 មិនស្ថិតនៅលើការដោះស្រាយសំណងរបស់កម្មករនិយោជិតដែលក្រុមហ៊ុនបានបញ្ឈប់នោះទេ គឺការប៉ុនប៉ងរំលាយវត្តមានសហជីពប៉ុណ្ណោះ។){kind=link}
មន្ត្រីសង្គមស៊ីវិលធ្វើការលើវិស័យសិទ្ធិការងារនៅកម្ពុជា លើកឡើងថា ឫសគល់នៃបញ្ហារបស់ក្រុមហ៊ុនណាហ្គាវើលដ៍ (Naga World) មិនស្ថិតនៅលើការដោះស្រាយសំណងរបស់កម្មករនិយោជិតដែលក្រុមហ៊ុនបានបញ្ឈប់នោះទេ គឺការប៉ុនប៉ងរំលាយវត្តមានសហជីពប៉ុណ្ណោះ។
អ្នកគ្រប់គ្រងសិទ្ធិការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក ឃុន ថារ៉ូ ប្រាប់សារព័ត៌មាន The Cambodia Daily នៅថ្ងៃទី២៩ ធ្នូ នេះថា កន្លងមក ក្រសួងការងារ និងបណ្តុះបណ្តាលវិជ្ជាជីវៈ មិនដែលដោះស្រាយប្រភពបញ្ហាដើមដំបូងដែលនាំទៅដល់ការបញ្ឈប់បុគ្គលិកទ្រង់ទ្រាយធំរហូតដល់រាប់ពាន់នាក់នោះទេ។ លោកបន្ថែមថា ក្រសួងបានអូសបន្លាយបញ្ហានេះរហូតដោយគ្មានដំណោះស្រាយមកទល់នឹងពេលនេះ។
លោក ឃុន ថារ៉ូ លើកឡើងថា ក្រសួងការងារត្រូវតែដោះស្រាយវិវាទនេះជាពីរផ្នែក គឺទី១ ការដោះស្រាយសំណងជូនកម្មករនិយោជិតដែលក្រុមហ៊ុនបានបញ្ឈប់ឱ្យបានត្រឹមត្រូវតាមច្បាប់ការងាររបស់ប្រទេសកម្ពុជា។ ទី២ ក្រសួងត្រូវតែដោះស្រាយការរំលោភសិទ្ធិកម្មករដែលក្រុមហ៊ុនព្យាយាមរំលាយសហជីព ដែលបានបង្កើតឡើងដោយត្រឹមត្រូវតាមច្បាប់ក្នុងគោលបំណងការពារសិទ្ធិកម្មករនិយោជិតរហូតមក។
មន្ត្រីជាន់ខ្ពស់នៃមជ្ឈមណ្ឌលសម្ព័ន្ធភាពការងាររូបនេះបញ្ជាក់ថា ក្រសួងការងារសព្វថ្ងៃនេះ ព្យាយាមរកវិធីយ៉ាងណាឱ្យកម្មករទទួលយកការទូទាត់សំណងពីក្រុមហ៊ុនប៉ុណ្ណោះ ប៉ុន្តែការដោះស្រាយបញ្ហាដែលក្រុមហ៊ុនព្យាយាមរំលាយសហជីព ក្រសួងមិនដែលចេញមុខដោះស្រាយ ឬដាក់ចេញនូវវិធានការណាមួយ ដើម្បីរកយុត្តិធម៌សម្រាប់ថ្នាក់ដឹកនាំសហជីពនោះទេ។
លោកបន្តថា ក្រសួងមិនត្រឹមតែមិនរកដំណោះស្រាយទេ តែបែរជាបណ្តែតបណ្តោយឱ្យខាងក្រុមហ៊ុនធ្វើទុក្ខបុកម្នេញលើថ្នាក់ដឹកនាំសហជីពតាមអំពើចិត្តយ៉ាងធ្ងន់ធ្ងរ។ ជាក់ស្តែង ដូចជាការចោទប្តឹង ចាប់ឃុំខ្លួន ដែលក្រុមហ៊ុនបានធ្វើលើកញ្ញា ឈឹម ស៊ីថរ នៅពេលនេះស្រាប់។
កាលពីថ្ងៃទី២៨ ខែធ្នូ ឆ្នាំ២០២២ ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីប្រកាសព័ត៌មានថា ខ្លួនបានដោះស្រាយជុំវិញការទូទាត់នូវប្រាក់បំណាច់បញ្ចប់កិច្ចសន្យាការងាររវាងកម្មករនិយោជិតនៃក្រុមហ៊ុនណាហ្គាវើលដ៍បាន ៤នាក់បន្ថែមទៀតហើយ។
ក្រសួងការងារបញ្ជាក់ថា គិតត្រឹមថ្ងៃទី២៨ ខែធ្នូ នេះ មានអតីតបុគ្គលិកក្រុមហ៊ុនណាហ្គាវើលដ៍ ២៥៣រូបហើយដែលបានយល់ព្រមទទួលយកការទូទាត់នូវប្រាក់បំណាច់បញ្ចប់កិច្ចសន្យាការងារ ដែលក្រុមហ៊ុនបានបញ្ឈប់ពីការងារកាលពីពេលកន្លងទៅ។
កាលពីថ្ងៃទី៨ ខែមេសា ឆ្នាំ២០២១ ក្រុមហ៊ុនណាហ្គាវើលដ៍បានចេញសេចក្ដីថ្លែងការណ៍ថា ក្រុមហ៊ុននឹងបញ្ឈប់កម្មករនិយោជិតចំនួន ១៣២៩នាក់ ក្រោមមូលហេតុជួបវិបត្តិហិរញ្ញវត្ថុដោយសារការរីករាលដាលនៃជំងឺកូវីដ-១៩ ប៉ុន្តែកម្មករនិយោជិតអះអាងថា ការលើកឡើងរបស់ក្រុមហ៊ុនគ្រាន់តែជាលេសក្នុងចេតនាប៉ុនប៉ងរំលាយក្រុមសហជីព ដែលតែងតែជួយការពារសិទ្ធិកម្មករកន្លងមកប៉ុណ្ណោះ។
ក្រុមហ៊ុនណាហ្គាវើលដ៍បានព្យាយាមរំលាយសហជីពចំនួន ៤លើករួចមកហើយ ក្នុងនោះនៅឆ្នាំ២០០៩ ក្រុមហ៊ុនបានបញ្ឈប់សហជីពរាប់រយនាក់រហូតដល់ឆ្នាំ២០១៣ ក្រុមហ៊ុនបានបញ្ឈប់សមាជិកសហជីពបន្តទៀត ប៉ុន្តែនៅឆ្នាំ២០១៩ ក្រុមហ៊ុនបានព្យួរការងារប្រធានសហជីព កញ្ញា ឈឹម ស៊ីថរ តែម្តង។ លុះដល់ឆ្នាំ២០២១ ក្រុមហ៊ុនបានបញ្ឈប់បុគ្គលិកចំនួន ១៣២៩នាក់ ក្នុងនោះមានសមាជិក ថ្នាក់ដឹកនាំ និងប្រតិភូបុគ្គលិកសហជីពដល់ទៅ ១១០០នាក់ឯណោះ។
ក្រុមអ្នកសង្កេតការណ៍លើកឡើងថា ការបញ្ឈប់បុគ្គលិកនេះ ក្រុមហ៊ុនណាហ្គាវើលដ៍បានអនុវត្តបំពានទៅនឹងច្បាប់ជាតិ និងច្បាប់អន្តរជាតិយ៉ាងធ្ងន់ធ្ងរបំផុត ព្រោះថាក្រុមហ៊ុនព្យាយាមបញ្ឈប់បុគ្គលិកដែលមានអតីតភាពច្រើន តែរក្សាទុកបុគ្គលិកដែលមានអតីតភាពតិច ជាពិសេសក្រុមហ៊ុនមានចេតនាបំផ្លាញសហជីពតែម្តង ដែលទង្វើនេះផ្ទុយនឹងខ្លឹមសារនៃមាត្រា ៩៥ នៃច្បាប់ស្ដីពីការងារ និងអនុសញ្ញាអន្តរជាតិលេខ៨៧ និង ៩៨ ទាំងស្រុង។
លើសពីនេះ ការបញ្ឈប់ថ្នាក់ដឹកនាំសហជីព និងប្រតិភូបុគ្គលិកទាំងនេះ ថៅកែក្រុមហ៊ុនមិនទទួលបានការអនុញ្ញាតពីអធិការកិច្ចការងារដែលតម្រូវដោយច្បាប់នោះទេ ដែលទង្វើនេះបានបង្ហាញយ៉ាងច្បាស់ថា ពួកគេបានបំពានច្បាប់ការងារមាត្រា២៩៣ និងច្បាប់ស្ដីពីសហជីពមាត្រា៤៣ និងមាត្រា៦៧ យ៉ាងធ្ងន់ធ្ងរផងដែរ៕