សង្គ្រាមរុស្ស៊ីឈ្លានពានអ៊ុយក្រែនកាន់តែសាហាវខ្លាំងទៅៗនៅពេលនេះ ជាពិសេសគឺនៅភាគខាងកើតប្រទេស។ ក្រោយខួបមួយឆ្នាំនៅថ្ងៃទី២៤ ខែកុម្ភៈ ខាងមុខនេះ រុស្ស៊ីអាចនឹងមានផែនការថ្មីផ្សេងទៀតទៅលើប្រទេសអ៊ុយក្រែន និងទៅលើផលប្រយោជន៍របស់ពួកបស្ចិមប្រទេសដែលមាននៅលើទឹកដីរុស្ស៊ី។
បន្ថែមលើសពីនេះ ក៏មានការព្រមានថា ពលរដ្ឋក្រុមបស្ចិមប្រទេស ជាពិសេសពលរដ្ឋអាមេរិកាំងដែលកំពុងរស់នៅលើទឹកដីរុស្ស៊ី អាចប្រឈមនឹងការចាប់ខ្លួន ឬករណីបង្កគ្រោះថ្នាក់ដោយប្រការអ្វីមួយ។ នៅថ្ងៃទី១៣ ខែកុម្ភៈ ស្ថានទូតអាមេរិកប្រចាំនៅក្រុងមូស្គូ ដែលបានទទួលការណែនាំពីក្រសួងការបរទេសរបស់ខ្លួន បានព្រមានជាចំហទៅកាន់ពលរដ្ឋអាមេរិក ដែលនៅបន្តស្ថិតក្នុងប្រទេសរុស្ស៊ី ត្រូវតែចាកចេញពីប្រទេសនេះជាបន្ទាន់។
ការប្រកាសរបស់ស្ថានទូតអាមេរិក ដោយផ្អែកលើស្ថានការណ៍សឹកដែលរុស្ស៊ីឈ្លានពានអ៊ុយក្រែនកាន់តែអាក្រក់ និងធ្ងន់ធ្ងរ ជាពិសេសការវាយប្រយុទ្ធគ្នានៅភាគខាងកើតប្រទេស។
ការព្រមាននេះ ក៏កើតឡើងទន្ទឹមនឹងខួបមួយឆ្នាំជិតចូលមកដល់។ ខួបមួយឆ្នាំដែលរុស្ស៊ីលើកទ័ព ២៥ម៉ឺននាក់វាយលុកចូលអ៊ុយក្រែន នឹងចូលមកដល់នៅសប្ដាហ៍ក្រោយនេះ។
ក្នុងខួបមួយឆ្នាំនេះហើយដែលរបបនៅក្រុងមូស្គូ ក្រោមការដឹកនាំរបស់ជនផ្ដាច់ការ វ៉្លាឌីមៀរ ពូទីន អាចនឹងចាត់វិធានការថ្មីទៀតទៅលើប្រទេសអ៊ុយក្រែន ជាមួយនឹងការសងសឹកពួកបស្ចិមប្រទេសដែលសហរដ្ឋអាមេរិកឈានមុខគេ ក្នុងការផ្ដល់សព្វាវុធទៅឱ្យអ៊ុយក្រែន និងការដាក់ទណ្ឌកម្មសេដ្ឋកិច្ចទៅលើប្រទេសរុស្ស៊ី។
តាមសេចក្ដីប្រកាសរបស់ស្ថានទូតអាមេរិកនៅក្រុងមូស្គូ ការប្រព្រឹត្តទៅលើពលរដ្ឋអាមេរិកអាចមានការចាប់ខ្លួន ដោយចោទអ្វីមួយរបស់អាជ្ញាធររុស្ស៊ី ឬការចាប់ពង្រាត់ ឬករណីផ្សេងៗទៀតដោយក្រុមសម្ងាត់ណាមួយ ឬដោយក្រុមភេរវកម្ម។
ដោយឃើញផលវិបាកទាំងនេះអាចកើតមាន ស្ថានទូតអាមេរិកព្រមានពលរដ្ឋរបស់ខ្លួនដែលនៅមិនទាន់ចាកចេញពីប្រទេសរុស្ស៊ី ត្រូវតែចាកចេញជាបន្ទាន់ ហើយពលរដ្ឋណាដែលចង់មកកាន់ប្រទេសរុស្ស៊ី គឺមិនត្រូវមកដាច់ខាត។
ស្ថានទូតប្រកាសទៀតថា បើពលរដ្ឋមានទុក្ខធុរៈមិនអាចចាកចេញ ត្រូវមកកាន់ស្ថានទូតអាមេរិកដើម្បីឱ្យស្ថានទូតជួយដោះស្រាយ គឺស្ថានទូតនឹងផ្ដល់ជំនួយសេវាកម្មភ្លាមៗ។
សេចក្ដីប្រកាសរបស់ស្ថានទូតអាមេរិកបន្តថា ឆាប់ៗនេះ រុស្ស៊ីនឹងធ្វើកំណើនទ័ពជាថ្មីទៀតដើម្បីប្រមូលកម្លាំងត្រៀមទៅសមរភូមិនៅលើទឹកដីអ៊ុយក្រែន ហើយពេលនោះ អាជ្ញាធររុស្ស៊ីអាចនឹងចាប់ខ្លួនពលរដ្ឋបរទេស ដោយហេតុផលថាជាក្រុមចារកម្មនៅលើទឹកដីរុស្ស៊ី ហើយការកេណ្ឌទ័ពជាថ្មីនេះអាចបង្កឱ្យពលរដ្ឋរុស្ស៊ីធ្វើការតវ៉ាជាថ្មីទៀតប្រឆាំងនឹងរដ្ឋាភិបាលក្រុងមូស្គូ ដែលពេលនោះនឹងមានការបង្ក្រាប និងចាប់ខ្លួនអ្នកតវ៉ា។
តាមការព្រមាននេះ ពលរដ្ឋអាមេរិកដែលមានមុខជំនួញតូចក្ដីធំៗក្ដី ក៏ត្រូវរកពេលវេលាដើម្បីប្រមូលធនធានរបស់ខ្លួនចាកចេញដែរ។ នេះបើយោងតាមការចុះផ្សាយរបស់ទីភ្នាក់ងារសារព័ត៌មានតួកគី Anadolu ដែលស្រង់សេចក្ដីប្រកាសព័ត៌មានរបស់ស្ថានទូតអាមេរិក នៅក្រុងមូស្គូ នៅថ្ងៃទី១៣ កុម្ភៈ នេះ។
យ៉ាងណា ការព្រមានរបស់ស្ថានទូតអាមេរិកនៅរុស្ស៊ី ធ្វើឡើងក្រោយពីអគ្គរដ្ឋអាជ្ញានៃសហព័ន្ធសហរដ្ឋអាមេរិក Merrick Garland កាលពីពេលថ្មីៗនេះ បានចេញដីកាបង្គាប់ទៅរដ្ឋការលោក បៃដិន ឱ្យរឹបអូសទ្រព្យសម្បត្តិរបស់រុស្ស៊ី ជាពិសេសទុនហិរញ្ញវត្ថុរបស់រុស្ស៊ី ដែលមាននៅលើទឹកដីអាមេរិក ដែលក្រសួងរតនាគារអាមេរិករកឃើញជាង ៥ពាន់លានដុល្លារ ដោយត្រូវរឹបអូសដើម្បីទូទាត់នឹងអំពើវិនាសកម្មសង្គ្រាមនៅលើទឹកដីអ៊ុយក្រែន ដោយប្រគល់ទៅឲ្យរដ្ឋាភិបាលលោកប្រធានាធិបតី វូឡូឌីមៀ ហ្សេឡេនស្គី។
លោកអគ្គរដ្ឋអាជ្ញា Merrick Garland បានចេញដីកាដូចនេះខណៈលោកបានជួបនឹងអគ្គរដ្ឋអាជ្ញាអ៊ុយក្រែន ដែលមកជួបលោកផ្ទាល់នៅក្រុងវ៉ាស៊ីនតោន ដោយស្នើឱ្យអាមេរិកមានវិធានការនេះទៅលើប្រទេសរុស្ស៊ី។
ទុនហិរញ្ញវត្ថុរបស់រុស្ស៊ីមាននៅលើទឹកដីអាមេរិក ជាង ៥ពាន់លានដុល្លារនេះ គឺយ៉ាងហោចណាស់ទ្រព្យសម្បត្តិរបស់សេដ្ឋីរុស្ស៊ី ជិត ៤០នាក់ ក៏មានក្នុងការរឹបអូសនេះដែរ។ ករណីនេះដែលអ្នកសង្កេតការណ៍យល់ថា អាចនឹងនាំឱ្យរដ្ឋាភិបាលលោក ពូទីន ធ្វើការសងសឹកអាមេរិក។
ណាមួយទៀត ការព្រមាននេះកើតឡើងស្របពេលដែលសេតវិមានជូនដំណឹងថា លោកប្រធានាធិបតី ចូ បៃដិន នឹងធ្វើដំណើរទៅអឺរ៉ុប ដើម្បីបើកវេទិកាជាមួយក្រុមមេដឹកនាំអឺរ៉ុប អំពីខួបមួយឆ្នាំនៃសង្គ្រាមរុស្ស៊ីឈ្លានពានអ៊ុយក្រែន ហើយជាមួយគ្នានោះ លោក បៃដិន នឹងធ្វើដំណើរទៅកាន់ប្រទេសប៉ូឡូញ ដើម្បីសួរសុខទុក្ខកងទ័ពអាមេរិកនៅលើទឹកដីនៅអឺរ៉ុបខាងកើតមួយនេះ។
ក្នុងដំណើរទស្សនកិច្ចលើកទី២ របស់លោក បៃដិន ទៅកាន់ប្រទេសប៉ូឡូញ នេះ ត្រូវគេរំពឹងថា លោក បៃដិន នឹងទៅពិនិត្យស្ថានការណ៍តាមព្រំដែនប៉ូឡូញ និងអ៊ុយក្រែន។
នៅលើទឹកដីប៉ូឡូញ លោក បៃដិន នឹងជួបប្រធានាធិបតីប៉ូឡូញ ដែលប៉ូឡូញ ជាប្រទេសដ៏ខ្លាំងនៅអឺរ៉ុបខាងកើត ក្នុងការចេញមុខប្រឆាំងនឹងរុស្ស៊ីឈ្លានពានអ៊ុយក្រែន។ តែប៉ូឡូញ គឺជាសមាជិកណាតូដ៏សំខាន់មួយដែលរុស្ស៊ីចាត់ទុកថាជាប្រភពចែកចាយអាវុធទៅឱ្យទ័ពអ៊ុយក្រែន និងជាផ្លូវដឹកជញ្ជូនអាវុធរបស់ពួកបស្ចិមប្រទេសចូលទឹកដីអ៊ុយក្រែន។
បច្ចុប្បន្ន នៅលើទឹកដីប៉ូឡូញមានកងទ័ពអាមេរិក កងទ័ពបារាំង អាល្លឺម៉ង់ អង់គ្លេស ហើយសម្រាប់សហរដ្ឋអាមេរិក បានដំឡើងរួចហើយប្រព័ន្ធមីស៊ីលប៉ាទ្រីយ៉ូត នៅតាមព្រំដែនប៉ូឡូញជាប់នឹងអ៊ុយក្រែន៕