សកម្មជនសង្គមជាច្រើននាក់ យកញត្តិទៅដាក់ជូនក្រសួងព័ត៌មាន ដើម្បីស្នើសុំឱ្យផ្តល់អាជ្ញាប័ណ្ណដល់អង្គភាពសារព័ត៌មានសំឡេងប្រជាធិបតេយ្យ វីអូឌី ឡើងវិញ បន្ទាប់ពីអង្គភាពសារព័ត៌មានមួយនេះត្រូវបានរដ្ឋាភិបាលបិទលែងឱ្យដំណើរការកាលពីពាក់កណ្តាលខែកុម្ភៈ កន្លងទៅ។
យុវជនសង្គមជាង ១០នាក់ នៅថ្ងៃទី៣១ ខែមីនា ឆ្នាំ២០២៣ បាននាំគ្នាយកញត្តិទៅដាក់នៅក្រសួងព័ត៌មាន ដើម្បីស្នើសុំឱ្យក្រសួងផ្តល់អាជ្ញាប័ណ្ណដល់អង្គភាពសារព័ត៌មាន វីអូឌី ឡើងវិញ ដើម្បីជួយផ្តល់ព័ត៌មានពិតពីប្រជាពលរដ្ឋនៅមូលដ្ឋានទៅកាន់រដ្ឋាភិបាល និងផ្តល់ការផ្សព្វផ្សាយរបស់រដ្ឋាភិបាលទៅកាន់ប្រជាពលរដ្ឋផងដែរ។
ក្រុមយុវជនសង្គមខាងលើលើកឡើងថា អង្គភាពសារព័ត៌មាន វីអូឌី បានដើរតួនាទីយ៉ាងសំខាន់ក្នុងការផ្តល់ព័ត៌មានពិតជូនរដ្ឋាភិបាលពីប្រជាពលរដ្ឋដែលជាម្ចាស់ឆ្នោត ហើយកាន់តែសំខាន់ទៀតនោះ កម្ពុជាក៏នឹងរៀបចំការបោះឆ្នោតជាតិនៅអាណត្តិទី៧ របស់ខ្លួនថែមទៀត ដូច្នេះដើម្បីធានានូវសេរីភាពបញ្ចេញមតិ និងសេរីភាពសារព័ត៌មាន រដ្ឋាភិបាលគួរតែបើកឱ្យសារព័ត៌មានឯករាជ្យអាចធ្វើសកម្មភាពរបស់ខ្លួនបានឡើងវិញនៅមុនពេលការបោះឆ្នោតជាតិដែលនឹងមកដល់នៅពេលខាងមុខនេះ។
ការដាក់ញត្តិនេះ ធ្វើឡើងបន្ទាប់ពីអង្គភាពសារព័ត៌មាន វីអូឌី ត្រូវបានក្រសួងព័ត៌មានដកអាជ្ញាប័ណ្ណលែងឱ្យដំណើរការតាមបញ្ជារបស់លោកនាយករដ្ឋមន្ត្រី ហ៊ុន សែន កាលពីពេលកន្លងទៅនេះ។
ញត្តិរបស់ក្រុមយុវជនដែលបានដាក់ជូនក្រសួងព័ត៌មាន នៅថ្ងៃទី៣១ ខែមីនា ឆ្នាំ២០២៣ នេះ ត្រូវបានមន្ត្រីក្រសួងព័ត៌មានទទួលជាបណ្ដោះអាសន្នសិន ប៉ុន្តែក្រសួងតម្រូវឱ្យយុវជនទាំងនោះធ្វើញត្តិថ្មីដោយកែតម្រូវកម្មវត្ថុស្នើសុំឱ្យជាក់លាក់ និងបញ្ជាក់ស្ថាប័នរបស់ពួកគេផងដែរ ដើម្បីយកមកប្តូរញត្តិដែលក្រុមយុវជនទាំងនោះបានយកមកដាក់ជូនក្រសួងនៅថ្ងៃនេះ។
កាលពីថ្ងៃទី១៣ ខែកុម្ភៈ ឆ្នាំ២០២៣ ក្រសួងព័ត៌មានបានបិទអង្គភាពសារព័ត៌មាន វីអូឌី បន្ទាប់ពីទទួលបានបញ្ជាពីលោក ហ៊ុន សែន ក្រោមហេតុផលថាអង្គភាពសារព័ត៌មាននេះបានរំលោភយ៉ាងធ្ងន់ធ្ងរលើវិជ្ជាជីវៈសារព័ត៌មាន ដែលធ្វើឲ្យប៉ះពាល់ដល់កិត្តិយស និងកិត្យានុភាពរបស់រាជរដ្ឋាភិបាលកម្ពុជាដែលមិនអាចលើកលែងឲ្យបាន។
កាលពីថ្ងៃទី៩ ខែកុម្ភៈ ឆ្នាំ២០២៣ អង្គភាពសារព័ត៌មានសំឡេងប្រជាធិបតេយ្យ VOD បានចុះផ្សាយអត្ថបទមួយពាក់ព័ន្ធនឹងលោក ហ៊ុន ម៉ាណែត ដែលមានចំណងជើងថា មន្ត្រីរដ្ឋាភិបាលអះអាងថា ការដែលលោក ហ៊ុន ម៉ាណែត ដើរតួនាទីជំនួសឪពុកក្នុងការផ្តល់ជំនួយឲ្យប្រទេសតួកគី មិនមែនជារឿងខុសឆ្គងទេ។
ជុំវិញការចុះផ្សាយនេះ ប្រមុខរដ្ឋាភិបាលកម្ពុជា លោក ហ៊ុន សែន បានប្រតិកម្មយ៉ាងខ្លាំង ដោយចោទថា អង្គភាពសារព័ត៌មាន VOD មានចេតនាមួលបង្កាច់មិនត្រឹមតែលើលោក ហ៊ុន ម៉ាណែត ប៉ុណ្ណោះទេ តែបានធ្វើឲ្យប៉ះពាល់ដល់រាជរដ្ឋាភិបាលទាំងមូលលើការគ្រប់គ្រងថវិកាជាតិថែមទៀត ក្នុងនោះលោក ហ៊ុន សែន បានបញ្ជាឱ្យក្រសួងព័ត៌មានដកអាជ្ញាប័ណ្ណរបស់អង្គភាពសារព័ត៌មាន វីអូឌី តែម្តង។
ប្រមុខរដ្ឋាភិបាលកម្ពុជា លោក ហ៊ុន សែន បញ្ជាក់ថា គ្មានការផ្លាស់ប្ដូរការសម្រេចចិត្តរបស់លោកចំពោះការបិទអង្គភាពសារព័ត៌មាន វីអូឌី នេះទេ ហើយការបិទនេះ ក៏នឹងមិនធ្វើឲ្យស្លាប់នូវសេរីភាពសារព័ត៌មាននៅកម្ពុជាដែរ។
កាលពីថ្ងៃទី១៣ ខែកុម្ភៈ ឆ្នាំ២០២៣ សហភាពអឺរ៉ុបប្រចាំកម្ពុជា បានអះអាងថា ស្ថានទូតប្រទេសបែលហ្សិក ប្រទេសឆេក ដាណឺម៉ាក ហ្វាំងឡង់ បារាំង អាល្លឺម៉ង់ អ៊ីតាលី ហុឡង់ដ៍ អេស្ប៉ាញ ស៊ុយអែត ប៉ូឡូញ និងព័រទុយហ្គាល់ ជាដើម មានការព្រួយបារម្ភយ៉ាងខ្លាំងចំពោះការសម្រេចចិត្តរបស់រាជរដ្ឋាភិបាលកម្ពុជាក្នុងការដកហូតអាជ្ញាប័ណ្ណរបស់វិទ្យុសំឡេងប្រជាធិបតេយ្យ VOD ដែលបង្ហាញពីការរាំងខ្ទប់ដំណើរការប្រព័ន្ធផ្សព្វផ្សាយឯករាជ្យនៅកម្ពុជាយ៉ាងធ្ងន់ធ្ងរ។
ចំណែកសភានៃសហភាពអឺរ៉ុប កាលពីថ្ងៃទី១៦ ខែមីនា ឆ្នាំ២០២៣ នេះ បានព្រមានដាក់ទណ្ឌកម្មពាណិជ្ជកម្មលើរដ្ឋាភិបាលលោក ហ៊ុន សែន ដោយការព្យួរប្រព័ន្ធអនុគ្រោះពន្ធ EBA បន្ថែមទៀត ប្រសិនបើរដ្ឋាភិបាលឯកបក្សរបស់លោក ហ៊ុន សែន មិនដោះលែងមេដឹកនាំសហជីព អ្នកការពារសិទ្ធិមនុស្ស និងបើកលំហសង្គមស៊ីវិល ព្រមទាំងត្រូវផ្តល់អាជ្ញាប័ណ្ណដល់ប្រព័ន្ធផ្សព្វផ្សាយឯករាជ្យ VOD ឡើងវិញទេនោះ។
អង្គការអ្នកសារព័ត៌មានគ្មានព្រំដែន (Reporters Without Borders) បានដាក់ចំណាត់ថ្នាក់សេរីភាពសារព័ត៌មាននៅកម្ពុជាសម្រាប់ឆ្នាំ២០២២ ស្ថិតក្នុងលំដាប់លេខរៀងទី១៤២ ក្នុងចំណោមប្រទេស១៨០ ដែលជាចំណាត់ថ្នាក់ដ៏អាក្រក់មួយ ក្រោយគេរកឃើញថា ប្រព័ន្ធផ្សព្វផ្សាយឯករាជ្យនៅកម្ពុជាត្រូវបានបំផ្លិចបំផ្លាញ និងបោសសម្អាតដោយរដ្ឋាភិបាលកម្ពុជាចាប់តាំងពីអំឡុងឆ្នាំ២០១៧ មក ដែលជំនួសមកវិញនូវសារព័ត៌មានដែលមាននិន្នាការគាំទ្របក្សកាន់អំណាចរបស់លោក ហ៊ុន សែន ពេញផ្ទៃប្រទេសសព្វថ្ងៃនេះ៕