38 C
Phnom Penh

សមត្ថកិច្ច​ឃាត់​ខ្លួន​ជនជាតិ​វៀតណាម​២​នាក់​ករណី​លួច​ដាំ​កញ្ឆា​លើ​ផ្ទៃដី​១​ហិកតារ​នៅ​មណ្ឌលគិរី

ដោយ ឌឹ ខេមបូឌា ដេលី

បទវិភាគ

សមត្ថកិច្ច​ចាប់​ខ្លួន​ជនជាតិ​វៀតណាម ២​នាក់ ករណី​ដែល​ពួកគេ​លួច​ដាំ​កញ្ឆា​លើ​ផ្ទៃដី ១​ហិកតារ​នៅ​ក្នុង​ខេត្ត​មណ្ឌលគិរី ខណៈ​អ្នកវិភាគ​នយោបាយ​ចាត់ទុក​ករណី​នេះ​ថា​ជា​សញ្ញា​គ្រោះថ្នាក់​ដ៏​ធំ​សម្រាប់​ប្រទេស​កម្ពុជា។

ទំព័រ​ហ្វេសប៊ុក​របស់​ស្នងការដ្ឋាន​នគរបាល​ខេត្ត​មណ្ឌលគិរី កាលពី​ថ្ងៃទី​១៥ ខែ​មេសា ឆ្នាំ​២០២៣ បាន​ផ្សាយ​ថា ជនជាតិ​វៀតណាម​ទាំង​ពីរ​នាក់​ដែល​ត្រូវ​បាន​កម្លាំង​ចម្រុះ​ឃាត់​ខ្លួន​មាន​ឈ្មោះ ង្វៀន វ៉ាន់ហ្វាង ភេទ​ប្រុស ជនជាតិ​វៀតណាម ទីលំនៅ​ភូមិ​វូយបា ឃុំ​ធុងដូរ ស្រុក​វិញ ខេត្ត​ងាអាន។ ចំណែក​ម្នាក់​ទៀត​ឈ្មោះ ហ្វាម វ៉ាន់ថាយ ភេទ​ប្រុស អាយុ ២៧​ឆ្នាំ ជនជាតិ​វៀតណាម មាន​ទីលំនៅ​ភូមិ​វូយបា ឃុំ​ធុងដូរ ស្រុក​វិញ ខេត្ត​ងាអាន ប្រទេស​វៀតណាម។

ក្រៅពី​ឃាត់​ខ្លួន​ជនជាតិ​វៀតណាម កម្លាំង​សមត្ថកិច្ច​ក៏​ចាប់​យក​បាន​វត្ថុ​តាង​រួមមាន កញ្ឆា​ស្ងួត​ចំនួន ០២​កញ្ចប់ និង​ជីគីមី​ចំនួន ៣០​ការុង ព្រមទាំង​ថ្នាំ​បំប៉ន​កញ្ឆា​កំប៉ុង កែវ​ជ័រ​បណ្ដុះ​កូន​កញ្ឆា​កែវ ជញ្ជីង​ថ្លឹង​កញ្ឆា​ក្រៀម ម៉ាស៊ីន​អ៊ុត​កញ្ចប់​កញ្ឆា ថង់​វេច​ខ្ចប់ ជី​ម្សៅ​បំប៉ន​កញ្ឆា​កញ្ចប់ ថ្នាំ​ជ្រលក់​កញ្ឆា​កំប៉ុង ថ្នាំ​បាញ់​ស្មៅ​កញ្ចប់ ជាដើម។

ចំណែក​ដើម​កញ្ឆា​ស្រស់​ជាង ១​ម៉ឺន​ដើម​ដែល​មាន​ទម្ងន់ ១២០៥​គីឡូក្រាម ត្រូវ​បាន​សមត្ថកិច្ច​ដុត​កម្ទេច​ចោល ខណៈ​ជនជាតិ​វៀតណាម​ទាំង​ពីរ​នាក់​ត្រូវ​បាន​កសាង​សំណុំរឿង​បញ្ជូន​ទៅ​សាលាដំបូង​ខេត្ត​មណ្ឌលគិរី ដើម្បី​ចាត់ការ​តាម​នីតិវិធី​ច្បាប់។

បើ​តាម​ស្នងការ​ខេត្ត​មណ្ឌលគិរី លោក ឡោ សុខា ប្រាប់​សារព័ត៌មាន​ក្នុង​ស្រុក​ថា ដើម​កញ្ឆា​ទាំងនោះ ជនជាតិ​វៀតណាម​បាន​ដាំ​ចន្លោះ ៣​ខែ​ទៅ ៤​ខែ ដោយ​មិនទាន់​អាច​ប្រមូល​ផល​បាន​ទេ ដោយសារ​ដើម​កញ្ឆា​អាច​ប្រមូល​ផល​បាន​ត្រូវ​មាន​អាយុ​ពី ៦​ខែ​ទៅ ៨​ខែ។

អ្នកវិភាគ​នយោបាយ និង​ជា​ប្រធាន​វេទិកា​ពលរដ្ឋ លោក គឹម សុខ និយាយ​ថា រឿង​ឧក្រិដ្ឋកម្ម​ឆ្លងដែន​ដ៏​ធំ​ចូល​មក​ប្រព្រឹត្ត​ដោយ​ជនជាតិ​វៀតណាម ក្នុង​ទឹកដី​ខ្មែរ​បែប​នេះ គឺ​ទាល់តែ​មាន​ការ​អនុញ្ញាត​ពី​អ្នក​ដឹកនាំ​កំពូល​ណា​ម្នាក់​ជា​ខ្នងបង្អែក ហើយ​ពួក​មន្ត្រី​អាជ្ញាធរ​មូលដ្ឋាន​ដើរ​តួ​ជា​សេនាធិការ​ជ្រោមជ្រែង ទើប​អាច​បំពាន​បាន​យ៉ាង​ងាយ និង​មាន​រយៈពេល​យូរ។

លោក​បន្ត​ថា ករណី​នេះ​ពុំ​មែន​មន្ត្រី​អាជ្ញាធរ​ទើប​តែ​ដឹង​នោះ​ទេ គឺ​ពួកគេ​ដឹង​ច្បាស់​តាំងពី​ដំបូង ប៉ុន្តែ​អាច​មាន​ហេតុផល​ពីរ​ដែល​ពួកគេ​ទើប​តែ​ចាត់​វិធានការ​នៅ​ពេលនេះ ទី​១ គឺ​អាច​ដោយសារ​ទំនាស់​ផល​ប្រយោជន៍ ទើប​លេង​ល្បែង​ចាត់ការ​គ្នា ហើយ​ទី​២ គឺ​ពួកគេ​ចាត់ការ​គ្នា​ដើម្បី​ផ្សាយ​យក​មុខ។

លោក​ចាត់ទុក​ករណី​នេះ​ថា​ជា​សញ្ញា​គ្រោះថ្នាក់​ដ៏​ធំ​សម្រាប់​ប្រទេស​កម្ពុជា ក្រោម​ការ​ដឹកនាំ​របស់​ក្រុម​គ្រួសារ​ហ៊ុន។ លោក​ថា​មិន​ត្រឹមតែ​មេដឹកនាំ​រដ្ឋ​វៀតណាម​ទេ​ដែល​ធ្វើ​ជា​ចៅហ្វាយ សូម្បីតែ​រដ្ឋាភិបាល​គ្រួសារ​ហ៊ុន បង្វិល​ប្រទេស​កម្ពុជា​តាម​ទំនើងចិត្ត ដែល​នាំ​ឲ្យ​ឈ្មួញ​វៀតណាម និង​ពួក​សង្គម​ងងឹត​វៀតណាម មាន​ឥទ្ធិពល​បញ្ជា​ពួក​មន្ត្រី​រដ្ឋាភិបាល​លោក ហ៊ុន សែន ថែម​ទៀត។

លោក គឹម សុខ ថា​ក្រោម​ការ​ដឹកនាំ​របស់​លោក ហ៊ុន សែន ប្រជាជន​វៀតណាម​ចូល​មក​ជាន់​ដី​កម្ពុជា​ដោយ​មោទកភាព ទោះ​ពួកគេ​ចូល​មក​ដោយ​ខុស​ច្បាប់ និង​ប្រព្រឹត្ត​អំពើ​ម៉ាហ្វីយ៉ា​ក៏ដោយ។

លោក​បន្ត​ថា ប្រទេស​កម្ពុជា​នៅ​ក្រោម​ការ​ដឹកនាំ​របស់​លោក ហ៊ុន សែន និង​បន្ត​ទៅ​លោក ហ៊ុន ម៉ាណែត គឺជា​កន្លែង​សាកល្បង​អំពើ​អបាយមុខ​របស់​វៀតណាម ដូចជា កញ្ឆា គ្រឿងញៀន ល្បែង​ស៊ីសង ការ​ជួញដូរ​មនុស្ស និង​ទីតាំង​ចែកចាយ​ទំនិញ​ខូច​គុណភាព ជាដើម៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស