32 C
Phnom Penh

បណ្ឌិត យ៉ង សាំងកុមារ អរ​ព្រះ​គុណ​ព្រះមហាក្សត្រ​និង​លោក ហ៊ុន សែន ដែល​ផ្តល់​ឱកាស​ឱ្យ​ជួយ​អភិវឌ្ឍ​កសិកម្ម

ដោយ ឌឹ ខេមបូឌា ដេលី

បទវិភាគ

អតីត​សមាជិក​គណបក្ស​ប្រជាធិបតេយ្យ​មូលដ្ឋាន បណ្ឌិត យ៉ង សាំងកុមារ អរ​ព្រះ​គុណ​ដល់​ព្រះករុណា​ព្រះបាទ​សម្តេច​ព្រះ បរមនាថ នរោត្តម សីហមុនី និង​លោក​នាយករដ្ឋមន្ត្រី ហ៊ុន សែន ដែល​តែងតាំង​លោក​ជា​រដ្ឋមន្ត្រី​ប្រតិភូ​អម​នាយករដ្ឋមន្ត្រី និង​ជា​រដ្ឋលេខាធិការ​ក្រសួង​កសិកម្ម រុក្ខាប្រមាញ់ និង​នេសាទ ដើម្បី​លោក​មាន​ឱកាស​ក្នុង​ការ​អភិវឌ្ឍ​វិស័យ​កសិកម្ម​នៅ​កម្ពុជា។

យោង​តាម​ទំព័រ​ហ្វេសប៊ុក​របស់​លោក យ៉ង សាំងកុមារ នៅ​ព្រឹក​ថ្ងៃទី​១ ខែ​ធ្នូ ឆ្នាំ​២០២២ នេះ បាន​សរសេរ​ថា លោក​ក្រាប​ថ្វាយបង្គំ​អរ​ព្រះ​គុណ​ដល់​ព្រះករុណា​ព្រះបាទ​សម្តេច​ព្រះ បរមនាថ នរោត្តម សីហមុនី ដែល​បាន​តែងតាំង​លោក​ជា​រដ្ឋមន្ត្រី​ប្រតិភូ​អម​នាយករដ្ឋមន្ត្រី និង​ជា​រដ្ឋលេខាធិការ​ក្រសួង​កសិកម្ម រុក្ខាប្រមាញ់ និង​នេសាទ។

ទន្ទឹម​នោះ លោក យ៉ង សាំងកុមារ ក៏​បាន​អរគុណ​ដល់​លោក​នាយករដ្ឋមន្ត្រី ហ៊ុន សែន ដែល​ផ្ដល់​ឱកាស និង​ទំនុកចិត្ត​ដល់​លោក​ក្នុង​ការ​ចូលរួម​ការងារ​ជាមួយ​លោក ឌិត ទីណា រដ្ឋមន្ត្រី​កសិកម្ម​ថ្មី ដើម្បី​អភិវឌ្ឍ​វិស័យ​កសិកម្ម​កម្ពុជា ដោយ​ចាប់ផ្ដើម​ពី​ការ​កសាង​សង្វាក់​ផលិតកម្ម និង​ទីផ្សារ​ស្រូវ​អង្ករ។

អតីត​សមាជិក​គណបក្ស​ប្រជាធិបតេយ្យ​មូលដ្ឋាន​រូប​នេះ​រំពឹង​ថា មុខតំណែង​ដែល​ផ្ដល់​ដោយ​បក្ស​កាន់​អំណាច​នៅ​ពេលនេះ គឺ​ជា​មធ្យោបាយ​ដើម្បី​ឱ្យ​លោក​សម្រេច​គោលដៅ​ជួយ​កសិករ និង​ការ​កែទម្រង់​វិស័យ​កសិកម្ម​កម្ពុជា​ផង​ដែរ។ លោក យ៉ង សាំងកុមារ អាច​នឹង​ចូល​បម្រើ​ការងារ​ក្នុង​ឋានៈ​ជា​រដ្ឋមន្ត្រី​ប្រតិភូ​អម​នាយករដ្ឋមន្ត្រី និង​ជា​រដ្ឋលេខាធិការ​ក្រសួង​កសិកម្ម​នៅ​សប្ដាហ៍​ក្រោយ។

កាលពី​ថ្ងៃទី​២៧ ខែ​វិច្ឆិកា ឆ្នាំ​២០២២ ប្រធាន​គណៈកម្មាធិការ​នាយក​គណបក្ស​ប្រជាធិបតេយ្យ​មូលដ្ឋាន បណ្ឌិត យ៉ង សាំងកុមារ បាន​ស្នើសុំ​ចូលរួម​ជីវភាព​នយោបាយ​ជាមួយ​គណបក្ស​ប្រជាជន​កម្ពុជា ដើម្បី​ជួយ​អភិវឌ្ឍ​វិស័យ​កសិកម្ម​ដល់​រដ្ឋាភិបាល។ ក្រោយ​ជួប​ជាមួយ​លោក​នាយករដ្ឋមន្ត្រី ហ៊ុន សែន នៅ​ថ្ងៃទី​២៩ ខែ​វិច្ឆិកា ឆ្នាំ​២០២២ បណ្ឌិត យ៉ង សាំងកុមារ ក៏​ត្រូវ​បាន​តែងតាំង​ជា​រដ្ឋមន្ត្រី​ប្រតិភូ​អម​នាយករដ្ឋមន្ត្រី និង​ជា​រដ្ឋលេខាធិការ​ក្រសួង​កសិកម្ម រុក្ខាប្រមាញ់ និង​នេសាទ​ភ្លាមៗ​តែម្តង។

មុន​ពេល​ចុះចូល​ជាមួយ​បក្ស​កាន់​អំណាច បណ្ឌិត យ៉ង សាំងកុមារ បាន​អះអាង​កាលពី​ថ្ងៃទី​២៨ ខែ​វិច្ឆិកា ថា បើ​រដ្ឋាភិបាល​អាច​អនុវត្ត​នូវ​លក្ខខណ្ឌ​ទាំង ១២​ខ របស់​លោក​ឱ្យ​បាន​ត្រឹមត្រូវ គឺ​អាច​ជួយ​កសិករ​បាន​ជាង ១​លាន​គ្រួសារ​ឱ្យ​មាន​ជីវភាព​ល្អ​ប្រសើរ​ក្នុង​ដំណាក់កាល​ដំបូង ហើយ​ផែនការ​កសាង​សង្វាក់​ផលិតកម្ម​នេះ គឺ​ត្រូវ​ប្រើ​ពេល​រៀបចំ​យ៉ាងតិច ៥​ឆ្នាំ​ដើម្បី​ធានា​នូវ​ការ​អនុវត្ត​ឱ្យ​បាន​ទូទាំង​ប្រទេស។

កាលពី​ថ្ងៃទី​២៩ ខែ​វិច្ឆិកា ឆ្នាំ​២០២២ គណបក្ស​ប្រជាធិបតេយ្យ​មូលដ្ឋាន​បាន​ចេញ​សេចក្តី​ថ្លែងការណ៍​ថា បណ្ឌិត យ៉ង សាំងកុមារ បាន​ទទួល​ឋានៈ តួនាទី ស័ក្តិសម​នឹង​សមត្ថភាព​របស់​គាត់។

ប្រភព​ដដែល​លើកឡើង​ថា ខ្លួន​សង្ឃឹម​ថា​រាជរដ្ឋាភិបាល​កម្ពុជា​នឹង​ផ្តល់​អំណាច ធនធាន និង​សិទ្ធិ​គ្រប់គ្រាន់ ដើម្បី​ឱ្យ​បណ្ឌិត យ៉ង សាំងកុមារ អាច​បំពេញ​ភារកិច្ច​បម្រើ​កសិករ​ខ្មែរ​ទៅ​តាម​គម្រោង​ដែល​គាត់​បាន​បង្ហាញ​នា​ពេល​កន្លងមក។

នាយក​បេសកកម្ម​ក្រៅ​ប្រទេស​នៃ​វិទ្យាស្ថាន​ស្រាវជ្រាវ​គោល​នយោបាយ​ក្នុង​សហរដ្ឋ​អាមេរិក លោក មាជ សុវណ្ណារ៉ា បាន​ប្រាប់​សារព័ត៌ មាន The Cambodia Daily កន្លងមក​ថា ប្រសិនបើ​ការ​ចុះចូល​ជាមួយ​បក្ស​កាន់​អំណាច​របស់​បណ្ឌិត យ៉ង សាំងកុមារ អាច​ធ្វើ​ឱ្យ​ការ​ចំណាយ​លើ​ការ​ផលិត​របស់​កសិករ​ចុះ​ថោក និង​ជួយ​ឱ្យ​កសិផល​ឡើង​ថ្លៃ នោះ​គឺជា​រឿង​ល្អ ប៉ុន្តែ​បើ​ផ្អែកលើ​ស្ថានភាព​ជាក់ស្តែង​នៅ​កម្ពុជា​សព្វថ្ងៃ​នេះ ក្រុម​ឧកញ៉ា​ដែល​រក​ប្រយោជន៍​ឱ្យ​បក្ស​កាន់​អំណាច គឺ​មាន​ច្រើន​ណាស់​ដែល​កំពុង​កេង​ចំណេញ​លើ​កសិករ ដូច្នេះ​ពួកគេ​នឹង​មិន​ឯកភាព​នូវ​ផែនការ​របស់​បណ្ឌិត យ៉ង សាំងកុមារ ឡើយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស