37 C
Phnom Penh

អតីត​មន្ត្រី​ជាន់ខ្ពស់​កម្ពុជា​ចោទ​គ្រួសារ​លោក ទៀ បាញ់ កំពុង​ប្រព្រឹត្ត​ឧក្រិដ្ឋកម្ម​ធំៗ​នៅ​លម្ហ​សមុទ្រ​ខ្មែរ

ដោយ ឌឹ ខេមបូឌា ដេលី

បទវិភាគ

អតីត​មន្ត្រី​ជាន់ខ្ពស់​ខាង​ផ្នែក​ការពារ​លម្ហ​សមុទ្រ​ខេត្ត​កោះកុង ចោទ​ថា​ក្រុម​គ្រួសារ​ត្រកូល ទៀ កំពុង​ប្រព្រឹត្ត​ឧក្រិដ្ឋកម្ម​ធំៗ​ជាច្រើន​នៅ​លម្ហ​សមុទ្រ​កម្ពុជា​សព្វថ្ងៃ​នេះ ដូចជា​ការ​លាង​លុយ​កខ្វក់ ការ​រត់ពន្ធ​ប្រេងឥន្ធនៈ ការ​រត់ពន្ធ​ឈើ ការ​រត់ពន្ធ​គ្រឿងញៀន និង​រត់ពន្ធ​អាវុធ ជាដើម។

មន្ត្រី​រូប​នេះ​បញ្ជាក់​ថា ដែនសមុទ្រ​របស់​កម្ពុជា​សព្វថ្ងៃ​នេះ​សឹងតែ​ក្លាយ​ជា​តំបន់​កាន់កាប់​ផ្ដាច់មុខ​រក​ផល​ប្រយោជន៍​ឲ្យ​ត្រកូល ទៀ របស់​លោក ទៀ បាញ់ ទៅ​ហើយ។

អតីត​គណៈកម្មាធិការ​ជាតិ​សន្តិសុខ​លំហ​សមុទ្រ​ប្រចាំ​ខេត្ត​កោះកុង លោក មុំ អស្សនី បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​ចុង​សប្តាហ៍​កន្លង​ទៅ​ថា ត្រកូល ទៀ រួមមាន​លោក ទៀ បាញ់ លោក ទៀ វិញ លោក ទៀ សុខា និង​លោក ទៀ វិចិត្រ ជាដើម កំពុង​ប្រព្រឹត្ត​អំពើ​ឧក្រិដ្ឋកម្ម​យ៉ាង​ធ្ងន់ធ្ងរ​សព្វថ្ងៃ​នេះ ដូចជា​ការ​ប្រព្រឹត្ត​អំពើ​លាង​លុយ​កខ្វក់​ឲ្យ​ជនជាតិ​ចិន​ដែល​ដឹកជញ្ជូន​តាម​កប៉ាល់ ដោយ​យក​លុយ​យ័ន​របស់​ចិន មក​ដូរ​ជា​លុយ​ដុល្លារ​ក្នុង​ទំហំ​រាប់​រយ​លាន​ដុល្លារ​អាមេរិក ដែល​អាច​ឲ្យ​លោក ទៀ វិចិត្រ មាន​ឱកាស​កើប​ប្រាក់​ចំណេញ​រាប់​សិប​លាន​ដុល្លារ​អាមេរិក​ផង​ដែរ​ពី​ទង្វើ​លាង​លុយ​ខ្មៅ​នេះ។

លោក​បន្ថែម​ថា ក្រៅពី​លាយ​លុយ​កខ្វក់ លោក ទៀ វិចិត្រ ក៏​ជា​ឈ្មួញ​នាំ​ឈើ​ចេញពី​ទឹកដី​កម្ពុជា​តាម​ច្រក​សមុទ្រ​របស់​កម្ពុជា​ទៅ​កាន់​ប្រទេស​វៀតណាម ជា​ឈ្មួញ​លក់​អាវុធ​ខុស​ច្បាប់​ឲ្យ​ចោរ​សមុទ្រ​ថៃ ជា​មេ​ឈ្មួញ​នាំចូល និង​ចែកចាយ​គ្រឿងញៀន​ប្រចាំ​ស្រុក​ខ្មែរ និង​ជា​ឈ្មួញ​រត់ពន្ធ​ប្រេងឥន្ធនៈ​ចូល​ស្រុក​ខ្មែរ​ដោយ​មិន​បង់​ពន្ធ ដើម្បី​លក់​ចេញ​ទៅ​ឲ្យ​ក្រុមហ៊ុន​ប្រេង​នានា​នៅ​ស្រុក​ខ្មែរ​ដែល​មាន​ចំនួន​ដល់​ទៅ ១​លាន​លីត្រ​ក្នុង​មួយ​ថ្ងៃៗ​ក្នុង​ពេល​បច្ចុប្បន្ន​នេះ​ថែម​ទៀត។

លោក មុំ អស្សនី អះអាង​ថា ចំណែក​លោក ទៀ វិញ ដែល​ជា​មេបញ្ជាការ​កងទ័ព​ជើងទឹក និង​ជា​អគ្គលេខាធិការ​នៃ​គណៈកម្មាធិការ​ជាតិ​សន្តិសុខ​លម្ហ​សមុទ្រ និង​កូនប្រុស​របស់​គាត់​ឈ្មោះ ទៀ សុខា ដែល​ជា​មេបញ្ជាការ​រង​នៃ​កងទ័ព​ជើងទឹក និង​ជា​មេបញ្ជាការ​ទីបញ្ជាការ​ជួរមុខ​នៃ​អគ្គលេខាធិការដ្ឋាន​គណៈកម្មាធិការ​ជាតិ​សន្តិសុខ​លម្ហ​សមុទ្រ​ដែរ​នោះ ក៏​នាំគ្នា​ប្រព្រឹត្ត​អំពើពុករលួយ​ដោយ​ទទួល​សំណូក​ពី​ឈ្មួញ​នេសាទ​ថៃ ជាង ៤០០​ទូក​ក្នុង​មួយ​ថ្ងៃៗ ហើយ​ទូក​នីមួយៗ​ត្រូវ​បង់​លុយ​ឲ្យ​ពួកគេ​ចំនួន ៤​ពាន់​ដុល្លារ​អាមេរិក ដើម្បី​មាន​សិទ្ធិ​នេសាទ​ខុស​ច្បាប់​ដោយ​ប្រើ​ឧបករណ៍​ឆក់​ត្រជាក់​ក្នុង​ដែន​សមុទ្រ​របស់​ខ្មែរ​សព្វថ្ងៃ​នេះ។

អតីត​មន្ត្រី​ជាន់ខ្ពស់​រាជរដ្ឋាភិបាល​កម្ពុជា​រូប​នេះ​បញ្ជាក់​ថា ដើម្បី​ឲ្យ​ក្រុម​គ្រួសារ​ត្រកូល ទៀ របស់​លោក ទៀ បាញ់ ប្រព្រឹត្ត​អំពើ​ឧក្រិដ្ឋ​បែប​នេះ​បាន ដោយសារតែ​ពួកគេ​មាន​ការ​សហការ​ចែក​ផល​ប្រយោជន៍​គ្នា​ជាមួយ​គ្រួសារ​ត្រកូល ហ៊ុន របស់​លោក ហ៊ុន សែន យ៉ាង​ធំ ក្នុង​នោះ​លោក ហ៊ុន ម៉ាណែត ក៏​ជាប់​ពាក់ព័ន្ធ​ក្នុង​អំពើ​ឧក្រិដ្ឋ​នេះ​ជាមួយ​លោក ទៀ វិចិត្រ យ៉ាង​ខ្លាំង​ដែរ ក្នុង​ការ​ចែក​ផល​ប្រយោជន៍​ដែល​ទទួល​បាន​ពី​អំពើ​ឧក្រិដ្ឋ​ទាំងនោះ។

ទោះបីជា​មាន​ការ​ចោទប្រកាន់​បែប​នេះ​យ៉ាងណា​ក៏ដោយ អ្នកឧកញ៉ា ទៀ វិចិត្រ បាន​ប្រាប់​សារព័ត៌មាន The Cambodia Daily មុន​ការ​ផ្សាយ​នេះ​បន្តិច​ថា លោក​សូម​បដិសេធ​ទាំងស្រុង​ចំពោះ​ការ​ចោទប្រកាន់​នេះ។

លោក​បន្ត​ថា ការងារ​របស់​លោក​ដែល​កំពុង​ធ្វើ​សព្វថ្ងៃ​នេះ គឺ​ស្រប​ទៅ​តាម​ច្បាប់​របស់​រដ្ឋ ហើយ​ថា​លោក​មិន​អាច​ធ្វើ​អ្វី​ផ្តេសផ្តាស​តាម​ទំនើង​ចិត្ត​បាន​នោះ​ទេ ពីព្រោះ​ប្រទេស​មាន​ច្បាប់។ អ្នកឧកញ៉ា ទៀ វិចិត្រ អះអាង​ថា លោក​ស្វាគមន៍​ឲ្យ​សមត្ថកិច្ច​អាច​បើក​ការ​ស៊ើបអង្កេត​មក​លើ​ការងារ​របស់​លោក​បាន។

រដ្ឋមន្ត្រី​ក្រសួង​មហាផ្ទៃ លោក ស ខេង បាន​ចេញ​សេចក្ដី​ណែនាំ​ស្ដីពី​ការ​បង្កើន​វិធានការ​បង្ការ ទប់ស្កាត់ និង​បង្ក្រាប​បទឧក្រិដ្ឋ​ឆ្លងដែន​កាលពី​ពេល​កន្លងទៅ ដល់​កងកម្លាំង​នគរបាល​ជាតិ និង​សមត្ថកិច្ច​ដែល​មាន​ការ​ពាក់ព័ន្ធ​ថា ត្រូវតែ​ចាត់​វិធានការ​ប្រកប​ដោយ​ប្រសិទ្ធភាព​ក្នុង​ការ​ប្រយុទ្ធ​ប្រឆាំង​ឧក្រិដ្ឋកម្ម​ឆ្លងដែន​គ្រប់​ប្រភេទ ដូចជា​អំពើ​ភេរវកម្ម ការ​ចរាចរណ៍​ជួញដូរ​គ្រឿងញៀន​ខុស​ច្បាប់ បទល្មើស​សម្អាត​ប្រាក់ ការ​ជួញដូរ​រត់ពន្ធ​មនុស្ស ការ​ជួញដូរ​អាវុធ​ខុស​ច្បាប់ និង​បទល្មើស​បច្ចេកវិទ្យា ជាដើម ប៉ុន្តែ​វិធានការ​ទាំងនេះ​មិន​មាន​ប្រសិទ្ធភាព​ទេ ដោយសារតែ​អំពើ​ឧក្រិដ្ឋ​ទាំងនោះ​គឺជា​មុខរបរ​របស់​អ្នក​មាន​អំណាច​ដែល​បាន​ផ្ដល់​ផល​ប្រយោជន៍​ឲ្យ​ពួកគេ​ធ្វើ​មាន​ធ្វើ​បាន​សព្វថ្ងៃ​នេះ។

ទាក់ទិន​នឹង​បញ្ហា​នេះ កាលពី​ថ្ងៃទី​២៩ ខែ​កញ្ញា ឆ្នាំ​២០២២ លោក ហ៊ុន សែន ក៏​បាន​អំពាវនាវ​ឲ្យ​អាជ្ញាធរ​ពាក់ព័ន្ធ​ទាំងអស់ និង​អ្នក​កាន់​សាសនា​ផ្សេងៗ រួម​គ្នា​ប្រយុទ្ធ​ប្រឆាំង​នឹង​អំពើ​ទុច្ចរិត​ឱ្យ​បាន​ព្រមៗ​គ្នា ដើម្បី​កុំ​ឱ្យ​កម្ពុជា​ក្លាយ​ជា​ឋានសួគ៌​នៃ​ឧក្រិដ្ឋកម្ម កន្លែង​លាង​លុយ ការ​ជួញដូរ​មនុស្ស និង​បទល្មើស​ផ្សេងៗ​ទៀត។

អង្គការ​ឃ្លាំមើល​ពិភពលោក គ្លប៊ល វីនេស បាន​ចេញ​របាយការណ៍​កម្រាស់​ជិត ៦០​ទំព័រ កាលពី​ចុងឆ្នាំ​២០១៦ ដែល​មាន​ចំណងជើង​ថា “ការ​ក្ដោប​យក​វិនិយោគ​នៅ​កម្ពុជា” ដែល​ជា​សែស្រឡាយ​របស់​លោក ហ៊ុន សែន ហើយ​កំពុង​ក្ដោប​ក្ដាប់​សេដ្ឋកិច្ច​ធំៗ​របស់​កម្ពុជា​ទាំងអស់ ដែល​ក្រុមហ៊ុន​ខ្លះ​កំពុង​រំលោភ​សិទ្ធិមនុស្ស ហើយ​ខ្លះ​ទៀត​កំពុង​រំលោភ​ច្បាប់​ដោយ​ការ​ប្រព្រឹត្ត​អំពើពុករលួយ ជាដើម៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស