35 C
Phnom Penh

លោក ហ៊ុន ម៉ាណែត៖ សមយុទ្ធ​នាគ​មាស​ជា​ការ​កសាង​សហគមន៍​វាសនា​រួម​កម្ពុជា-ចិន​ឱ្យ​កាន់តែ​រឹងមាំ

ដោយ ឌឹ ខេមបូឌា ដេលី

បទវិភាគ

កូនប្រុស​មេដឹកនាំ​ក្រាញ​អំណាច​ដែល​ត្រៀម​ស្នង​តំណែង​ជា​នាយករដ្ឋមន្ត្រី លោក ហ៊ុន ម៉ាណែត អះអាង​ថា សមយុទ្ធ​នាគ​មាស​កម្ពុជា-ចិន ឆ្នាំ​២០២៣ នេះ នឹង​ចូលរួម​ចំណែក​យ៉ាង​សំខាន់​ក្នុង​ការ​គាំទ្រ​ដល់​ដំណើរការ​ទៅ​មុខ​នៃ​ភាព​ជា​ដៃគូ​យុទ្ធសាស្ត្រ​គ្រប់​ជ្រុងជ្រោយ ក៏ដូចជា​ការ​កសាង​សហគមន៍​វាសនា​រួម​កម្ពុជា-ចិន ឱ្យ​កាន់តែ​រឹងមាំ។

បេក្ខជន​អនាគត​នាយករដ្ឋមន្ត្រី​បក្ស​កាន់​អំណាច លោក ហ៊ុន ម៉ាណែត លើកឡើង​ក្នុង​ពិធី​បើក​សមយុទ្ធ​រួម​គ្នា​រវាង​កងទ័ព​កម្ពុជា-ចិន នៅ​មជ្ឈមណ្ឌល​ហ្វឹកហ្វឺន​កងរាជ​អាវុធហត្ថ​ភ្នំ​ជុំសែនរីករាយ ស្ថិត​ក្នុង​ខេត្ត​កំពង់ឆ្នាំង នៅ​ថ្ងៃទី​២៣ ខែ​មីនា ឆ្នាំ​២០២៣ នេះ​ថា ផ្តើម​ចេញពី​ទំនាក់ទំនង​ក្នុង​ប្រវត្តិសាស្ត្រ​រាប់​ពាន់​ឆ្នាំ និង​ការ​បង្កើត​ចំណង​ការទូត​រហូត​មក​ដល់​បច្ចុប្បន្ន​នេះ កម្ពុជា-ចិន​មាន​កិច្ច​សហប្រតិបត្តិការ​ល្អ​លើ​គ្រប់​វិស័យ រួម​ទាំង​វិស័យ​យោធា​ផង​ដែរ។

កូនប្រុស​មេដឹកនាំ​ក្រាញ​អំណាច​ត​ត្រកូល​នៅ​កម្ពុជា លោក ហ៊ុន ម៉ាណែត បញ្ជាក់​ថា សមយុទ្ធ​នាគ​មាស​នេះ គឺ​ជា​ផ្នែក​មួយ​នៃ​យន្តការ​អនុវត្ត​ក្នុង​ក្របខ័ណ្ឌ​នៃ​ការ​កសាង​សហគមន៍​វាសនា​រួម​កម្ពុជា-ចិន ក្នុង​យុគសម័យ​ថ្មី ស្រប​ពេល​ដែល​ឆ្នាំ​២០២៣ នេះ ត្រូវ​បាន​កំណត់​ជា​ឆ្នាំ​មិត្តភាព​កម្ពុជា-ចិន ដែល​ប្រទេស​ទាំង​ពីរ​បាន​ប្ដេជ្ញា​ជំរុញ​កិច្ច​សហប្រតិបត្តិការ​ក្នុង​ភាព​ជា​ដៃគូ​យុទ្ធសាស្ត្រ​គ្រប់​ជ្រុងជ្រោយ និង​ដើម្បី​ថែរក្សា​សន្តិភាព និង​ស្ថិរភាព​នៅ​ក្នុង​តំបន់​ផង​ដែរ។

ការ​ចូលរួម​សមយុទ្ធ​នាគ​មាស​ជំនួស​អគ្គមេបញ្ជាការ​នៃ​កងយោធពល​ខេមរភូមិន្ទ​នេះ ធ្វើឡើង​បន្ទាប់ពី​លោក ហ៊ុន ម៉ាណែត ត្រូវ​បាន​ដំឡើង​ឋានន្តរស័ក្តិ​ជា​នាយ​ឧត្តមសេនីយ៍​ផ្កាយ​មាស​៤ កាលពី​ពេល​ថ្មីៗ​នេះ ក្រោយពី​ព័ត៌មាន​លេច​ធ្លាយ​ថា ចិន​កំពុង​ងាក​ទៅ​រក​លោក ទៀ បាញ់ ដើម្បី​ធ្វើជា​ខ្នង​បង្អែក​របស់​កងទ័ព​ចិន​នៅ​កម្ពុជា​កាលពី​ពេល​កន្លង​ទៅ​នោះ។

អនុប្រធាន​វេទិកា​ពលរដ្ឋ លោក ម៉ែន ណាត ប្រាប់​សារព័ត៌មាន The Cambodia Daily នៅ​ថ្ងៃទី​២៣ មីនា នេះ​ថា ការ​ដំឡើង​ឋានន្តរស័ក្តិ​លោក ហ៊ុន ម៉ាណែត ជា​នាយ​ឧត្តមសេនីយ៍​ផ្កាយ​មាស​៤ ស្រប​ពេល​ដែល​គាត់​មាន​តួនាទី​ជា​អគ្គមេបញ្ជាការ​រង​នៃ​កងយោធពល​ខេមរភូមិន្ទ​ផង​នោះ មិនមែន​ត្រឹមតែ​បង្ហាញ​ឱ្យ​ឃើញ​ពី​ការ​រៀប​ផែនការ​ក្តោប​ក្តាប់​អំណាច​ឆ្ពោះ​ទៅ​កាន់​តំណែង​ជា​នាយករដ្ឋមន្ត្រី​បន្ត​ពី​លោក ហ៊ុន សែន ប៉ុណ្ណោះ​ទេ ប៉ុន្តែ​ក៏​ដើម្បី​ទប់ស្កាត់​ទំនាក់ទំនង​ចិន​ជាមួយ​អគ្គមេបញ្ជាការ​កងយោធពល​ខេមរភូមិន្ទ លោក ទៀ បាញ់ ផង​ដែរ។

លោក ម៉ែន ណាត អះអាង​ថា គេ​ក៏​អាច​មើល​ឃើញ​កាន់តែ​ច្បាស់​ពី​ការ​ប្លន់​អំណាច​របស់​លោក ហ៊ុន សែន ពី​មន្ត្រី​ជាន់ខ្ពស់​របស់​គណបក្ស​ប្រជាជន​កម្ពុជា​ឱ្យ​កូន​ខ្លួនឯង ដូច​ដែល​គាត់​ធ្លាប់​ប្លន់​អំណាច​ពី​លោក ប៉ែន សុវណ្ណ និង​លោក ចាន់ ស៊ី កាលពី​អំឡុង​ទសវត្សរ៍​ឆ្នាំ​១៩៨០ ដូច្នោះ​ដែរ ព្រោះ​លោក ហ៊ុន ម៉ាណែត នឹង​ឆ្ពោះ​ទៅ​កាន់​កងកម្លាំង​ប្រដាប់​អាវុធ​នៃ​កងយោធពល​ខេមរភូមិន្ទ​ឱ្យ​កាន់តែ​រឹងមាំ​មួយ​កម្រិត​ទៀត បន្ទាប់ពី​គាត់​បាន​ក្តោប​ក្តាប់ និង​រៀបចំ​កម្លាំង​កងទ័ព​ជើងគោក​ឱ្យ​ក្លាយ​ជា​កម្លាំង​ផ្ទាល់​ខ្លួនឯង​រួច​ហើយ​នោះ។

លោក​បន្ថែម​ថា ផែនការ​បន្ទាប់ លោក ហ៊ុន ម៉ាណែត នឹង​ត្រូវ​កម្ចាត់​កូន​មន្ត្រី​ជាន់ខ្ពស់​បក្ស​កាន់​អំណាច​ទាំងអស់​ដែល​មិន​ឯកភាព​នឹង​តំណែង​ជា​នាយករដ្ឋមន្ត្រី​របស់​គាត់ ហើយ​ក៏​ដើម្បី​ផ្តាច់​ទំនាក់ទំនង​ចិន​ជាមួយ​អ្នក​ទាំងនោះ​ឱ្យ​ងាក​មក​រក​គាត់​តែ​មួយ​ប៉ុណ្ណោះ​នៅ​ថ្ងៃ​មុខ ដើម្បី​ធានា​សុវត្ថិភាព​អំណាច​បន្ត​ពី​ឪពុក​របស់​ខ្លួន​សម្រាប់​ត្រកូល​ហ៊ុន​ទៅ​ថ្ងៃ​ក្រោយ។

ទាក់ទិន​នឹង​បញ្ហា​នេះ កាលពី​ថ្ងៃទី​២២ ខែ​មីនា ឆ្នាំ​២០២៣ បុរស​ខ្លាំង​ក្រាញ​អំណាច​ផ្ដាច់មុខ​នៅ​កម្ពុជា លោក ហ៊ុន សែន អះអាង​ថា ការ​ដំឡើង​ឋានន្តរស័ក្តិ​ឱ្យ​កូនប្រុស​បង្កើត​របស់​គាត់ លោក ហ៊ុន ម៉ាណែត គឺជា​ផែនការ​ឆ្ពោះ​ទៅ​រក​ការ​ក្តោប​ក្តាប់​អំណាច ដើម្បី​គ្រប់គ្រង​អំណាច​ជា​នាយករដ្ឋមន្ត្រី​នា​ពេល​ខាងមុខ។ លោក ហ៊ុន សែន គំរាម​ថា គ្មាន​នរណា​អាច​រារាំង​ផែនការ​នេះ​បាន​ឡើយ។

មេដឹកនាំ​ខ្មែរ​កាង​អំណាច​ត​ត្រកូល លោក ហ៊ុន សែន ព្រមាន​ថា អំណាច​ជា​នាយករដ្ឋមន្ត្រី​គឺ​ធំ​ជាង​អ្វីៗ​ទាំងអស់ កុំ​ថា​ឡើយ​ឋានៈ​ត្រឹម​ពាក់​ផ្កាយ សូម្បី​ពាក់​ដល់​លោក​ខែ ក៏​នាយករដ្ឋមន្ត្រី​អាច​ដក​ចេញពី​តំណែង​បាន​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស