បណ្ដាញសហគមន៍ព្រៃឡង់ខេត្តព្រះវិហារ រកឃើញបទល្មើសជាច្រើនករណីបានកើតឡើងនៅក្នុងតំបន់អភិរក្សសត្វព្រៃព្រៃឡង់យ៉ាងអនាធិបតេយ្យ ដែលជាទង្វើរបស់ក្រុមហ៊ុនរកស៊ីឈើខុសច្បាប់មួយចំនួន ខណៈអាជ្ញាធរ ឬមន្ត្រីឧទ្យានុរក្សមិនបានចុះស៊ើបអង្កេត ឬចុះអន្តរាគមន៍ឡើយ។
បណ្ដាញសហគមន៍ព្រៃឡង់ខេត្តព្រះវិហារ បានសរសេរលើទំព័រហ្វេសប៊ុករបស់ខ្លួនកាលពីថ្ងៃទី២០ ខែកុម្ភៈ ឆ្នាំ២០២៣ នេះថា ក្នុងរយៈពេល ៣ថ្ងៃចាប់ពីថ្ងៃទី១៧ ដល់ថ្ងៃទី២០ ខែកុម្ភៈ ឆ្នាំ២០២៣ ខ្លួនបានរកឃើញបទល្មើសព្រៃឈើបន្ថែមទៀតដោយគ្មានការស៊ើបអង្កេត និងការអន្តរាគមន៍ពីអាជ្ញាធរឡើយ ក្នុងនោះពួកគេបានរកឃើញគល់ឈើដែលបានកាត់រួចចំនួន ៧២គល់ ដែលជាប្រភេទឈើស្រឡៅ ឈើទាល ផ្ចឹក សុក្រំ ឈ្លីក និងគគីរ ជាដើម។
ប្រភពដដែលលើកឡើងថា ក្រៅពីឈើដែលត្រូវកាប់បំផ្លាញ និងដឹកជញ្ជូនទៅអស់ ពួកគេក៏បានឃើញភស្តុតាងជាច្រើនទៀតនៅនឹងទីតាំងផ្ទាល់ ដូចជាឈើឃ្នាប ឈើក្តារ ឈើឃ្លុំ ដែលសរុបមានចំនួនជាង ២៩ម៉ែត្រគូប។ ក្រៅពីនេះក៏រកឃើញគោយន្តចំនួន ១៧គ្រឿង រណារយន្ត ១៥គ្រឿង មនុស្ស ៣៨នាក់ ម៉ូតូ ៨គ្រឿង ប្រេងសាំង និងម៉ាស៊ូតជាច្រើនប៊ីដុងធំ និងអាវុធកែច្នៃចំនួន ១៧ដើមផងដែរ។
បណ្ដាញសហគមន៍ព្រៃឡង់ខេត្តព្រះវិហារ បញ្ជាក់ថា ការប្រព្រឹត្តបទល្មើសព្រៃឈើក្នុងតំបន់អភិរក្សសត្វព្រៃព្រៃឡង់នៅពេលនេះ គឺកំពុងកើតមានយ៉ាងអនាធិបតេយ្យនៅក្នុងទីតាំងមួយចំនួន ដូចជាចំណុចវាលស្មាច់ ចំណុចអូរពីរ ចំណុចដំណាក់ភ្ញៀវ ចំណុចព្រៃស្រុកចាស់ ចំណុចបុស្សរាំង និងចំណុចជាំប្រមេរុ ផងដែរ។
ក្រមព្រហ្មទណ្ឌមាត្រា៥២៨ ចែងថា មន្ត្រីរាជការសាធារណៈមិនប្ដឹងបរិហារ និងមិនអើពើបង្ក្រាបបទល្មើសឋិតក្នុងដែនសមត្ថកិច្ចរបស់ខ្លួន ត្រូវផ្ដន្ទាទោសដាក់ពន្ធនាគារពី ១ឆ្នាំដល់ ៣ឆ្នាំ និងពិន័យជាប្រាក់ពី ២លានរៀលដល់ ៦លានរៀល។ ប៉ុន្តែកន្លងមកត្រូវគេមើលឃើញមន្ត្រីដែលអនុវត្តខុសពីមាត្រានេះ មិនទទួលរងទណ្ឌកម្ម ឬពិន័យទេ តែបែរជាត្រូវដំឡើងឋានៈបុណ្យស័ក្តិទៅវិញ។
ជាក់ស្តែង ឧកញ៉ា លីម ប៊ុណ្ណា ហៅឧកញ៉ា ខ្នា និងនាយករងការិយាល័យបំភ័ន្តអក្ខរៈនៃកងរាជអាវុធហត្ថលើផ្ទៃប្រទេស លោក ចាប សារ៉ន ដែលគេដឹងឮគ្រប់គ្នាថាជាឧក្រិដ្ឋជនព្រៃឈើក្នុងតំបន់ព្រៃឡង់នេះ ត្រូវបានតែងតាំងជាជំនួយការរបស់លោក ហ៊ុន សែន និងត្រូវបានដំឡើងឋានៈពីមន្ត្រីទាបទៅជាមន្ត្រីថ្នាក់ខ្ពស់ក្នុងជួររដ្ឋាភិបាលផងដែរ បើទោះបីជាពួកគេល្បីល្បាញខាងបទល្មើសព្រៃឈើខុសច្បាប់នៅក្នុងតំបន់ព្រៃឡង់យ៉ាងណាក៏ដោយ។
ទាក់ទិននឹងបញ្ហានេះ កាលពីថ្ងៃទី២៨ ខែវិច្ឆិកា ឆ្នាំ២០២២ បណ្ដាញសហគមន៍ព្រៃឡង់ជាច្រើននាក់នៅខេត្តព្រះវិហារ បានត្អូញត្អែរអំពីការកាប់បំផ្លាញដើមឈើធំៗរាប់រយដើមពីសំណាក់ក្រុមហ៊ុន ម៉ាខល ឡូជីស្ទីក ឬក្រុមហ៊ុន៩៧ ដែលមានដើមឈើសុក្រំ ដើមឈ្លីក ដើមផ្ចឹក ដើមរាំង ដើមត្រាច ដើមឈើទាល និងដើមផ្ដៀក ជាដើម។
យ៉ាងណាក៏ដោយ កាលពីថ្ងៃទី០៤ ខែកញ្ញា ឆ្នាំ២០២២ អ្នកនាំពាក្យក្រសួងបរិស្ថាន លោក នេត្រ ភក្ត្រា រិះគន់ថា ការចោទប្រកាន់ថា ព្រៃឈើនៅកម្ពុជាកំពុងបន្តរងនូវការកាប់បំផ្លាញ គឺជាចេតនាបង្កប់សារនយោបាយ និងជាយុទ្ធនាការមួយដែលប្រឆាំងនឹងកម្ពុជាដើម្បីបំភ្លៃ បំផ្លើស និងបំប៉ោងរបស់ក្រុមអ្នកស្រឡាញ់ព្រៃឈើតែសម្បកក្រៅ។
ទាក់ទិននឹងករណីនេះ សកម្មជនព្រៃឈើ លោក ហេង ស្រស់ ធ្លាប់បានលើកឡើងកាលពីពេលថ្មីៗនេះថា អាជ្ញាធរមានសមត្ថកិច្ចទាំងអស់នៅជុំវិញតំបន់ព្រៃឡង់សុទ្ធតែជាប់ពាក់ព័ន្ធនឹងបទល្មើសព្រៃឈើ និងទទួលបានសំណូកពីជនល្មើសទាំងអស់ ដូច្នេះហើយបានជាពួកគេមិនចាត់វិធានការបង្ក្រាប និងដាក់ទោសពៃរ៍លើពួកអ្នកកាប់បំផ្លាញព្រៃឈើទាំងនោះទេ។
លោក ហេង ស្រស់ អះអាងថា អ្នកកាប់ឈើ និងដឹកជញ្ជូនឈើទាំងនោះតែងតែនិយាយទាំងទឹកមុខញញឹមថា ពួកគេមិនខ្លាចមន្ត្រីបរិស្ថានទាំងនោះឡើយ ព្រោះពួកគេបានបង់លុយឱ្យមន្ត្រីទាំងនោះរួចអស់ហើយ មុនពេលដែលពួកគេចូលមកកាប់ឈើនៅក្នុងតំបន់ព្រៃឡង់នេះ។
បែបនេះក្តី អង្គការលើកលែងទោសអន្តរជាតិ (Amnesty International) បានចេញរបាយការណ៍មួយកាលពីថ្ងៃទី២៨ ខែមករា ឆ្នាំ២០២២ ថា ព្រៃឈើចំនួន ៦២៧១ហិកតារ ត្រូវបានកាប់បំផ្លាញនៅក្នុងដែនជម្រកសត្វព្រៃចំនួនពីរ ក្នុងនោះមានដែនជម្រកសត្វព្រៃព្រៃឡង់ និងដែនជម្រកសត្វព្រៃព្រះរការ ដែលជាការកាប់ឈើខុសច្បាប់យ៉ាងច្រើនសន្ធឹកសន្ធាប់ និងកំពុងប៉ះពាល់ធ្ងន់ធ្ងរដល់សិទ្ធិ និងវប្បធម៌របស់ជនជាតិដើមភាគតិចនៅតំបន់នោះយ៉ាងធ្ងន់ធ្ងរ៕