សង្គ្រាមដែលរុស្ស៊ីឈ្លានពានអ៊ុយក្រែនជាប្រទេសជិតខាង បានឈានចូលដល់ ១២ខែហើយ។ ក្នុងពេលនេះ រុស្ស៊ីនៅតែពុំមានឱកាសដើម្បីឈ្នះសង្គ្រាមជាមួយនឹងការវាយរំលំរដ្ឋាភិបាលប្រធានាធិបតីអ៊ុយក្រែន វូឡូឌីមៀ ហ្សេឡេនស្គី បានឡើយ។
តែមហាអំណាចនេះនៅតែរកមធ្យោបាយដើម្បីវាយលុក និងវាយកាន់កាប់ទឹកដីអ៊ុយក្រែន ឱ្យបានមួយចម្រៀកណាមួយច្បាស់លាស់ ហើយគ្រប់គ្រងឱ្យបានជាស្ថាពរ។
រយៈពេលចុងក្រោយនេះ រុស្ស៊ីបង្កើនការវាយលុកជាខ្លាំងនៅក្នុងតំបន់ភាគខាងកើត និងខាងត្បូង ដោយសំដៅវាយកាន់កាប់ទឹកដីដែលទ័ពអ៊ុយក្រែនវាយរំដោះបានមកវិញកាលពីជិត ២ខែមកនេះ។
ក្នុងអំឡុងសង្គ្រាមដ៏ខ្លាំងនេះ ទ័ពរុស្ស៊ីមានប្រៀបជាងទ័ពអ៊ុយក្រែនបន្តិចនៅក្នុងតំបន់មួយ ស្ថិតក្នុងខេត្តដូណេត ក្នុងតំបន់ដុនបាស់។
ទីក្រុង Soledar ជាទីក្រុងតូចមួយទម្រាំតែរុស្ស៊ីវាយយកបានមួយផ្នែកក្នុងតំបន់នេះ រុស្ស៊ីចំណាយទ័ពរាប់រយនាក់ ហើយមកដល់ពេលនេះ អ៊ុយក្រែននៅតែវាយបកយកមកវិញ។
តើរុស្ស៊ីមានលទ្ធភាពអ្វីដើម្បីវាយកាន់កាប់បានទាំងស្រុងដែនដីទាំងមូលនៃប្រទេសអ៊ុយក្រែន?
ត្រង់នេះហើយដែលក្រុមអ្នកវិភាគ និងអ្នកសង្កេតការណ៍ជាច្រើនមើលឃើញអំពីភាពបរាជ័យរបស់រុស្ស៊ី អាចនៅចំពោះមុខ ទោះជារុស្ស៊ីពង្រីកចំនួនទ័ព និងបង្កើនយុទ្ធសាស្ត្រនៃសង្គ្រាមវាយលើអ៊ុយក្រែនក៏ដោយនោះ។
បើតាមក្រុមអ្នកវិភាគទាំងនោះ នៅដើមរដូវក្ដៅនាឆ្នាំ២០២៣ នេះ រុស្ស៊ីអាចនឹងពង្រីកសមរភូមិជាច្រើនវាយប្រហារលើទឹកដីអ៊ុយក្រែន ហើយគោលដៅរបស់ក្រុងមូស្គូ ចង់ឱ្យអ៊ុយក្រែនទទួលស្គាល់នូវវិនាសកម្មដ៏ធ្ងន់ធ្ងរបើក្រុងគៀវ មិនព្រមបន្ទន់ជំហរចុះចាញ់នឹងរុស្ស៊ី។
អ្នកនាំពាក្យសម្រាប់អង្គភាពចារកម្មអ៊ុយក្រែន លោក Vadym Skibitsky បានឱ្យដឹងថា នៅដើមរដូវក្ដៅខាងមុខនេះ រុស្ស៊ីមិនត្រឹមមានផែនការវាយយកតំបន់ដុនបាស់តែមួយនោះទេ គឺរុស្ស៊ីចង់យកតំបន់ជាច្រើនដែលទ័ពរុស្ស៊ី វាយយកបានតាំងពី ៣ខែដំបូងនៃសង្គ្រាម ដូចជាតំបន់ខឺសុន និងខាគៀវ ជាដើម ហើយរុស្ស៊ីចង់ពង្រីកសមរភូមិនៅភាគខាងជើងប្រទេសអ៊ុយក្រែន ដោយវាយចេញពីប្រទេសបេឡារុស ដែលក្នុងទឹកដីនេះ ទ័ពរុស្ស៊ីមានជាង ១ម៉ឺននាក់។ តែអ្នកនាំពាក្យរូបនេះថាការពង្រីកសមរភូមិនៅភាគខាងជើងនេះ គឺភាគតិចណាស់ដែលរុស្ស៊ីអាចមានលទ្ធភាព។
ចំណែកក្រុមអ្នកវិភាគមិនបានមើលឃើញអំពីលទ្ធភាពដែលក្រុងមូស្គូ មានលទ្ធភាពក្នុងសង្គ្រាមដែលមហាអំណាចនេះ ចង់ពង្រីកសមរភូមិច្រើនទៀតនោះទេ ហើយសូម្បីចង់ពង្រីកសមរភូមិនៅភាគខាងជើង ឬវាយចេញពីប្រទេសបេឡារុសក៏ដោយនោះ។
តើកត្តាអ្វីខ្លះដែលក្រុមវិភាគ និងអ្នកសង្កេតការណ៍ទាំងនេះមានទស្សនៈដូចនេះ?
មានកត្តាជាច្រើនដែលមហាអំណាចរុស្ស៊ី កំពុងប្រឈមមុខដ៏ខ្លាំង នោះគឺគេអាចរាប់ពីសីលធម៌ និងស្មារតីប្រយុទ្ធរបស់កងទ័ពរុស្ស៊ី ដែលនៅមានចំណុចខ្សោយជាខ្លាំងបើធៀបនឹងកងទ័ពអ៊ុយក្រែន ក្នុងការប្រយុទ្ធដើម្បីការពារទឹកដី និងសេរីភាពរបស់ខ្លួន។ កត្តាស្មារតីនេះ គឺការកំណត់ភាពខ្លាំងរបស់កងទ័ព បើកងទ័ពមិនមានភាពក្លាហាន ទោះជាមានអាវុធទំនើប និងមានអនុភាពក៏ដោយ ក៏មិនងាយមានប្រៀបលើភាគីម្ខាងទៀតឡើយ។
ត្រង់នេះហើយដែលរុស្ស៊ីសម្រេចចាប់បញ្ជូនអ្នកទោសឧក្រិដ្ឋជាង ៥ម៉ឺននាក់ឱ្យមកកាន់អាវុធនៅលើសមរភូមិ ដោយបញ្ចូលពួកគេទៅក្នុងអង្គភាពទាហានស៊ីឈ្នួល។ ការស្លាប់កងទ័ពដ៏សម្បើម ដែលមកដល់ពេលនេះជាង ១២ម៉ឺន ២ពាន់នាក់ ក៏ជាកត្តាមួយធ្វើឱ្យប៉ះពាល់ភាពខ្លាំងរបស់ប្រទេសមហាអំណាចយោធាលំដាប់ទី២ ពិភពលោកនេះ និងស្មារតីរបស់កងទ័ព។
គេអាចគិតមួយទៀត គឺកត្តាសព្វាវុធ និងការផ្គត់ផ្គង់ភស្តុភារ។ មកដល់ពេលនេះ មហាអំណាចរុស្ស៊ីចុះខ្សោយខ្លាំង ក្នុងការវាយប្រហារដោយទ័ពថ្មើរជើងទៅលើទ័ពអ៊ុយក្រែន។ ការទ្រទ្រង់ទ័ពថ្មើរជើង គឺសព្វាវុធរថក្រោះ រថពាសដែក ប្រព័ន្ធកាំភ្លើងធំ ជាកត្តាចាំបាច់។ ការបាត់បង់រថក្រោះរហូតជាង ៣១៥០គ្រឿង រថពាសដែកជាង ៦២៨០គ្រឿង និងប្រព័ន្ធកាំភ្លើងធំជិត ២១៥០គ្រឿង ថែមទាំងការបាត់បង់រថយន្តដឹកភស្តុភារជិត ៥ពាន់គ្រឿង គឺជារឿងអាម៉ាស់របស់ប្រទេសមហាអំណាចនេះ។
ការថយចុះជាខ្លាំង គ្រាប់កាំភ្លើងធំដែល ៣ខែដំបូង រុស្ស៊ីធ្លាប់បាញ់លើអ៊ុយក្រែន ៦ម៉ឺនគ្រាប់ ៥ម៉ឺនគ្រាប់ក្នុងមួយថ្ងៃ ហើយធ្លាក់មកត្រឹមមួយថ្ងៃមួយម៉ឺនគ្រាប់ ហើយថ្ងៃខ្លះមានត្រឹម ៥ពាន់គ្រាប់។
នេះក៏ជាកត្តាមួយកំណត់បានថា រុស្ស៊ីជិតអស់គ្រាប់កាំភ្លើងធំក្នុងឃ្លាំងក៏ថាបានដែរ។ ការថយចុះចំនួនបាញ់គ្រាប់មីស៊ីល ហើយរហូតរុស្ស៊ីប្រើមីស៊ីលលឿនជាងសំឡេង និងមីស៊ីលបាល់ឡេស្ទិច ក៏បញ្ជាក់បានថា មហាអំណាចនេះក៏ជិតអស់គ្រាប់នៃអាវុធនេះផងដែរ។ ដូចនេះហើយបានជាចារកម្មអាមេរិករកឃើញរុស្ស៊ីស្វែងរកជំនួយគ្រាប់កាំភ្លើងធំពីប្រទេសចិន កូរ៉េខាងជើង និងអ៊ីរ៉ង់ ជាដើម។
តែប្រទេសចិន និងកូរ៉េខាងជើង បានប្រកាសហើយថា ខ្លួនគេពុំមានការបញ្ជូនគ្រាប់អាវុធទាំងនោះទៅឱ្យរុស្ស៊ីនោះទេ លើកលែងអ៊ីរ៉ង់បានបញ្ជូនរួចហើយនូវដ្រូនអត្តឃាតជាង ៥០០គ្រឿងទៅឱ្យរុស្ស៊ី ហើយចំនួននេះរុស្ស៊ីប្រើវាសឹងតែអស់ទៅហើយ។
សរុបទៅ ការដែលរុស្ស៊ីជួបវិបត្តិដ៏ធ្ងន់បែបនេះ ពិតណាស់ រុស្ស៊ីទំនងដឹងខ្លួនឯងថា នឹងមិនអាចឈ្នះសង្គ្រាមលើអ៊ុយក្រែនបានទេនៅខណៈដែលអ៊ុយក្រែន នៅតែមានគ្រាប់កាំភ្លើងធំ មានរថក្រោះ រថពាសដែក ប្រព័ន្ធមីស៊ីលប្រើប្រាស់ក្នុងសមរភូមិដែលជាជំនួយរបស់សហរដ្ឋអាមេរិក និងក្រុមបស្ចិមប្រទេស ហើយប្រទេសទាំងនោះកាន់តែបញ្ជូនទៅឱ្យអ៊ុយក្រែនច្រើនថែមទៀតនេះ៕