33 C
Phnom Penh

លោក ស ខេង អំពាវនាវ​ឱ្យ​ពលរដ្ឋ​ចូលរួម​ដាំ​ដើមឈើ​និង​ការពារ​ព្រៃឈើ​នៅ​កម្ពុជា

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ក្រសួង​មហាផ្ទៃ លោក ស ខេង អំពាវនាវ​ឲ្យ​ពលរដ្ឋ​ចូលរួម​ដាំ​ដើមឈើ និង​រួម​គ្នា​ការពារ​ព្រៃឈើ​នៅ​កម្ពុជា ឲ្យ​បាន​គង់វង្ស​បន្ត​ទៅ​ទៀត។ លោក​លើកឡើង​បែប​នេះ​នៅ​ក្នុង​កម្មវិធី​ក្រុងពាលី​បញ្ចុះ​បឋម​សិលា​សាងសង់​វិមាន​ឯករាជ្យ​នៅ​សង្កាត់​ស្វាយប៉ោ ក្រុង​បាត់ដំបង ខេត្ត​បាត់ដំបង កាលពី​ថ្ងៃទី​១៥ ខែ​ធ្នូ ឆ្នាំ​២០២២។

លោក ស ខេង ក៏​បាន​រៀបរាប់​ពី​របៀប​ក្រុម​ឈ្មួញ​រកស៊ី​ឈើ​ក្រញូង​ខុស​ច្បាប់​ពី​ប្រទេស​ថៃ ឡាវ និង​កម្ពុជា នាំ​យក​ទៅ​លក់​នៅ​ប្រទេស​វៀតណាម និង​ប្រទេស​ចិន ព្រមទាំង​កែច្នៃ​ជា​វត្ថុ​ផ្សេងៗ​សម្រាប់​តុបតែង​នៅ​ក្នុង​ផ្ទះ។

លោក​បន្ត​ថា ពលរដ្ឋ​ខ្លះ​មិន​ស្គាល់​ប្រភេទ​ឈើ​ក្រញូង​នោះ​ទេ ក៏ប៉ុន្តែ​ឈ្មួញ​រកស៊ី​ឈើ​ទាំងអស់​នោះ​ជា​អ្នក​ប្រាប់​ឲ្យ​ស្គាល់ និង​បញ្ជា​ឲ្យ​ពលរដ្ឋ​កាប់ ហើយ​រឿង​ទាំងអស់​នេះ​អាច​កើតឡើង​ទៅ​បាន គឺ​អាជ្ញាធរ​នៅ​តាម​បន្ទាត់​ព្រំដែន​ជា​អ្នក​បើក​ផ្លូវ​ឲ្យ​គ្នា​ទៅវិញ​ទៅមក ទើប​អាច​មាន​ការ​កាប់​ឈើ និង​ដឹក​ឈើ​ចេញពី​ប្រទេស​មួយ​ទៅ​ប្រទេស​មួយ​បាន។

ជុំវិញ​ការ​លើកឡើង​របស់​លោក ស ខេង នេះ សកម្មជន​ព្រៃឈើ លោក ហេង ស្រស់ បាន​ប្រាប់​សារព័ត៌មាន The Cambodia Daily ថា​វា​ជា​កម្សោយ​ក្នុង​ការ​អនុវត្ត​ច្បាប់​រវាង​ប្រទេស​ទាំងអស់​នេះ ហើយ​មន្ត្រី​អាជ្ញាធរ​ទាំងអស់​នោះ​ជា​អ្នក​ជាប់​ពាក់ព័ន្ធ​នឹង​អំពើពុករលួយ។

លោក​អះអាង​ថា រដ្ឋមន្ត្រី​ក្រសួង​មហាផ្ទៃ​គួរ​ទៅ​ហាមប្រាម​ចំពោះ​មន្ត្រី​របស់​រដ្ឋាភិបាល​វិញ​ល្អ​ជាង ព្រោះ​អ្នក​ដែល​រកស៊ី​កាប់​បំផ្លាញ​ព្រៃឈើ​នៅ​កម្ពុជា​សព្វថ្ងៃ​នេះ មិន​មែន​ជា​ពលរដ្ឋ​តូចតាច​ដែល​អាច​ធ្វើ​បាន​នោះ​ទេ គឺ​សុទ្ធតែ​ជា​អ្នក​មាន​តួនាទី​នៅ​ក្នុង​ជួរ​រដ្ឋាភិបាល អ្នក​មាន​អំណាច និង​មាន​ងារ​ជា​ឧកញ៉ា។

ចំពោះ​រឿង​កាប់​បំផ្លាញ​ព្រៃឈើ​នេះ​ដែរ អង្គការ​គំនិត​ផ្ដួចផ្ដើម​សាកល​ប្រឆាំង​នឹង​ឧក្រិដ្ឋកម្ម​ឆ្លងដែន គ្លូបល អ៊ីននីហ្សីអេធីវ កាល​ខែ​កញ្ញា ឆ្នាំ​២០២២ បាន​ចេញ​របាយការណ៍​ស្រាវជ្រាវ​ដែល​បាន​រៀបរាប់​អំពី​មែកធាង​នៃ​ការ​កាប់​ឈើ​ដោយ​ខុស​ច្បាប់​នៅ​កម្ពុជា។

អង្គការ​មួយ​នេះ​បាន​រក​ឃើញ​ដំណើរការ​នៃ​គ្រួសារ​លោក ហ៊ុន សែន ក្នុង​ការ​គ្រប់គ្រង​លើ​ក្រុម​ឧកញ៉ា​ដែល​ជា​ឈ្មួញ​រកស៊ី​ព្រៃឈើ ក្នុង​នោះ​អ្នកស្រី ប៊ុន រ៉ានី ភរិយា​របស់​លោក ហ៊ុន សែន ធ្លាប់​ជំរុញ​ឲ្យ​បើក​ការ​ស៊ើបអង្កេត​លើ​ឧកញ៉ា លីម ប៊ុណ្ណា ហៅ​ខ្នា ដែល​ជា​អ្នក​សម្រួល​ផ្លូវ​រកស៊ី​ឈើ​ជាមួយ​ឧកញ៉ា សឹង សំអុល ប៉ុន្តែ​ឧកញ៉ា លីម ប៊ុណ្ណា ហៅ​ខ្នា ជា​មនុស្ស​របស់​លោក ហ៊ុន ម៉ាណែត ដែល​ជា​កូនប្រុស​ច្បង​របស់​លោក ហ៊ុន សែន៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស