រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ អះអាងថា សព្វថ្ងៃនេះ កម្ពុជាមានទីភ្នាក់ងារព័ត៌មានបរទេសចំនួន ១៧អង្គភាព និងសមាគមសារព័ត៌មានសរុបមានចំនួន ៥១អង្គភាព ដែលបង្ហាញថាកម្ពុជាបានបើកឱ្យមានសិទ្ធិសេរីភាពបញ្ចេញមតិ និងសេរីភាពខាងសារព័ត៌មានយ៉ាងទូលំទូលាយ។
លោក ខៀវ កាញារីទ្ធ លើកឡើងក្នុងពិធីបើកសន្និបាតបូកសរុបលទ្ធផលការងារ ៥ឆ្នាំ និងលើកទិសដៅការងារបន្តសម្រាប់ឆ្នាំ២០២៣ ដល់ឆ្នាំ២០២៨ របស់ក្រសួងព័ត៌មាន នៅថ្ងៃទី៥ ខែមេសា នេះថា ប្រទេសកម្ពុជាគឺជាប្រទេសតែមួយគត់ដែលបានរាប់បញ្ចូលអ្នកសារព័ត៌មានជាក្រុមអាទិភាពនៅអំឡុងពេលយុទ្ធនាការប្រឆាំងជំងឺកូវីដ-១៩ ដោយទទួលបានការចាក់វ៉ាក់សាំងបង្ការជំងឺនេះគ្រប់ៗគ្នា ដូច្នេះអ្នកសារព័ត៌មាននៅកម្ពុជាត្រូវបានយកចិត្តទុកដាក់យ៉ាងល្អពីសំណាក់រាជរដ្ឋាភិបាលរហូតមក។
លោកលើកឡើងបន្តថា ទន្ទឹមនឹងការរីកចម្រើននៃប្រព័ន្ធផ្សព្វផ្សាយ និងដោយមានការខិតខំប្រឹងប្រែងប្រកបដោយស្មារតីទទួលខុសត្រូវដែលមានកិច្ចសហការល្អរវាងប្រព័ន្ធផ្សព្វផ្សាយជាតិ និងវិស័យឯកជន បានធ្វើឱ្យក្រសួងព័ត៌មានសម្រេចបាននូវសមិទ្ធផលយ៉ាងត្រចះត្រចង់ជាច្រើន។
រដ្ឋមន្ត្រីក្រសួងព័ត៌មានរូបនេះបញ្ជាក់ថា បច្ចុប្បន្ននេះ នៅកម្ពុជាមានទីភ្នាក់ងារព័ត៌មានបរទេស និងការិយាល័យតំណាងវិទ្យុ និងទូរទស្សន៍បរទេសប្រចាំការអចិន្ត្រៃយ៍នៅកម្ពុជាមានចំនួន ១៧អង្គភាព និងសមាគមសារព័ត៌មានសរុបមានចំនួន ៥១អង្គភាព ដែលបានបង្ហាញពីសិទ្ធិសេរីភាពបញ្ចេញមតិ និងសេរីភាពខាងសារព័ត៌មាន ព្រមទាំងមានសក្ដានុពលនៃប្រព័ន្ធផ្សព្វផ្សាយនៅកម្ពុជាយ៉ាងខ្លាំងក្លាផងដែរ។
ក្រសួងព័ត៌មាន បានបញ្ចេញរបាយការណ៍របស់ខ្លួននៅថ្ងៃទី៥ ខែមេសា នេះថា បច្ចុប្បន្ននេះសារព័ត៌មានដែលបោះពុម្ពផ្សាយតាមបែបប្រពៃណីរួមមាន កាសែត ព្រឹត្តិបត្រ ទស្សនាវដី្ត បានចុះបញ្ជីនៅក្រសួងព័ត៌មានចំនួន ៦៦១អង្គភាព គេហទំព័រ និងទូរទស្សន៍អនឡាញមានចំនួន ៨៧៨អង្គភាព វិទ្យុ FM ដែលកំពុងដំណើរការផ្សាយមានចំនួន ២២១ស្ថានីយផងដែរ។
ជាងនេះទៀត ក៏មានទូរទស្សន៍ផ្សាយផ្ទាល់មានចំនួន ១៩ស្ថានីយ ទូរទស្សន៍ផ្សាយបន្តមានចំនួន ១៦៥ស្ថានីយ ទូរទស្សន៍ផ្កាយរណបមានចំនួន ២ស្ថានីយ គឺ Sky One និងតេជោ DTV ទូរទស្សន៍ឌីជីថល (Pay TV) មានចំនួន ៤ស្ថានីយ និងទូរទស្សន៍ប្រភេទ OTT (Over The-Top) មាន ៦ស្ថានីយថែមទៀត។
បើទោះបីជាកម្ពុជាមានប្រព័ន្ធផ្សព្វផ្សាយច្រើនក៏ដោយ ក៏កម្ពុជានៅតែជាប់ចំណាត់ថ្នាក់ទាបលើសេរីភាពសារព័ត៌មានដដែល។ ជាក់ស្តែង អង្គការអ្នកសារព័ត៌មានគ្មានព្រំដែន (Reporters Without Borders) បានដាក់ចំណាត់ថ្នាក់សេរីភាពសារព័ត៌មាននៅកម្ពុជាសម្រាប់ឆ្នាំ២០២២ ស្ថិតក្នុងលំដាប់លេខរៀងទី១៤២ ក្នុងចំណោមប្រទេស១៨០។
ការដាក់ចំណាត់ថ្នាក់ទាបបែបនេះ ក្រោយពីគេរកឃើញថា ប្រព័ន្ធផ្សព្វផ្សាយឯករាជ្យនៅកម្ពុជាត្រូវបានបំផ្លិចបំផ្លាញ និងបោសសម្អាតដោយរដ្ឋាភិបាលកម្ពុជាចាប់តាំងពីអំឡុងឆ្នាំ២០១៧ និងឆ្នាំ២០១៨ មក ដែលធ្វើឱ្យសេរីភាពសារព័ត៌មាននៅកម្ពុជាបន្តធ្លាក់ចុះជាបន្តបន្ទាប់រហូតមកទល់ពេលនេះ។
ទាក់ទិននឹងបញ្ហានេះ កាលពីដើមខែកុម្ភៈ ឆ្នាំ២០២៣ ក្រសួងព័ត៌មានបានលុបអាជ្ញាប័ណ្ណរបស់អង្គភាពសារព័ត៌មានសំឡេងប្រជាធិបតេយ្យ (VOD) ជាប្រព័ន្ធផ្សព្វផ្សាយឯករាជ្យដែលនៅសល់ពីការបោសសម្អាតកាលពីឆ្នាំ២០១៧ និងឆ្នាំ២០១៨ ដែលជាឆ្នាំដ៏អាក្រក់នៃការបំបិទសេរីភាពសារព័ត៌មាន និងសេរីភាពបញ្ចេញមតិនៅកម្ពុជានាពេលនោះ។
របាយការណ៍ឆ្នាំ២០២១ របស់អង្គការអ្នកកាសែតគ្មានព្រំដែន បានបង្ហាញថា បន្ទាប់ពីរដ្ឋាភិបាលកម្ពុជាប្រកាសរំលាយគណបក្សសង្គ្រោះជាតិកាលពីចុងឆ្នាំ២០១៧ លោក ហ៊ុន សែន បានប្រើយុទ្ធនាការប្រឆាំងនឹងប្រព័ន្ធផ្សព្វផ្សាយឯករាជ្យទាំងអស់ ក្នុងនោះរដ្ឋាភិបាលកម្ពុជាបានបិទស្ថានីយវិទ្យុចំនួន ៣២ស្ថានីយ បង្ខំឱ្យបិទទ្វារកាសែត ឌឹ ខេមបូឌា ដេលី និងការផ្លាស់ប្ដូរម្ចាស់កាសែតភ្នំពេញប៉ុស្តិ៍ ជាដើម។ ដោយឡែកនៅឆ្នាំ២០១៨ រដ្ឋាភិបាលបានបិទគេហទំព័រចំនួន ១៧គេហទំព័រថែមទៀត៕