ក្រសួងទេសចរណ៍កម្ពុជា អះអាងថា កម្ពុជាទទួលបានភ្ញៀវទេសចរធ្វើដំណើរកម្សាន្តទាំងជាតិ និងអន្តរជាតិជាង ១៣លាន ១សែននាក់ក្នុងឱកាសបុណ្យចូលឆ្នាំខ្មែររយៈពេល ៣ថ្ងៃ។
ក្រសួងទេសចរណ៍កម្ពុជា បានចេញរបាយការណ៍របស់ខ្លួននៅថ្ងៃទី១៧ មេសា នេះថា សម្រាប់រយៈពេល ៣ថ្ងៃនៃពិធីបុណ្យចូលឆ្នាំថ្មីប្រពៃណីជាតិខ្មែរមានភ្ញៀវទេសចរដើរលេងកម្សាន្តនៅតាមតំបន់ទេសចរណ៍ និងរមណីយដ្ឋាននានានៅទូទាំងប្រទេសសរុប ១៣លាន ១សែន ៨ម៉ឺននាក់ ក្នុងនោះភ្ញៀវជាតិជាង ១៣លាន ១សែន ៣ម៉ឺននាក់ ខណៈភ្ញៀវអន្តរជាតិមានចំនួនជាង ៥ម៉ឺន ៥ពាន់នាក់ប៉ុណ្ណោះ។
ប្រភពដដែលអះអាងថា គោលដៅទេសចរណ៍សំខាន់ៗសម្រាប់លេងកម្សាន្តអំឡុងពេលចូលឆ្នាំថ្មីខ្មែរមានចំនួន ៩ខេត្តនៅទូទាំងប្រទេស ដូចជារាជធានីភ្នំពេញ ខេត្តសៀមរាប និងខេត្តបាត់ដំបង ជាដើម ប៉ុន្តែខេត្តដែលមានភ្ញៀវទេសចរច្រើនជាងគេ គឺមានតែខេត្តសៀមរាប មួយប៉ុណ្ណោះ ដែលភ្ញៀវទេសចររហូតដល់ទៅជាង ២លាននាក់ ខណៈខេត្តបាត់ដំបង ទទួលបានភ្ញៀវទេសចរជាង ១លាន ៥សែននាក់ផងដែរ។
ប្រទេសកម្ពុជា បានប្រារព្ធពិធីបុណ្យចូលឆ្នាំខ្មែររយៈពេល ៣ថ្ងៃចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៣ នេះ ក្នុងនោះក៏មានការបើកពិធីអង្គរសង្ក្រាន្តនៅខេត្តសៀមរាប គម្រប់ខួប ១០ឆ្នាំនៃពិធីនេះផងដែរ បន្ទាប់ពីកម្ពុជាខកខានប្រារព្ធពិធីបុណ្យចូលឆ្នាំរបស់ខ្លួនអស់រយៈពេល ២ឆ្នាំ ដោយសារជំងឺកូវីដ-១៩ កាលពីពេលកន្លងទៅ។
ជុំវិញការប្រារព្ធពិធីបុណ្យចូលឆ្នាំថ្មីនេះ លោក ហ៊ុន សែន បានលើកឡើងក្នុងពិធីបើកព្រឹត្តិការណ៍អង្គរសង្ក្រាន្តកាលពីថ្ងៃទី១៤ ខែមេសា ឆ្នាំ២០២៣ នេះថា មានមូលហេតុមួយចំនួនដែលនាំឱ្យកើតមានព្រឹត្តិការណ៍អង្គរសង្ក្រាន្ត និងការរៀបចំសង្ក្រាន្តអបអរឆ្នាំថ្មីទូទាំងប្រទេសនោះ គឺដោយសារកម្ពុជាមានសុខសន្តិភាព ស្ថិរភាពនយោបាយ ឈ្នះលើជំងឺកូវីដ-១៩ និងការតភ្ជាប់ហេដ្ឋារចនាសម្ព័ន្ធពីគ្រប់ខេត្តនានា ជាដើម។
ទាក់ទិននឹងការរៀបចំពិធីបុណ្យចូលឆ្នាំខ្មែរនេះ ស្នងការដ្ឋាននគរបាលជាតិរាជធានីភ្នំពេញ បានឲ្យដឹងកាលពីថ្ងៃទី១៦ មេសា នេះថា រយៈពេល ៣ថ្ងៃក្នុងឱកាសពិធីបុណ្យចូលឆ្នាំថ្មី គ្រោះថ្នាក់ចរាចរណ៍នៅទូទាំងប្រទេសបានកើតឡើងចំនួន ៤៣លើក បណ្តាលឲ្យមនុស្សចំនួន ១៨នាក់ស្លាប់បាត់បង់ជីវិត និង ៧៧នាក់ទៀតរងរបួសធ្ងន់ស្រាល ដោយសារតែការបើកបរលើសល្បឿនកំណត់ និងទទួលទានគ្រឿងស្រវឹង។
ស្នងការដ្ឋាននគរបាលជាតិបញ្ជាក់ថា កម្លាំងសមត្ថកិច្ចចម្រុះជាង ៨ពាន់នាក់មកពី ១២អង្គភាព និងស្ថាប័ន រួមមានអគ្គស្នងការដ្ឋាននគរបាលជាតិ កងរាជអាវុធហត្ថ បញ្ជាការដ្ឋានអង្គរក្ស និងបញ្ជាការដ្ឋានជាតិប្រឆាំងភេរវកម្ម ជាដើម ត្រូវបានដាក់ពង្រាយនៅខេត្តសៀមរាប ដើម្បីរក្សាសុវត្ថិភាព សណ្ដាប់ធ្នាប់ នាឱកាសបុណ្យចូលឆ្នាំថ្មីនេះ។
ក្នុងពិធីបុណ្យចូលឆ្នាំថ្មីប្រពៃណីជាតិខ្មែរនេះ កម្ពុជាបានជាប់កំណត់ត្រាពិភពលោក (World Guinness Record) ដល់ទៅពីរផ្សេងគ្នា គឺទី១ កំណត់ត្រា អ្នករាំបទម៉ាឌីហ្សូនច្រើនជាងគេលើនៅពិភពលោក ដែលមានអ្នកចូលរួមរាំចំនួន ៤៩៩៩នាក់ និងទី២ កំណត់ត្រាពិភពលោកដែលមានបេះដូងក្រដាសច្រើនជាងគេនៅលើពិភពលោក៕