អ្នកឃ្លាំមើលសង្គម លើកឡើងថា ការសម្រេចចិត្តរបស់ក្រសួងហិរញ្ញវត្ថុអាមេរិក ក្នុងការបង្កកទ្រព្យសម្បត្តិសមាជិកព្រឹទ្ធសភាកម្ពុជា លោក កុក អាន និងបណ្ដាញជំនួញរបស់គាត់ គឺជាសញ្ញាប្រកាសអាសន្នមួយដែលប្រាប់ថា រដ្ឋាភិបាលរបស់លោក ហ៊ុន ម៉ាណែត កំពុងស្ថិតក្នុងស្ថានភាពផុយស្រួយ និងប្រឈមបំផុតក្នុងពេលនេះ។
អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី បានសរសេរលើគណនីហ្វេសប៊ុករបស់ខ្លួននៅថ្ងៃទី២៤ មេសា ថា បើពិនិត្យទៅលើភាពស្មុគស្មាញ និងទំហំនៃបណ្ដាញឧក្រិដ្ឋកម្មដែលបានចាក់ឫសយ៉ាងជ្រៅ ដូចជាករណីលោក កុក អាន ដែលជាសមាជិកព្រឹទ្ធសភា និងក្រុមហ៊ុនសន្តិសុខផ្ទាល់ខ្លួន ដូចជា អានកូ ប្រាឌ័រ ជាដើម បង្ហាញថាការលុបបំបាត់ឧក្រិដ្ឋកម្មឆបោកនៅកម្ពុជាឱ្យអស់ត្រឹមដំណាច់ខែមេសា នេះ ហាក់ដូចជាពិបាកនឹងទៅរួចបំផុត។
លោក សេង វណ្ណលី លើកឡើងថា សព្វថ្ងៃ បណ្ដាញទាំងនេះមិនមែនត្រឹមតែជាទីតាំងដាច់ដោយឡែកទេ ប៉ុន្តែវាគឺជា «អាណាចក្រឆបោក» ដែលមានរចនាសម្ព័ន្ធធំធេងគ្របដណ្ដប់ទាំងលើវិស័យអចលនទ្រព្យ ធនាគារ និងសណ្ឋាគារ ដូចជាករណីសណ្ឋាគារ ស៊ីហ៊ូ រីសត និងធនាគារ ហេង ហ្វេង ជាដើម ដែលតម្រូវឱ្យមានការស៊ើបអង្កេតយ៉ាងស៊ីជម្រៅ និងប្រើពេលវេលាយូរដើម្បីកម្ទេចឱ្យអស់ដល់ឫសគល់នោះ។
លោកអះអាងថា ទោះបីជានាយករដ្ឋមន្ត្រីខ្មែរលោក ហ៊ុន ម៉ាណែត បង្ហាញពីការតាំងចិត្តបោសសម្អាតឧក្រិដ្ឋកម្មទាំងនេះយ៉ាងណាក៏ដោយ ក៏ការបង្ក្រាបកន្លងមកគ្រាន់តែជាផ្នែកមួយនៃដំណោះស្រាយប៉ុណ្ណោះ ប៉ុន្តែអ្វីដែលជាឧបសគ្គធំបំផុត គឺនៅតែមិនអាចលុបបំបាត់ «អំណាចនៃនិទណ្ឌភាព» របស់ក្រុមឧកញ៉ា និងមន្ត្រីមានឥទ្ធិពលដែលនៅពីក្រោយខ្នងនៃអាជីវកម្មខុសច្បាប់ទាំងនេះ។
អ្នកឃ្លាំមើលរូបនេះបញ្ជាក់ថា ការដែលអាមេរិកដាក់ទណ្ឌកម្មបង្កកទ្រព្យសម្បត្តិលើបុគ្គលរហូតដល់ ២៨នាក់ និងអង្គភាពពាក់ព័ន្ធជាច្រើនទៀតកាលពីថ្ងៃទី២៣ ខែមេសា ឆ្នាំ២០២៦ នេះ គឺជាសក្ខីភាពដែលបញ្ជាក់ថា ឧក្រិដ្ឋកម្មនេះបានរីករាលដាលខ្លាំងហួសពីលទ្ធភាពនៃការបង្ក្រាបត្រឹមរយៈពេលខ្លី ជាពិសេសរយៈពេលដែលនៅសល់ក្នុងខែមេសា នេះ ដែលកម្ពុជាបានដាក់កំណត់នោះ។
ការអះអាងនេះ ធ្វើឡើងបន្ទាប់ពីអាមេរិកដាក់ទណ្ឌកម្មលើសមាជិកព្រឹទ្ធសភាកម្ពុជា ព្រមទាំងបុគ្គល និងស្ថាប័នជាច្រើនដែលពាក់ព័ន្ធនឹងឧក្រិដ្ឋកម្មឆបោកកាលពីថ្ងៃទី២៣ មេសា។
ការិយាល័យគ្រប់គ្រងទ្រព្យសម្បត្តិបរទេស (OFAC) របស់ក្រសួងរតនាគារសហរដ្ឋអាមេរិក បានដាក់ទណ្ឌកម្មលើសមាជិកព្រឹទ្ធសភាកម្ពុជា លោក កុក អាន ព្រមទាំងបុគ្គល និងស្ថាប័នពាក់ព័ន្ធសរុបចំនួន ២៨នាក់កាលពីថ្ងៃទី២៣ ខែមេសា ឆ្នាំ២០២៦ នេះ។
ក្រសួងរតនាគារសហរដ្ឋអាមេរិក អះអាងថា លោក កុក អាន និងសហការីរបស់គាត់ បានដំណើរការ និងទទួលផលចំណេញពីទីតាំងឆបោកដែលមានគោលដៅលើពលរដ្ឋអាមេរិក ហើយជាញឹកញាប់ បានប្រើប្រាស់ជនរងគ្រោះពីការជួញដូរមនុស្ស ដែលត្រូវបង្ខំឱ្យប្រព្រឹត្តអំពើខុសច្បាប់ក្រោមការគំរាមកំហែងនៃអំពើហិង្សា។
OFAC បញ្ជាក់ថា ក្រុមឆបោកបានប្រើប្រាស់អន្ទាក់នៃការលួងលោមក្រោមរូបភាពនៃទំនាក់ទំនងមិត្តភាព ឬស្នេហា ដោយពួកគេព្យាយាមបញ្ចុះបញ្ចូលពលរដ្ឋអាមេរិកដែលងាយរងគ្រោះ ឱ្យផ្ទេរប្រាក់សន្សំទៅឱ្យពួកគេក្នុងទម្រង់ជាទ្រព្យសម្បត្តិឌីជីថល ដោយពួកគេសន្យាថានឹងមានឱកាសវិនិយោគ រួមទាំងទទួលបានប្រាក់ចំណេញខ្ពស់ ប៉ុន្តែនេះគឺជាល្បិចដើម្បីល្បួងយកប្រាក់ជនរងគ្រោះប៉ុណ្ណោះ។
យ៉ាងណាក៏ដោយ នាយករដ្ឋមន្ត្រីកម្ពុជា លោក ហ៊ុន ម៉ាណែត បានចេញសេចក្តីប្រកាសព័ត៌មានក្រោយពីកិច្ចប្រជុំពេញអង្គគណៈរដ្ឋមន្ត្រីកាលពីថ្ងៃទី២៣ ខែមេសា នេះ ដោយចេញបញ្ជាឱ្យសមត្ថកិច្ច និងកងកម្លាំងពាក់ព័ន្ធទាំងអស់ បន្តការបង្ក្រាបបទល្មើស Scam Online មិនបង្អង់ដៃឡើយ។
លោក ហ៊ុន ម៉ាណែត បានបញ្ជាក់ថា កម្ពុជាមានច្បាប់បង្ក្រាបឧក្រិដ្ឋកម្មអនឡាញហើយ ដូច្នេះស្ថាប័នពាក់ព័ន្ធត្រូវតែអនុវត្តឱ្យបានម៉ត់ចត់ និងឱ្យមានប្រសិទ្ធភាពដោយមិនបន្ធូរដៃ និងដោយគ្មានការលើកលែងដាច់ខាត។
ជុំវិញបញ្ហានេះ អង្គការ Humanity Research Consultancy បានបង្ហាញរបាយការណ៍ស៊ើបអង្កេតរបស់ខ្លួនកាលពីពេលថ្មីៗនេះថាមានមនុស្សយ៉ាងតិច ២៨នាក់ ដែលជាមេខ្លោងនៃក្រុមឧក្រិដ្ឋកម្មអនឡាញនៅក្នុងប្រទេសកម្ពុជា រួមមាន៖
- សហនាយកសណ្ឋាគារអន្តរជាតិណានហៃ ឈ្មោះ អ៊ិក ប៉ោន
- ប្រធានក្រុមហ៊ុន ហេង ហឺ ឈ្មោះ ចេន អាលឡេន
- នាយិកាក្រុមហ៊ុន Amiga Entertainment (Isle of Man) និងជានាយិកាក្រុមហ៊ុន Prince Real Estate របស់តៃវ៉ាន់ ឈ្មោះ ចិន ស៊ីវលីង
- ប្រធានក្រុមហ៊ុន ព្រីនស៍ គ្រុប (Prince Group Holdings) និងជាទីប្រឹក្សាលោក ហ៊ុន ម៉ាណែត និងលោក ហ៊ុន សែន ដែលត្រូវបានចាប់ខ្លួនបញ្ជូនទៅប្រទេសចិន កាលពីពេលថ្មីៗនេះ ឈ្មោះ ចេន ហ្ស៊ី
- រដ្ឋលេខាធិការក្រសួងមហាផ្ទៃ និងជាអនុប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អ្នកស្រី ជូ ប៊ុនអេង
- នាយកក្រុមហ៊ុន Golden Sun Sky Entertainment Co., Ltd ឈ្មោះ ដុង លេឆេង
- អគ្គស្នងការរងនគរបាលជាតិ និងជាអគ្គនាយកនៃនាយកដ្ឋានសន្តិសុខកណ្ដាល និងជាកូនប្រសារបស់លោក ហ៊ុន សែន គឺលោក ឌី វិជ្ជា
- នាយកប្រតិបត្តិ (CEO) នៃក្រុមហ៊ុន Prince Real Estate Group ឈ្មោះ អ៊ែដវឺដ លី
- ប្រធានផ្នែកទំនាក់ទំនងនៃក្រុមហ៊ុន ព្រីនស៍ គ្រុប (Prince Group) ឈ្មោះ ហ្គាប្រ៊ីយ៉ែល តាន់
- មេបញ្ជាការកងអង្គរក្សដែលត្រូវបានក្រសួងរតនាគារសហរដ្ឋអាមេរិក ដាក់ទណ្ឌកម្មកាលពីឆ្នាំ២០១៨ លោក ហ៊ីង ប៊ុនហៀង
- នាយកក្រុមហ៊ុន ហួយវ័ន្ត ផេ (Huione Pay), ធនាគារ ផេនដា (Panda Bank) និងធនាគារ Heng He ដែលត្រូវជាបងប្អូនជីដូនមួយនាយករដ្ឋមន្ត្រីកម្ពុជា លោក ហ៊ុន ម៉ាណែត គឺឧកញ៉ា ហ៊ុន តូ
- នាយកប្រតិបត្តិដែលជាប់ពាក់ព័ន្ធនឹងក្រុមហ៊ុន ព្រីនស៍ គ្រុប (Prince Group) និងជាប្រធានកាស៊ីណូ Golden Fortune លោក អ៊ឹង ដារ៉ា
- សមាជិកព្រឹទ្ធសភា និងជាម្ចាស់កាស៊ីណូ Crown ឧកញ៉ា កុក អាន
- អភិបាលខេត្តកណ្តាល និងជាអតីតអភិបាលខេត្តព្រះសីហនុ លោក គួច ចំរើន
- នាយកក្រុមហ៊ុន ហួយវ័ន្ត (Huione) ឈ្មោះ លី ស៊ុង
- អភិបាលរងខេត្តព្រះសីហនុ លោក ឡុង ឌីម៉ង់
- សមាជិកព្រឹទ្ធសភា និងជាសមាជិកអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា ដែលត្រូវបានក្រសួងរតនាគារសហរដ្ឋអាមេរិក ដាក់ទណ្ឌកម្មកាលពីឆ្នាំ២០២៤ ឧកញ៉ា លី យ៉ុងផាត់
- ឧបនាយករដ្ឋមន្ត្រី និងជាក្មួយប្រសារបស់លោក ហ៊ុន សែន លោក នេត សាវឿន
- ប្រធានក្រុមហ៊ុន K99 Group លោក រីទ្ធី រស្មី
- លោក រីទ្ធី សំណាង ដែលបានទទួលមរណភាព
- សហនាយកសណ្ឋាគារអន្តរជាតិ ណានហៃ អ្នកស្រី សាយ អ៊ុងលីន
- ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស សុខា
- នាយកធនាគារពាណិជ្ជ ឈ្មោះ ស៊ូ ចុងជៀន
- នាយកក្រុមហ៊ុន MDS Heng He និងជាទីប្រឹក្សាប្រធានព្រឹទ្ធសភាលោក ហ៊ុន សែន ដែលត្រូវបានក្រសួងរតនាគារសហរដ្ឋអាមេរិក ដាក់ទណ្ឌកម្មកាលពីឆ្នាំ២០១៩ គឺឧកញ៉ា ទ្រី ភាព
- នាយកក្រុមហ៊ុន Huione Insurance លោក យ៉ាន បូរិទ្ធ
- នាយកក្រុមហ៊ុន Huione Life Insurance និង Heng He លោក យ៉ាន ណារ៉ុង
- នាយកក្រុមហ៊ុន Huione Pay លោក យ៉ាន សត្យា
- សហម្ចាស់សណ្ឋាគារ និងកាស៊ីណូ KB ឈ្មោះ ស៊ូ អាយមីន។
សារព័ត៌មាន The Cambodia Daily មិនទាន់អាចទាក់ទងអ្នកនាំពាក្យរងក្រសួងមហាផ្ទៃ លោក ទូច សុឃៈ ដើម្បីសុំការបំភ្លឺជុំវិញបញ្ហានេះបាននៅឡើយទេ រហូតដល់ម៉ោងផ្សាយនេះ៕
© 2026, ឌឹ ខេមបូឌា ដេលី. All rights reserved.