30 C
Phnom Penh

ជនជាតិ​ដើម​ភាគតិច​កួយ​អំពាវនាវ​ឱ្យ​បញ្ឈប់​ការ​រំលោភ​សិទ្ធិ​សេរីភាព​ក្នុង​ការ​ចូលរួម​ការពារ​ព្រៃឈើ

ដោយ ឌឹ ខេមបូឌា ដេលី

បទវិភាគ

សហគមន៍​ជនជាតិ​ដើម​ភាគតិច​កួយ អំពាវនាវ​ឱ្យ​ក្រសួង​បរិស្ថាន និង​អាជ្ញាធរ​ដែនដី ព្រមទាំង​ស្ថាប័ន​ពាក់ព័ន្ធ បញ្ឈប់​ការ​រំលោភ​សិទ្ធិ​សេរីភាព​ក្នុង​ការ​ចូលរួម​ចំណែក​ការពារ​ព្រៃឈើ​របស់​ពលរដ្ឋ​នៅ​តាម​មូលដ្ឋាន។

យុវជន និង​សហគមន៍​ជនជាតិ​ដើម​ភាគតិច​កួយ ខេត្ត​ព្រះវិហារ ចេញ​សេចក្ដី​ប្រកាស​ព័ត៌មាន​កាលពី​ថ្ងៃទី​១៨ ខែ​មករា ឆ្នាំ​២០២៣ ថា បណ្ដាញ​សហគមន៍​ជនជាតិ​ដើម​ភាគតិច​កួយ ភូមិ​ប្រមេរុ បាន​នាំគ្នា​ចុះ​ប្រមូល​ព័ត៌មាន និង​ធ្វើ​បច្ចុប្បន្នភាព​អំពី​ដែន​ជម្រក​សត្វព្រៃ​ព្រះរការ ចាប់ពី​ថ្ងៃទី​១០ ដល់​ថ្ងៃទី​១៣ ខែ​មករា ឆ្នាំ​២០២៣ បាន​ប្រទះ​ឃើញ​បទល្មើស​ព្រៃឈើ​ចំនួន ៤០​ករណី​ថ្មី​បន្ថែម​ទៀត ក្នុង​នោះ​ឈើ​ដែល​ត្រូវ​រង​ការ​កាប់​បំផ្លាញ​មាន​មុខកាត់​ចាប់ពី ៣៤​សង់ទីម៉ែត្រ​ដល់ ៩០​សង់ទីម៉ែត្រ។ លើស​ពី​នេះ ក៏​បាន​រក​ឃើញ​ក្តារ​បន្ទះ​ចំនួន ៣៦​បន្ទះ​ផង​ដែរ។

ប្រភព​ដដែល​សម្ដែង​ការ​សោកស្ដាយ​យ៉ាង​ខ្លាំង​ចំពោះ​ការ​អនុវត្ត​ផែនការ​ក្នុង​ការ​ល្បាត​ការពារ​ព្រៃ​ពី​សំណាក់​ក្រសួង​បរិស្ថាន ដ្បិត​បទល្មើស​ព្រៃឈើ​ទាំងនេះ​បាន​ឆ្លុះបញ្ចាំង​ឱ្យ​ឃើញ​ពី​កង្វះ​សមត្ថភាព និង​ឆន្ទៈ​ក្នុង​ការ​ការពារ​ព្រៃឈើ ធនធាន​ធម្មជាតិ​ពី​សំណាក់​ក្រសួង​សាមី និង​អាជ្ញាធរ​ពាក់ព័ន្ធ​យ៉ាង​ជាក់ច្បាស់ ហើយ​បញ្ហា​នេះ​នឹង​បង្ក​ផល​ប៉ះពាល់​យ៉ាង​ធ្ងន់ធ្ងរ​មក​លើ​ជីវភាព​រស់នៅ​របស់​ពលរដ្ឋ បរិស្ថាន និង​ទំនៀមទម្លាប់​របស់​សហគមន៍​ជនជាតិ​ដើម​ភាគតិច​កួយ ផង​ដែរ។

សហគមន៍​ជនជាតិ​ដើម​ភាគតិច ជំរុញ​ឱ្យ​អាជ្ញាធរ​មូលដ្ឋាន និង​ក្រសួង​បរិស្ថាន បើក​លំហ​សិទ្ធិ​សេរីភាព​ក្នុង​ការ​ចូលរួម​ចំណែក​ការពារ​ព្រៃឈើ​របស់​ពួកគេ និង​សាធារណជន​ទូទៅ ដូច​មាន​ចែង​ក្នុង​ច្បាប់​ស្ដីពី​តំបន់​ការពារ​ធម្មជាតិ និង​រដ្ឋធម្មនុញ្ញ។ ជាង​នេះ​ទៀត ក៏​ត្រូវ​បើក​ទូលាយ​ដល់​អង្គការ​សង្គម​ស៊ីវិល សហគមន៍​មូលដ្ឋាន ក្នុង​ការ​រួម​ចំណែក​ធ្វើ​សកម្មភាព​ការពារ ថែរក្សា និង​អភិរក្ស​ព្រៃឈើ​ធនធាន​ធម្មជាតិ​ដែល​ជា​សម្បត្តិ​មហាសាល​របស់​ជាតិ​ផង​ដែរ។

សហគមន៍​ជនជាតិ​ដើម​ខេត្ត​ព្រះវិហារ ទាមទារ​ឱ្យ​ក្រសួង​បរិស្ថាន ពង្រឹង​ការ​អនុវត្ត​ច្បាប់​របស់​មន្ត្រី​មូលដ្ឋាន​ឱ្យ​បាន​ហ្មត់ចត់ មាន​តម្លាភាព និង​ការ​ទទួល​ខុសត្រូវ​ខ្ពស់ ដោយ​បង្កើត​យន្តការ​តាមដាន​ការ​អនុវត្ត​ច្បាប់​របស់​ពួកគេ និង​ដាក់​ទោសទណ្ឌ​បើសិន​រក​ឃើញ​ថា​អាជ្ញាធរ​មូលដ្ឋាន​ទាំងនោះ​ជាប់​ពាក់ព័ន្ធ​នឹង​ការ​ស៊ីសំណូក​ជាមួយ​ឈ្មួញ​ខិលខូច។

កាលពី​ថ្ងៃទី​១៨ ខែ​មករា ឆ្នាំ​២០២៣ សហគមន៍​ជនជាតិ​ដើម​ភាគតិច​កួយ ភូមិ​ប្រមេរុ ឃុំ​ប្រមេរុ ស្រុក​ត្បែងមានជ័យ ខេត្ត​ព្រះវិហារ បាន​បន្ត​រក​ឃើញ​ករណី​បទល្មើស​ជា​ហូរហែ​ក្នុង​ដែន​ជម្រក​សត្វព្រៃ​ព្រះរការ ដូចជា​ការ​កាប់​បំផ្លាញ​ដើម​ពពេល ដើម​ផ្ដៀក ដើម​ស្ទៀង ដើម​កកោះ ដើម​ឈ្លីក និង​ដើម​ឈើទាល ជាដើម។

ដើមឈើ​ដែល​ត្រូវ​បាន​កាប់​បំផ្លាញ​ទាំងនេះ​សុទ្ធសឹងតែ​ជា​ប្រភេទ​ឈើ​ដែល​សហគមន៍​ទាញ​អនុផល តាមរយៈ​ការ​ប្រមូល​ជ័រទឹក បេះ​ផ្លែឈើ ប្រមូល​ទឹកឃ្មុំ​ព្រៃ ដើម្បី​ប្រកប​របរ​ចិញ្ចឹម​ជីវិត​ជា​លក្ខណៈ​គ្រួសារ​ប្រចាំ​ថ្ងៃ​រហូត​មក។

ទាក់ទិន​បញ្ហា​នេះ កាលពី​ថ្ងៃទី​០៤ ខែ​កញ្ញា ឆ្នាំ​២០២២ អ្នក​នាំពាក្យ​ក្រសួង​បរិស្ថាន លោក នេត្រ ភក្ត្រា រិះគន់​ថា ការ​ចោទប្រកាន់​ថា​ព្រៃឈើ​នៅ​កម្ពុជា​កំពុង​បន្ត​រង​នូវ​ការ​កាប់​បំផ្លាញ គឺជា​ចេតនា​បង្កប់​សារ​នយោបាយ និង​ជា​យុទ្ធនាការ​មួយ​ដែល​ប្រឆាំង​នឹង​កម្ពុជា ដើម្បី​បំភ្លៃ បំផ្លើស និង​បំប៉ោង​របស់​ក្រុម​អ្នក​ស្រឡាញ់​ព្រៃឈើ​តែ​សម្បក​ក្រៅ​តែប៉ុណ្ណោះ។

យ៉ាងណាក៏ដោយ អង្គការ​លើកលែង​ទោស​អន្តរជាតិ (Amnesty International) បាន​ចេញ​របាយការណ៍​មួយ​កាលពី​ថ្ងៃទី​២៨ ខែ​មករា ឆ្នាំ​២០២២ បាន​បង្ហាញ​ថា ព្រៃឈើ​កម្ពុជា​កំពុងតែ​ត្រូវ​រង​នូវ​ការ​កាប់​បំផ្លាញ​យ៉ាង​ធ្ងន់ធ្ងរ ក្នុង​នោះ​គេ​រក​ឃើញ​ថា ព្រៃឈើ​ចំនួន ៦២៧១​ហិកតារ​ត្រូវ​បាន​កាប់​បំផ្លាញ​នៅ​ក្នុង​ដែន​ជម្រក​សត្វព្រៃ​ចំនួន​ពីរ គឺ​ដែន​ជម្រក​សត្វព្រៃ​ព្រៃឡង់ និង​ដែន​ជម្រក​សត្វព្រៃ​ព្រះរការ ដោយ​ការ​កាប់​ឈើ​ខុស​ច្បាប់​យ៉ាង​ច្រើន​សន្ធឹកសន្ធាប់​ដែល​គ្មាន​ការ​ទប់ស្កាត់​ពី​អាជ្ញាធរ​មាន​សមត្ថកិច្ច​ឡើយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស