អំពើចលាចលយោធារយៈពេល ២៤ម៉ោងកាលពីថ្ងៃសៅរ៍ ទី២៥ ខែមិថុនា ដែលក្រុមទាហានស៊ីឈ្នួល Wagner បង្កនៅក្នុងទឹកដីរុស្ស៊ី បាននាំទៅរកការបញ្ចេញមតិរបស់ក្រុមបស្ចិមប្រទេស និងអ្នកសង្កេតការណ៍ដែលថា យុទ្ធសាស្ត្រសង្គ្រាមឈ្លានពានប្រទេសអ៊ុយក្រែន របស់លោក ពូទីន ដើរដល់ចំណុចធាក់ថយក្រោយវិញហើយ ព្រោះតែអស់លទ្ធភាពវាយកាន់កាប់ទឹកដីអ៊ុយក្រែន។
កាលពីថ្ងៃទី២៥ មិថុនា ពិភពលោកមានការភ្ញាក់ផ្អើលជាខ្លាំងចំពោះក្រុមទាហានស៊ីឈ្នួលឱ្យរុស្ស៊ី ហៅថា Wagner group ដែលបានលើកទ័ពជាង ២ម៉ឺន ៥ពាន់នាក់ចូលក្នុងប្រទេសរុស្ស៊ី ដោយបើកការវាយប្រហារជាមួយទ័ពរុស្ស៊ី នៅក្នុងទីក្រុងចំនួនពីរនៅក្បែរព្រំដែនប្រទេសអ៊ុយក្រែន។
តាមការចុះផ្សាយរបស់សារព័ត៌មាន Reuters ឱ្យដឹងថា ការប៉ះទង្គិចគ្នានោះបណ្ដាលឱ្យកងទ័ពទាំងសងខាងរងរបួស ហើយឧទ្ធម្ភាគចក្រ ៣គ្រឿងរបស់រុស្ស៊ីដែលវាយប្រហារលើក្រុម Wagner ត្រូវបានបាញ់ទម្លាក់។
យ៉ាងណាក៏ដោយ ដើមចមដែលនាំឱ្យក្រុម Wagner លើកទ័ពសំដៅទៅរដ្ឋធានីមូស្គូ ដោយសារតែក្រុមនេះទៅតវ៉ាព្រោះតែមេទ័ពរបស់រុស្ស៊ី ប្រមាថមើលងាយ ហើយជាពិសេសគ្រាប់មីស៊ីលមួយគ្រាប់ដែលបានធ្លាក់ចូលក្នុងមូលដ្ឋានទ័ព Wagner ដោយបានបាញ់ចេញពីខាងក្នុងទឹកដីរុស្ស៊ី។
ប្រធានក្រុមទាហានស៊ីឈ្នួល Wagner លោក Yevgeny Prigozhin ប្រកាសថ្កោលទោសក្រសួងការពារជាតិរុស្ស៊ី ហើយសម្រេចបែកផ្លូវគ្នាជាមួយនឹងការដាក់សម្ពាធឱ្យលោក ពូទីន ដកហូតតំណែងរដ្ឋមន្ត្រីការពារជាតិ លោក Sergei Shoigu និងអគ្គសេនាធិការកងទ័ពឧត្តមសេនីយ៍ Valery Gerasimov។
ចលាចលកងទ័ពដែលបង្កឡើងដោយក្រុម Wagner ត្រូវបានប្រព័ន្ធផ្សព្វផ្សាយរបស់ក្រុងមូស្គូ ហៅថាជាសកម្មភាពទៅរកការធ្វើរដ្ឋប្រហារក្រោយពីក្រុម Wagner បង្វែរគោលដៅទៅរកក្រុងមូស្គូ ស្របពេលដែលលោកប្រធានាធិបតី វ៉្លាឌីមៀរ ពូទីន បានប្រកាសថ្កោលទោស ហើយចោទលោក Yevgeny Prigozhin ថាជាជនក្បត់ជាតិ ដោយបញ្ជាឱ្យកងទ័ពជាតិតាមចាប់ខ្លួនមេទ័ពក្រុម Wagner យកមកកាត់ទោស។
ភ្លាមៗក្រោយពីលោក ពូទីន ចេញបញ្ជាឱ្យចាប់ខ្លួន លោក Prigozhin ប្រកាសថារុស្ស៊ីត្រូវការប្រធានាធិបតីថ្មី។ ប្រព័ន្ធផ្សព្វផ្សាយនៅក្រុងមូស្គូ បានហៅការរុលសំដៅទៅក្រុងមូស្គូ របស់ទ័ព Wagner ថាជារដ្ឋប្រហារ។
តែចលនារបស់ទ័ពក្រុម Wagner ដែលសំដៅទៅក្រុងមូស្គូ បានវិលត្រឡប់ទៅជំរំវិញក្រោយពីលោក ពូទីន ទទួលយកការសម្របសម្រួលពីប្រធានាធិបតីនៃប្រទេសបេឡារូស ហើយសម្រេចដកបទបញ្ជាចាប់ខ្លួនលោក Prigozhin ជាមួយនឹងការទុកជាមោឃៈការចោទលោក Prigozhin ថាជនក្បត់ជាតិ។ ស្របពេលនោះ លោក Prigozhin ក៏ទទួលយកការនិរទេសខ្លួនទៅនៅប្រទេសបេឡារូស។
តែយ៉ាងណានេះក្ដី អ្នកសង្កេតការណ៍ និងក្រុមមន្ត្រីជាន់ខ្ពស់នៃក្រុមបស្ចិមប្រទេស បានហៅស្ថានភាពនៅរុស្ស៊ី ថាកំពុងធ្លាក់ក្នុងការបែកបាក់ជុំវិញយុទ្ធសាស្ត្ររបស់លោក ពូទីន ធ្វើសង្គ្រាមឈ្លានពានប្រទេសអ៊ុយក្រែន។
ផ្ដើមមុនគេដោយរដ្ឋមន្ត្រីការបរទេសសហរដ្ឋអាមេរិក លោក Antony Blinken បាននិយាយថា ការបះបោររបស់ក្រុមទាហានស៊ីឈ្នួលរុស្ស៊ី Wagner ប្រឆាំងនឹងវិមានក្រឹមឡាំង បានបង្ហាញពី «ស្នាមប្រេះ» នៅក្នុងអំណាចដឹកនាំរបស់លោកប្រធានាធិបតី វ្ល៉ាឌីមៀរ ពូទីន បើទោះជាការបះបោរនេះត្រូវបញ្ឈប់ទៅវិញនៅកណ្ដាលទីក៏ដោយ។
លោក Blinken ធ្វើការកត់សម្គាល់បែបនេះនៅក្នុងបទសម្ភាសន៍ជាមួយកម្មវិធី Face the Nation របស់ទូរទស្សន៍អាមេរិក CBS កាលពីថ្ងៃអាទិត្យ ទី២៥ ខែមិថុនា និងបន្ទាប់ពីការបះបោរប្រដាប់អាវុធប្រឆាំងនឹងរដ្ឋមន្ត្រីការពារជាតិរុស្ស៊ី ដឹកនាំដោយថៅកែទាហានស៊ីឈ្នួល Wagner លោក Prigozhin បានបញ្ឈប់ទៅវិញក្រោមការសម្របសម្រួលពីប្រធានាធិបតីបេឡារូស។
នៅក្នុងបទសម្ភាសន៍នោះ លោក Blinken បានសង្កត់ធ្ងន់ថា ការបះបោររបស់ទាហានស៊ីឈ្នួលរុស្ស៊ី គឺជាការគំរាមកំហែងដោយផ្ទាល់ដល់អំណាចដឹកនាំរបស់លោក ពូទីន ដែលនេះបានបង្កឱ្យមានភាពមិនច្បាស់លាស់ និងបង្ហាញពីស្នាមប្រេះយ៉ាងពិតប្រាកដនៅក្នុងអំណាចដឹកនាំរបស់លោក ពូទីន។
ជាមួយគ្នានេះ អគ្គលេខាធិការអង្គការណាតូ លោក Jens Stoltenberg បាននិយាយនៅថ្ងៃចន្ទនេះថា សកម្មភាពបះបោរប្រដាប់អាវុធដែលក្រោយមកត្រូវបោះបង់ចោលវិញរបស់ក្រុមទាហានស៊ីឈ្នួល Wagner នៅប្រទេសរុស្ស៊ី បង្ហាញថា ទីក្រុងមូស្គូបានប្រព្រឹត្តកំហុសឆ្គងផ្នែកយុទ្ធសាស្ត្រដ៏ធំមួយតាមរយៈការសម្រេចចិត្តបង្កសង្គ្រាមនៅអ៊ុយក្រែន។
ថ្លែងប្រាប់ក្រុមអ្នកសារព័ត៌មានអំឡុងទស្សនកិច្ចប្រទេសលីទុយអានី លោកប្រមុខអង្គការណាតូ បានលើកឡើងថា៖ ព្រឹត្តិការណ៍ដែលបានកើតឡើងកាលពីថ្ងៃសៅរ៍ គឺជាបញ្ហាផ្ទៃក្នុងរបស់ប្រទេសរុស្ស៊ី ហើយជាការស្តែងឱ្យឃើញជាថ្មីមួយទៀតអំពីកំហុសផ្នែកយុទ្ធសាស្ត្រដ៏ធំ ដែលលោក ពូទីន បានប្រព្រឹត្តតាមរយៈការក្រសោបយកតំបន់ឧបទ្វីបគ្រីមៀរ ដោយខុសច្បាប់ និងការបង្កសង្គ្រាមឈ្លានពានប្រឆាំងលើអ៊ុយក្រែន។
ជុំវិញការបះបោរផ្នែកយោធានៅក្នុងប្រទេសរុស្ស៊ី ប្រធានគោលនយោបាយការបរទេសរបស់សហភាពអឺរ៉ុប លោក Josep Borrell បាននិយាយថា ការបះបោរដោយក្រុមទាហានស៊ីឈ្នួល Wagner នៅក្នុងប្រទេសរុស្ស៊ី បានបង្ហាញពីភាពប្រេះឆាក្នុងអំណាចយោធារបស់ទីក្រុងមូស្គូ ដែលអាចបណ្តាលមកពីសង្គ្រាមលើប្រទេសអ៊ុយក្រែន។
លោក Borrell បានប្រាប់អ្នកយកព័ត៌មានដូចនេះនៅក្នុងប្រទេសលុចហ្សំបួរ មុនពេលលោកចូលរួមកិច្ចប្រជុំរដ្ឋមន្ត្រីការបរទេសសហភាពអឺរ៉ុប។
លោកបានបញ្ជាក់ថា៖ ប្រព័ន្ធនយោបាយរុស្ស៊ី កំពុងបង្ហាញពីភាពផុយស្រួយ ហើយអំណាចយោធាកំពុងប្រេះឆា ហើយថាលោក ពូទីន ដែលជាអ្នកបង្កើតក្រុម Wagner ឥឡូវក្រុមនេះកំពុងធ្វើសកម្មភាពប្រឆាំងនឹងអ្នកដែលបានបង្កើតពួកគេ។
លោកប្រមុខកិច្ចការបរទេសសហភាពអឺរ៉ុប បានបន្ថែមថា៖ វាមិនមែនជារឿងល្អទេដែលមហាអំណាចនុយក្លេអ៊ែរមួយនេះកំពុងឈានចូលទៅក្នុងដំណាក់កាលនៃអស្ថិរភាពនយោបាយ។
លោក ពូទីន មិនត្រឹមតែអាម៉ាស់មុខនៅឆាកអន្តរជាតិករណីការបះបោររបស់ក្រុមទាហានស៊ីឈ្នួល Wagner នោះទេ លោកអាចប្រឈមនឹងរលករិះគន់តវ៉ាក្នុងប្រទេសរុស្ស៊ីថែមទៀត បើសង្គ្រាមលើទឹកដីអ៊ុយក្រែនកាន់តែអូសបន្លាយ ហើយរុស្ស៊ីពុំមានលទ្ធភាពឈ្នះសង្គ្រាមផងនោះ៕