 ប្រសិនបើអង្គភាពសារព័ត៌មានមួយនេះមិនធ្វើការកែតម្រូវឡើងវិញទេនោះ បន្ទាប់ពីសារព័ត៌មានមួយនេះបានចុះផ្សាយទាក់ទិននឹងការលុបអាជ្ញាប័ណ្ណរបស់អង្គភាពសារព័ត៌មានចំនួន៣ ពីសំណាក់ក្រសួងព័ត៌មាន កាលពីពេលថ្មីៗនេះ។){kind=link}
ក្រសួងព័ត៌មាន ព្រមានចាត់វិធានការច្បាប់លើសម្ព័ន្ធអ្នកសារព័ត៌មានកម្ពុជា ខេមបូចា (CamboJA) ប្រសិនបើអង្គភាពសារព័ត៌មានមួយនេះមិនធ្វើការកែតម្រូវឡើងវិញទេនោះ បន្ទាប់ពីសារព័ត៌មានមួយនេះបានចុះផ្សាយទាក់ទិននឹងការលុបអាជ្ញាប័ណ្ណរបស់អង្គភាពសារព័ត៌មានចំនួន៣ ពីសំណាក់ក្រសួងព័ត៌មាន កាលពីពេលថ្មីៗនេះ។
ក្រសួងព័ត៌មាន បានចេញសេចក្តីជូនព័ត៌មានទៅកាន់អង្គភាពសម្ព័ន្ធអ្នកសារព័ត៌មានកម្ពុជា ខេមបូចា កាលពីថ្ងៃទី២០ ខែមីនា ឆ្នាំ២០២៣ ថា ការសម្រេចលុបអាជ្ញាប័ណ្ណអង្គភាពសារព័ត៌មានទាំង៣ នោះ គឺផ្អែកលើការប្រមូលព័ត៌មានពិតពីភាគីពាក់ព័ន្ធ មិនមែនដោយសារតែអង្គភាពសារព័ត៌មានទាំងនោះបានរាយការណ៍នូវព័ត៌មានដែលប៉ះពាល់ដល់តួនាទីរបស់មន្ត្រីជាន់ខ្ពស់ក្នុងជួររដ្ឋាភិបាលកម្ពុជា ជុំវិញជម្លោះដីធ្លីនៅខេត្តបន្ទាយមានជ័យ ដូចការចុះផ្សាយរបស់ ខេមបូចា នោះឡើយ។
ប្រភពដដែលលើកឡើងថា ការកាត់ចោលនូវចំណុចសំខាន់មួយចំនួននៃខ្លឹមសារបញ្ជាក់អំពីការសម្រេចចិត្តរបស់ក្រសួងព័ត៌មាន គឺជាចេតនាបំភាន់សាធារណជនឱ្យយល់ខុស ឬយល់ច្រឡំមកលើក្រសួងព័ត៌មាន អំពីការសម្រេចចិត្តលុបអាជ្ញាប័ណ្ណរបស់អង្គភាពសារព័ត៌មានទាំង៣ យ៉ាងធ្ងន់ធ្ងរ កាលពីពេលកន្លងទៅនេះ។
ក្រសួងព័ត៌មាន បញ្ជាក់ថា ករណីនេះមិនមែនជាករណីលើកទីមួយដែល ខេមបូចា បានប្រព្រឹត្តខុសឆ្គងនោះទេ ដូច្នេះការចុះផ្សាយដែលខុសការពិតបែបនេះ គឺជាការអនុវត្តផ្ទុយទៅនឹងគោលការណ៍នៃក្រមសីលធម៌វិជ្ជាជីវៈសារព័ត៌មាន ដែលមានចែងក្នុងច្បាប់របបសារព័ត៌មាននៃព្រះរាជាណាចក្រកម្ពុជាទាំងស្រុង។
កាលពីថ្ងៃទី១៨ ខែមីនា ឆ្នាំ២០២៣ អង្គភាពសម្ព័ន្ធអ្នកសារព័ត៌មានកម្ពុជា ខេមបូចា បានចុះផ្សាយអត្ថបទជាភាសាអង់គ្លេសមួយដែលមានចំណងជើងថា Information Ministry Revokes Three Media Licenses Following Reports on Senior Official’s Role in Land Fraud ដែលមានសេចក្តីប្រែសម្រួលថា ក្រសួងព័ត៌មានដកហូតអាជ្ញាប័ណ្ណប្រព័ន្ធផ្សព្វផ្សាយចំនួនបី បន្ទាប់ពីមានរបាយការណ៍ស្ដីពីតួនាទីមន្ត្រីជាន់ខ្ពស់ក្នុងការក្លែងបន្លំដីធ្លី។
ក្នុងខ្លឹមសារអត្ថបទនោះ បញ្ជាក់ថា The Information Ministry revoked the licenses of three media outlets on Thursday after they published reports exposing a senior government official’s role in land fraud ដែលមានសេចក្តីប្រែសម្រួលថា ក្រសួងព័ត៌មានបានដកហូតអាជ្ញាប័ណ្ណរបស់ប្រព័ន្ធផ្សព្វផ្សាយចំនួនបីកាលពីថ្ងៃព្រហស្បតិ៍ បន្ទាប់ពីពួកគេបានផ្សព្វផ្សាយរបាយការណ៍ដែលលាតត្រដាងតួនាទីមន្ត្រីជាន់ខ្ពស់របស់រដ្ឋាភិបាលក្នុងការលួចបន្លំដីធ្លីកន្លងមក។
យ៉ាងណាក៏ដោយ អង្គភាពសម្ព័ន្ធអ្នកសារព័ត៌មានកម្ពុជា ខេមបូចា កាលពីថ្ងៃទី២០ ខែមីនា បានធ្វើការកែតម្រូវឡើងវិញបន្ទាប់ពីរងនូវការព្រមានរបស់ក្រសួងព័ត៌មាន ដោយបញ្ជាក់ថា ហេតុផលទី៣ ដែលលើកឡើងដោយអ្នកនាំពាក្យក្រសួងព័ត៌មាន លោក មាស សោភ័ណ្ឌ ជុំវិញការសម្រេចចិត្តរបស់ក្រសួងក្នុងការដកហូតអាជ្ញាប័ណ្ណប្រព័ន្ធផ្សព្វផ្សាយទាំងបី គឺថាបណ្ដាញសារព័ត៌មានទាំង៣ នោះបានផ្សព្វផ្សាយព័ត៌មានមិនពិត ពីព្រោះប្រព័ន្ធផ្សព្វផ្សាយទាំងនោះត្រូវបានស្នើសុំឱ្យជួយពីភាគីផ្សេងទៀត ដែលត្រូវបានសន្យាថានឹងទទួលបានអត្ថប្រយោជន៍ ប្រសិនបើរឿងនោះត្រូវបានដោះស្រាយ។
កាលពីថ្ងៃទី១៦ ខែមីនា ឆ្នាំ២០២៣ ក្រសួងព័ត៌មានសម្រេចលុបអាជ្ញាប័ណ្ណរបស់អង្គភាពសារព័ត៌មានចំនួន៣ ក្រោមហេតុផលថា អង្គភាពសារព័ត៌មានទាំងនោះបានប្រព្រឹត្តកំហុសដោយគឃ្លើនខាងក្រមសីលធម៌វិជ្ជាជីវៈធ្ងន់ធ្ងរ ដោយមិនព្រមអនុវត្តតាមការអប់រំណែនាំរបស់ក្រសួងជាអាណាព្យាបាល ដែលផ្ទុយនឹងកិច្ចសន្យាអាជីវកម្មរបស់ខ្លួនដែលបានតម្កល់ទុកនៅក្រសួងកន្លងមក មានដូចជា អង្គភាពសារព័ត៌មានកម្ពុជា-អាស៊ាន អង្គភាពសារព័ត៌មានដំណឹងក្នុងស្រុក និងអង្គភាពសារព័ត៌មានរស្មីកំពង់ចាម ផងដែរ។
ទាក់ទិននឹងបញ្ហានេះ ក្រុមអ្នកសង្កេតការណ៍លើកឡើងថា អ្នកសារព័ត៌មាននៅកម្ពុជាតែងរងនូវការបំភិតបំភ័យ និងការគំរាមកំហែងពីសំណាក់រដ្ឋាភិបាលកម្ពុជាជាប់ជានិច្ច ដូចជាការហាមឃាត់អ្នកកាសែតមិនឲ្យថតសកម្មភាពដែលអាជ្ញាធរបានរារាំងពលរដ្ឋដែលធ្វើការតវ៉ារឿងអយុត្តិធម៌ជាដើម។ ជាងនេះទៀត ក៏មានការចាត់វិធានការផ្លូវច្បាប់ចំពោះអ្នកសារព័ត៌មានដែលបានស៊ើបអង្កេតលើករណីរសើបនានា ដូចជាការប្រព្រឹត្តអំពើពុករលួយធ្ងន់ធ្ងររបស់មន្ត្រីជាន់ខ្ពស់នៃរដ្ឋាភិបាលកម្ពុជា និងការចុះផ្សាយពាក់ព័ន្ធនឹងករណីនយោបាយរបស់បក្សកាន់អំណាច ជាដើម។
អង្គការអ្នកសារព័ត៌មានគ្មានព្រំដែន (Reporters Without Borders) បានដាក់ចំណាត់ថ្នាក់សេរីភាពសារព័ត៌មាននៅកម្ពុជាសម្រាប់ឆ្នាំ២០២២ ស្ថិតក្នុងលំដាប់លេខរៀងទី១៤២ ក្នុងចំណោមប្រទេស១៨០ ដោយសារតែគេរកឃើញថា ប្រព័ន្ធផ្សព្វផ្សាយឯករាជ្យនៅកម្ពុជាត្រូវបានបំផ្លិចបំផ្លាញ និងបោសសម្អាតដោយរដ្ឋាភិបាលកម្ពុជា ចាប់តាំងពីអំឡុងឆ្នាំ២០១៧ និងឆ្នាំ២០១៨ មក ដែលធ្វើឱ្យចំណាត់ថ្នាក់សេរីភាពសារព័ត៌មាននៅប្រទេសនេះបន្តធ្លាក់ចុះជាបន្តបន្ទាប់រហូតដល់ពេលនេះ៕