អំពើឆបោកអនឡាញកំពុងបំប្លែងខ្លួនទៅតាមតំបន់សេដ្ឋកិច្ចពិសេស រោងចក្រ សណ្ឋាគារ បុរីផ្ទះជួលនិងអគារកំពុងសង់

ពលរដ្ឋដែលរងគ្រោះក្នុងអំពើឆបោក ទម្លាយថាអំពើឆបោកតាមអនឡាញនៅកម្ពុជា កំពុងបំប្លែងខ្លួនទៅតាមតំបន់សេដ្ឋកិច្ចពិសេស តំបន់រោងចក្រ បុរី ផ្ទះជួល សណ្ឋាគារ និងអគារកំពុងសាងសង់ ជាដើម។

ការបំប្លែងខ្លួននេះ បន្ទាប់ពីមានការបង្ក្រាបតាមអគារធំៗ និងអគារខ្ពស់ៗក្នុងរយៈពេលចុងក្រោយនេះ។

ជនរងគ្រោះក្នុងអំពើឆបោកតាមប្រព័ន្ធអនឡាញ បានទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី២៧ មេសា ថា អំពើឆបោកតាមប្រព័ន្ធអនឡាញត្រូវបានបង្ក្រាបតែនៅតាមអគារខ្ពស់ៗ និងអគារធំៗប៉ុណ្ណោះ ប៉ុន្តែអគារតូចៗនៅតែបន្តដំណើរការដដែល ហើយក៏កំពុងពង្រីកខ្លួនកាន់តែខ្លាំងដែរ ដូចជានៅតាមតំបន់សេដ្ឋកិច្ចពិសេស តំបន់រោងចក្រ សណ្ឋាគារ និងអគារកំពុងសាងសង់។

ប្រភពដដែល ទម្លាយថា សណ្ឋាគារដែលបង្កប់អំពើឆបោកទាំងនេះ មានដូចជា សណ្ឋាគារ ណានហៃ អន្តរជាតិ សណ្ឋាគារ ស៊ីហ៊ូ រីសត ក្នុងក្រុងព្រះសីហនុ និងសណ្ឋាគារ ហ្វូចូ ជាដើម ដែលសុទ្ធសឹងតែជាសណ្ឋាគារលំដាប់ផ្កាយប្រាំ។ ចំណែកតាមតំបន់រោងចក្រ ត្រូវបានគេបង្កប់អំពើឆបោកតាមអនឡាញក្រោមស្លាកវិនិយោគ ក្នុងនោះ ពួកគេប្រើពីរ ឬបីជាន់នៃអគាររោងចក្រទាំងនោះ ដែលរោងចក្រខ្លះមានចាប់ពី ៥ជាន់ឡើងទៅ ប៉ុន្តែជាន់នៃអគារដែលពួកគេបានបង្កប់អំពើឆបោកនោះ មិនត្រូវបានអនុញ្ញាតឱ្យបុគ្គលិករោងចក្រចេញចូល ឬធ្វើដំណើរតាមជណ្តើរទៅដល់ឡើយ។

ជាងនេះទៀត អគារតាមតំបន់សេដ្ឋកិច្ចពិសេស ក៏ត្រូវបានពួកគេបង្កប់អំពើឆបោកដែរ គឺពួកគេបង្កប់តាមអគារដែលកំពុងសាងសង់ ខណៈអគារទាំងនោះត្រូវបានអូសបន្លាយពេលសាងសង់អគារជាច្រើនឆ្នាំ ដែលមានន័យថា បើមើលពីសម្បកខាងក្រៅ ហាក់ដូចជាការសាងសង់នេះកំពុងជាប់គាំង ឬជាអគារដែលកំពុងសាងសង់ដ៏យឺតយ៉ាវ ជាដើម។

ដោយឡែកក្រុមឧក្រិដ្ឋជនបានផ្លាស់ប្ដូរទីតាំងនាំគ្នាទៅរស់នៅតាមបុរី និងផ្ទះជួល ក្រោមការសហការរវាងម្ចាស់បុរី និងអាជ្ញាធរ ហើយរាល់ពេលមានការបង្ក្រាប សមត្ថកិច្ចតែងផ្តល់ដំណឹងដល់ម្ចាស់បុរីទាំងនោះ ដើម្បីជម្លៀសក្រុមឧក្រិដ្ឋជនទាំងអស់ទៅទីតាំងផ្សេង។

ប្រភពដដែល បញ្ជាក់ថា នេះគឺជាយុទ្ធសាស្ត្រថ្មីដែលក្រុមឧក្រិដ្ឋជនកំពុងផ្លាស់ប្ដូរទីតាំងបោកប្រាស់ដើម្បីគេចចេញពីការបង្ក្រាប ខណៈការឆបោកនៅតែដំណើរការដដែល ដោយគ្រាន់តែផ្លាស់ប្ដូរទីតាំងប៉ុណ្ណោះ។

ការិយាល័យគ្រប់គ្រងទ្រព្យសម្បត្តិបរទេស OFAC របស់ក្រសួងហិរញ្ញវត្ថុសហរដ្ឋអាមេរិក បានដាក់ទណ្ឌកម្មលើសមាជិកព្រឹទ្ធសភាកម្ពុជា លោក កុក អាន ព្រមទាំងបុគ្គល និងស្ថាប័នពាក់ព័ន្ធសរុបចំនួន ២៨នាក់ ពាក់ព័ន្ធនឹងអំពើឆបោកកាលពីថ្ងៃទី២៣ ខែមេសា ឆ្នាំ២០២៦ កន្លងទៅនេះ។

សហរដ្ឋអាមេរិក អះអាងថា លោក កុក អាន និងសហការីរបស់គាត់ បានដំណើរការ និងទទួលផលចំណេញពីទីតាំងឆបោក ដែលមានគោលដៅលើពលរដ្ឋអាមេរិកាំង ហើយជាញឹកញាប់ បានប្រើប្រាស់ជនរងគ្រោះពីការជួញដូរមនុស្សដែលត្រូវបង្ខំឱ្យប្រព្រឹត្តអំពើខុសច្បាប់ ក្រោមការគំរាមកំហែងនៃអំពើហិង្សា។

ជុំវិញបញ្ហានេះ អង្គការ Humanity Research Consultancy បានបង្ហាញរបាយការណ៍ស៊ើបអង្កេតរបស់ខ្លួនកាលពីពេលថ្មីៗនេះថា មានមនុស្សយ៉ាងតិច ២៨នាក់ដែលជាមេខ្លោងនៃក្រុមឧក្រិដ្ឋកម្មអនឡាញនៅក្នុងប្រទេសកម្ពុជា ដែលក្នុងនោះក៏មានមន្ត្រីជាន់ខ្ពស់ក្នុងជួររដ្ឋាភិបាល និងមនុស្សជំនិតរបស់មេដឹកនាំបក្សកាន់អំណាច លោក ហ៊ុន សែន រួមទាំងសមាជិកគ្រួសារត្រកូលហ៊ុនផងដែរ ក្រៅពីសេដ្ឋីបរទេសជាច្រើននាក់ដែលមានក្នុងបញ្ជីទណ្ឌកម្មនោះ។

មនុស្សទាំងនោះ រួមមាន៖

រដ្ឋលេខាធិការក្រសួងមហាផ្ទៃ និងជាអនុប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អ្នកស្រី ជូ ប៊ុនអេង
អគ្គស្នងការរងនគរបាលជាតិ និងជាអគ្គនាយកនៃនាយកដ្ឋានសន្តិសុខកណ្ដាល និងជាកូនប្រសារបស់លោក ហ៊ុន សែន គឺលោក ឌី វិជ្ជា
មេបញ្ជាការកងអង្គរក្ស លោក ហ៊ីង ប៊ុនហៀង
អភិបាលខេត្តកណ្តាល លោក គួច ចំរើន
អភិបាលរងខេត្តព្រះសីហនុ លោក ឡុង ឌីម៉ង់
ឧកញ៉ា លី យ៉ុងផាត់
ក្មួយប្រសារបស់លោក ហ៊ុន សែន គឺលោក នេត សាវឿន
រដ្ឋមន្ត្រីក្រសួងមហាផ្ទៃ លោក ស សុខា
ទីប្រឹក្សាប្រធានព្រឹទ្ធសភាលោក ហ៊ុន សែន គឺឧកញ៉ា ទ្រី ភាព
ហើយចុងក្រោយគឺសមាជិកគ្រួសារត្រកូលហ៊ុនតែម្តង គឺឧកញ៉ា ហ៊ុន តូ ដែលជានាយកក្រុមហ៊ុន ហួយវ័ន្ត ផេ (Huione Pay), ធនាគារ ផេនដា (Panda Bank) និងធនាគារ Heng He សព្វថ្ងៃនេះ។

ពាក់ព័ន្ធនឹងបញ្ហានេះ ក្រុមហ៊ុនវិភាគកាក់ឌីជីថល Elliptic ដែលមានមូលដ្ឋាននៅប្រទេសអង់គ្លេស បានលាតត្រដាងកាលពីពេលកន្លងទៅថា លោក ហ៊ុន តូ គឺជាម្ចាស់អាជីវកម្មក្រុមហ៊ុនបោកប្រាស់តាមបណ្ដាញអ៊ីនធឺណិតខ្មៅដ៏ធំមួយឈ្មោះ ក្រុមហ៊ុន ហួយ អាដេ គ្រុប (Huioun AD Group) ដែលជាក្រុមហ៊ុនបុត្រសម្ព័ន្ធរបស់ក្រុមបោកប្រាស់អន្តរជាតិឈ្មោះ ហួយ ហ្គែរិនធី (Huioun Guarantee)។

ប្រភពដដែល បញ្ជាក់ថា ក្រុមហ៊ុនរបស់លោក ហ៊ុន តូ បានធ្វើការបោកប្រាស់តាមអនឡាញ ដូចជា ការបោកបញ្ឆោតក្នុងទំនាក់ទំនងស្នេហាផ្លូវភេទ ការបោកប្រាស់ក្នុងគម្រោងវិនិយោគ ការលាងលុយកខ្វក់ដែលបោកប្រាស់បានពីជនរងគ្រោះ និងការចាប់ជំរិត ជាដើម។

ប្រភពពីមនុស្សដែលជិតស្និទ្ធនឹងឧកញ៉ា ហ៊ុន តូ មួយរូបបានទម្លាយថា ក្មួយប្រុសលោក ហ៊ុន សែន រូបនេះកំពុងសាងសង់ទីតាំងវាយកូនហ្គោល (Golf) នៅតំបន់បឹងតាមោក ក្នុងតម្លៃ ២៥០លានដុល្លារលើផ្ទៃដី ៤០ហិកតា។

ជាងនេះទៀត ក៏កំពុងទិញដីពង្រីកបន្ថែមជិត ២០ហិកតា (១៩ហិកតា) ទៀតដែរ ក្នុងតម្លៃជិត ៤០លានដុល្លារអាមេរិក (៣៦លានដុល្លារ) ពីលោកស្រីឧកញ៉ា អ៊ាន អាឡែន។

ប្រភពដែលនិយាយថា ឧកញ៉ា ហ៊ុន តូ បានកាត់គាស់រំលើងថ្មពីភ្នំតាកែន ដែលស្ថិតក្នុងភូមិបេង ឃុំចំបក់ ស្រុកភ្នំស្រួច ខេត្តកំពង់ស្ពឺ យកមកធ្វើជារបងដីរបស់គាត់ថែមទៀតផង៕

អំពើឆបោកអនឡាញកំពុងបំប្លែងខ្លួនទៅតាមតំបន់សេដ្ឋកិច្ចពិសេស រោងចក្រ សណ្ឋាគារ បុរីផ្ទះជួលនិងអគារកំពុងសង់

បទវិភាគ

បទវិភាគ៖ ហេតុអ្វីបានជារុស្ស៊ី ខ្លាចមីស៊ីល Tomahawk អាមេរិក? ធ្វើដូចម្ដេចអ៊ុយក្រែន បានអាវុធនេះពីលោក ត្រាំ?

បទវិភាគ៖ ពីឧក្រិដ្ឋជនសង្គ្រាមក្លាយជាភ្ញៀវរបស់អាមេរិក លោក ត្រាំ ទាញលោក ពូទីន ចេញពីភាពឯកា

បទវិភាគព័ត៌មាន៖ មិនអាចប្ដូរមេដឹកនាំផ្ដាច់ការនៅបេឡារូស លើកលែងតែដូចប្រទេសបង់ក្លាដេស

បទវិភាគ៖ របបផ្ដាច់ការនៅប្រទេសស៊ីរី ដល់ពេលត្រូវបាត់បង់ហើយ

បទវិភាគ៖ ប្រទេសមួយក្រោមឥទ្ធិពលចិនខ្លាំង ហើយពីរទៀតក្រោមឥទ្ធិពលវៀតណាមផងចិនផង

បទវិភាគ៖ ផ្លែការ៉ុតនិងដំបងដាក់នៅចំពោះមុខកម្ពុជាក្នុងភូមិសាស្ត្រនយោបាយរវាងអាមេរិកនិងចិន

បទវិភាគ៖ តើប៉ាឡេស្ទីន អាចក្លាយជាសមាជិកពេញសិទ្ធិនៃអង្គការសហប្រជាជាតិបានដែរឬទេ?

បទវិភាគ៖ អាហ្វ្រិកខាងត្បូងអូសអ៊ីស្រាអែលឡើង ICC តែផ្ដល់ឱកាសឱ្យរុស្ស៊ីបន្តវិនាសកម្មនៅអ៊ុយក្រែន

អត្ថបទទាក់ទង

អាជ្ញាធរមានសមត្ថកិច្ចខ្មែរ និងកូរ៉េខាងត្បូង ធ្វើសហប្រតិបត្តិការកម្ចាត់បទល្មើសឆបោកតាមអនឡាញ

ការិយាល័យរដ្ឋអាជ្ញានៅរដ្ឋធានីវ៉ាស៊ីនតុន ប្រកាសដាក់ទណ្ឌកម្មឧកញ៉ាក្នុងគណបក្សប្រជាជនកម្ពុជា

អ្នកឃ្លាំមើលថាអាមេរិកដាក់ទណ្ឌកម្មលើឧកញ៉ា កុក អាន ជាសញ្ញាអាសន្នដល់កម្ពុជា

អាមេរិកប្រកាសផ្តល់ប្រាក់រង្វាន់ ៤លានដុល្លារសម្រាប់ការផ្តល់ព័ត៌មានឧក្រិដ្ឋជនចិនឈ្មោះ Daren Li

មន្ត្រីរដ្ឋាភិបាលនិងមន្ត្រីបក្សក្រៅរដ្ឋាភិបាលខ្មែរ កើតទុក្ខមិនសុខចិត្តនឹងពាក្យគេហៅ Scambodia

តើពលរដ្ឋខ្មែរគួរខឹងអ្នកហៅស្រុកទេសខ្លួនថា Scambodia ឬអ្នកដែលអនុញ្ញាតឱ្យឧក្រិដ្ឋកម្មនេះរីកដូចផ្សិតនៅកម្ពុជា?

អត្ថបទអានច្រើន

និស្សិតភូមា យករូបមេដឹកនាំកម្ពុជាលោក ហ៊ុន សែន ទៅជាន់ឈ្លីនិងដុតចោលតាមទីសាធារណៈ

លោក ហ៊ុន សែន គំរាមមិនឱ្យលោក ស ខេង ឈរជាបេក្ខភាពនាយករដ្ឋមន្ត្រីបន្ទាប់ពីលោកជាដាច់ខាត

អតិថិជនទិញអចលនទ្រព្យពីអ្នកឧកញ៉ា ឡេង ណាវ៉ាត្រា ទាមទារផ្ទះតាមកិច្ចសន្យា

អតិថិជនទិញផ្ទះល្វែងពីបុរីពិភពថ្មីកំបូលខកចិត្តនឹងគុណភាពសំណង់ផ្ទះល្វែង និងសេវាមួយចំនួនរបស់ក្រុមហ៊ុននេះ

លោក ជា សុផារ៉ា រងការចោទប្រកាន់ថាប្រព្រឹត្តអំពើពុករលួយក្នុងជួរបក្សកាន់អំណាចរបស់ខ្លួន

លោក សម រង្ស៊ី ប្រកាសរកការរួបរួមជាមួយបក្សកាន់អំណាចរបស់លោក ហ៊ុន សែន ដើម្បីជាតិខ្មែររុងរឿង

សេចក្ដីរាយការណ៍ពិសេស

លោក ចេន ហ្ស៊ី បាត់មុខពីកម្ពុជា ស្របពេលអាមេរិកលាតត្រដាងអំពើឆបោកនិងលាងលុយកខ្វក់ក្នុងប្រព័ន្ធគ្រីបតូ

តើព្រះសង្ឃ និងមេដឹកនាំខ្មែរ បានធ្វើអ្វីខ្លះដើម្បីជាប្រយោជន៍ដល់ព្រះពុទ្ធសាសនា និងសង្គមជាតិរបស់ខ្លួន?

តើកាកបាទក្រហមកម្ពុជាទទួលអំណោយសប្បុរសដោយកុសលកម្ម ឬអកុសលកម្មបថ?

លោក ហេង សិទ្ធី អំពាវនាវឱ្យពលរដ្ឋខ្មែរចូលរួមរំដោះប្រទេសចេញពីអំណាចប្រមូលផ្ដុំគ្រួសារតែមួយ

មេធាវី៖ ការចាប់ខ្លួនលោក ហេង សិទ្ធី ដោយសារដឹងអំពីផែនការបង្កើតបក្សនយោបាយប្រឆាំងត្រកូលហ៊ុន