ក្រសួងទេសចរណ៍កម្ពុជា អះអាងថា រយៈពេល ៧ខែ កម្ពុជាទទួលបានភ្ញៀវទេសចរផ្ទៃក្នុងជាង ១២លាននាក់នៅទូទាំងប្រទេស និងភ្ញៀវទេសចរអន្តរជាតិមានចំនួនជាង ២លាននាក់ ស្របពេលដែលប្រទេសថៃ ទទួលបានភ្ញៀវទេសចរអន្តរជាតិរហូតដល់ទៅ ១៥លាននាក់ក្នុងរយៈពេលដូចគ្នាក្នុងឆ្នាំ២០២៣ នេះ។
ក្រសួងទេសចរណ៍កម្ពុជា បានចេញរបាយការណ៍របស់ខ្លួនកាលពីថ្ងៃទី៦ ខែសីហា ឆ្នាំ២០២៣ ថា ចរន្តភ្ញៀវទេសចរជាធម្មតានៅខែកក្កដា និងខែសីហា នឹងធ្លាក់ចុះដោយសារតែក្នុងរយៈពេលពីរខែនេះស្ថិតនៅក្នុងរដូវភ្លៀង ដែលអាចមានទឹកជំនន់ និងខែទាំងពីរនេះមិនមានថ្ងៃឈប់សម្រាកបុណ្យជាតិ។
ប្រភពដដែលអះអាងថា ភ្ញៀវទេសចរនឹងចាប់ផ្តើមមានសន្ទុះខ្លាំងឡើងវិញចាប់ពីខែកញ្ញា តទៅ ដែលបណ្តាលមកពីមានការប្រារព្ធពិធីបុណ្យកាន់បិណ្ឌ និងបុណ្យភ្ជុំបិណ្ឌ ព្រមទាំងថ្ងៃឈប់សម្រាកនានាផងដែរ ដូច្នេះក្រសួងទេសចរណ៍រំពឹងថានឹងទទួលបានភ្ញៀវទេសចរផ្ទៃក្នុងប្រមាណ ១៦លាននាក់សម្រាប់ឆ្នាំ២០២៣ នេះ ដូចដែលក្រសួងធ្លាប់បានព្យាករក្នុងផែនទីចង្អុលផ្លូវស្ដីពីការស្ដារ និងលើកស្ទួយវិស័យទេសចរណ៍ក្រោយដំណាក់កាលវិបត្តិជំងឺកូវីដ-១៩ កាលពីពេលកន្លងទៅនោះជាមិនខាន។
ការអះអាងនេះ ធ្វើឡើងស្របពេលដែលគេមើលឃើញថា ភ្ញៀវទេសចរនៅកម្ពុជាកំពុងធ្លាក់ចុះខ្លាំង ខណៈតួលេខរបស់ក្រសួងទេសចរណ៍ត្រូវបានមជ្ឈដ្ឋានខ្លះបដិសេធថាជារបាយការណ៍ដែលមិនអាចទទួលយកបាន។
ម្ចាស់គណនីហ្វេសប៊ុកមួយឈ្មោះ ហៀវ វាសនា បានសរសេរលើគណនីហ្វេសប៊ុករបស់ខ្លួនកាលពីថ្ងៃទី៦ ខែសីហា នេះថា សៀមរាបជាទីក្រុងទេសចរណ៍ខ្មែរដ៏ល្បីល្បាញមួយ ប៉ុន្តែភ្ញៀវទេសចរបរទេសដែលមកលេងប្រាសាទអង្គរវត្ត និងដើរលេងកម្សាន្តនៅពេលយប់នៅតែមានចំនួនតិចតួចនៅឡើយ ខណៈសណ្ឋាគារ ផ្ទះសំណាក់ ភោជនីយដ្ឋាន និងហាងលក់វត្ថុអនុស្សាវរីយ៍ ជាដើម មួយចំនួនធំនៅតែបន្តបិទទ្វារនៅឡើយ។
ម្ចាស់គណនីហ្វេសប៊ុកខាងលើលើកឡើងថា ចំណែកនៅប្រទេសថៃវិញ ភ្ញៀវទេសចរបរទេសដើរប្រជ្រៀតគ្នាស្ទើរគ្រប់ជាតិសាសន៍ទាំងថ្ងៃទាំងយប់គ្រប់ផ្លូវតូច និងផ្លូវធំ ខណៈឡានតាក់ស៊ីស្ទើររកជិះគ្មាន ដែលធ្វើឱ្យតាក់ស៊ីក្ដី សាមឡក្តី កង់បីក្ដី អាចដំឡើងថ្លៃចំពោះភ្ញៀវបរទេសទាំងអស់នោះផងដែរ។
ប្រភពដដែលបញ្ជាក់ថា ចំណែកឯសណ្ឋាគារ ផ្ទះសំណាក់ជាលក្ខណៈគ្រួសារ និងម្ហូបអាហារក៏ឡើងថ្លៃប្រមាណជា ២០ភាគរយដែរ បើធៀបនឹងឆ្នាំ២០២២ កន្លងទៅ ប៉ុន្តែភ្ញៀវទេសចរបរទេសទាំងនោះ រួមទាំងភ្ញៀវទេសចរដែលជាជនជាតិខ្មែរផង នៅតែមានកំណើនទៅលេងប្រទេសថៃច្រើនឡើងៗដដែល។
កាលពីថ្ងៃទី៧ ខែកក្កដា ឆ្នាំ២០២៣ កន្លងទៅនេះ ក្រសួងទេសចរណ៍កម្ពុជា បានបង្ហាញក្នុងរបាយការណ៍របស់ខ្លួនថា ក្នុងឆមាសទី១ ឆ្នាំ២០២៣ កម្ពុជាទទួលបានភ្ញៀវទេសចរអន្តរជាតិប្រមាណ ២លាន ៥សែននាក់ក្នុងចំណោមភ្ញៀវទេសចរផ្ទៃក្នុងសរុបប្រមាណជាង ១២លាននាក់។
របាយការណ៍ខាងលើបញ្ជាក់ថា ក្នុងចំណោមភ្ញៀវទេសចរអន្តរជាតិដែលបានចូលមកទស្សនាកម្ពុជាមានចំនួនជាង ២លាន ៥សែននាក់នោះ គឺធ្វើដំណើរមកតាមផ្លូវអាកាសមានចំនួន ៩១ម៉ឺននាក់ ផ្លូវគោកមានចំនួនជាង ១លាន ៦សែននាក់ និងផ្លូវទឹកមានចំនួន ៣ម៉ឺននាក់ ដូចជាមកពីប្រទេសថៃ វៀតណាម ចិន ឡាវ សហរដ្ឋអាមេរិក កូរ៉េខាងត្បូង ឥណ្ឌូនេស៊ី បារាំង ចក្រភពអង់គ្លេស ម៉ាឡេស៊ី និងអូស្ត្រាលី ជាដើម ដូច្នេះនៅឆ្នាំ២០២៣ នេះ កម្ពុជាអាចនឹងទទួលបានភ្ញៀវទេសចរអន្តរជាតិប្រមាណ ៥លាននាក់កើនឡើង ១២០ភាគរយធៀបនឹងឆ្នាំ២០២២ កន្លងទៅ។
ទាក់ទិននឹងបញ្ហានេះ ក្រុមមគ្គទេសក៍ទេសចរណ៍ទាំងនៅភ្នំពេញ និងខេត្តសៀមរាប ប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី៧ សីហា នេះថា ការអះអាងរបស់ក្រសួងទេសចរណ៍ដែលថាកម្ពុជាទទួលបានភ្ញៀវទេសចរជាង ២លាននាក់ក្នុងឆមាសទី១ ឆ្នាំ២០២៣ នេះ ពួកគេមិនដឹងថាក្រសួងទទួលបានតួលេខទាំងនោះពីប្រភពណានោះទេ ប៉ុន្តែជាក់ស្តែង ក្រុមហ៊ុនទេសចរណ៍ភាគច្រើននៅកម្ពុជានៅតែបន្តបិទទ្វារនៅឡើយ ខណៈក្រុមហ៊ុនខ្លះដែលទទួលបានភ្ញៀវទេសចរ គឺមានចំនួនភ្ញៀវតិចតួច និងដើរកម្សាន្តក្នុងរយៈពេលខ្លីប៉ុណ្ណោះ។
ប្រភពដដែលបញ្ជាក់ថា ភ្ញៀវទេសចរអន្តរជាតិដែលចូលទៅលេងកម្ពុជាសព្វថ្ងៃនេះ ស្ទើរតែទាំងអស់ គឺជាភ្ញៀវដែលសល់ពីប្រទេសថៃ ឬប្រទេសវៀតណាម ដែលពួកគេទទួលបានកញ្ចប់បញ្ចុះតម្លៃ ឬកញ្ចប់ដំណើរកម្សាន្តបន្ថែមក្នុងរយៈពេលខ្លីឱ្យទៅលេងកម្ពុជាប៉ុណ្ណោះ មិនមែនជាភ្ញៀវដែលធ្វើដំណើរដោយត្រង់ទៅទេសចរណ៍នៅកម្ពុជាតែម្តងនោះទេ។
ទាក់ទិននឹងបញ្ហានេះ កាសែតបាងកកប៉ុស្តិ៍ បានចេញផ្សាយកាលពីថ្ងៃទី៥ ខែសីហា ឆ្នាំ២០២៣ នេះថា ចំនួនភ្ញៀវទេសចរអន្តរជាតិដែលបានចូលទៅប្រទេសថៃ ចាប់ពីខែមករា មកទល់នឹងខែកក្កដា ឆ្នាំ២០២៣ នេះ បានកើនឡើងដល់ ១៥លាននាក់ ដែលមានកំណើន ៣៨៤ភាគរយ បើធៀបទៅនឹងរយៈពេលដូចគ្នានៅឆ្នាំ២០២២ កន្លងទៅ៕