អតីតតំណាងរាស្ត្រប្រទេសអូស្ត្រាលី ថាប្រទេសកម្ពុជានឹងក្លាយជារបបផ្ដាច់ការក្រោយពីគ្រួសារលោក ហ៊ុន សែន ទាញប្រទេសនេះទៅគ្រប់គ្រងផ្ដាច់មុខ។
អតីតតំណាងរាស្ត្រប្រទេសអូស្ត្រាលីដើមកំណើតខ្មែរប្រចាំរដ្ឋវិចតូរីយ៉ា លោក ហុង លីម ព្រមានថា កម្ពុជានឹងក្លាយជារបបផ្ដាច់ការបន្ទាប់ពីលោក ហ៊ុន សែន ត្រួតត្រាដោយប្រើកណ្ដាប់ដៃដែកអស់រយៈពេល ៣៨ឆ្នាំ និងផ្ទេរអំណាចឱ្យកូនប្រុសរបស់គាត់ ដែលគេអាចដឹងយ៉ាងច្បាស់ថា ទាំងឪពុក ទាំងកូននៃវង្សត្រកូលមួយនេះចាប់ផ្តើមទាញប្រទេសកម្ពុជាទៅគ្រប់គ្រងដោយផ្ដាច់មុខទៅហើយនោះ។
ប្រធានសហព័ន្ធខ្មែរអូស្ត្រាលីសាជីវកម្ម លោក ហុង លីម បានចេញសេចក្តីប្រកាសព័ត៌មាននៅថ្ងៃទី៩ ខែសីហា ឆ្នាំ២០២៣ នេះថា មិនធ្លាប់មានទេក្នុងប្រវត្តិសាស្ត្ររបស់ប្រទេសកម្ពុជាចាប់តាំងពីរដ្ឋធម្មនុញ្ញត្រូវបានបង្កើតឡើងកាលពីឆ្នាំ១៩៩៣ មក ដែលព្រះមហាក្សត្រតែងតាំងនាយករដ្ឋមន្ត្រីមុនពេលសភាត្រូវបានបង្កើតឡើង ដើម្បីអនុម័តលើក្បាលម៉ាស៊ីនរបស់រាជរដ្ឋាភិបាលសម្រាប់អាណត្តិថ្មីក្រោយការបោះឆ្នោត ដែលការធ្វើបែបនេះ គឺបញ្ច្រាសទាំងស្រុងទៅនឹងរបបសភានិយមដែលប្រទេសកម្ពុជាបានប្រកាន់យក។
លោក ហុង លីម លើកឡើងថា ទោះបីជាលោក ហ៊ុន ម៉ាណែត ធ្លាប់ទទួលបានការបណ្តុះបណ្តាលពីប្រទេសលោកខាងលិចក៏ដោយ ក៏មិនមានលក្ខណៈសម្បត្តិខុសពីឪពុករបស់គាត់ លោក ហ៊ុន សែន ដែរ ព្រោះគាត់មិនបានបង្ហាញពីការដឹកនាំក្នុងការលើកស្ទួយសិទ្ធិមនុស្ស និងលទ្ធិប្រជាធិបតេយ្យទេ ក្នុងពេលដែលគាត់ក្លាយជាបេក្ខជនអនាគតនាយករដ្ឋមន្ត្រី ដើម្បីជួយដល់ពលរដ្ឋក្រីក្រ ស្របពេលដែលគ្រួសារត្រកូលហ៊ុន គឺជាមហាសេដ្ឋីនោះ។
អតីតតំណាងរាស្ត្រប្រទេសអូស្ត្រាលីរូបនេះបញ្ជាក់ថា ការបោះឆ្នោតនៅកម្ពុជាដែលទើបនឹងបញ្ចប់កាលពីពេលថ្មីៗនេះ គឺជាការបោកប្រាស់ ក្បត់លទ្ធិប្រជាធិបតេយ្យ និងសិទ្ធិមនុស្សទាំងស្រុង ខណៈការយាយី និងអំពើហិង្សាគ្រប់រូបភាព បានឡោមព័ទ្ធការបោះឆ្នោតនេះយ៉ាងធ្ងន់ធ្ងរ ដោយសារតែគណបក្សប្រជាជនកម្ពុជារបស់លោក ហ៊ុន សែន បានបំភិតបំភ័យ និងគំរាមកំហែងពលរដ្ឋឲ្យបោះឆ្នោតឲ្យពួកគេ។
ទាក់ទិននឹងបញ្ហានេះ សមាជិកសភាអូស្ត្រាលីដើមកំណើតខ្មែររដ្ឋវិចតូរីយ៉ា លោក តាក់ ម៉េងហ៊ាង ក៏បានលើកឡើងក្នុងសេចក្តីប្រកាសព័ត៌មាននេះដែរ ដោយអំពាវនាវឱ្យអូស្ត្រាលីលើកឡើងពីសិទ្ធិមនុស្ស និងលទ្ធិប្រជាធិបតេយ្យនៅកម្ពុជា ព្រោះថាវាមានសារសំខាន់ណាស់ដែលអូស្ត្រាលីធ្លាប់បានដើរតួនាទីយ៉ាងសំខាន់ក្នុងការជ្រោមជ្រែងកម្ពុជាស្វែងរកសន្តិភាពអំឡុងទសវត្សរ៍ឆ្នាំ១៩៩០ ដែលត្រូវរំលឹកឡើងវិញអំពីតម្លៃនៃសិទ្ធិមនុស្ស និងសេរីភាពនៅពេលនេះ ចំពេលដែលគេមើលឃើញថា លោក ហ៊ុន ម៉ាណែត នឹងអនុវត្តការដឹកនាំដោយគាបសង្កត់សិទ្ធិពលរដ្ឋតាមគន្លងឪពុករបស់គាត់នោះ។
ទាក់ទិននឹងបញ្ហានេះ កាលពីថ្ងៃទី៧ ខែសីហា ឆ្នាំ២០២៣ មេដឹកនាំខ្មែរដែលកំពុងផ្ទេរអំណាចតត្រកូលលោក ហ៊ុន សែន បានលើកឡើងថា ព្រះមហាក្សត្រខ្មែរបានចេញព្រះរាជក្រឹត្យចាត់តាំងនាយករដ្ឋមន្ត្រីថ្មីសម្រាប់ដឹកនាំប្រទេសកម្ពុជាហើយ បន្ទាប់ពីលោកសម្រេចដកខ្លួនចេញដើម្បីផ្តល់ឱកាសឲ្យក្រុមអ្នកបន្តវេនដឹកនាំបន្ត។
ប៉ុន្តែអតីតមេដឹកនាំបក្សប្រឆាំងលោក សម រង្ស៊ី បានលើកឡើងកាលពីពេលថ្មីនេះថា ដោយសារតែកម្ពុជាយកគំរូបន្តវេនតាមប្រទេសស៊ីរី គឺឪពុកផ្ទេរអំណាចឲ្យទៅកូន ដែលធ្វើឲ្យស្ថានការណ៍កាន់តែយ៉ាប់យ៉ឺនទៅៗ ដូចជាការគាបសង្កត់លើសិទ្ធិសេរីភាពនឹងបន្តកើតមានកាន់តែខ្លាំងឡើង ប្រសិនបើគ្មានការផ្លាស់ប្ដូរប្រព័ន្ធគ្រប់គ្រងប្រទេសនេះទេនោះ។
លោក សម រង្ស៊ី លើកឡើងថា ទោះបីលោក ហ៊ុន ម៉ាណែត រៀនសូត្រពីប្រទេសសេរីក៏ដោយ ក៏គាត់មិនអាចធ្វើអ្វីកើតដែរ ក្រៅតែពីដឹកនាំក្រោមប្រព័ន្ធដែលឪពុកគាត់បានរៀបចំទុកឲ្យ ដែលជាកត្តាមួយជំរុញការដឹកនាំរបស់គាត់ឱ្យធ្លាក់ទៅក្នុងអំពើដ៏អាក្រក់ដូចដែលកូនប្រុសរបស់មេដឹកនាំស៊ីរី លោក Bashar al-Assad ដែលរៀនសូត្រពីប្រទេសអង់គ្លេស និងទទួលអំណាចពីឪពុកខ្លួនឯង បានជំរុញឱ្យគាត់ដឹកនាំប្រទេសស៊ីរី ទៅរករបបផ្ដាច់ការ និងពុករលួយសាហាវជាងឪពុករបស់គាត់ទៀត។
ការតែងតាំងលោក ហ៊ុន ម៉ាណែត ជានាយករដ្ឋមន្ត្រីនេះ ត្រូវបានមជ្ឈដ្ឋានជាតិ និងអន្តរជាតិរិះគន់ថា គាត់មិនសក្ដិសមនឹងទទួលតំណែងនេះទេ ព្រោះថាគាត់បានជាប់ពាក់ព័ន្ធនឹងរឿងអាស្រូវជាច្រើនជុំវិញផលប្រយោជន៍ក្នុងវង្សត្រកូលរបស់គាត់ ខណៈផលប្រយោជន៍ទាំងនោះទាក់ទិននឹងការបំផ្លាញទ្រព្យសម្បត្តិជាតិយ៉ាងធ្ងន់ធ្ងរ ខណៈបទល្មើសឧក្រិដ្ឋជាច្រើនទៀតក៏មានជាប់ពាក់ព័ន្ធនឹងឪពុកកូនទាំងពីរនាក់នេះផងដែរ៕