នាយករដ្ឋមន្ត្រីតពូជនៅប្រទេសកម្ពុជា លោក ហ៊ុន ម៉ាណែត ប្រកាសរៀបចំព្រឹត្តិការណ៍អង្គរសង្ក្រាន្តទ្រង់ទ្រាយធំឡើងវិញនៅខេត្តសៀមរាប ក្នុងពិធីបុណ្យចូលឆ្នាំថ្មីប្រពៃណីជាតិខ្មែរឆ្នាំ២០២៥ ដើម្បីទាក់ទាញភ្ញៀវទេសចរ។
ថ្លែងក្នុងពិធីចែកសញ្ញាបត្រដល់និស្សិតសាកលវិទ្យាល័យ សៅស៍អ៊ីសថ៍ អេយសៀ (Southeast Asia University) ក្នុងខេត្តសៀមរាប កាលពីថ្ងៃអង្គារ ទី២៥ ខែកុម្ភៈ លោក ហ៊ុន ម៉ាណែត អះអាងថា ខែមេសា ឆ្នាំនេះ នឹងមានការរៀបចំពិធីអង្គរសង្ក្រាន្តដ៏ធំនៅខេត្តសៀមរាប។
លោកបានរំលឹកប្រាប់យុវជនសហភាពសហព័ន្ធយុវជនកម្ពុជា (ស.ស.យ.ក.) ខេត្តសៀមរាប ថាត្រូវត្រៀមខ្លួនចូលរួម និងផ្សព្វផ្សាយសក្ដានុពលទេសចរណ៍កម្ពុជាទៅកាន់ពិភពលោក។
ទាក់ទងទៅនឹងព្រឹត្តិការណ៍អង្គរសង្ក្រាន្តនេះ ប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី និងលោក ប្រាក់ សោភណ្ឌ អភិបាលខេត្តសៀមរាប កាលពីខែមករា បានដឹកនាំក្រុមការងារពាក់ព័ន្ធចុះពិនិត្យទីតាំងមួយចំនួនក្នុងបរិវេណមុខប្រាសាទអង្គរវត្ត និងសួនច្បារព្រះរាជដំណាក់ ដើម្បីត្រៀមរៀបចំព្រឹត្តិការណ៍អង្គរសង្ក្រាន្តឆ្នាំ២០២៥។
សហភាពសហព័ន្ធយុវជនកម្ពុជាអះអាងថា ព្រឹត្តិការណ៍អង្គរសង្ក្រាន្តនឹងត្រឡប់មកជាថ្មីជាមួយនឹងទស្សនីយភាពសិល្បៈវប្បធម៌ដ៏សម្បូរបែបរបស់ដូនតាខ្មែរ ដើម្បីមកដាក់បង្ហាញសាធារណជនជាតិ និងអន្តរជាតិក្នុងឱកាសអបអរពិធីបុណ្យចូលឆ្នាំថ្មីប្រពៃណីជាតិខាងមុខ។
ព្រឹត្តិការណ៍អង្គរសង្ក្រាន្តបានរៀបចំឡើងជាផ្ទាំងទស្សនីយភាពវប្បធម៌ទ្រង់ទ្រាយធំជាលើកដំបូងនៅខេត្តសៀមរាប ក្នុងឆ្នាំ២០១៣ ក្រោមការផ្ដួចផ្ដើមរបស់សហភាពសហព័ន្ធយុវជនកម្ពុជា (ស.ស.យ.ក.) ក្នុងបំណងប្រមូលផ្ដុំយុវជន ក៏ដូចជាសាធារណជន ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ រំលឹកនិងធ្វើឱ្យរស់រវើកឡើងវិញនូវមរតកបេតិកភណ្ឌអរូបីខ្មែរ តាមរយៈការចូលរួមថែរក្សាវប្បធម៌ជាតិ និងលើកស្ទួយកិត្យានុភាពជាតិលើឆាកអន្តរជាតិ។
ពិធីអង្គរសង្ក្រាន្តត្រូវបានរដ្ឋាភិបាលកម្ពុជាប្រកាសប្រារព្ធជាលើកដំបូងនៅឆ្នាំ២០១៣ លើទឹកដីខេត្តសៀមរាប នៅក្នុងបរិវេណប្រាសាទអង្គរវត្ត ដើម្បីអបអរសាទរពិធីបុណ្យចូលឆ្នាំខ្មែរ និងបន្តប្រារព្ធពិធីនេះរហូតមកអស់រយៈពេល ១០ឆ្នាំហើយ។
ប៉ុន្តែនៅឆ្នាំ២០២៤ រដ្ឋាភិបាលថ្មីរបស់លោក ហ៊ុន ម៉ាណែត មិនបានប្រកាសប្រារព្ធពិធីអង្គរសង្ក្រាន្តនេះដូចមុនទេ ដែលទង្វើនេះមានលក្ខណៈផ្ទុយគ្នាស្រឡះពីផែនការរបស់រដ្ឋាភិបាលដែលខំប្រឹងជំរុញឱ្យមានកំណើនទេសចរណ៍ក្នុងស្រុក ដើម្បីជួយជំរុញកំណើនសេដ្ឋកិច្ចរបស់កម្ពុជាដែលកំពុងធ្លាក់ចុះសព្វថ្ងៃនេះ។
អតីតមន្ត្រីគណបក្សប្រជាជនកម្ពុជាធ្លាប់និយាយក្នុងលក្ខខណ្ឌមិនបញ្ចេញឈ្មោះថា ការប្រកាសផ្អាកពិធីអង្គរសង្ក្រាន្តឆ្នាំ២០២៤ ពីសំណាក់ប្រធានសហភាពសហព័ន្ធយុវជនកម្ពុជា (ស.ស.យ.ក) លោក ហ៊ុន ម៉ានី ដោយសារតែរដ្ឋាភិបាលលោក ហ៊ុន ម៉ាណែត ខ្វះលុយធ្ងន់ធ្ងរស្របពេលដែលសេដ្ឋកិច្ចក្នុងស្រុករបស់កម្ពុជាកំពុងធ្លាក់ចុះ ដោយសារឧបសគ្គចាក់ស្រេះដែលរដ្ឋាភិបាលដោះស្រាយមិនចេញ៕
© 2025, ឌឹ ខេមបូឌា ដេលី. All rights reserved.