30 C
Phnom Penh

អង្គការ​សិទ្ធិមនុស្ស​អំពាវនាវ​ឱ្យ​តុលាការ​ទម្លាក់​ចោល​បទ​ចោទ​នានា​ពី​លោក វន់ ពៅ

ដោយ ឌឹ ខេមបូឌា ដេលី

បទវិភាគ

សមាគម​ការពារ​សិទ្ធិមនុស្ស អំពាវនាវ​ឱ្យ​តុលាការ​ផ្តល់​ភាព​ស្អាតស្អំ​ដល់​លោក វន់ ពៅ ចំពោះ​កិច្ចការ​ដែល​គាត់​បាន​ខិតខំ​ការពារ​សិទ្ធិ​កម្មករ​កន្លងមក ដោយ​ការ​ទម្លាក់​ចោល​នូវ​បទ​ចោទ​នានា​លើ​រូបលោក​ទាំងអស់ ត្បិត​ប្រធាន​សមាគម​ប្រជាធិបតេយ្យ​នៃ​សេដ្ឋកិច្ច​ក្រៅ​ប្រព័ន្ធ​រូប​នេះ​មិន​បាន​ប្រព្រឹត្ត​ដូច​ការ​ចោទប្រកាន់​នោះ​ឡើយ។

អ្នក​នាំពាក្យ​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា ប្រាប់​សារព័ត៌មាន The Cambodia Daily នៅ​ថ្ងៃទី​៤ សីហា នេះ​ថា លោក វន់ ពៅ គឺជា​ជន​រងគ្រោះ​ម្នាក់​ក្នុង​ចំណោម​ជន​រងគ្រោះ​ជាច្រើន​ទៀត​ពី​ការ​បង្ក្រាប​ដោយ​ហិង្សា ដូចជា​ការ​វាយដំ​ធ្ងន់ធ្ងរ​ពី​សំណាក់​កងកម្លាំង​ឆត្រ​យោង ៩១១ នៅ​មុខ​រោងចក្រ​យ៉ាកជីង កាលពី ៩​ឆ្នាំ​មុន ដូច្នេះ​ការ​ចោទប្រកាន់​លោក​ពី​បទ​ញុះញង់​ឱ្យ​ប្រព្រឹត្ត​បង្ក​ឱ្យ​មាន​ភាព​វឹកវរ​ដល់​សន្តិសុខ​សង្គម គឺ​ជា​ការ​ចោទប្រកាន់​ខុសពី​ការពិត និង​មិន​អាច​ទទួល​យក​បាន​នោះ​ឡើយ។

លោក ស៊ឹង សែនករុណា លើកឡើង​ថា ការ​ចូលរួម​ធ្វើ​កូដកម្ម​របស់​លោក វន់ ពៅ កាលពី​ឆ្នាំ​២០១៤ ជាមួយ​ក្រុម​កូដករ​នោះ គឺជា​ការ​អនុវត្ត​សិទ្ធិ​សេរីភាព​ដែល​មាន​ចែង​ក្នុង​រដ្ឋធម្មនុញ្ញ ដោយ​ការ​ចូលរួម​ជួយ​ទាមទារ​ប្រាក់ខែ​ឱ្យ​បាន ១៦០​ដុល្លារ​អាមេរិក​សម្រាប់​កម្មករ​តែប៉ុណ្ណោះ ប៉ុន្តែ​អាជ្ញាធរ​បែរ​ជា​បង្ក្រាប​ដោយ​ហិង្សា និង​ចាប់​លោក វន់ ពៅ និង​ក្រុម​កូដករ​ជាច្រើន​នាក់​ផ្សេង​ទៀត​ទៅ​ដាក់​ពន្ធនាគារ​ទៅវិញ ដែល​ការ​ធ្វើ​បែប​នេះ​គឺជា​អំពើ​ដ៏​អយុត្តិធម៌​យ៉ាង​ធ្ងន់ធ្ងរ​សម្រាប់​លោក វន់ ពៅ និង​កូដករ​ដែល​ត្រូវ​ចាប់​ខ្លួន​ទាំងនោះ។

មន្ត្រី​ជាន់ខ្ពស់​សមាគម​ការពារ​សិទ្ធិមនុស្ស​អាដហុក​រូប​នេះ​បញ្ជាក់​ថា អស់​រយៈពេល​ជាង ៩​ឆ្នាំ​ហើយ លោក វន់ ពៅ និង​កូដករ​ជាច្រើន​នាក់​ទៀត​ដែល​បាន​រង​នូវ​ការ​បង្ក្រាប​នា​ពេល​នោះ មិន​ទាន់​ទទួល​បាន​នូវ​យុត្តិធម៌ ដូច្នេះ​លោក​សង្ឃឹម​ថា​តុលាការ​នឹង​ផ្តល់​យុត្តិធម៌​ជូន​រូបលោក​នៅ​ក្នុង​សវនាការ​នា​ពេល​ខាងមុខ​នេះ។

ប្រធាន​សមាគម​ប្រជាធិបតេយ្យ​នៃ​សេដ្ឋកិច្ច​ក្រៅ​ប្រព័ន្ធ​លោក វន់ ពៅ ប្រាប់​សារព័ត៌មាន The Cambodia Daily នៅ​ថ្ងៃទី​៤ សីហា នេះ​ដែរ​ថា ក្នុង​នាម​លោក​ជា​ជន​រងគ្រោះ​ដែល​រង​នូវ​ការ​បង្ក្រាប​ដោយ​ហិង្សា​រហូត​មាន​របួស​ស្នាម​លើ​រូបរាងកាយ​ពី​សំណាក់​កងកម្លាំង​ឆត្រ​យោង ៩១១ និង​បាន​ទន្ទឹង​រង់ចាំ​យុត្តិធម៌​អស់​រយៈពេល​ជិត ១០​ឆ្នាំ​មក​នេះ លោក​សង្ឃឹម​ថា​សាលា​ឧទ្ធរណ៍​ភ្នំពេញ​នឹង​ផ្តល់​យុត្តិធម៌​ជូន​រូបលោក​នៅ​ថ្ងៃទី​១៧ ខែ​កក្កដា ខាងមុខ​នេះ។

លោក វន់ ពៅ អំពាវនាវ​សុំ​ឱ្យ​សាលា​ឧទ្ធរណ៍​ពិនិត្យ​លើ​សំណុំរឿង​របស់​លោក​ឱ្យ​បាន​ហ្មត់ចត់ និង​ផ្តល់​យុត្តិធម៌​ដល់​រូបលោក​ដែល​ជា​ជន​រងគ្រោះ​ពី​ការ​ប្រើ​អំពើ​ហិង្សា និង​ការ​ចោទប្រកាន់​ដោយ​គ្មាន​មូលដ្ឋាន​អស់​រយៈពេល​ជិត ១០​ឆ្នាំ​ទៅ​ហើយ​នោះ។

កាលពី​ថ្ងៃទី​៣ ខែ​កក្កដា ឆ្នាំ​២០២៣ ប្រធាន​សមាគម​ប្រជាធិបតេយ្យ​នៃ​សេដ្ឋកិច្ច​ក្រៅ​ប្រព័ន្ធ​លោក វន់ ពៅ បាន​បង្ហោះ​ដីកា​កោះហៅ​របស់​សាលា​ឧទ្ធរណ៍​ក្រុង​ភ្នំពេញ ដែល​តម្រូវ​ឱ្យ​លោក​ចូល​ខ្លួន​ទៅ​បំភ្លឺ​នៅ​ក្នុង​សវនាការ​នៅ​ថ្ងៃទី​១៧ ខែ​កក្កដា ខាងមុខ​នេះ ជុំវិញ​សំណុំរឿង​ដែល​លោក​ត្រូវ​បាន​ចោទប្រកាន់​ពី​បទ ញុះញង់​ឱ្យ​ប្រព្រឹត្ត​បង្ក​ឱ្យ​មាន​ភាព​វឹកវរ​ដល់​សន្តិសុខ​សង្គម​ក្នុង​សំណុំរឿង​ព្រហ្មទណ្ឌ ដែល​ចុះ​ថ្ងៃទី​១៦ ខែ​កញ្ញា ឆ្នាំ​២០១៤ កន្លងទៅ។

កាលពី​អំឡុង​ឆ្នាំ​២០១៤ លោក វន់ ពៅ បាន​ចូលរួម​ធ្វើ​កូដកម្ម​ទាមទារ​ដំឡើង​ប្រាក់​ឈ្នួល​ឱ្យ​បាន ១៦០​ដុល្លារ​ក្នុង​មួយ​ខែ​សម្រាប់​កម្មករ ប៉ុន្តែ​លោក​ត្រូវ​បាន​សមត្ថកិច្ច​ចាប់​ខ្លួន​នៅ​ពេល​នោះ និង​ត្រូវ​ចោទប្រកាន់​ពី​បទ​ញុះញង់​ឲ្យ​ប្រព្រឹត្ត​អំពើ​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម​ចំពោះ​ការ​ចូលរួម​នេះ។

ក្រោយពី​ចាប់​ខ្លួន សមត្ថកិច្ច​បញ្ជូន​លោក វន់ ពៅ ទៅ​ដាក់​ឃុំ​នៅ​ពន្ធនាគារ​ត្រពាំងផ្លុង ខេត្ត​ត្បូងឃ្មុំ ភ្លាមៗ​តែម្តង។ បន្ទាប់ពី​ឃុំ​ខ្លួន លោក វន់ ពៅ ត្រូវ​តុលាការ​ចេញ​សាលក្រម​កាត់​ឱ្យ​លោក​ជាប់​ទោស ៤​ឆ្នាំ ៦​ខែ និង​ពិន័យ​ជា​ប្រាក់ ៨​លាន​រៀល ក្នុង​នោះ​ត្រូវ​អនុវត្ត​ទោស​ក្នុង​ពន្ធនាគារ ៥​ខែ ចំណែក​ទោស​ដែល​នៅ​សល់ ត្រូវ​បាន​ព្យួរ​ជា​បណ្ដោះអាសន្ន។

អំឡុង​ពេល​នៅ​ក្រៅ​ឃុំ​បណ្ដោះអាសន្ន លោក វន់ ពៅ បាន​ដាក់​ពាក្យ​បណ្តឹង​ទៅ​សាលា​ឧទ្ធរណ៍​ដើម្បី​ជំទាស់​ទៅ​នឹង​សាលក្រម​របស់​សាលាដំបូង​ដែល​បាន​សម្រេច​ឱ្យ​លោក​មាន​ទោស ៤​ឆ្នាំ ៦​ខែ​ផង​ដែរ។ រហូត​ដល់​ឆ្នាំ​២០១៥ ទើប​សាលា​ឧទ្ធរណ៍​កោះហៅ​រូបលោក​ឱ្យ​ចូល​សវនាការ​ដើម្បី​បំភ្លឺ​លើ​សំណុំរឿង​នេះ ប៉ុន្តែ​ត្រូវ​ពន្យារ​ពេល​ទៅវិញ ដោយសារតែ​លោក វន់ ពៅ មាន​ជំងឺ​ធ្ងន់ធ្ងរ​នៅ​ពេល​នោះ រហូត​ដល់​ឆ្នាំ​២០២៣ នេះ ទើប​សាលា​ឧទ្ធរណ៍​ចេញ​ដីកា​កោះហៅ​រូបលោក​ម្តង​ទៀត៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស