អាជ្ញាធរក្រុងភ្នំពេញហាមយុវជន និងពលរដ្ឋមិនឲ្យលេងបាញ់ ឬគប់ស្បោងទឹក ប៉ាតម្សៅដល់អ្នកដំណើរ ដែលនាំឲ្យមានគ្រោះថ្នាក់ផ្សេងៗរហូតអាចឈានទៅបាត់បង់អាយុជីវិតអំឡុងពិធីបុណ្យចូលឆ្នាំថ្មីប្រពៃណីខ្មែរចាប់ពីថ្ងៃទី១៤ ដល់ថ្ងៃទី១៦ ខែមេសា ខាងមុខ។
ក្នុងសេចក្ដីជូនដំណឹងចុះថ្ងៃទី៥ ខែមេសា ឆ្នាំ២០២៣ រដ្ឋបាលសាលារាជធានីភ្នំពេញអំពាវនាវទៅប្រជាពលរដ្ឋចូលរួមលេងល្បែងប្រជាប្រិយគ្រប់ប្រភេទអំឡុងពិធីបុណ្យចូលឆ្នាំខ្មែរ ចាប់ពីថ្ងៃទី១៤ ដល់ថ្ងៃទី១៦ ខែមេសា ខាងមុខនេះ។ បន្ថែមពីនេះ ប្រជាពលរដ្ឋ ជាពិសេសក្មួយៗជាយុវជនយុវនារី សិស្សនិស្សិត និងកម្មករកម្មការិនីទាំងអស់ ត្រូវគោរពច្បាប់ចរាចរណ៍ផ្លូវគោក និងមិនត្រូវបើកបរក្នុងស្ថានភាពស្រវឹង និងចូលរួមទប់ស្កាត់គ្រោះអគ្គិភ័យចំពោះភ្លើងទៀន ធូប ភ្លើងចង្ក្រាន ចរន្តអគ្គិសនី ដើម្បីរក្សាបាននូវទ្រព្យសម្បត្តិអាយុជីវិតផ្ទាល់ខ្លួន និងអ្នកដទៃ។
ក្រៅពីឲ្យប្រជាពលរដ្ឋប្រុងប្រយ័ត្នហើយ សាលារាជធានីភ្នំពេញក៏ហាមឃាត់មិនឲ្យលេងបាញ់ទឹក ជះទឹក គប់ស្បោងទឹក លាបធ្យូង ប៉ាតម្សៅ ទះគក់ដោយដៃ ឬវាយដោយរំពាត់ដល់អ្នកដំណើរ ឬជិះម៉ូតូបង្ហោះប្រដេញគ្នាលេងនៅតាមផ្លូវ ដែលអាចនាំឲ្យមានគ្រោះថ្នាក់ជាយថាហេតុប៉ះពាល់ដល់អាយុជីវិតផ្ទាល់ខ្លួន និងអ្នកដំណើរ។ សម្រាប់ការលេងល្បែងស៊ីសង អុជផាវ និងគ្រឿងផ្ទុះគ្រប់ប្រភេទវិញ ត្រូវហាមដាច់ខាត។
អាជ្ញាធររាជធានីភ្នំពេញបានព្រមានចាត់វិធានការផ្លូវច្បាប់ចំពោះអ្នកប្រព្រឹត្តអំពើមិនគប្បីខាងលើ ដែលបង្កឲ្យប៉ះពាល់ដល់ប្រពៃណី សេចក្ដីថ្លៃថ្នូររបស់ជាតិ ក៏ដូចជាប៉ះពាល់ដល់សន្តិសុខ សុវត្ថិភាព សណ្ដាប់ធ្នាប់ និងរបៀបរៀបរយសាធារណៈក្នុងរាជធានីភ្នំពេញអំឡុងពិធីបុណ្យចូលឆ្នាំថ្មីប្រពៃណីខ្មែរ។
ប៉ុន្មានឆ្នាំចុងក្រោយនេះ គេសង្កេតឃើញថា យុវជន និងប្រជាពលរដ្ឋទាំងនៅទីក្រុងភ្នំពេញ និងបណ្ដាលខេត្តនានា តែងនាំគ្នាលេងបាញ់ទឹក គប់ ឬជះទឹក និងប៉ាតម្សៅតាមដងផ្លូវ ជាដើម នៅក្នុងឱកាសបុណ្យចូលឆ្នាំប្រពៃណីជាតិ ខណៈការលេងល្បែងប្រជាប្រិយខ្មែរវិញ ហាក់ដូចជាចាកឆ្ងាយបន្តិចម្ដង៕