មកដល់ពេលនេះ សង្គ្រាមរុស្ស៊ីឈ្លានពានអ៊ុយក្រែនចូលដល់ខែទី១០ ហើយ។ អំឡុង ១០ខែនេះ រុស្ស៊ីបានប្រើប្រាស់ប្រព័ន្ធមីស៊ីលបាញ់ស្រោចចូលទៅទឹកដីអ៊ុយក្រែន ដោយមិនរើសគោលដៅសូម្បីតែគោលដៅរបស់សហគមន៍ស៊ីវិល ក៏គ្រាប់មីស៊ីលរបស់រុស្ស៊ីបាញ់ទម្លាក់ឱ្យត្រូវផងដែរ។
ទីបំផុត ការបំផ្លាញរោងចក្រអគ្គិសនី រោងចក្រទឹកស្អាតដែលតម្រូវការជាចាំបាច់របស់ប្រជាជនអ៊ុយក្រែននៅរដូវត្រជាក់នេះ ក៏មីស៊ីលរបស់រុស្ស៊ី យន្តហោះចម្បាំងរបស់រុស្ស៊ី បាញ់កម្ទេចផងដែរ។
សហរដ្ឋអាមេរិកបានហៅសង្គ្រាមដែលរុស្ស៊ីបាញ់ប្រហារដោយគ្រាប់មីស៊ីលស្រោចលើទឹកដីអ៊ុយក្រែនចុងក្រោយនេះ គឺជាដំណាក់កាលដែលអ៊ុយក្រែនត្រូវការបន្ទាន់ប្រព័ន្ធការពារដែនអាកាស ដើម្បីបាញ់ទម្លាក់គ្រាប់មីស៊ីល និងបាញ់ទម្លាក់យន្តហោះចម្បាំងរបស់រុស្ស៊ី។
សហរដ្ឋអាមេរិកត្រូវបានប្រទេសសមាជិកអង្គការណាតូគាបសង្កត់ឱ្យបញ្ជូនប្រព័ន្ធមីស៊ីលទាំងឡាយណាដែលមានវង់ប្រតិបត្តិការឆ្ងាយ និងមីស៊ីលការពារដែនអាកាសមានដូចជាមីស៊ីលផាទ្រីយ៉ូត ដែលជាមីស៊ីលមានមុខងារដើម្បីបាញ់ទម្លាក់យន្តហោះ និងបាញ់ស្កាត់គ្រាប់មីស៊ីល ហើយនិងមីស៊ីល ATACM ដែលមានវង់ប្រតិបត្តិការឆ្ងាយអាចបាញ់បានពី ៣០០គីឡូម៉ែត្រទៅ ៥០០គីឡូម៉ែត្រទៅឱ្យអ៊ុយក្រែន ប្រយោជន៍ឱ្យអ៊ុយក្រែនមានតុល្យភាពនៃការប្រើប្រាស់អាវុធបែបនេះឆ្លើយតបនឹងសព្វាវុធរបស់រុស្ស៊ី។
ឥឡូវនេះ បើយោងតាមបណ្ដាញផ្សាយព័ត៌មាន CNN និងសារព័ត៌មានជាច្រើនទៀតបានចុះផ្សាយថា រដ្ឋការរបស់លោក ចូ បៃដិន កំពុងតែរៀបចំអនុម័តបញ្ជូនប្រព័ន្ធមីស៊ីលផាទ្រីយ៉ូតទៅជួយកងទ័ពអ៊ុយក្រែន។ បើតាមបណ្ដាញផ្សាយព័ត៌មាន CNN ការបញ្ជូនប្រព័ន្ធផាទ្រីយ៉ូតទៅឱ្យអ៊ុយក្រែន គឺលោករដ្ឋមន្ត្រីការពារជាតិអាមេរិក LYOUD AUSTIN បានចុះហត្ថលេខារួចទៅហើយដែលនៅតែរង់ចាំការចុះហត្ថលេខារបស់លោក ចូ បៃដិន តែប៉ុណ្ណោះ។
គេពុំដឹងថាអាមេរិកបញ្ជូនអាវុធប្រភេទនេះចំនួនប៉ុន្មានគ្រឿងនោះទេ ប៉ុន្តែអាវុធប្រភេទនេះត្រូវបានដាក់ពង្រាយរួចទៅហើយនៅតាមព្រំដែនប៉ូឡូញ ជាប់នឹងអ៊ុយក្រែន ដែលជាអាវុធរបស់អាល្លឺម៉ង់ និងអាមេរិក។ ប៉ូឡូញប្រកាសទទួលយកផាទ្រីយ៉ូតរបស់អាល្លឺម៉ង់ទៅដាក់ពង្រាយលើទឹកដីរបស់ខ្លួន គឺជាប្រយោជន៍ដើម្បីឱ្យប៉ូឡូញមានអានុភាពនៃការការពារដែនអាកាសរបស់ប៉ូឡូញករណីមានហេតុការណ៍បាញ់ប្រហារដោយគ្រាប់មីស៊ីល ឬក៏យន្តហោះចម្បាំងរបស់រុស្ស៊ីដែលហោះចូលដែនអាកាសរបស់ប៉ូឡូញ។
ប៉ុន្តែប៉ូឡូញប្រកាសថា ប្រព័ន្ធមីស៊ីលផាទ្រីយ៉ូតបើទោះជានៅលើទឹកដីព្រំដែនប៉ូឡូញក៏ដោយ ក៏វាអាចបាញ់ទម្លាក់គ្រាប់មីស៊ីល ឬយន្តហោះរុស្ស៊ីដែលហោះនៅលើទឹកដីអ៊ុយក្រែនបានផងដែរ។
ការព្រមានរបស់ប៉ូឡូញដូចនេះ គឺប៉ូឡូញបានប្រាប់ទៅអាល្លឺម៉ង់ថា ការពិតប៉ូឡូញមិនចង់ទទួលយកប្រព័ន្ធមីស៊ីលនេះទេ ព្រោះប៉ូឡូញមានប្រព័ន្ធមីស៊ីលនេះរបស់អាមេរិករួចទៅហើយ តែប៉ូឡូញទទួលយកមីស៊ីលនេះដើម្បីករណីពិសេសដែលអ៊ុយក្រែនត្រូវការចាំបាច់បំផុតពីប៉ូឡូញ។
នៅពេលនេះ ប៉ូឡូញក៏ប្រាប់ទៅអាមេរិក និងអង្គការណាតូ ឱ្យជួយអ៊ុយក្រែន គឺប្រព័ន្ធមីស៊ីលដូចនេះទើបអ៊ុយក្រែនមានតុល្យភាពនៃការបាញ់ស្កាត់គ្រាប់មីស៊ីលរបស់រុស្ស៊ី ឬក៏យន្តហោះចម្បាំងរបស់រុស្ស៊ី។
លោក Lyoud Austin រដ្ឋមន្ត្រីការពារជាតិអាមេរិកបានថ្លែងថា ការបញ្ជូនប្រព័ន្ធមីស៊ីលផាទ្រីយ៉ូតទៅឱ្យអ៊ុយក្រែន គឺដើម្បីការពារផលប្រយោជន៍ និងអាយុជីវិតជនស៊ីវិលរបស់ប្រជាជនអ៊ុយក្រែន ព្រោះពេលនេះរុស្ស៊ីបាញ់ប្រហារលើទឹកដីអ៊ុយក្រែនគ្មានរើសគោលដៅនោះទេ។ បែបនេះដែលសហរដ្ឋអាមេរិកប្រកាសថា ឆាប់ៗនេះប្រព័ន្ធមីស៊ីលផាទ្រីយ៉ូត នឹងត្រូវបញ្ជូនទៅឱ្យអ៊ុយក្រែន។ នៅពេលទទួលដំណឹងនេះភ្លាម វិមានក្រឹមឡាំងប្រតិកម្មភ្លាមៗតែម្ដង។
គេសង្កេតឃើញប្រតិកម្មចេញពីអតីតប្រធានាធិបតី ឌីមីទ្រី មិនដ្វេដេវ ដែលបច្ចុប្បន្នជានាយករងនៃក្រុមប្រឹក្សាសន្តិសុខជាតិរុស្ស៊ី និងអ្នកនាំពាក្យក្រសួងការបរទេសរុស្ស៊ី ដូចជាអ្នកស្រី ម៉ារីយ៉ា ហ្សាការ៉ុវ៉ា និងអ្នកនាំពាក្យវិមានក្រឹមឡាំង គឺលោក ឌីមីទ្រី ផេសស្កូវ បានបញ្ចេញប្រតិកម្មព្រមានធ្ងន់ថា បើផាទ្រីយ៉ូតធ្លាក់ដល់ដៃអ៊ុយក្រែន គឺវាបង្ហាញភាពស្របច្បាប់សម្រាប់រុស្ស៊ីដើម្បីបាញ់ប្រហារគោលដៅទាំងឡាយណាដែលរុស្ស៊ីអាចធ្វើទៅបាន ហើយរឿងនេះបង្ហាញអំពីអាមេរិកបង្ខំឱ្យក្រុងមូស្គូ ធ្លាក់ចូលក្នុងជម្លោះផ្ទាល់ជាមួយនឹងក្រុងវ៉ាស៊ីនតុនហើយនៅពេលនេះ។
ក្រុមអ្នកនាំពាក្យវិមានក្រឹមឡាំង ព្រមានទៀតថា បើប្រព័ន្ធមីស៊ីលនេះមកដល់ទឹកដីអ៊ុយក្រែនមែន ក៏រុញរុស្ស៊ីបញ្ចេញសព្វាវុធគ្រប់បែបយ៉ាងទាំងអស់ដើម្បីបាញ់ប្រហារទៅលើទឹកដីអ៊ុយក្រែន និងផលប្រយោជន៍អាមេរិកលើទឹកដីអ៊ុយក្រែន។ តែយ៉ាងណា នៅពេលអាមេរិកមិនទាន់បញ្ជូនប្រព័ន្ធមីស៊ីល NASAM ទៅឱ្យអ៊ុយក្រែន ក៏រុស្ស៊ីព្រមានដូចនេះដែរ តែទីបំផុតរុស្ស៊ីមិនឃើញបើកប្រតិបត្តិការវាយប្រហារលើផលប្រយោជន៍អាមេរិកនៅអឺរ៉ុប ឬនៅលើទឹកដីអាមេរិកផ្ទាល់នោះទេ។
តើអ្នកគិតថារុស្ស៊ីហ៊ានវាយប្រហារលើផលប្រយោជន៍អាមេរិកដែរឬទេ បើអាមេរិកបញ្ជូនផាទ្រីយ៉ូតទៅឱ្យអ៊ុយក្រែនឆាប់ៗនេះ?៕