នាយករដ្ឋមន្ត្រីតពូជថ្មីលោក ហ៊ុន ម៉ាណែត អំពាវនាវឱ្យស្ថានទូតនានាប្រចាំនៅកម្ពុជា ប្រាប់ពលរដ្ឋរបស់ខ្លួនឱ្យទៅលេងស្រុកខ្មែរ ព្រោះស្រុកខ្មែរមិនមែនជាគោលដៅចាប់ជំរិត ឬមានឧក្រិដ្ឋកម្មអនឡាញ និងការជួញដូរមនុស្សដូចការផ្សព្វផ្សាយមួយចំនួនឡើយ។
លោក ហ៊ុន ម៉ាណែត លើកឡើងក្នុងពិធីបិទសន្និបាតក្រសួងទេសចរណ៍ កាលពីថ្ងៃទី២៧ ខែកុម្ភៈ ឆ្នាំ២០២៥ នេះថា មិនមែនកម្ពុជាគ្មានបញ្ហាទាំងស្រុងនោះទេ គឺធ្លាប់មានបញ្ហាខ្លះដែរ ប៉ុន្តែរដ្ឋាភិបាលបានចាត់វិធានការជាបន្តបន្ទាប់ដើម្បីទប់ស្កាត់បញ្ហានេះទាំងអស់នេះ។
លោក ហ៊ុន ម៉ាណែត លើកឡើងថា ទោះកម្ពុជាមានបញ្ហាខ្លះ និងត្រូវបានដោះស្រាយហើយក៏ដោយ ប៉ុន្តែប្រសិនបើផ្ដោតតែរឿងអវិជ្ជមាន ច្បាស់ណាស់កម្ពុជានឹងទៅជាកន្លែងខ្មៅងងឹតជាមិនខាន ផ្ទុយទៅវិញចំណុចវិជ្ជមានរបស់កម្ពុជាមានច្រើនណាស់ ដូច្នេះគួរតែមានការជួយផ្សព្វផ្សាយនូវចំណុចល្អទាំងនោះឲ្យបានច្រើន។
នាយករដ្ឋមន្ត្រីខ្មែររូបនេះអំពាវនាវឱ្យឯកអគ្គរាជទូត និងឯកអគ្គរដ្ឋទូតប្រចាំកម្ពុជា ក៏ដូចជាឯកអគ្គរាជទូតកម្ពុជាប្រចាំបរទេស ជួយផ្សព្វផ្សាយពីកិត្តិនាមកម្ពុជា ពីគោលដៅទេសចរណ៍កម្ពុជា ពីបញ្ហាសុខសុវត្ថិភាពទៅដល់ពលរដ្ឋរបស់ពួកគេ ខណៈរាជរដ្ឋាភិបាលមានការប្រុងប្រយ័ត្នខ្ពស់ចំពោះសុវត្ថិភាពរបស់ពួកគេ និងមិនឲ្យកម្ពុជាក្លាយជាគោលដៅនៃសកម្មភាពខ្មៅងងឹតរបស់ឧក្រិដ្ឋជនដាច់ខាត។
អ្នកតាមដានភូមិសាស្ត្រនយោបាយនៅតំបន់អាស៊ីអាគ្នេយ៍ លោក សេង វណ្ណលី បានប្រាប់សារព័ត៌មាន The Cambodia Daily កាលពីថ្ងៃសុក្រថា បញ្ហារបស់កម្ពុជាគឺស្ថិតនៅត្រង់ថា តើកម្ពុជាអាចធានាសុវត្ថិភាពកម្រិតណា ពីព្រោះកម្ពុជាមានតំបន់ទេសចរណ៍ស្ទើរគ្រប់ផ្នែកទៅហើយ ដូចជាទេសចរណ៍វប្បធម៌ គឺទៅមើលប្រាសាទបុរាណ ទេសចរណ៍ធម្មជាតិ គឺទៅមើលតំបន់អេកូទេសចរណ៍ និងកន្លែងទេសចរណ៍ផ្សេងៗទៀត។
លោកថា ប្រទេសជិតខាងក៏មានបញ្ហាមិនខុសពីកម្ពុជាប៉ុន្មានដែរ ប៉ុន្តែរដ្ឋាភិបាលរបស់ប្រទេសទាំងនោះបានយកចិត្តទុកដាក់ក្នុងការបង្ក្រាបយ៉ាងខ្លាំង ក្រោមវិធានការច្បាប់ដែលអាចផ្តល់ទំនុកចិត្តឱ្យភ្ញៀវបរទេសទៅលេងប្រទេសរបស់គេ។
អ្នកជំនាញនយោបាយការទូតអន្តរជាតិរូបនេះអះអាងថា រដ្ឋាភិបាលព្រងើយកន្តើយក្នុងការអនុវត្តច្បាប់លើឧក្រិដ្ឋកម្មជាច្រើន ជាពិសេសអំពើឧក្រិដ្ឋរបស់សមាជិកព្រឹទ្ធសភាបក្សកាន់អំណាចលោក លី យ៉ុងផាត់ តែម្តង។
របាយការណ៍អន្តរជាតិ ចេញផ្សាយពីឧក្រិដ្ឋកម្មដែលកើតមាននៅប្រទេសក្នុងតំបន់អាស៊ីប្រចាំឆ្នាំ២០២៤ (Crime index in Southeast Asia – 2024) កាលពីចុងខែមករា បង្ហាញថា កម្ពុជាជាប់ចំណាត់ថ្នាក់លេខ១ ជាប្រទេសសម្បូរឧក្រិដ្ឋកម្មខ្លាំងជាងគេបំផុតក្នុងចំណោមប្រទេសនៅតំបន់អាស៊ាន៕
© 2025, ឌឹ ខេមបូឌា ដេលី. All rights reserved.