តុលាការព្រហ្មទណ្ឌអន្តរជាតិ ICC ប្រកាសព័ត៌មានជាជំហរលើកដំបូងរបស់ខ្លួន ដោយប្រកាសថា តុលាការអន្តរជាតិនេះត្រៀមចេញដីកាចាប់ខ្លួនពួកមន្ត្រីយោធាមួយចំនួន ជាពិសេសគឺឧត្តមសេនីយ៍រុស្ស៊ី និងមេទ័ពបញ្ជាការផ្ទាល់នៅសមរភូមិនៅលើទឹកដីអ៊ុយក្រែន ទាំងក្នុងនោះរួមមានទាំងក្រុមទាហានស៊ីឈ្នួល និងមេក្រុមរបស់ក្រុមនេះទៀតផង។
សារព័ត៌មាន The Hill បានឲ្យដឹងថា រដ្ឋអាជ្ញា ICC នៃតុលាការព្រហ្មទណ្ឌអន្តរជាតិនេះបានកសាងសំណុំរឿងចំនួន ៣បទចោទ ក្នុងនោះករណីការបង្ខំឲ្យមានការជម្លៀស ការចាប់ពង្រាត់កុមារអ៊ុយក្រែន និងឧក្រិដ្ឋកម្មធ្ងន់ធ្ងរប្រឆាំងនឹងមនុស្សជាតិ ករណីវាយប្រហារទៅលើហេដ្ឋារចនាសម្ព័ន្ធស៊ីវិលនៃប្រជាជនអ៊ុយក្រែន។ ដីកាចាប់ខ្លួននេះ ចេញដោយប្រធានរដ្ឋអាជ្ញា លោក Karim Khan ដែលដីកានេះទទួលបានការយល់ព្រមដោយចៅក្រម ICC។
គោលដៅនៃការចេញដីកាចាប់ខ្លួននេះ មិនបានកំណត់ថាមន្ត្រីរុស្ស៊ី ឬឧត្តមសេនីយ៍រុស្ស៊ីឈ្មោះណាពិតប្រាកដទេដែលប្រឈមមុខនឹងការចាប់ខ្លួន ប៉ុន្តែមន្ត្រីរុស្ស៊ី ឧត្តមសេនីយ៍រុស្ស៊ីជាច្រើននាក់ដែលរដ្ឋអាជ្ញា ICC ត្រូវចេញដីកាចាប់ខ្លួន។
ប្រធានរដ្ឋអាជ្ញា ICC លោក Karim Khan ដែលសម្រេចចេញដីកាចាប់ខ្លួនពួកឧត្តមសេនីយ៍យោធារុស្ស៊ីនេះ ធ្វើឡើងបន្ទាប់ពីលោកធ្វើដំណើរទៅទីក្រុងគៀវ ដោយបានជួបរដ្ឋអាជ្ញាអ៊ុយក្រែន និងប្រធានាធិបតី វ៉ូឡូឌីមៀរ ហ្សេឡេនស្គី។ ក្នុងជំនួបនោះ លោក ហ្សេឡេនស្គី បានស្នើឲ្យមានសាលាក្ដីពិសេសកាត់ទោសឧត្តមសេនីយ៍រុស្ស៊ី ពីបទឧក្រិដ្ឋកម្មសង្គ្រាម និងប្រល័យពូជសាសន៍ ហើយជាមួយគ្នានេះ លោក ហ្សេឡេនស្គី ទទូចឲ្យមានសាលាក្ដីពិសេសនេះប្រព្រឹត្តទៅនៅលើទឹកដីអ៊ុយក្រែន។
រដ្ឋអាជ្ញា ICC ដែលមានជំនាញស៊ើបអង្កេត និងស្រាវជ្រាវភស្តុតាងពាក់ព័ន្ធនឹងអំពើឧក្រិដ្ឋកម្មផ្សេងៗនៅលើពិភពលោក។
នៅពេលដែលសង្គ្រាមផ្ទុះឡើង ក្រុមរដ្ឋអាជ្ញានេះបានបញ្ជូនអ្នកស៊ើបអង្កេតរបស់ខ្លួនទៅប្រទេសអ៊ុយក្រែន ដោយបានទៅដល់ទីតាំងនៃការសម្លាប់ជនស៊ីវិលដោយកងទ័ពរុស្ស៊ី នៅតំបន់មួយនៅភាគខាងជើងរដ្ឋធានីគៀវ ដោយពេលនោះសាកសពជនរងគ្រោះមានទាំងមនុស្សស្រី និងកុមារ ហើយជនរងគ្រោះខ្លះស្លាប់ដោយដៃចងស្លាបសេកទៀតផង។
ក្រៅពីនេះ ក្រុមរដ្ឋអាជ្ញាបានទៅពិនិត្យមើលរណ្ដៅសាកសពរួមជាង ១ពាន់សាកសព ដែលប្រព្រឹត្តដោយកងទ័ពរុស្ស៊ី នៅទីក្រុង Mariupol។ ការទៅពិនិត្យមើលនេះ ក្រុមរដ្ឋអាជ្ញា ICC រកឃើញភ្លាមៗនូវអំពើឧក្រិដ្ឋកម្មដែលប្រព្រឹត្តដោយកងទ័ពរុស្ស៊ី។
ក្រោយពីរកឃើញសាកសពទាំងនោះ អង្គការសហប្រជាជាតិ និងសហភាពអឺរ៉ុប រួមទាំងសហរដ្ឋអាមេរិក ជំរុញឱ្យសាលាជំនុំជម្រះក្ដីពិសេសកាត់ទោសពួកឧត្តមសេនីយ៍រុស្ស៊ី ករណីពីរធំៗ គឺឧក្រិដ្ឋកម្មសង្គ្រាម និងអំពើប្រល័យពូជសាសន៍។
ប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី និងមេដឹកនាំពួកបស្ចិមប្រទេសមួយចំនួន បានប្រកាសថា ឧក្រិដ្ឋកម្មសង្គ្រាមនៅលើទឹកដីអ៊ុយក្រែននេះ គឺមិនត្រូវភ្លេចឈ្លោះលោក វ៉្លាឌីមៀរ ពូទីន ប្រធានាធិបតីរុស្ស៊ី ដែលជាអ្នកបញ្ជាលើកទ័ពចូលលុកលុយអ៊ុយក្រែន ហើយបង្កឲ្យមានវិនាសកម្មយ៉ាងធ្ងន់ធ្ងរបំផុត។
ក្រសួងការបរទេសអ៊ុយក្រែន បានបញ្ចេញរបាយការណ៍របស់ខ្លួនថា អគាររបស់ប្រជាជន រួមទាំងមន្ទីរពេទ្យ សាលារៀន យ៉ាងតិច ៥ពាន់ទីតាំងត្រូវបានបាញ់កម្ទេចដោយគ្រាប់មីស៊ីលរបស់រុស្ស៊ី។ លោក ហ្សេឡេនស្គី បានទទូចភ្លាមៗថាអំពើឧក្រិដ្ឋនេះត្រូវតែបង្ខំឱ្យលោក វ៉្លាឌីមៀរ ពូទីន ចេញមុខទទួលខុសត្រូវ។ យ៉ាងណា ប្រធានាធិបតីអាមេរិក ចូ បៃដិន បានហៅលោក ពូទីន ថាជាឧក្រិដ្ឋជនសង្គ្រាមរួចទៅហើយ។
ជាមួយគ្នានេះ ប្រទេសហុឡង់ដ៍ ដែលតុលាការយុត្តិធម៌អន្តរជាតិ ICJ និង ICC ស្ថិតនៅក្នុងប្រទេសនេះ រដ្ឋាភិបាលនៃប្រទេសហុឡង់ដ៍ បានចេញមុខរ៉ាប់រងឱ្យមានសាលាជំនុំជម្រះពិសេសនេះកើតឡើងនៅក្នុងទឹកដីហុឡង់ដ៍។ ICC និង ICJ គឺជាផ្នែកមួយនៃតុលាការអន្តរជាតិដែលគាំទ្រដោយអង្គការសហប្រជាជាតិ ករណីឧក្រិដ្ឋកម្មសង្គ្រាមប្រព្រឹត្តដោយទ័ពរុស្ស៊ី នៅលើទឹកដីអ៊ុយក្រែន។
តាមគោលការណ៍ បទបញ្ញត្តិពិសេសនៃសន្ធិសញ្ញាទីក្រុងរ៉ូម ឆ្នាំ១៩៩៧ តុលាការព្រហ្មទណ្ឌអន្តរជាតិ ICC ដែលមានយុត្តាធិការទទួលដោះស្រាយពាក្យបណ្តឹងពាក់ព័ន្ធនូវបទល្មើសព្រហ្មទណ្ឌអន្តរជាតិចំនួន៤ ក្នុងនោះមានបទឧក្រិដ្ឋប្រល័យពូជសាសន៍ បទឧក្រិដ្ឋប្រឆាំងមនុស្សជាតិ បទឧក្រិដ្ឋសង្គ្រាម និងបទឧក្រិដ្ឋឈ្លានពាន។
យ៉ាងណាមិញ តុលាការនេះមិនទាន់អាចអនុវត្តយុត្តាធិការរបស់ខ្លួនលើបទឧក្រិដ្ឋឈ្លានពានបានទេ។ តុលាការដែលមានយុត្តាធិការទូលំទូលាយ គឺតុលាការយុត្តិធម៌អន្តរជាតិ ICJ។ តុលាការនេះមានដែនសមត្ថកិច្ចលើហេតុការណ៍នៃបទឧក្រិដ្ឋឈ្លានពាន ដូចជាករណីរុស្ស៊ី ឈ្លានពានអ៊ុយក្រែន សព្វថ្ងៃនេះ៕