ក្រុមកូដករក្រុមហ៊ុនណាហ្គាវើលដ៍ប្រមាណជា ២០នាក់ បន្តចេញទាមទារឲ្យថៅកែក្រុមហ៊ុនណាហ្គាវើលដ៍ចេញមុខដោះស្រាយវិវាទ ដើម្បីឲ្យពួកគេបានចូលធ្វើការងារវិញ និងទាមទារឲ្យតុលាការដោះលែងមេដឹកនាំសហជីព កញ្ញា ឈឹម ស៊ីថរ ដែលកំពុងត្រូវបានឃុំខ្លួនក្នុងពន្ធនាគារទាំងអយុត្តិធម៌សព្វថ្ងៃនេះផងដែរ។
ក្រុមកូដករក្រុមហ៊ុនណាហ្គាវើលដ៍ដែលនៅតស៊ូដើម្បីរកយុត្តិធម៌ នាំគ្នាចេញធ្វើកូដកម្មអហិង្សានៅមុខក្រុមហ៊ុនណាហ្គាវើលដ៍២ ដែលស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ នៅថ្ងៃទី១២ ខែកក្កដា ឆ្នាំ២០២៣ នេះជាថ្មីទៀត ដោយលើកបដាមានរូបកញ្ញា ឈឹម ស៊ីថរ ជាដើម ឈរបង្ហាញការទាមទារទៅកាន់ថៅកែក្រុមហ៊ុនឱ្យចេញមុខដោះស្រាយវិវាទការងារ ដើម្បីបញ្ចប់បញ្ហានេះ ជាជាងទុកបណ្តែតបណ្តោយឱ្យនៅរ៉ាំរ៉ៃបន្តទៀត។
ការចេញធ្វើកូដកម្មអហិង្សានេះ ធ្វើឡើងដើម្បីទាមទារឱ្យថៅកែក្រុមហ៊ុនណាហ្គាវើលដ៍ចេញមុខដោះស្រាយលើវិវាទការងារជាមួយពួកគេដែលបានអូសបន្លាយអស់រយៈពេលជាង ២ឆ្នាំកន្លងមកនេះ។
ជុំវិញវិវាទការងារនៃក្រុមហ៊ុនណាហ្គាវើលដ៍នេះ មេដឹកនាំបក្សកាន់អំណាចលោក ហ៊ុន សែន បានលើកឡើងកាលពីដើមខែមិថុនា កន្លងទៅថា អតីតបុគ្គលិកណាហ្គាវើលដ៍ដែលនៅសេសសល់ចំនួនតែជាង ៩០នាក់ប៉ុណ្ណោះដែលមិនព្រមទទួលយកដំណោះស្រាយរបស់ក្រុមហ៊ុន។ លោកបន្ថែមថា មិនមែនលោកមិនដឹងថាពួកគេកំពុងស៊ីឈ្នួលធ្វើបាតុកម្មនោះទេ។
យ៉ាងណាក៏ដោយ អ្នកគ្រប់គ្រងសិទ្ធិការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក ឃុន ថារ៉ូ ធ្លាប់អះអាងថា ការសន្និដ្ឋានផ្ទុយពីការពិត គឺរឹតតែបង្កភាពឈឺចាប់ដល់ជនរងគ្រោះពិតប្រាកដ និងជាការលើកទឹកចិត្តឱ្យមានភាពអយុត្តិធម៌ក្នុងសង្គមកម្ពុជាកាន់តែច្រើនទ្បើងៗទៅវិញប៉ុណ្ណោះ។
លោក ឃុន ថារ៉ូ ត្អូញត្អែរថាវាគឺជាការឈឺចាប់បំផុតសម្រាប់សង្គមខ្មែរដែលមន្ត្រីរាជការជាអ្នកបម្រើរាស្ត្រមួយចំនួនធំមានទ្រព្យសម្បត្តិស្តុកស្តម្ភហូរហៀររាប់សិបលានដុល្លារអាមេរិក ខណៈប្រជារាស្ត្រខ្មែរដែលជាកម្មករសូម្បីតែស្រែករកយុត្តិធម៌ត្រឹមមួយចម្អែតក្រពះដែលជាផ្នែកមួយនៃសិទ្ធិរស់រានមានជីវិតរបស់ខ្លួន ក៏មិនទទួលបានផងនោះ។
កាលពីថ្ងៃទី៨ ខែមេសា ឆ្នាំ២០២១ កន្លងទៅ ក្រុមហ៊ុនណាហ្គាវើលដ៍បានប្រកាសបញ្ឈប់កម្មករនិយោជិតជាង ១ពាន់នាក់ ក្រោមមូលហេតុជួបវិបត្តិហិរញ្ញវត្ថុដោយសារការរីករាលដាលនៃជំងឺកូវីដ-១៩ ប៉ុន្តែកម្មករនិយោជិតទាំងនោះអះអាងថា ការលើកឡើងនេះគ្រាន់តែជាលេសរបស់ក្រុមហ៊ុនក្នុងចេតនាចង់រំលាយក្រុមសហជីពដែលតែងតែជួយការពារសិទ្ធិកម្មករកន្លងមកប៉ុណ្ណោះ។
បន្ទាប់ពីក្រុមហ៊ុនបញ្ឈប់កម្មករដោយរំលោភបំពានច្បាប់ការងារ នៅថ្ងៃទី១៨ ខែធ្នូ ឆ្នាំ២០២១ បុគ្គលិកក្រុមហ៊ុនណាហ្គាវើលដ៍ជាង ១៣០០នាក់ នាំគ្នាធ្វើកូដកម្មដោយសន្តិវិធីនៅមុខក្រុមហ៊ុនល្បែងស៊ីសងនេះ ដើម្បីទាមទារឱ្យក្រុមហ៊ុនទទួលយកបុគ្គលិកទាំង ៣៦៥នាក់ដែលក្រុមហ៊ុនបានបញ្ឈប់ ឱ្យចូលបម្រើការងារវិញ ប៉ុន្តែត្រូវអាជ្ញាធរចោទថាពួកគេបានធ្វើចលនាបដិវត្តន៍ពណ៌ដែលមានការរៀបចំ និងបណ្តុះបណ្តាលដោយពួកបរទេស។
ចាប់តាំងពីថ្ងៃចាប់ផ្តើមធ្វើកូដកម្មនៅថ្ងៃទី១៨ ខែធ្នូ ឆ្នាំ២០២១ រហូតដល់ពេលនេះមានរយៈពេលជិត ២ឆ្នាំហើយ ប៉ុន្តែវិវាទនេះនៅតែគ្មានដំណោះស្រាយដដែល ខណៈប្រធានសហជីពកញ្ញា ឈឹម ស៊ីថរ ក៏ត្រូវបានសមត្ថកិច្ចក្រុងភ្នំពេញចាប់ខ្លួនសាជាថ្មីម្តងទៀតកាលពីថ្ងៃទី២៦ ខែវិច្ឆិកា ឆ្នាំ២០២២ កន្លងទៅ និងក្រុមកូដករមួយចំនួនផ្សេងទៀតកំពុងរងនូវបណ្តឹងនានាតាមផ្លូវតុលាការ ខណៈលោក ហ៊ុន សែន ដែលជានាយករដ្ឋមន្ត្រី បែរជាចោទថាពួកគេស៊ីឈ្នួលធ្វើបាតុកម្មទៅវិញ៕