជា​សន្តិសុខ​របស់​ក្រុមហ៊ុន ម៉ាខល ឡូជីស្ទីក ដែល​មាន​ឈ្មោះ​ថា ទុយ ចាន់សុភុន ដែល​មាន​សម្ភារៈ​មួយ​ចំនួន ដូចជា​វិទ្យុ​ទាក់ទង​មួយ​គ្រឿង ម៉ូតូ ២​គ្រឿង​រណារ​យន្ត និង​អាវុធ​កែច្នៃ​ផង​ដែរ ដើម្បី​ត្រៀម​កាប់​ឈើ​នៅ​តំបន់​នោះ។

ព្រៃឡង់​ត្រូវ​បាន​រដ្ឋាភិបាល​ប្រកាស​បង្កើត​ជា​ដែន​ជម្រក​សត្វព្រៃ​កាលពី​ឆ្នាំ​២០១៦ មាន​ផ្ទៃដី​ជាង ៤​សែន​ហិកតារ (៤៣១៦៨៣​ហិកតារ) ឋិត​ក្នុង​ចន្លោះ​ខេត្ត​ចំនួន​បួន គឺ​ខែត្រ​ក្រចេះ ស្ទឹងត្រែង ព្រះវិហារ និង​ខេត្ត​កំពង់ធំ ដែល​ដាក់​ឱ្យ​ស្ថិត​ក្រោម​ការ​គ្រប់គ្រង​របស់​ក្រសួង​បរិស្ថាន​សព្វថ្ងៃ​នេះ។

ក្រម​ព្រហ្មទណ្ឌ​មាត្រា​៥២៨ ចែង​ថា មន្ត្រី​រាជការ​សាធារណៈ មិន​ប្ដឹង​បរិហារ និង​មិន​អើពើ​បង្ក្រាប​បទល្មើស​ឋិត​ក្នុង​ដែន​សមត្ថកិច្ច​របស់​ខ្លួន ត្រូវ​ផ្ដន្ទាទោស​ដាក់​ពន្ធនាគារ​ពី ១​ឆ្នាំ​ដល់ ៣​ឆ្នាំ និង​ពិន័យ​ជា​ប្រាក់​ពី ២​លាន​រៀល​ដល់ ៦​លាន​រៀល ប៉ុន្តែ​កន្លងមក​ត្រូវ​គេ​មើល​ឃើញ​ថា មន្ត្រី​ដែល​អនុវត្ត​ខុស​ពី​មាត្រា​នេះ មិន​ទទួល​រង​ទណ្ឌកម្ម ឬ​ពិន័យ​ទេ តែ​បែរ​ជា​ត្រូវ​ដំឡើង​ឋានៈ​បុណ្យ​សក្តិ​ទៅវិញ។

ជាក់ស្តែង ឧកញ៉ា លីម ប៊ុណ្ណា ហៅ​ឧកញ៉ា ខ្នា ត្រូវ​បាន​តែងតាំង​ជា​ជំនួយការ​លោក ហ៊ុន សែន ក្នុង​ឋានៈ​ជា​ប្រធាន​គណបក្ស​ប្រជាជន​កម្ពុជា និង​នាយករង​ការិយាល័យ​បំភ័ន្ត​អក្ខរៈ​នៃ​កងរាជ​អាវុធហត្ថ​លើ​ផ្ទៃ​ប្រទេស លោក ចាប សារ៉ន ក៏​ត្រូវ​បាន​ដំឡើង​ឋានន្តរស័ក្ដិ​ពី​វរសេនីយ៍ឯក​ទៅ​ជា​ឧត្តមសេនីយ៍ត្រី​ផង​ដែរ បើ​ទោះបីជា​ពួកគេ​ល្បីល្បាញ​ខាង​កាប់​ឈើ​ខុស​ច្បាប់​នៅ​ក្នុង​តំបន់​ព្រៃឡង់​រហូត​មក​ក៏ដោយ។

អង្គការ​លើកលែង​ទោស​អន្តរជាតិ (Amnesty International) បាន​ចេញ​របាយការណ៍​មួយ​កាលពី​ថ្ងៃទី​២៨ ខែ​មករា ឆ្នាំ​២០២២ ថា ព្រៃឈើ​ចំនួន ៦២៧១​ហិកតារ ត្រូវ​បាន​កាប់​បំផ្លាញ​នៅ​ក្នុង​ដែន​ជម្រក​សត្វព្រៃ​ចំនួន​ពីរ ក្នុង​នោះ​មាន​ដែន​ជម្រក​សត្វព្រៃ​ព្រៃឡង់ និង​ដែន​ជម្រក​សត្វព្រៃ​ព្រះរការ ដែល​ជា​ការ​កាប់​ឈើ​ខុស​ច្បាប់​យ៉ាង​ច្រើន​សន្ធឹកសន្ធាប់ និង​កំពុង​ប៉ះពាល់​ធ្ងន់ធ្ងរ​ដល់​សិទ្ធិ និង​វប្បធម៌​របស់​ជនជាតិ​ដើម​ភាគតិច​នៅ​តំបន់​នោះ​ផង​ដែរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស