27 C
Phnom Penh

ក្រុមប្រឹក្សា​ធម្មនុញ្ញ​នឹង​ប្រជុំ​ពិភាក្សា​លើ​បណ្តឹង​តវ៉ា​របស់​បក្ស​នយោបាយ​ពីរ​នៅ​ថ្ងៃទី​២៥​ឧសភា

ដោយ ឌឹ ខេមបូឌា ដេលី

បទវិភាគ

ក្រុមប្រឹក្សា​ធម្មនុញ្ញ​លើកឡើង​ថា នឹង​បើក​កិច្ចប្រជុំ​ពិភាក្សា​លើ​បណ្តឹង​តវ៉ា​របស់​គណបក្ស​ភ្លើង​ទៀន និង​គណបក្ស​មហា​សាមគ្គី​ជាតិ​ខ្មែរ នៅ​ថ្ងៃទី​២៥ ខែ​ឧសភា ឆ្នាំ​២០២៣ បន្ទាប់ពី​គណៈកម្មាធិការ​ជាតិ​រៀបចំ​ការ​បោះឆ្នោត​បដិសេធ​ចុះបញ្ជី​គណបក្ស​នយោបាយ​ឈរ​ឈ្មោះ​បោះឆ្នោត។

សេចក្តី​ប្រកាស​ព័ត៌មាន​របស់​ប្រធាន​ក្រុមប្រឹក្សា​ធម្មនុញ្ញ​ចុះ​ថ្ងៃទី​២៣ ខែ​ឧសភា ថា ប្រធាន​ក្រុមប្រឹក្សា​ធម្មនុញ្ញ​នឹង​បើក​កិច្ចប្រជុំ​បណ្តឹង​របស់​គណបក្ស​ភ្លើង​ទៀន និង​គណបក្ស​មហា​សាមគ្គី​ជាតិ​ខ្មែរ នៅ​ថ្ងៃទី​២៥ ខែ​ឧសភា នេះ។

គណបក្ស​ភ្លើង​ទៀន បាន​ដាក់​បណ្ដឹង​តវ៉ា​ទៅ​ក្រុមប្រឹក្សា​ធម្មនុញ្ញ បន្ទាប់ពី​គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) បដិសេធ​ការ​ចុះបញ្ជី​គណបក្ស​នយោបាយ​ឈរ​ឈ្មោះ​បោះឆ្នោត និង​បេក្ខជន​ឈរ​ឈ្មោះ​បោះឆ្នោត​សម្រាប់​បោះឆ្នោត​ជ្រើសតាំង​តំណាងរាស្ត្រ​នីតិកាល​ទី​៧ នៅ​ខែ​កក្កដា ខាងមុខ​នេះ។

ការ​បដិសេធ​ការ​ចុះបញ្ជី​នេះ ដោយ គ.ជ.ប លើក​ហេតុផល​ថា បក្ស​ភ្លើង​ទៀន​មិន​បាន​ភ្ជាប់​ប្រកាស​ស្ដីពី​ការ​ចុះឈ្មោះ​ក្នុង​បញ្ជី​គណបក្ស​នយោបាយ​នៅ​ក្រសួង​មហាផ្ទៃ ដែល​មាន​បញ្ជាក់​នីត្យានុកូលកម្ម​ដោយ​រដ្ឋបាល​រាជធានី ខេត្ត ក្រុង ស្រុក ខណ្ឌ នៅ​ការិយាល័យ​ច្រក​ចេញចូល​តែ​មួយ​ឱ្យ​បាន​ត្រឹមត្រូវ​ស្រប​តាម​កថាខណ្ឌ​ទី​២ និង​ចំណុច​ទី​១ ក្នុង​មាត្រា​២៧ នៃ​ច្បាប់​ស្ដីពី​ការ​បោះឆ្នោត​ជ្រើសតាំង​តំណាងរាស្ត្រ​នោះ​ទេ។

ប៉ុន្តែ​ការ​បដិសេធ​របស់​គណៈកម្មាធិការ​ជាតិ​រៀបចំ​ការ​បោះឆ្នោត​ដែល​មិន​ចុះបញ្ជី​នេះ ត្រូវ​អ្នក​ឃ្លាំមើល​ការ​បោះឆ្នោត និង​អ្នកវិភាគ ថា​ជា​ការ​ធ្វើ​ទុក្ខបុកម្នេញ​លើ​គណបក្ស​ភ្លើង​ទៀន​ជាង​ការ​ខ្វះខាត​ឯកសារ ខណៈ​ឯកសារ​ទាំងនោះ គឺ គ.ជ.ប ធ្លាប់​ទទួលស្គាល់ និង​អនុញ្ញាត​ឲ្យ​គណបក្ស​ភ្លើង​ទៀន​ចូលរួម​ការ​បោះឆ្នោត​ឃុំ-សង្កាត់​រួច​ហើយ​កាលពី​ឆ្នាំ​២០២២៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស