គិតមកដល់ថ្ងៃទី៨ ខែឧសភា នេះ សង្គ្រាមរុស្ស៊ីឈ្លានពានអ៊ុយក្រែនចូលដល់ខែទី១៥ ហើយ។ យោងតាមរបាយការណ៍ភ្នាក់ងារចារកម្ម CIA របស់អាមេរិក រយៈពេល ៥ខែចុងក្រោយនេះ រុស្ស៊ីបាត់បង់ទ័ពនៅសមរភូមិភាគខាងកើត និងភាគខាងត្បូងប្រទេសអ៊ុយក្រែន មានជាង ១០ម៉ឺននាក់ ហើយក្នុងមួយថ្ងៃរុស្ស៊ីបាត់បង់ទ័ពពី ៣៨០នាក់ទៅ ៤០០នាក់។
តែជាមួយគ្នានេះ CIA អាមេរិកមិនបានបញ្ជាក់ថា ទ័ពអ៊ុយក្រែនបាត់បង់ប៉ុន្មានម៉ឺននាក់ក្នុងអំឡុង ៥ខែចុងក្រោយនេះទេ។
CIA បានបញ្ចេញរបាយការណ៍ថា ទ័ពរុស្ស៊ី និងទ័ពអ៊ុយក្រែន បើគិតពីរយៈពេល ១ឆ្នាំ ២ខែមកនេះ ប្រទេសទាំងពីរបានបាត់បង់ទ័ពចំនួនច្រើនដូចគ្នា។ រុស្ស៊ីបាត់បង់ទ័ពហក់ឡើងដល់ទៅជាង ២៣ម៉ឺននាក់ ហើយអ៊ុយក្រែន ជាង ១២ម៉ឺននាក់។
តុល្យាការនៃសង្គ្រាមនេះ រុស្ស៊ីដែលជាប្រទេសមហាអំណាចបានឈានទៅដល់ការប្រើប្រាស់អាវុធទំនើបៗរបស់ខ្លួន ដូចជាការបាញ់មីស៊ីលល្បឿនលឿនជាងសំឡេងចូលទៅទឹកដីអ៊ុយក្រែន ហើយអ៊ុយក្រែននោះវិញ ក៏ចាប់ផ្ដើមប្រើប្រាស់អាវុធទំនើបៗជាជំនួយរបស់អាមេរិក និងបស្ចិមប្រទេស។
ដំណាក់កាលចុងក្រោយនេះ រុស្ស៊ីបញ្ចេញរថក្រោះជំនាន់ថ្មីរបស់ខ្លួន គឺរថក្រោះ T-14 Amata និងយន្តហោះទម្លាក់គ្រាប់បែកយុទ្ធសាស្ត្រ Tu-160។ សព្វាវុធពីរប្រភេទរបស់រុស្ស៊ីនេះ ត្រូវរុស្ស៊ីចាប់ផ្ដើមប្រើប្រាស់វានៅថ្ងៃទី១ ខែឧសភា ក្រោយមួយថ្ងៃដែលអ៊ុយក្រែន បើកការវាយបកដំណាក់កាលដំបូងចូលទៅទីតាំងរបស់កងទ័ពរុស្ស៊ី នៅភាគខាងកើតប្រទេស ហើយចំពេលដែលអ៊ុយក្រែន ក៏ចាប់ផ្ដើមប្រើប្រាស់ប្រព័ន្ធមីស៊ីលរបស់សហរដ្ឋអាមេរិក បាទ្រីយ៉ូត និងរថក្រោះធុនធ្ងន់ Leopard 2 ជាបច្ចេកវិទ្យារបស់អាល្លឺម៉ង់ ដែលត្រូវបានក្រុមប្រទេសណាតូប្រើប្រាស់ច្រើនបំផុតក្នុងទសវត្សចុងក្រោយនេះ។
ការប្រយុទ្ធគ្នានៅពេលនេះ ទាំងរុស្ស៊ី និងអ៊ុយក្រែន បង្ហាញសព្វាវុធជំនាន់ថ្មីដូចៗគ្នា។
នៅលើសមរភូមិគេឃើញរថក្រោះ Leopard 2 របស់ពួកណាតូត្រូវបានប្រើយ៉ាងសកម្មនៅលើទឹកដីអ៊ុយក្រែន ដែលណាតូបញ្ជូនទៅឲ្យអ៊ុយក្រែន ២៣០គ្រឿង។ ក្រៅពីនេះ អ៊ុយក្រែនប្រើប្រាស់រថពាសដែកស៊េរីថ្មីរបស់ពួកណាតូដល់ទៅ ១៥៥០គ្រឿង។ តាមដំណឹងមកថា អ៊ុយក្រែននឹងប្រើប្រាស់រថក្រោះទាំងអស់នេះរបស់ណាតូ ក្នុងការវាយលុកទ្រង់ទ្រាយធំដើម្បីរំដោះទឹកដីអ៊ុយក្រែនពីរុស្ស៊ីមកវិញដោយរាប់ទាំងឧបទ្វីបគ្រីមៀរ។
ខណៈនេះ រុស្ស៊ីដែលត្រូវបានអ្នកជំនាញមើលឃើញថាប្រទេសមហាអំណាចនេះទំនងមិនបើកការវាយលុកចូលទៅទឹកដីរបស់អ៊ុយក្រែនទៀតនោះទេ អាចត្រឹមតែវាយការពារទីតាំងរបស់ខ្លួនតែប៉ុណ្ណោះដែលរុស្ស៊ីវាយយកបានតំបន់មួយចំនួននៅភាគខាងកើត និងភាគខាងត្បូងប្រទេស។
យ៉ាងណា រុស្ស៊ីដែលបាត់បង់រថក្រោះធុនធ្ងន់ជិត ៤ពាន់គ្រឿងទៅហើយនោះ ប្រទេសមហាអំណាចនេះកំពុងតែចុះខ្សោយទ័ពថ្មើរជើង ព្រោះតែបាត់បង់ទ័ពយ៉ាងច្រើនពុំធ្លាប់មាន បើធៀបនឹងសហភាពសូវៀតលើកទ័ពលុកលុយប្រទេសអាហ្វហ្គានីស្ថាន កាលពីទសវត្ស១៩៨០ គឺសហភាពសូវៀតបាត់បង់ទ័ពតែ ២ម៉ឺន ៥ពាន់នាក់ប៉ុណ្ណោះក្នុងសង្គ្រាម ១០ឆ្នាំ។
អ្នកជំនាញផ្នែកយោធាព្រមានថា ដំណាក់កាលចុងក្រោយនេះសង្គ្រាមនៅលើទឹកដីអ៊ុយក្រែនអាចនឹងប្រែប្រួល ហើយការប្រែប្រួលនេះវាមានគោលដៅពីរនៅពេលតែមួយ។ មានន័យថា អ៊ុយក្រែនអាចនឹងយកឧបទ្វីបគ្រីមៀរបានពីរុស្ស៊ីមកវិញ ហើយពេលនោះ វានឹងផ្ទុះទៅរកសង្គ្រាមថ្មីមួយទៀតរបស់រុស្ស៊ី ដែលរុស្ស៊ីអាចនឹងប្រើអាវុធប្រល័យលោក គឺអាវុធនុយក្លេអ៊ែរ។
អតីតប្រធានាធិបតីរុស្ស៊ី ឌីមេទ្រី មីដវេឌៀវ ដែលបច្ចុប្បន្នជានាយករងទីមួយនៃក្រុមប្រឹក្សាសន្តិសុខជាតិរុស្ស៊ី ព្រមានរួចស្រេចហើយថា បើគ្រីមៀរធ្លាក់ក្នុងសង្គ្រាមវាយលុករបស់អ៊ុយក្រែន អាវុធទំនើបៗរបស់រុស្ស៊ីទាំងអស់នឹងត្រូវបញ្ចេញប្រើប្រាស់ដោយរួមទាំងអាវុធនុយក្លេអ៊ែរទៀតផង។
ការដែលរុស្ស៊ីបាញ់គ្រាប់មីស៊ីលល្បឿនលឿនជាងសំឡេង គីងហ្សារ ទៅលើប្រទេសអ៊ុយក្រែនដំណាក់កាលសង្គ្រាមចុងក្រោយនេះ បើទោះជាត្រូវបាន ប៉ាទ្រីយ៉ូតអាមេរិកជាប្រព័ន្ធមីស៊ីលដ៏ទំនើបរបស់មហាអំណាចនេះបាញ់ទម្លាក់ក៏ដោយ ក៏រុស្ស៊ីនៅមានអាវុធទំនើបជាងនេះទៅទៀត ដូចជាមីស៊ីលខ្នាតយក្ស Satan 2 ដែលវាអាចរត់បាន ៣០០០ ទៅ ៥០០០គីឡូម៉ែត្រ អាចនឹងត្រូវប្រើប្រាស់ដំណាក់កាលសង្គ្រាមចុងក្រោយ។ ចំណែកអ៊ុយក្រែនវិញ ពឹងផ្អែកទាំងស្រុងទៅលើអាវុធជំនួយរបស់ពួកបស្ចិមប្រទេស។
សហរដ្ឋអាមេរិក និងអ៊ីស្រាអែល ធ្លាប់បានព្រមានហើយថា បើរុស្ស៊ីបញ្ចេញអាវុធទំនើបៗវាយប្រហារទៅលើប្រទេសអ៊ុយក្រែន ប្រទេសពីរនេះនឹងបញ្ជូនមីស៊ីលផ្លោងអន្តរទ្វីបទៅឲ្យអ៊ុយក្រែន។ ឥឡូវនេះ ដំណាក់កាលចុងក្រោយនេះ ប្រទេសទាំងពីរចាប់ផ្ដើមប្រើប្រាស់អាវុធទំនើបបណ្ដើរៗហើយ៕