30 C
Phnom Penh

ប្រធានាធិបតី​អាមេរិក​លោក ចូ បៃដិន ប្ដេជ្ញា​គាំទ្រ​អ៊ុយក្រែន​ទោះ​ក្នុង​កម្រិត​ណា​ក៏ដោយ

ដោយ ឌឹ ខេមបូឌា ដេលី

បទវិភាគ

ប្រធានាធិបតី​សហរដ្ឋ​អាមេរិក លោក ចូ បៃដិន សច្ចា​ថា​សហរដ្ឋ​អាមេរិក​នឹង​ផ្ដល់​ការ​គាំទ្រ​ឥត​ងាករេ​ដល់​អ៊ុយក្រែន ដើម្បី​តស៊ូ​ប្រយុទ្ធ​ប្រឆាំង​នឹង​សង្គ្រាម​ឈ្លានពាន​របស់​រុស្ស៊ី ដែល​នឹង​ចូល​ដល់​គម្រប់​ខួប​មួយ​ឆ្នាំ​នៅ​ថ្ងៃទី​២៤ ខែ​កុម្ភៈ ខាងមុខ​នេះ។

បើ​តាម​ការ​ចេញ​ផ្សាយ​ដោយ​ទីភ្នាក់ងារ​សារព័ត៌មាន AFP នៅ​ថ្ងៃ​ពុធ ទី​៨ ខែ​កុម្ភៈ ឆ្នាំ​២០២៣ ការ​សច្ចា​របស់​លោក បៃដិន ធ្វើឡើង​នៅ​ពេល​លោក​ថ្លែង​សុន្ទរកថា​ស្ដីពី «ស្ថានភាព​សហព័ន្ធ» ដោយ​លោក​រើស​ប្រធានបទ​សង្គ្រាម​រុស្ស៊ី-អ៊ុយក្រែន គឺជា​ចំណុច​ចាប់ផ្ដើម​នៃ​សុន្ទរកថា​របស់​លោក។

លោក បៃដិន បញ្ជាក់​ថា សហរដ្ឋ​អាមេរិក​សច្ចា​ឈរ​នៅ​ជាមួយ​ប្រជាជន​អ៊ុយក្រែន ដរាបណា​ពលរដ្ឋ​អ៊ុយក្រែន​នៅតែ​ត្រូវការ​ជំនួយ​ពី​អាមេរិក។ លោក​ថា ប្រជាជាតិ​អ៊ុយក្រែន កំពុង​ធ្វើការ​តស៊ូ​ដើម្បី​សេរីភាព សេចក្ដី​ថ្លៃថ្នូរ និង​សន្តិភាព ដោយ​មិនមែន​ត្រឹមតែ​សម្រាប់​អឺរ៉ុប​ប៉ុណ្ណោះ​ទេ ប៉ុន្តែ​សម្រាប់​គ្រប់​ទីកន្លែង​នៅ​លើ​ពិភពលោក​ដែល​សហរដ្ឋ​អាមេរិក​ជា​កម្លាំង​ដ៏​ធំ​ការពារ​អ្នក​ទន់ខ្សោយ។

ការ​ថ្លែង​របស់​លោក បៃដិន នៅ​ក្នុង​វត្តមាន​របស់​ឯកអគ្គរដ្ឋទូត​អ៊ុយក្រែន ប្រចាំ​ទីក្រុង​វ៉ាស៊ីនតោន អ្នកស្រី Oksana Markarova ដែល​បាន​ចូលរួម​ក្នុង​ពិធី​ថ្លែង​សុន្ទរកថា​ស្ដីពី «ស្ថានភាព​សហព័ន្ធ» របស់​លោក ចូ បៃដិន ផង​ដែរ។ លោក បៃ ដិន ថ្លែង​ដូចនេះ​នៅ​ក្នុង​វិមាន​កាពីតូល។

ចាប់តាំងពី​សង្គ្រាម​រុស្ស៊ី​ឈ្លានពាន​អ៊ុយក្រែន សហរដ្ឋ​អាមេរិក​បាន​ផ្ដល់​ជំនួយ​យោធា និង​ជំនួយ​ផ្សេងៗ​ជាង ២៩​ពាន់​លាន​ដុល្លារ​ហើយ​ទៅ​ឱ្យ​អ៊ុយក្រែន ក្នុង​កញ្ចប់​សរុប ៨៥​ពាន់​លាន​ដុល្លារ​សម្រាប់​រយៈពេល ២​ឆ្នាំ។ សព្វាវុធ​ដែល​អាមេរិក​បញ្ជូន​ទៅ​ឱ្យ​អ៊ុយក្រែន ហើយ​រំពឹង​ថា​នឹង​ទៅ​ដល់​អ៊ុយក្រែន​ឆាប់ៗ​នេះ គឺ​រថក្រោះ​រថពាសដែក​ជិត ២០០​គ្រឿង។

ព្រឹត្តិការណ៍​ជា​ប្រវត្តិសាស្ត្រ​មួយ​ទៀត ការិយាល័យ​នាយករដ្ឋមន្ត្រី​អង់គ្លេស បាន​ឱ្យ​ដឹង​ថា នៅ​ថ្ងៃ​ពុធ ទី​៨ ខែ​កុម្ភៈ នេះ ប្រធានាធិបតី​អ៊ុយក្រែន លោក វ៉ូឡូឌីមៀ ហ្សេឡេនស្គី ត្រូវ​ធ្វើ​ដំណើរ​មក​កាន់​អង់គ្លេស តាម​ការ​អញ្ជើញ​របស់​នាយករដ្ឋមន្ត្រី លោក រីស៊ី ស៊ូណាក់។ លោក ហ្សេឡេនស្គី នឹង​ជួប​លោក រីស៊ី ស៊ូណាក់ មុន​នឹង​ឡើង​ថ្លែង​សុន្ទរកថា​ទៅ​កាន់​សមាជិក​សភា​អង់គ្លេស។

នេះ​គឺជា​ទស្សនកិច្ច​លើកដំបូង​មក​កាន់​ទីក្រុង​ឡុងដ៍ និង​ជា​ដំណើរ​ទស្សនកិច្ច​ក្រៅ​ប្រទេស​លើក​ទី​ពីរ​របស់​លោក ហ្សេឡេនស្គី ដែល​លោក​បាន​ទៅ​កាន់​សេតវិមាន​កាលពី​ខែ​ធ្នូ ឆ្នាំ​២០២២។

អំឡុង​ការ​បំពេញ​ទស្សនកិច្ច​នេះ លោក​ប្រធានាធិបតី​អ៊ុយក្រែន នឹង​ចុះ​សួរ​សុខទុក្ខ​កងទ័ព​នៃ​ប្រទេស​របស់​លោក​ដែល​កំពុង​ទទួល​ការ​ហ្វឹកហាត់​នៅ​ក្នុង​ប្រទេស​អង់គ្លេស។

ជាមួយ​គ្នា​នេះ ការិយាល័យ​លោក ស៊ូណាក់ បាន​ប្រកាស​ពី​គម្រោង​ដើម្បី​ពង្រីក​បន្ថែម​ទៀត​នូវ​កម្មវិធី​ផ្តល់​ការ​ហ្វឹកហាត់​ដល់​កងទ័ព​របស់​អ៊ុយក្រែន មកពី​ក្រុម​អ្នក​បើក​យន្តហោះ​ចម្បាំង ហើយ​និង​កង​ម៉ារីន។

អង់គ្លេស​បាន​និយាយ​ថា ការ​ហ្វឹកហាត់​ភីឡុត​អ៊ុយក្រែន​មាន​គោលដៅ​ជា​ចម្បង​ធានា​ឱ្យ​បាន​ថា ពួកគេ​នឹង​មាន​សមត្ថភាព​ប្រើប្រាស់​យន្តហោះ​ចម្បាំង​ទំនើបៗ​របស់​អង្គការ​ណាតូ ដែល​រំពឹង​ថា​នឹង​ត្រូវ​បញ្ជូន​ទៅ​ឱ្យ​អ៊ុយក្រែន​ឆាប់ៗ​នេះ។

ទស្សនកិច្ច​របស់​លោក ហ្សេឡេនស្គី ធ្វើឡើង​បន្ទាប់ពី​លោក បូរីស ចនសុន បាន​ទៅ​ជួប​មេដឹកនាំ​អ៊ុយក្រែន នៅ​ទីក្រុង​គៀវ ជា​លើក​ទី​៣ តែ​លើក​នេះ​លោក ចនសុន ពុំ​មែន​ជា​នាយករដ្ឋមន្ត្រី​អង់គ្លេស ទៀត​នោះ​ទេ។

ជុំវិញ​ស្ថានភាព​សង្គ្រាម​នៅ​អ៊ុយក្រែន ដែល​កំពុង​ផ្ទុះ​យ៉ាង​ខ្លាំង​នៅ​ភាគ​ខាងកើត​ប្រទេស​ដាណឺម៉ាក អាល្លឺម៉ង់ និង​ហុឡង់ដ៍ ប្រកាស​ប្រមូល​មូលនិធិ​ដើម្បី​ជួសជុល​រថក្រោះ​ប្រយុទ្ធ​ប្រភេទ Leopard-1 យ៉ាងតិច​ណាស់ ១០០​គ្រឿង​ចេញពី​ឃ្លាំង​ស្តុក​អាវុធ​របស់​ប្រទេស​ទាំង ៣ នេះ ដើម្បី​បញ្ជូន​ទៅ​ឱ្យ​អ៊ុយក្រែន។

ការិយាល័យ​រដ្ឋមន្ត្រី​ការពារ​ជាតិ​អ៊ុយក្រែន បាន​ឲ្យ​ដឹង​ថា ការ​សន្យា​របស់​ប្រទេស ៣ នេះ​ធ្វើ​ឡើង​ខណៈ Oleksii Reznikov រដ្ឋមន្ត្រី​ការពារ​ជាតិ​បាន​ជួប​ជាមួយ​រដ្ឋមន្ត្រី​ការពារ​ជាតិ​អាល្លឺម៉ង់ លោក Boris Pistorius ក្នុង​ដំណើរ​ទស្សនកិច្ច​ដែល​លោក Pistorius មិន​បាន​ប្រកាស​ជា​មុន​ទៅ​កាន់​ទីក្រុង​គៀវ។

នៅ​ក្នុង​ជំនួប​នោះ លោក Pistorius បាន​និយាយ​ថា រថក្រោះ​របស់​អាល្លឺម៉ង់​ចំនួន ២៥​គ្រឿង​ជា​រថក្រោះ Leopard-2 នឹង​មក​ដល់​អ៊ុយក្រែន ក្នុង​អំឡុង​ខែ​មីនា ហើយ​ប្រហែល ៨០​គ្រឿង​មក​ដល់​នៅ​ចុង​ឆ្នាំ​២០២៣។ ចំណែក ១០០​គ្រឿង​ទៀត​ជា​រថក្រោះ Leopard-1 នឹង​មក​ដល់​នៅ​ឆ្នាំ​២០២៤។

ជុំវិញ​ស្ថានភាព​សង្គ្រាម​នៅ​អ៊ុយក្រែន អគ្គលេខាធិការ​អង្គការ​សហប្រជាជាតិ អង់តូនីញូ គួតារ៉េស បាន​ថ្លែង​ដោយ​ក្ដី​បារម្ភ​ជា​ខ្លាំង​ថា សង្គ្រាម​នៅ​ឆ្នាំ​២០២៣ នេះ​កាន់តែ​ធ្ងន់ធ្ងរ និង​អាក្រក់​ឡើង។

លោក គួតារ៉េស បាន​ថ្លែង​ដូចនេះ​ទៅ​កាន់​មហាសន្និបាត​អង្គការ​សហប្រជាជាតិ កាលពី​ថ្ងៃ​អង្គារ ក្នុង​សប្ដាហ៍​នេះ។ លោក គួតារ៉េស បាន​អំពាវនាវ​ដល់​ភាគី​រុស្ស៊ី និង​អ៊ុយក្រែន បន្ថយ​សង្គ្រាម ហើយ​ស្វែងរក​ការ​បញ្ចប់​ការ​ឈឺចាប់​វេទនា​របស់​ប្រជាជន​អ៊ុយក្រែន។

គិត​មក​ដល់​ពេលនេះ សង្គ្រាម​មហាអំណាច​រុស្ស៊ី​ឈ្លានពាន​អ៊ុយក្រែន ជិត​មួយ​ឆ្នាំ​ហើយ​ដែល​កងទ័ព​នៃ​ប្រទេស​ទាំង​ពីរ​កំពុង​ប្រយុទ្ធ​គ្នា​យ៉ាង​សហាវ​នៅ​ភាគ​ខាងកើត​ប្រទេស។ ភាគី​អ៊ុយក្រែន អះអាង​ថា បាន​សម្លាប់​កងទ័ព​រុស្ស៊ី ជាង ១៣​ម៉ឺន ៣​ពាន់​នាក់។ ចំណែក​ភាគី​រុស្ស៊ី មិន​បាន​ប្រកាស​អំពី​ភាគី​អ៊ុយក្រែន ស្លាប់​ទ័ព​ដោយសារ​ទ័ព​រុស្ស៊ី​បាញ់​សម្លាប់​ប៉ុន្មាន​ម៉ឺន​នាក់​នោះ​ទេ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស