28 C
Phnom Penh

បក្ស​ភ្លើង​ទៀន​ប្រកាស​ធ្វើ​សមាជ​វិសាមញ្ញ​កំណត់​យុទ្ធសាស្ត្រ​ចូលរួម​ការ​បោះឆ្នោត​ជាតិ​ឆ្នាំ​២០២៣

ដោយ ឌឹ ខេមបូឌា ដេលី

បទវិភាគ

គណបក្ស​ភ្លើង​ទៀន​ប្រកាស​ធ្វើ​ពិធី​សមាជ​វិសាមញ្ញ​ដើម្បី​កំណត់​យុទ្ធសាស្ត្រ និង​គោល​នយោបាយ​របស់​ខ្លួន​សម្រាប់​ការ​ចូលរួម​បោះឆ្នោត​ជាតិ​អាណត្តិ​ទី​៧ ក្នុង​ឆ្នាំ​២០២៣ ខាងមុខ​នេះ ស្រប​ពេល​ដែល​គណបក្ស​នេះ​បាន​រង​នូវ​ការ​គំរាមកំហែង​ពី​មេដឹកនាំ​បក្ស​កាន់​អំណាច លោក ហ៊ុន សែន ជា​បន្តបន្ទាប់។

គណបក្ស​ភ្លើង​ទៀន ចេញ​សេចក្តី​ជូនដំណឹង​កាលពី​ថ្ងៃទី​៧ ខែ​កុម្ភៈ ឆ្នាំ​២០២៣ ថា ខ្លួន​នឹង​ប្រារព្ធ​សមាជ​វិសាមញ្ញ​កំណត់​យុទ្ធសាស្ត្រ និង​គោល​នយោបាយ​មុន​នឹង​ចូលរួម​ការ​បោះឆ្នោត​ឆ្នាំ​២០២៣ ដែល​នឹង​ធ្វើ​នៅ​ថ្ងៃទី​១១ ខែ​កុម្ភៈ ឆ្នាំ​២០២៣ នេះ មាន​ទីតាំង​ស្ថិត​នៅ​ភូមិ​ព្រៃគុយ ឃុំ​អំពិល ស្រុក​ប្រាសាទបាគង ខេត្ត​សៀមរាប។

ការ​ប្រកាស​ប្រារព្ធ​ពិធី​សមាជ​វិសាមញ្ញ​នេះ ធ្វើឡើង​ស្រប​ពេល​ដែល​គណបក្ស​នេះ​បាន​ត្រៀម​ខ្លួន​ចូលរួម​ការ​បោះឆ្នោត​ខាងមុខ​នេះ ខណៈ​មន្ត្រី​ជាន់ខ្ពស់​របស់​ខ្លួន​កំពុង​រង​នូវ​បណ្តឹង​ពី​បក្ស​កាន់​អំណាច​ជា​បន្តបន្ទាប់។

ការ​ប្រារព្ធ​សមាជ​វិសាមញ្ញ​របស់​គណបក្ស​ភ្លើង​ទៀន នៅ​ចុង​សប្តាហ៍​នេះ ត្រូវ​គេ​មើល​ឃើញ​ថា មិន​មែន​ត្រឹមតែ​កំណត់​គោល​នយោបាយ និង​កំណត់​យុទ្ធសាស្ត្រ​របស់​គណបក្ស​ប៉ុណ្ណោះ​ទេ ប៉ុន្តែ​ក៏​មាន​ការ​ប្រកាស​តែងតាំង​មន្ត្រី​ជាន់ខ្ពស់​របស់​បក្ស​នេះ​ដែរ ក្នុង​នោះ​គេ​កត់សម្គាល់​ឃើញ​ថា លោក រ៉ុង ឈុន ដែល​ទើប​តែ​ប្រកាស​ចូលរួម​ជីវភាព​នយោបាយ​ជាមួយ​គណបក្ស​ភ្លើង​ទៀន កាលពី​ពេល​ថ្មីៗ​នេះ ក៏​នឹង​ត្រូវ​ប្រកាស​តែងតាំង​ជា​មន្ត្រី​សំខាន់​របស់​បក្ស​នេះ​នៅ​ក្នុង​ពិធី​សមាជ​នោះ​តែម្តង។

អតីត​មន្ត្រី​ជាន់ខ្ពស់​គណបក្ស​សង្គ្រោះ​ជាតិ លោក មាជ សុវណ្ណារ៉ា ប្រាប់​សារព័ត៌មាន The Cambodia Daily នៅ​ថ្ងៃទី​៩ កុម្ភៈ នេះ​ថា ជា​រឿង​ធម្មតា​សម្រាប់​គណបក្ស​នយោបាយ​ដែល​ត្រូវ​ធ្វើ​សមាជ​ដើម្បី​កំណត់​គោល​នយោបាយ និង​យុទ្ធសាស្ត្រ​របស់​ខ្លួន មុន​នឹង​ចូលរួម​ការ​បោះឆ្នោត ប៉ុន្តែ​ការ​ចូលរួម​របស់​គណបក្ស​ភ្លើង​ទៀន​ក្នុង​ការ​បោះឆ្នោត​ជាតិ​ខាងមុខ​នេះ មិន​មាន​អ្វី​ជា​សម្ពាធ​ដល់​បក្ស​កាន់​អំណាច ឬ​ធ្វើ​ឲ្យ​មាន​ការ​ប្រែប្រួល​ដល់​ស្ថានការណ៍​នយោបាយ​នៅ​កម្ពុជា​សព្វថ្ងៃ​នេះ​ទេ។

លោក មាជ សុវណ្ណារ៉ា លើកឡើង​ថា អ្វី​ដែល​សំខាន់​ជុំវិញ​ការ​បោះឆ្នោត​ជាតិ​ខាងមុខ​នេះ គឺ​សហគមន៍​អន្តរជាតិ​មិនទាន់​ទទួល​គណបក្ស​នយោបាយ​ណា​មួយ​ថា​ជា​គណបក្ស​ប្រឆាំង​ក្នុង​ការ​ប្រកួតប្រជែង​ជាមួយ​បក្ស​កាន់​អំណាច​ឡើយ ក្រៅតែ​ពី​គណបក្ស​សង្គ្រោះ​ជាតិ និង​ការ​ទាមទារ​ឲ្យ​រដ្ឋាភិបាល​កម្ពុជា​បើក​លំហ​សេរីភាព​នយោបាយ​ជូន​មេដឹកនាំ​បក្ស​ប្រឆាំង លោក កឹម សុខា អាច​វិល​ចូល​ឆាក​នយោបាយ​ឡើងវិញ ដើម្បី​ធានា​នូវ​ការ​អនុវត្ត​លទ្ធិប្រជាធិបតេយ្យ​នៅ​កម្ពុជា​ទៅ​ថ្ងៃ​មុខ​បន្ត​ទៀត។

កាលពី​ថ្ងៃទី​១៩ ខែ​មករា ឆ្នាំ​២០២៣ មេដឹកនាំ​បក្ស​កាន់​អំណាច លោក ហ៊ុន សែន បាន​ព្រមាន​ប្តឹង​គណបក្ស​ភ្លើង​ទៀន​ទៅ​តុលាការ បន្ទាប់ពី​គណបក្ស​នេះ​បាន​ចេញ​សេចក្តី​ថ្លែងការណ៍​កាលពី​ថ្ងៃទី​១៨ ខែ​មករា ដោយ​ប្រកាស​ប្រឆាំង​ដាច់ខាត​លើ​ការ​គាប​សង្កត់ ការ​គំរាមកំហែង និង​ការ​ធ្វើ​ទុក្ខបុកម្នេញ​ផ្នែក​នយោបាយ​គ្រប់​រូបភាព​ពី​គណបក្ស​កាន់​អំណាច និង​ទាមទារ​ឱ្យ​បញ្ឈប់​សកម្មភាព​ទាំងនេះ​ជាបន្ទាន់។

ប៉ុន្តែ​ក្រោយ​ការ​គំរាមកំហែង​របស់​លោក ហ៊ុន សែន គណបក្ស​ភ្លើង​ទៀន​បាន​កែ​ខ្លឹមសារ​សេចក្តី​ថ្លែងការណ៍​របស់​ខ្លួន​វិញ​ភ្លាមៗ​ផង​ដែរ។

ការ​ចេញ​សេចក្តី​ថ្លែងការណ៍​របស់​បក្ស​ភ្លើង​ទៀន​នេះ ធ្វើឡើង​បន្ទាប់ពី​គណបក្ស​កាន់​អំណាច​ប្ដឹង​មន្ត្រី​ជាន់ខ្ពស់​គណបក្ស​ភ្លើង​ទៀន​ទៅ​តុលាការ​ជា​បន្តបន្ទាប់ ដូចជា​លោក សុន ឆ័យ លោក គង់ គាំ ដោយ​ការ​រឹបអូស​ទ្រព្យសម្បត្តិ​របស់​ពួកគេ​ផង​ដែរ។

ជាង​នេះ​ទៀត តុលាការ​ក៏​បាន​ចាប់​ឃុំ​ខ្លួន​លោក ថាច់ សេដ្ឋា ដោយ​លើក​យក​បទ​ចោទ​មិន​សម​ហេតុផល​ដែល​ចោទ​ថា លោក​បាន​ចេញ​សែក​ស្អុយ​តាំងពី​ឆ្នាំ​២០១៩ មក​អនុវត្ត​នៅ​ពេលនេះ​ថែម​ទៀត។

ទាក់ទិន​នឹង​បញ្ហា​នេះ អ្នក​ស្រាវជ្រាវ​ការ​អភិវឌ្ឍ​សង្គម បណ្ឌិត មាស នី បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​ពេល​ថ្មីៗ​នេះ​ថា ចាប់​ពេលនេះ​ទៅ​រហូត​ដល់​ថ្ងៃ​បោះឆ្នោត​ចុង​ខែ​កក្កដា ឆ្នាំ​២០២៣ ខាងមុខ​នេះ នឹង​មាន​ការ​គំរាមកំហែង និង​ការ​បង្ក្រាប​លើ​ក្រុម​អ្នក​ប្រជាធិបតេយ្យ​ដែល​ជា​បក្ស​ក្រៅ​រដ្ឋាភិបាល​ជាមិនខាន ហើយ​សកម្មភាព​បែប​នេះ គឺ​តែងតែ​កើតមាន​គ្រប់​អាណត្តិ​នៃ​ការ​បោះឆ្នោត​នៅ​កម្ពុជា​រហូត​មក។

ការ​បោះឆ្នោត​ជ្រើសតាំង​តំណាងរាស្ត្រ​ក្នុង​អាណត្តិ​ទី​៧ នេះ គណបក្ស​ដែល​មាន​សក្ដានុពល​នៅ​កម្ពុជា គឺ​មាន​តែ​គណបក្ស​ប្រជាជន​កម្ពុជា​របស់​លោក ហ៊ុន សែន តែ​មួយ​គត់​ដែល​ចូលរួម ខណៈ​គណបក្ស​សង្គ្រោះ​ជាតិ​ដែល​ត្រូវ​គេ​ចាត់ទុក​ជា​គណបក្ស​ប្រឆាំង​ដ៏​ធំ​នៅ​កម្ពុជា ត្រូវ​តុលាការ​រំលាយ ចំណែក​មេដឹកនាំ​បក្ស​ប្រឆាំង លោក កឹម សុខា ក៏​ត្រូវ​រង​នូវ​បណ្តឹង​តាម​ផ្លូវ​តុលាការ​ថែម​ទៀត បញ្ហា​នេះ ពួកគេ​នឹង​មិន​អាច​ចូលរួម​ការ​បោះឆ្នោត​ខាងមុខ​នេះ​បាន​ឡើយ។

កាលពី​ថ្ងៃទី​២៩ ខែ​មិថុនា ឆ្នាំ​២០២២ ប្រមុខ​រដ្ឋាភិបាល​កម្ពុជា លោក ហ៊ុន សែន បាន​ចេញ​អនុក្រឹត្យ​ស្ដីពី​ការ​កំណត់​កាលបរិច្ឆេទ​នៃ​ការ​បោះឆ្នោត​ជាតិ​អាណត្តិ​ទី​៧ ដោយ​កំណត់​យក​ថ្ងៃ​អាទិត្យ ទី​២៣ ខែ​កក្កដា ឆ្នាំ​២០២៣ ជា​ថ្ងៃ​បោះឆ្នោត​ជ្រើសតាំង​តំណាងរាស្ត្រ​ទៅ​តាម​អាណត្តិ​របស់​ខ្លួន​រយៈពេល ៥​ឆ្នាំ​ម្តង៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស