35 C
Phnom Penh

អាវុធហត្ថ​ភ្នំពេញ​បង្ក្រាប​ជនជាតិ​ចិន​៤​នាក់​និង​ខ្មែរ​ម្នាក់​ដែល Hack ចូល Telegram ឆបោក​ប្រាក់​ពលរដ្ឋ

ដោយ ឌឹ ខេមបូឌា ដេលី

បទវិភាគ

អាវុធហត្ថ​រាជធានី​ភ្នំពេញ បង្ក្រាប​ជនជាតិ​ចិន ៤​នាក់ និង​ខ្មែរ​ម្នាក់ ដែល​ពួកគេ​បាន​ពាក់ព័ន្ធ​ជាមួយ​នឹង​បណ្ដាញ​ក្រុម Hacker នៅ​ឯ​បរទេស ដោយ​ធ្វើ​សកម្មភាព​ហែក​ចូល​តេឡេក្រាម​មនុស្ស​ជាច្រើន​ដើម្បី​ឆបោក​ប្រាក់។

ការ​ចុះ​បង្ក្រាប​នេះ ធ្វើឡើង​បន្ទាប់ពី​អាវុធហត្ថ​រាជធានី​ភ្នំពេញ​ទទួល​បាន​ពាក្យបណ្ដឹង​ពី​ប្រជាពលរដ្ឋ​រងគ្រោះ ដែល​ត្រូវ​បាន​ក្រុម Hacker ឆបោក​ប្រាក់​នា​ពេល​ថ្មីៗ​នេះ។

បើ​តាម​ហ្វេសប៊ុក Phnom Penh Gendarmerie ចុះផ្សាយ​នា​ថ្ងៃទី​២២ ខែ​មិថុនា ឆ្នាំ​២០២៣ ឲ្យ​ដឹង​ថា កម្លាំង​ជំនាញ​របស់​អាវុធហត្ថ​រាជធានី​ភ្នំពេញ បាន​ធ្វើការ​ឃាត់​ខ្លួន​ជនសង្ស័យ​ចំនួន ០៥​នាក់ ក្នុង​នោះ​មាន​ជនជាតិ​ខ្មែរ​ម្នាក់ និង​ជនជាតិ​ចិន ៤​នាក់ ដែល​ពួកគេ​បាន​ពាក់ព័ន្ធ​ជាមួយ​នឹង​បណ្ដាញ​ក្រុម Hacker នៅ​ឯ​បរទេស ដោយ​ធ្វើ​សកម្មភាព​ហែក​ចូល​តេឡេក្រាម​មនុស្ស​ជាច្រើន ដើម្បី​ឆបោក​ប្រាក់។

ប្រភព​ដដែល​ថា កម្លាំង​អាវុធហត្ថ​បាន​ធ្វើ​សកម្មភាព​ចុះ​បង្ក្រាប​ចាប់ពី​ចន្លោះ​ថ្ងៃទី​១៧ ដល់​ថ្ងៃទី​១៩ ខែ​មិថុនា ឆ្នាំ​២០២៣។ ជនជាតិ​ចិន និង​ខ្មែរ​ទាំង ៥​នាក់ ក្នុង​នោះ​ឈ្មោះ YU YULONG ជនជាតិ​ចិន ទទួល​ខុសត្រូវ​ក្នុង​ការ​ទំនាក់ទំនង​ជាមួយ​ក្រុម Hacker នៅ​ក្រៅ​ប្រទេស និង​ឈ្មោះ មាស ស្រីចិន (ហៅ​ស្រី​ពៅ) ជនជាតិ​ខ្មែរ ប្រពន្ធ​របស់​ឈ្មោះ YU YULONG ទទួល​ខុសត្រូវ​បកប្រែ​ឆាត​ពី​ខ្មែរ​ទៅ​ចិន និង​ពី​ចិន​ទៅ​ខ្មែរ ទាំង​អក្សរ​និង​សំឡេង​ឲ្យ​ក្រុម Hacker។

ចំណែក​ឈ្មោះ HUANG ZHENG LIANG ជនជាតិ​ចិន ទទួល​ខុសត្រូវ​ខាង​ដក​លុយ​ចេញពី​ធនាគារ រក​បណ្ដាញ​បន្ថែម និង​ពេល​ខ្លះ​ទំនាក់ទំនង​ផ្ទាល់​ជាមួយ​ក្រុម Hacker ហើយ​ឈ្មោះ ZHANG ZHAOCUN ជនជាតិ​ចិន ទទួល​ខុសត្រូវ​ខាង​ដក​លុយ​ចេញពី​ធនាគារ និង​ឈ្មោះ LI QUEQIN ទទួល​ខុសត្រូវ​តម្កល់​ប្រាក់​នៅ​ធនាគារ ដើម្បី​ធានា​ប្រតិបត្តិការ​ឲ្យ​ក្រុម Hacker នៅ​ក្រៅ​ប្រទេស។

បើ​តាម​អាវុធហត្ថ​រាជធានី​ភ្នំពេញ​ដកស្រង់​ចម្លើយ​សារភាព​របស់​ឈ្មោះ YU YULONG និង​ប្រពន្ធ​ឈ្មោះ មាស ស្រីចិន បាន​ឲ្យ​ដឹង​ថា ពួកគេ​ស្គាល់​ក្រុម Hacker តាមរយៈ​វីឆាត (WeChat) ប៉ុណ្ណោះ មិន​ដឹង​ថា​ពួក​នោះ​នៅ​ទីណា​ទេ គ្រាន់តែ​ធ្លាប់​ឮ​ពួកវា​ប្រាប់​ថា​រស់នៅ​ប្រទេស​ថៃ ហើយ​ពួកវា​ប្រាប់​ថា អាច​ហែក​តេឡេក្រាម​បាន​តាមរយៈ​ផ្ញើ​សារ ឬ​កម្មវិធី​អ្វី​មួយ​ទៅ​បុគ្គល​ណា​ម្នាក់ ប្រសិនបើ​បុគ្គល​នោះ​ចូល​មើល។

ការ​ចូល​មើល​នេះ តាម​ជនសង្ស័យ​ឈ្មោះ មាស ស្រីចិន ថា​នឹង​ធ្វើ​ឲ្យ​ពួកគេ​ចូល​ទៅ​គ្រប់គ្រង​កម្មវិធី​ទូរសព្ទ ឬ​ឈាន​ដល់​គ្រប់គ្រង​អាខោន​ធនាគារ​បាន និង​ម្យ៉ាង​ទៀត ប្រសិនបើ​អ្នក​ប្រើប្រាស់ ឬ​ប្រជាពលរដ្ឋ​ថត​ស្គែន​លេខ​តេឡេក្រាម ៥​ខ្ទង់​ផ្ញើ​ទៅ​ឲ្យ​ពួកគេ​នោះ ពួកគេ​ក៏​អាច​គ្រប់គ្រង Telegram បាន​ដូច​គ្នា​ដែរ។

ប្រពន្ធ​ឈ្មោះ YU YULONG បាន​ឲ្យ​ដឹង​ទៀត​ថា រាល់​ប្រតិបត្តិការ​ជោគជ័យ​ទាំងអស់ ឈ្មោះ YU YULONG និង​ប្រពន្ធ​ឈ្មោះ មាស ស្រីចិន ទទួល​បាន ៧% ឈ្មោះ HUANG ZHENG LIANG ទទួល​បាន ៤% ឈ្មោះ ZHANG ZHAOCUN ទទួល​បាន ២% ឈ្មោះ LI QUEQIN ទទួល​បាន ២% នៅ​សល់​ទាំង​ប៉ុន្មាន គឺ​ត្រូវ​ផ្ញើ​ទៅ​ឲ្យ​ក្រុម Hacker តាមរយៈ​ធនាគារ​ហ៊ុយវ័ង។

វិធានការ​របស់​អាវុធហត្ថ​រាជធានី​ភ្នំពេញ បាន​ធ្វើឡើង​បន្ទាប់ពី​ថ្មីៗ​នេះ​មាន​ករណី​ក្រុម Hacker បាន​ហែក​ចូល​តេឡេក្រាម​ប្រជាពលរដ្ឋ​ជា​អ្នក​ប្រើប្រាស់​ជាច្រើន​ករណី ដែល​បង្ក​ឲ្យ​មាន​ជនរងគ្រោះ​មួយ​ចំនួន​ត្រូវ​បាន​ខាតបង់​ប្រាក់​រាប់​ពាន់​ម៉ឺន​ដុល្លារ​ដោយសារតែ​ការ​បោក​បញ្ឆោត។ ជាក់ស្តែង កាលពី​ថ្ងៃទី​២៧ ខែ​មីនា ឆ្នាំ​២០២៣ អាវុធហត្ថ​ភ្នំពេញ​បាន​ទទួល​បណ្តឹង​ពី​ជនរងគ្រោះ​ម្នាក់​សុំ​ប្តឹង​ពី​ជនសង្ស័យ​មិន​ស្គាល់​អត្តសញ្ញាណ ដែល​បាន​ហែក​ចូល​តេឡេក្រាម​របស់​ខ្លួន និង​បាន​ឆាត​ទៅ​បងប្អូន​មិត្តភ័ក្ដិ​ជាច្រើន​នាក់​ដើម្បី​ខ្ចី​ប្រាក់ ព្រមទាំង​ឆាត​ទៅ​គំរាម​ទារ​ប្រាក់​អតិថិជន​ដែល​ជំពាក់​ខ្លួន​ផង​ដែរ។

ជាមួយ​គ្នា​នេះ​ដែរ អតិថិជន​របស់​ខ្លួន​ម្នាក់​ក៏​ត្រូវ​បាន​គេ​ហែក​ចូល​តេឡេក្រាម​របស់​ជនរងគ្រោះ ដែល​ដាក់​បណ្ដឹង​ដូច​គ្នា​ដែរ ហើយ​ក៏​បាន​ឆាត​មក​ខ្ចី​ប្រាក់​ខ្លួន​ចំនួន ៦០០០០​ដុល្លារ ក្នុង​នោះ​ខ្លួន​បាន​វេរ​ទៅ​ឲ្យ​អស់ ១០០០០​ដុល្លារ មុន​ពេល​ដឹង​ថា​មាន​ការ​ចាញ់​បោក​ក្រុម Hacker នោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស