មន្ត្រីជាន់ខ្ពស់គណបក្សភ្លើងទៀន ស្នើសុំសាលាដំបូងរាជធានីភ្នំពេញចូលទៅសួរសុខទុក្ខលោក ថាច់ សេដ្ឋា នៅក្នុងពន្ធនាគារ បន្ទាប់ពីអនុប្រធានបក្សភ្លើងទៀនរូបនេះត្រូវបានតុលាការឃុំខ្លួនចាប់តាំងពីពាក់កណ្តាលខែមករា ឆ្នាំ២០២៣។
មេធាវីការពារក្តីឱ្យលោក ថាច់ សេដ្ឋា គឺលោក ជូង ជូងី បានដាក់ពាក្យស្នើសុំទៅតុលាការកាលពីថ្ងៃទី២៤ ខែឧសភា ឆ្នាំ២០២៣ ដោយសុំឱ្យមន្ត្រីជាន់ខ្ពស់គណបក្សភ្លើងទៀន ដូចជាលោក ទាវ វណ្ណុល លោក ហុង សុខហួរ និងលោក គឹម សួរភិរិទ្ធ បានចូលទៅសួរសុខទុក្ខលោក ថាច់ សេដ្ឋា ដែលកំពុងត្រូវបានឃុំខ្លួននៅពន្ធនាគារព្រៃស ឬមណ្ឌលអប់រំកែប្រែ ម១ នៅពេលនេះ។
លោក ជូង ជូងី អះអាងថា លោកបានដាក់ពាក្យទៅអគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃ ដើម្បីសុំឱ្យថ្នាក់ដឹកនាំគណបក្សភ្លើងទៀនបានចូលសួរសុខទុក្ខលោក ថាច់ សេដ្ឋា ដែរ ប៉ុន្តែអគ្គនាយកនៃអគ្គនាយកដ្ឋានពន្ធនាគារយល់ឃើញថា លោក ថាច់ សេដ្ឋា ស្ថិតក្នុងនីតិវិធីតុលាការ ដូច្នេះត្រូវតែសុំការអនុញ្ញាតពីអាជ្ញាធរតុលាការ ទើបត្រឹមត្រូវតាមនីតិវិធី។
អនុប្រធានគណបក្សភ្លើងទៀន លោក ថាច់ សេដ្ឋា ត្រូវសមត្ថកិច្ចរាជធានីភ្នំពេញចាប់ខ្លួនកាលពីថ្ងៃទី១៦ ខែមករា ឆ្នាំ២០២៣ ក្រោមបទចោទមិនបំពេញកាតព្វកិច្ចចំពោះឧបករណ៍អាចជួញដូរបាន ឬចេញសែកស្អុយចំនួន ៥សន្លឹកកាលពីអំឡុងឆ្នាំ២០១៩ ប៉ុន្តែការចាប់ខ្លួននេះត្រូវក្រុមអ្នកឃ្លាំមើល អ្នកវិភាគ និងមន្ត្រីបក្សភ្លើងទៀន ចាត់ទុកជារឿងនយោបាយ ដែលជាការធ្វើទុក្ខបុកម្នេញលើគណបក្សភ្លើងទៀននៅមុនការបោះឆ្នោតជាតិឆ្នាំ២០២៣ នេះ។
ក្រោយឃុំខ្លួនក្រោមបទចោទចេញសែកស្អុយ កាលពីចុងខែមេសា ឆ្នាំ២០២៣ លោក ដាច់ សេដ្ឋា ក៏ត្រូវសាលាដំបូងរាជធានីភ្នំពេញចោទប្រកាន់នូវបទល្មើសចំនួនពីរបន្ថែមទៀត គឺបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់ឱ្យមានការរើសអើងតាមមាត្រា៤៩៤ និងមាត្រា៤៩៥ នៃក្រមព្រហ្មទណ្ឌ។
យ៉ាងណាក៏ដោយ កាលពីថ្ងៃទី១០ ខែឧសភា ឆ្នាំ២០២៣ ក្នុងសវនាការដែលតុលាការដេញដោលលើបទចោទថ្មីនេះ អនុប្រធានគណបក្សភ្លើងទៀន លោក ថាច់ សេដ្ឋា បានស្នើទៅតុលាការក្រុងភ្នំពេញឱ្យទម្លាក់បទចោទទាំងនេះ ដោយលោកអះអាងថា លោកមិនបានប្រព្រឹត្តដូចការចោទប្រកាន់នោះឡើយ។
គិតមកទល់នឹងថ្ងៃទី២៦ ខែឧសភា ឆ្នាំ២០២៣ នេះ លោក ថាច់ សេដ្ឋា ត្រូវបានឃុំនៅនៅពន្ធនាគារព្រៃស (ម១) អស់រយៈពេល ១៣០ថ្ងៃ ឬជាង ៤ខែហើយ ក្នុងនោះប្រសិនបើតុលាការសម្រេចផ្ដន្ទាទោសលោក ថាច់ សេដ្ឋា លើសំណុំរឿងថ្មីនេះទៀត នោះអនុប្រធានគណបក្សភ្លើងទៀនរូបនេះនឹងត្រូវប្រឈមមុខជាប់ពន្ធនាគារពី ០៦ខែរហូតដល់ ២ឆ្នាំឯណោះ។
ក្រុមអ្នកសង្កេតការណ៍លើកឡើងថា ការចាប់ខ្លួន និងចោទប្រកាន់ពីបទផ្សេងៗជាបន្តបន្ទាប់លើលោក ថាច់ សេដ្ឋា គឺជាការរឹតត្បិតផ្នែកនយោបាយនៅមុនការបោះឆ្នោតប៉ុណ្ណោះ ព្រោះថាបើទាក់ទងនឹងរឿងបំណុល ការឃុំខ្លួនលោក ថាច់ សេដ្ឋា នៅក្នុងពន្ធនាគារបែបនេះមិនអាចជាដំណោះស្រាយរឿងបំណុលបានទេ ប៉ុន្តែមានតែរឿងនយោបាយប៉ុណ្ណោះទើបគេធ្វើបែបនេះ ហើយលោក ថាច់ សេដ្ឋា ក៏នឹងមិនងាយទទួលបានសេរីភាពឡើងវិញដែរ។
ទិន្នន័យសង្គមស៊ីវិលបានបង្ហាញកាលពីពេលថ្មីៗនេះថា អ្នកទោសមនសិការដែលត្រូវរដ្ឋាភិបាលកម្ពុជាឃុំខ្លួនទាំងអយុត្តិធម៌មានរាប់រយនាក់ ក្នុងនោះក៏មានអ្នកទោសដែលជាសកម្មជននយោបាយ សកម្មជនសិទ្ធិមនុស្ស សកម្មជនដីធ្លី សហជីព និងអ្នកសារព័ត៌មានផងដែរ ដែលអ្នកខ្លះត្រូវជាប់ពន្ធនាគារជាង ១ឆ្នាំ និងខ្លះទៀតត្រូវជាប់ឃុំដល់រហូតដល់ ១៥ឆ្នាំក៏មាន។
គម្រោងយុត្តិធម៌ពិភពលោក (The World Justice Project) បានចេញរបាយការណ៍របស់ខ្លួនស្ដីពីនីតិរដ្ឋសម្រាប់ឆ្នាំ២០២២ ថា កម្ពុជាបានជាប់ចំណាត់ថ្នាក់លេខទី១៣៩ ក្នុងចំណោម ១៤០ប្រទេសដែលមាននីតិរដ្ឋទាបបំផុត ដោយសារតែការដឹកនាំរបស់រដ្ឋាភិបាលកម្ពុជាគ្មានតម្លាភាព មានការគំរាមកំហែងសិទ្ធិជាមូលដ្ឋានរបស់ពលរដ្ឋ និងការមិនធានាបាននូវប្រព័ន្ធយុត្តិធម៌របស់ខ្លួន ជាដើម៕