សកម្មជនព្រៃឈើ អំពាវនាវឱ្យក្រសួងបរិស្ថាន ចុះទៅស៊ើបអង្កេត និងចាត់វិធានការជុំវិញសកម្មភាពកាប់បំផ្លាញព្រៃឈើក្នុងតំបន់ព្រៃឡង់ ត្រង់ចំណុចព្រំប្រទល់ខេត្តព្រះវិហារ និងខេត្តកំពង់ធំ ដែលកំពុងកើតយ៉ាងអនាធិបតេយ្យសព្វថ្ងៃនេះ។
មន្ត្រីសម្របសម្រួលសហគមន៍នៃសមាគមបណ្ដាញយុវជនកម្ពុជា (CYN) លោក អូត ឡាទីន លើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃអង្គារ ថា បទល្មើសព្រៃឈើក្នុងតំបន់ព្រៃឡង់នៅតែបន្តកើតមាន បើទោះបីជានៅតាមច្រកចូលទៅក្នុងតំបន់អភិរក្សនេះមានទីស្នាក់ការឃ្លាំមើលនៅគ្រប់ច្រកចេញចូលក៏ដោយ ដូច្នេះគឺអាចបញ្ជាក់បានថា បទល្មើសព្រៃឈើទាំងនោះគឺមានការឃុបឃិតគ្នារវាងឈ្មួញទុច្ចរិត និងមន្ត្រីអភិរក្សពុករលួយ។
លោក អូត ឡាទីន លើកឡើងថា បទល្មើសព្រៃឈើនៅតំបន់អភិរក្សសត្វព្រៃព្រៃឡង់សព្វថ្ងៃនេះ មិនមែនប្រជាពលរដ្ឋសាមញ្ញអាចចូលទៅកាប់បំផ្លាញបាននោះទេ ព្រោះថាអ្នកដែលចូលទៅលួចកាប់ឈើក្នុងតំបន់នោះ សុទ្ធសឹងតែជាអ្នកស៊ីឈ្នួលឱ្យគេគ្រប់គ្នា។
លោកថា ជាងនេះទៀត ពួកគេតែងធ្វើសកម្មភាពនៅពេលយប់ ខណៈអាជ្ញាធរមិនទាន់មានវិធានការណាមួយដើម្បីបង្ក្រាបទៅលើបទល្មើសទាំងអស់នោះទេ ស្របពេលដែលសហគមន៍ដែលនៅតំបន់នោះត្រូវបានហាមឃាត់ពីសំណាក់អាជ្ញាធរមិនឱ្យចុះល្បាតថែមទៀត។
មន្ត្រីសម្របសម្រួលសហគមន៍រូបនេះបញ្ជាក់ថា ក្រៅពីតំបន់ព្រៃឡង់ដែលកំពុងរងនូវការកាប់បំផ្លាញឈើប្រណិត តំបន់អភិរក្សសត្វព្រៃព្រះរការ ក៏កំពុងរងនូវការកាប់បំផ្លាញយ៉ាងធ្ងន់ធ្ងរដែរ ក្នុងនោះសំឡេងរណារយន្តបានបន្លឺឡើងទាំងយប់ទាំងថ្ងៃ ដែលបង្ហាញឱ្យឃើញថា អាជ្ញាធរ និងក្រសួងពាក់ព័ន្ធមិនបានយកចិត្តទុកដាក់ក្នុងការការពារសម្បត្តិធនធានធម្មជាតិទាំងនោះទេ។
កាលពីថ្ងៃទី២ ខែធ្នូ ឆ្នាំ២០២២ អគ្គមេបញ្ជាការកងរាជអាវុធហត្ថ លោក សៅ សុខា បានអះអាងថា កម្លាំងស្រាវជ្រាវព័ត៌មានរបស់កងរាជអាវុធហត្ថបានចុះដល់ទីតាំងភូមិសាស្ត្រខេត្តព្រះវិហារ កាលពីអំឡុងខែវិច្ឆិកា ឆ្នាំ២០២២ កន្លងទៅ ដោយធ្វើការស្រាវជ្រាវ និងពិនិត្យទីតាំងជាក់ស្តែង រកឃើញថាពុំមានសកម្មភាពណាមួយដែលបង្កទៅជាបទល្មើសកាប់បំផ្លាញព្រៃឈើដូចការលើកឡើងរបស់សកម្មជនព្រៃឈើ ឬការចុះផ្សាយរបស់អង្គភាពសារព័ត៌មានណាមួយនោះឡើយ។
យ៉ាងណាក៏ដោយ សកម្មជនព្រៃឈើ លោក ហេង ស្រស់ ធ្លាប់បានលើកឡើងកាលពីពេលថ្មីៗនេះថា អាជ្ញាធរមានសមត្ថកិច្ចទាំងអស់នៅជុំវិញតំបន់ព្រៃឡង់សុទ្ធតែជាប់ពាក់ព័ន្ធនឹងបទល្មើសព្រៃឈើ និងទទួលបានសំណូកពីជនល្មើសគ្រប់គ្នា ដូច្នេះហើយបានជាពួកគេមិនហ៊ានចាត់វិធានការបង្ក្រាប និងដាក់ទោសពៃរ៍ណាមួយលើពួកអ្នកកាប់បំផ្លាញព្រៃឈើទាំងនោះ។
ទាក់ទិននឹងឧក្រិដ្ឋកម្មបំផ្លាញព្រៃឈើនៅកម្ពុជានេះ គេបានរកឃើញថា មានឧកញ៉ាដែលស្និទ្ធនឹងលោក ហ៊ុន សែន មួយចំនួនដែលប្រកបអាជីវកម្មលើបទល្មើសព្រៃឈើនេះ ដូចជាម្ចាស់ក្រុមហ៊ុន ទ្រី ភាព ហ្គ្រុប គឺឧកញ៉ា ទ្រី ភាព រហស្សនាមស្តេចគ្រញូង និងយាយភូ ម្ចាស់ក្រុមហ៊ុន ភាពីម៉ិច ដែលជាមិត្តជិតស្និទ្ធនឹងភរិយាលោក ហ៊ុន សែន គឺអ្នកស្រី ប៊ុន រ៉ានី ជាដើម ក្រៅពីនោះគេក៏បានរកឃើញក្រុមហ៊ុនជាច្រើនទៀតផងដែរ ដូចជាក្រុមហ៊ុន Angkor Plywood របស់លោក ជា ពៅ និងក្រុមហ៊ុន ហ្វ័ងអាញ់ ចាឡាយ (HAGL) របស់ជនជាតិវៀតណាម ជាដើម។
យ៉ាងណាក៏ដោយ កាលពីចុងឆ្នាំ២០២១ លោក ហ៊ុន សែន ធ្លាប់បានរិះគន់ពលរដ្ឋ និងអ្នកដែលរិះគន់លោករឿងបាត់បង់ព្រៃឈើថា ពួកគេបាននាំគ្នាទៅទិញឈើដើម្បីសង់ផ្ទះដែលជាការលើកទឹកចិត្តឱ្យមានការកាប់បំផ្លាញព្រៃឈើ ប៉ុន្តែពួកគេបែរជានាំគ្នាទម្លាក់កំហុសមកលើលោកទៅវិញ។ បញ្ហានេះ លោក ហ៊ុន សែន ព្រមានថា លោកនឹងរុះរើផ្ទះរបស់ពលរដ្ឋទាំងអស់ដែលសាងសង់ក្រោយឆ្នាំ១៩៧៩ ដើម្បីប្រមូលឈើដែលបាត់បង់ទាំងនោះត្រឡប់មកវិញឱ្យអស់។
អង្គការលើកលែងទោសអន្តរជាតិ (Amnesty International) បានចេញរបាយការណ៍មួយកាលពីថ្ងៃទី២៨ ខែមករា ឆ្នាំ២០២២ បានបង្ហាញថា ព្រៃឈើកម្ពុជាកំពុងតែត្រូវរងនូវការកាប់បំផ្លាញយ៉ាងធ្ងន់ធ្ងរ ក្នុងនោះគេរកឃើញថា ព្រៃឈើចំនួន ៦២៧១ហិកតារត្រូវបានកាប់បំផ្លាញនៅក្នុងដែនជម្រកសត្វព្រៃចំនួនពីរ គឺដែនជម្រកសត្វព្រៃព្រៃឡង់ និងដែនជម្រកសត្វព្រៃព្រះរការ ដោយការកាប់ឈើខុសច្បាប់យ៉ាងច្រើនសន្ធឹកសន្ធាប់ដែលគ្មានការទប់ស្កាត់ពីអាជ្ញាធរមានសមត្ថកិច្ចឡើយ៕