29 C
Phnom Penh

សង្គ្រាម​នៅ​អ៊ុយក្រែន​ប្រែប្រួល​ហើយ​ខណៈ​អ៊ុយក្រែន​ចាប់ផ្ដើម​វាយបក​លើ​ទីតាំង​ទ័ព​រុស្ស៊ី

ដោយ ឌឹ ខេមបូឌា ដេលី

បទវិភាគ

ការ​វាយបក​ដើម្បី​រំដោះ​ទឹកដី​ពី​រុស្ស៊ី មក​វិញ​ចាប់ផ្ដើម​ហើយ ដោយ​អ៊ុយក្រែន ចាប់​បើក​ទ្វារ​សង្គ្រាម​វាយ​រំដោះ​ទឹកដី​របស់​ខ្លួន​ពី​រុស្ស៊ី មក​វិញ​នៅ​ភាគ​ខាងកើត និង​ខាងត្បូង​ប្រទេស ខណៈ​ឧបទ្វីប​គ្រីមៀរ ដែល​ធ្លាក់​ក្នុង​រុស្ស៊ី នៅ​ឆ្នាំ​២០១៤ ក៏​នឹង​ក្លាយ​ជា​សមរភូមិ​ចុងក្រោយ​ផង​ដែរ។

នៅ​ថ្ងៃទី​៦ មិថុនា នេះ មាន​សេចក្ដី​រាយការណ៍​ជាច្រើន ដូចជា​បណ្ដាញ​ផ្សាយ​ព័ត៌មាន​អង់គ្លេស BBC បណ្ដាញ​ផ្សាយ​ព័ត៌មាន​អាល្លឺម៉ង់ DW និង​សារព័ត៌មាន​អ៊ុយក្រែន The Kyiv Post បាន​ធ្វើ​សេចក្ដី​រាយការណ៍​មក​ថា អ៊ុយក្រែន​បញ្ចេញ​រថពាសដែក ១៨០​គ្រឿង និង​រថក្រោះ Leopard ផលិត​នៅ​អាល្លឺម៉ង់​រាប់​សិប​គ្រឿង​ចូល​ទៅ​សមរភូមិ ដោយ​ធ្វើ​សកម្មភាព​យ៉ាង​សកម្ម។

ក្រសួង​ការពារ​ជាតិ​រុស្ស៊ី ប្រកាស​ថា អ៊ុយក្រែន​បើក​វាយបក​ទ្រង់ទ្រាយ​ធំ ៥​កន្លែង​នៅ​តំបន់​ដូណេត ចាប់ពី​ថ្ងៃទី​៤ ខែ​មិថុនា ឆ្នាំ​២០២៣ តែ​ត្រូវ​បរាជ័យ​មិន​អាច​សម្រេច​ផែនការ​របស់​ខ្លួន ព្រមទាំង​បាត់បង់​កម្លាំង​ទ័ព​ប្រមាណ ២៥០​នាក់ ហើយ​ទ័ព​រុស្ស៊ី បាញ់​កម្ទេច​រថពាសដែក​អ៊ុយក្រែន ២១​គ្រឿង។

ប្រភព​ការពារ​ជាតិ​រុស្ស៊ី បាន​បន្ថែម​ទៀត​ថា ការ​បើក​ប្រតិបត្តិការ​វាយប្រហារ​របស់​អ៊ុយក្រែន ដោយ​កងពល​តូច​មេកានិច ៦​កង និង​កងពល​រថក្រោះ ២​កង។

រុស្ស៊ី​បាន​បញ្ជាក់​ទៀត​ថា នាយសេនាធិការ​កងទ័ព​រុស្ស៊ី​កំពុង​ស្ថិត​ក្នុង​ប៉ុស្តិ៍​បញ្ជាការ​ក្នុង​តំបន់​ដែល​មាន​ការ​វាយប្រហារ​ពី​អ៊ុយក្រែន តែ​នៅ​តំបន់​ហ្សាប៉ូរីហ្សីយ៉ា គឺជា​ទីតាំង​របស់​រុស្ស៊ី​បាន​រង​ការ​វាយប្រហារ​យ៉ាង​ខ្លាំង ខណៈ​នៅ​បាកមូត កងទ័ព​អ៊ុយក្រែន​បើក​ការ​វាយប្រហារ​ជា​ខ្លាំង​ដែរ។

ទោះជា​យ៉ាងណា អ៊ុយក្រែន មិន​បាន​បញ្ជាក់​ព័ត៌មាន​ទាក់ទង​នឹង​ការ​ប្រកាស​របស់​រុស្ស៊ី​នោះ​ទេ ហើយ​ក៏​គ្មាន​ប្រភព​ឯករាជ្យ​ណា​ធ្វើការ​ផ្ទៀងផ្ទាត់​ចំពោះ​ការ​ប្រកាស​របស់​រុស្ស៊ី ដែល​ថា​វាយបក​វិញ​ធ្វើ​ឱ្យ​ទ័ព​អ៊ុយក្រែន បរាជ័យ​ជា​ទម្ងន់។

ផ្ទុយទៅវិញ មេបញ្ជាការ​កងទ័ព​ជើងគោក​អ៊ុយក្រែន បាន​បង្ហោះ​សារ​តាម​បណ្ដាញ​សង្គម​ថា កងកម្លាំង​អ៊ុយក្រែន បាន​បន្ត​រុល​ទៅ​មុខ​ក្នុង​តំបន់​បាកមូត ដែល​ទ័ព​រុស្ស៊ី និង​ក្រុម​ទាហាន​ស៊ីឈ្នួល​វាយ​យក​បាន​កាល​ពី​ចុងខែ​ឧសភា។ ចំណែក​នៅ​តំបន់​ហ្សាប៉ូរីហ្សីយ៉ា ក៏​កងទ័ព​អ៊ុយក្រែន វាយ​រុល​ផ្ដាច់​ខ្សែ​ត្រៀម​ទ័ព​រុស្ស៊ី ជាច្រើន​ផង​ដែរ។ តំបន់​បាកមូត ស្ថិត​ក្នុង​ដូណេត​ភាគ​ខាងកើត ចំណែក​តំបន់​ហ្សាប៉ូរីហ្សីយ៉ា ស្ថិ​តនៅ​ភាគ​ខាងត្បូង​ប្រទេស​អ៊ុយក្រែន។

ក្រៅ​អំពី​ការ​វាយប្រហារ​របស់​អ៊ុយក្រែន នៅ​តំបន់​ដុនបាស នៅ​ភាគ​ខាងកើត និង​តំបន់​ហ្សាប៉ូរីហ្សីយ៉ា ក៏​មាន​ការ​ប្រយុទ្ធ​គ្នា​យ៉ាង​សន្ធោសន្ធៅ​រវាង​កងទ័ព​ជាតិ​រុស្ស៊ី និង​ក្រុម​កម្លាំង​ប្រដាប់​ប្រឆាំង​រុស្ស៊ី ដែល​គាំទ្រ​ដោយ​អ៊ុយក្រែន នៅ​តាម​តំបន់​ជាប់​ព្រំដែន​អ៊ុយក្រែន។

ក្នុង​ស្ថានភាព​ទៅ​រក​ការ​ប្រែ​សម្រួល​សង្គ្រាម​រុស្ស៊ី​ឈ្លានពាន​អ៊ុយក្រែន មេ​ក្រុម​ទាហាន​ស៊ីឈ្នួល​ឱ្យ​រុស្ស៊ី លោក Yevgeny Prigozhin បាន​រិះគន់​កងទ័ព​រុស្ស៊ី ដែល​កំពុង​ធ្វើ​ឱ្យ​បាត់បង់​ទីតាំង​ជាច្រើន​ស្ថិត​នៅ​ក្បែរ​ទីក្រុង​បាកមូត ធ្លាក់​ក្នុង​ដៃ​កងទ័ព​អ៊ុយក្រែន ហើយ​ថា​យុទ្ធសាស្ត្រ​ដែល​រុស្ស៊ី កំពុង​អនុវត្ត វា​នឹង​នាំ​ទៅ​រក​បរាជ័យ ហើយ​យ៉ាង​យូរ ២​សប្ដាហ៍​ខាងមុខ តំបន់​បាកមូត នឹង​ធ្លាក់​ក្នុង​កងទ័ព​អ៊ុយក្រែន​វិញ​ហើយ។

លោក Prigozhin ធ្វើការ​កត់សម្គាល់​ដូចនេះ ខណៈ​មន្ត្រី​រុស្ស៊ី​ម្នាក់​ក្នុង​តំបន់​ដូណេត បាន​ឱ្យ​ដឹង​ថា ស្ថានការណ៍​នៅ​ជុំវិញ​ទីក្រុង​បាកមូត មាន​ភាព​លំបាក​ជា​ខ្លាំង​ក្រោយពី​ទាហាន​ស៊ីឈ្នួល​រុស្ស៊ី Wagner ប្រកាស​ពី​ការ​វាយ​ដណ្ដើម​បាន​ទីក្រុង​បាកមូត​ទាំងស្រុង​កាលពី​ចុងខែ​ឧសភា ក្រោយ​ការ​វាយ​ប្រយុទ្ធ​យ៉ាង​បង្ហូរ​ឈាម​អស់​រយៈពេល​ជាច្រើន​ខែ។

ចាប់តាំងពី​ពេល​នោះ​មក ទ័ព​អ៊ុយក្រែន​នៅតែ​បន្ត​បើក​ការ​វាយប្រហារ​នៅ​តាម​ទីតាំង​ស្ថិត​នៅ​ភាគ​ខាងជើង និង​ខាងត្បូង​នៃ​ទីក្រុង​មួយ​នេះ​ស្ថិត​នៅ​ភាគ​ខាងកើត​ប្រទេស​អ៊ុយក្រែន។

លោក Prigozhin បាន​និយាយ​ក្នុង​សារ​សំឡេង​មួយ​ត្រូវ​បាន​ចេញ​ផ្សាយ​ដោយ​សេវា​ព័ត៌មាន​នៃ​ក្រុមហ៊ុន Wagner ថា៖ នៅ​ពេលនេះ សង្កាត់ Berkhivka នៃ​តំបន់​បាកមូត បាន​ធ្លាក់​ទៅ​ក្នុង​ដៃ​ទ័ព​អ៊ុយក្រែន​ទៅ​ហើយ រីឯ​កងទ័ព​រុស្ស៊ី​ក៏​បាន​រត់​ចោល​សមរភូមិ​ស្ងាត់ៗ ខណៈ​ទ័ព​អ៊ុយក្រែន​បើក​ការ​វាយ​បក។

ឥឡូវ​នេះ សង្គ្រាម​កាន់តែ​ប្រែប្រួល សេចក្ដី​រាយការណ៍​របស់​បណ្ដាញ​ផ្សាយ​ព័ត៌មាន​អាល្លឺម៉ង់ DW បាន​ចុះផ្សាយ​នៅ​ថ្ងៃទី​៦ មិថុនា ថា មាន​ហេតុការណ៍​បំផ្ទុះ​បាន​កើតមាន​ឡើង​ប៉ះ​ទៅ​លើ​ទំនប់​វារីអគ្គិសនី​សម័យ​សូវៀត​មួយ​កន្លែង​ក្នុង​តំបន់​ដែល​គ្រប់គ្រង​ដោយ​កងកម្លាំង​រុស្ស៊ី នៅ​ភាគ​ខាងត្បូង​ប្រទេស​អ៊ុយក្រែន។ ការ​បំផ្ទុះ​នេះ បណ្ដាល​ឱ្យ​បាក់​ទំនប់​វារីអគ្គិសនី ហើយ​បង្ក​ទឹក​ជន់​លិច​ក្រុង​ខឺសុន ដែល​កងទ័ព​អ៊ុយក្រែន វាយ​កាន់កាប់​បាន​មក​វិញ​ពី​ទ័ព​រុស្ស៊ី​កាលពី​ខែ​តុលា ឆ្នាំ​២០២២។

រដ្ឋាភិបាល​អ៊ុយក្រែន ចោទ​ថា​ជា​ការ​វាយប្រហារ​របស់​កងទ័ព​រុស្ស៊ី តែ​ក្រុង​មូស្គូ បដិសេធ ដោយ​ចោទ​វិញ​ថា ទំនប់​នេះ​វា​រងគ្រោះ​ពី​ការ​វាយប្រហារ​ដោយ​គ្រាប់កាំភ្លើង​ធំ​ពី​ទ័ព​អ៊ុយក្រែន។

ទំនប់​វារីអគ្គិសនី Kakhovka មាន​កម្ពស់ ៣០​ម៉ែត្រ និង​បណ្តោយ​ប្រវែង​ជាង ៣​គីឡូម៉ែត្រ។ វា​ស្តុក​ទឹក​ក្នុង​បរិមាណ​ស្មើ​ទៅ​នឹង​បឹង Great Salt Lake នៅ​ឯ​រដ្ឋ UTAH នៃ​សហរដ្ឋ​អាមេរិក ហើយ​វា​ត្រូវ​បាន​សាងសង់​ឡើង​កាលពី​ឆ្នាំ​១៩៥៦ នៅ​លើ​ទន្លេ Dnipro ក្នុង​តំបន់​ខឺសុន។

ទំនប់​វារីអគ្គិសនី​នេះ​ក៏​ផ្គត់ផ្គង់​ទឹក​ផង​ដែរ​ទៅ​កាន់​ឧបទ្វីប​គ្រីមៀរ ដែល​ត្រូវ​បាន​រុស្ស៊ី​ក្រសោប​យក​ពី​អ៊ុយក្រែន កាលពី​ឆ្នាំ​២០១៤ និង​ទៅ​កាន់​រោងចក្រ​អគ្គិសនី​ដើរ​ដោយ​ថាមពល​នុយក្លេអ៊ែរ​នៅ​តំបន់​ហ្សាប៉ូរីហ្សីយ៉ា ដែល​ស្ថិត​ក្រោម​ការ​គ្រប់គ្រង​របស់​រុស្ស៊ី។

ទីបញ្ជាការ​ភូមិភាគ​ខាងត្បូង​របស់​អ៊ុយក្រែន បាន​បង្ហោះ​សារ​លើ​បណ្ដាញ Facebook ថា៖ ទំនប់ Kakhovka បាន​ទទួល​រង​ការ​បំផ្ទុះ​ដោយ​កងកម្លាំង​ទ័ព​របស់​រុស្ស៊ី ដែល​កំពុង​ត្រួតត្រា​នៅ​តំបន់​នោះ។ ទំហំ​នៃ​ការ​បង្ក​ជន់​លិច​មាន​ល្បឿន​ខ្លាំង និង​បរិមាណ​ទឹក​ដែល​លេច​ធ្លាយ​កំពុង​ជន់​លិច​តំបន់​មួយ​ចំនួន​នៅ​ខឺសុន ដោយ​រាប់​ទាំង​ក្រុង​ខឺសុន ផង​ដែរ។

ប្រធានាធិបតី​អ៊ុយក្រែន លោក វូឡូឌីមៀ ហ្សេឡេនស្គី ចោទ​ថា រុស្ស៊ី​មាន​ចេតនា​បំផ្លាញ​ទំនប់​វារីអគ្គិសនី​ដែល​ជា​ផល​ប្រយោជន៍ និង​ទ្រព្យសម្បត្តិ​របស់​ប្រជាជន​អ៊ុយក្រែន ហើយ​បង្ក​ឱ្យ​ប្រជាជន​រាប់​ម៉ឺន​នាក់​រត់​ចោល​ផ្ទះសម្បែង​របស់​ពួកគេ ដែល​ត្រូវ​ជន់​លិច​ពី​ការ​បាក់​ទំនប់​នៃ​ទន្លេ Dnipro ដែល​កំពុង​វាយ​បុក​ចូល​ក្រុង​ខឺសុន និង​តំបន់​ជាច្រើន​ទៀត​នៅ​ភាគ​ខាងត្បូង​ប្រទេស​អ៊ុយក្រែន។

បើ​ទោះជា​យ៉ាង​នេះ​ក្ដី ប្រធានាធិបតី​អ៊ុយក្រែន កំពុងតែ​សរសើរ​ជា​ខ្លាំង​ដល់​កងទ័ព​របស់​លោក​ដែល​វាយបក​រុល​ចូល​ទីតាំង​របស់​ទ័ព​រុស្ស៊ី បាន​ជាច្រើន​ខ្សែ​ត្រៀម​នៅ​ភាគ​ខាងកើត និង​តំបន់​ហ្សាប៉ូរីហ្សីយ៉ា ខណៈ​លោក​សច្ចា​វាយ​យក​គ្រីមៀរ មក​វិញ​ពី​រុស្ស៊ី ឱ្យ​បាន​នៅ​ក្នុង​ឆ្នាំ​២០២៣ នេះ។

លោក ហ្សេឡេនស្គី ថ្លែង​ថា ការ​វាយ​រំដោះ​ដែនដី​នេះ​នឹង​ត្រូវ​ធ្វើឡើង​អំឡុង​ទ័ព​អ៊ុយក្រែន ត្រូវ​បើក​វាយបក​ទ្រង់ទ្រាយ​ធំ។ លោក​ប្រកាស​ថា ការ​រំដោះ​ឧបទ្វីប​មួយ​នេះ​ដែល​ត្រូវ​បាន​រុស្ស៊ី ដណ្ដើម​យក​កាលពី​ឆ្នាំ​២០១៤ ច្បាស់​ណាស់​ថា​នឹង​កើតឡើង​យ៉ាង​ពិតប្រាកដ។

បើ​តាម​លោក ហ្សេឡេនស្គី មាន​ប្រទេស​កាន់តែ​ច្រើនឡើង​ចាប់ផ្ដើម​យល់​ឃើញ​ថា សន្តិភាព​នឹង​មិន​អាច​កើតឡើង បើ​គ្មាន​ការ​ប្រគល់​តំបន់​គ្រីមៀរ មក​ឱ្យ​អ៊ុយក្រែន វិញ។

លោក​បញ្ជាក់​ថា អ៊ុយក្រែន​នឹង​បន្ត​ករណីយកិច្ច​របស់​ខ្លួន​ដើម្បី​រំដោះ​តំបន់​គ្រីមៀរ ដែល​ច្បាស់​ណាស់​ថា​វា​នឹង​កើតឡើង ហើយ​តំបន់​មួយ​នេះ​នឹង​ត្រូវ​ត្រឡប់​ទៅ​ក្រោម​ប្រព័ន្ធ​គ្រប់គ្រង​របស់​អ៊ុយក្រែន​វិញ។

អ្នក​សង្កេតការណ៍​មើល​ឃើញ​ថា ទំហំ​នៃ​ការ​វាយ​បក​របស់​ទ័ព​អ៊ុយក្រែន នៅ​មិន​ទាន់​រីក​រាលដាល​ខ្លាំង ខណៈ​រដ្ឋាភិបាល​អ៊ុយក្រែន ក៏​មិនទាន់​ប្រកាស​ជា​ផ្លូវការ​នៃ​ការ​វាយបក​នេះ​ដែរ។ តែ​ករណី​នៃ​ការ​វាយ​ចូល​ទៅ​រំដោះ​តំបន់​គ្រីមៀរ មក​វិញ អាច​ជា​ដំណាក់កាល​ចុងក្រោយ​នៃ​ការ​បិទ​បញ្ចប់​សង្គ្រាម​រុស្ស៊ី​ឈ្លានពាន​ទឹកដី​អ៊ុយក្រែន៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស