36 C
Phnom Penh

សមត្ថកិច្ច​រឹបអូស​សារធាតុ​ញៀន​ជិត ៤​ពាន់​គីឡូក្រាម​និង​ចាប់​ខ្លួន​ជនជាតិ​វៀតណាម​១០​នាក់

ដោយ ឌឹ ខេមបូឌា ដេលី

បទវិភាគ

សមត្ថកិច្ច​ខេត្ត​ស្វាយរៀង រឹបអូស​សារធាតុ​ញៀន​ជាង ៣៧៩៩​គីឡូក្រាម និង​ចាប់​ខ្លួន​ជនជាតិ​វៀតណាម ចំនួន ១០​នាក់ ព្រមទាំង​ដកហូត​កាំភ្លើង ៣​ដើម ដែល​ធ្វើ​ឲ្យ​ចំនួន​សារធាតុ​ញៀន និង​គ្រឿងញៀន​រឹបអូស​បាន​រយៈពេល​ជិត​មួយ​ខែ​សីហា នេះ កើន​ជិត ១​តោន។

បើ​តាម​ការ​ចុះ​ផ្សាយ​របស់​ស្នងការដ្ឋាន​នគរបាល​ខេត្ត​ស្វាយរៀង កាលពី​ថ្ងៃទី​១៩ ខែ​សីហា ឲ្យ​ដឹង​ថា ការ​ឃាត់​ខ្លួន​ជនជាតិ​វៀតណាម ទាំង ១០​នាក់​បន្ទាប់ពី​សមត្ថកិច្ច​ចម្រុះ​ខេត្ត​ស្វាយរៀង ចាប់ផ្ដើម​ចុះ​បង្ក្រាប​ដោយ​កំណត់​មុខសញ្ញា​លើ​ជន​សង្ស័យ​កាលពី​ថ្ងៃទី​១៦ ខែ​សីហា ឆ្នាំ​២០២៣។

ប្រតិបត្តិការ​បង្ក្រាប​ករណី​ជួញដូរ​នេះ នៅ​ទីតាំង​ហាង​ខារ៉ាអូខេ MDM.KTV មួយ​កន្លែង ស្ថិត​ក្នុង​ភូមិ​បាវិតកណ្តាល សង្កាត់​បាវិត ក្រុង​បាវិត ខេត្ត​ស្វាយរៀង ដោយ​ក្នុង​ប្រតិបត្តិការ​ចុះ​បង្ក្រាប សមត្ថកិច្ច​ក៏​បាន​ដកហូត​កាំភ្លើង ៣​ដើម និង​សារធាតុ​ញៀន​ចំនួន ៣៧៩៩,៣២​គីឡូក្រាម។

សារធាតុ​ញៀន​សរុប​ទម្ងន់ ៣៧៩៩,៣២​គីឡូក្រាម និង​កាំភ្លើង ៣​ដើម​ដែល​សមត្ថកិច្ច​រឹបអូស ក្នុង​នោះ​ថ្នាំញៀន​ប្រភេទ​មេតំហ្វេតាមីន​ទម្ងន់ ៥១៧,០៦​ក្រាម ថ្នាំញៀន​ប្រភេទ​កេតាមីន​ទម្ងន់ ១៩៤៨,៩៥​ក្រាម ថ្នាំញៀន​ប្រភេទ​អ៊ិចស្តាស៊ី​ទម្ងន់ ១៣៣២,៧៧​ក្រាម ជញ្ជីង​ថ្លឹង​ថ្នាំញៀន ០២​គ្រឿង ទូរសព្ទ ០៩​គ្រឿង និង​រថយន្ត ០២គ្រឿង។

ចំពោះ​អាវុធ ០៣​ដើម​វិញ ក្នុង​នោះ​មាន​ប្រភេទ AK ស្វាយ​បត់ ០១​ដើម ដោយ​មាន​គ្រាប់​ចំនួន ១៧​គ្រាប់ ហើយ K59 ចំនួន ០១​ដើម ដោយ​មាន​គ្រាប់ ០៤​គ្រាប់ និង​ឡុក ០១​ដើម ដោយ​មាន​គ្រាប់​ចំនួន ៥៤​គ្រាប់ ព្រមទាំង​ឧបករណ៍​សម្ភារៈ​ពាក់ព័ន្ធ​មួយ​ចំនួន​ទៀត។

ស្នងការ​ខេត្ត​ស្វាយរៀង ឲ្យ​ដឹង​ថា ជនជាតិ​វៀតណាម​ទាំង ១០​នាក់ និង​វត្ថុ​តាង​ត្រូវ​បាន​សមត្ថកិច្ច​កសាង​សំណុំរឿង​បញ្ជូន​ទៅ​សាលាដំបូង​ខេត្ត​ដើម្បី​បន្ត​នីតិវិធី​ច្បាប់។

គួរ​បញ្ជាក់​ផង​ដែរ​ថា គិត​ត្រឹម​ថ្ងៃទី​២០ ខែ​សីហា ឆ្នាំ​២០២៣ នេះ សារធាតុ​ញៀន និង​គ្រឿងញៀន​ដែល​សមត្ថកិច្ច​បង្ក្រាប​បាន​កើនឡើង​ប្រមាណ ១ តោន ដោយ​មិន​រាប់​បញ្ជូន​ករណី​បង្ក្រាប​នៅ​ទូទាំង​ប្រទេស ខណៈ​អ្នក​ជួញដូរ​ដែល​ចាប់​ខ្លួន​ជា​ជនជាតិ​ចិន និង​វៀតណាម។

ជាក់ស្ដែង កាលពី​ថ្ងៃទី​០៨ ខែ​សីហា នេះ សមត្ថកិច្ច​បាន​ចុះ​បង្ក្រាប​ក្រុម​ឧក្រិដ្ឋជន​ដែល​ចរាចរ​គ្រឿងញៀន​ឆ្លងដែន​ពី​តំបន់​ត្រីកោណ​មាស​ឆ្លងកាត់​ប្រទេស​ឡាវ ចូល​ទៅ​កម្ពុជា​ចំនួន ៤៦៥​គីឡូក្រាម និង ៦៥១​ក្រាម ដោយ​ការ​បង្ក្រាប​នេះ​នៅ​មុខ​ផ្ទះសំណាក់​កណ្តាល​ស្ទឹង​ព្រែកជ្រៃ ស្ថិត​ភូមិ​ព្រែកជ្រៃ សង្កាត់​ស្ពានថ្ម ខណ្ឌ​ដង្កោ និង​នៅ​សង្កាត់​ភ្នំពេញថ្មី ខណ្ឌ​សែនសុខ រាជធានី​ភ្នំពេញ។ ចំណែក​ថ្ងៃទី​៩ ខែ​សីហា សមត្ថកិច្ច​រឹបអូស​សារធាតុ​ញៀន​ជាង ១០០​គីឡូក្រាម ហើយ​បាន​ឃាត់​ខ្លួន​ជនជាតិ​ចិន​ម្នាក់ និង​ខ្មែរ ២​នាក់ ពាក់ព័ន្ធ​នឹង​ករណី​នេះ។

ចាប់តាំងពី​ឆ្នាំ​២០១៧ មក​ដល់​បច្ចុប្បន្ន ចំនួន​គ្រឿងញៀន​ដែល​អាជ្ញាធរ​រឹបអូស​បាន​កើនឡើង​ពី​មួយ​ឆ្នាំ​ទៅ​មួយ​ឆ្នាំ ក្នុង​នោះ​នៅ​ឆ្នាំ​២០១៧ អាជ្ញាធរ​ចាប់​បាន​គ្រឿងញៀន​ជិត ៣០០ (២៩៦) គីឡូក្រាម ហើយ​ឆ្នាំ​២០១៨ រឹបអូស​បាន​ជិត ៥០០ (៤៧២,៥៣) គីឡូក្រាម និង​ឆ្នាំ​២០១៩ ចាប់​បាន ៧៥០​គីឡូក្រាម។ នៅ​ឆ្នាំ​២០២០ អាជ្ញាធរ​រឹបអូស​បាន​ជិត ៤​ពាន់ (៣៨៧៦) គីឡូក្រាម និង​ឆ្នាំ​២០២១ រឹបអូស​បាន​ជាង ៤៦០០ (៤៦៨៩) គីឡូក្រាម ហើយ​នៅ​ឆ្នាំ​២០២២ អាជ្ញាធរ​ចាប់​បាន​ជាង ១​ម៉ឺន ៤​ពាន់ (១៤៩១៩) គីឡូក្រាម។

ក្រុម​អ្នក​សង្កេតការណ៍​លើកឡើង​ថា ការ​បរាជ័យ​នេះ​ត្រូវ​គេ​រក​ឃើញ​ថា មកពី​ក្រុម​គ្រួសារ​របស់​បុរស​ខ្លាំង​ក្រាញ​អំណាច​នៅ​កម្ពុជា​លោក ហ៊ុន សែន ជា​អ្នក​នៅ​ពីក្រោយ​នៃ​ការ​ចរាចរ​គ្រឿងញៀន​ដ៏​ធំ​បំផុត​នៅ​កម្ពុជា ដែល​កំពុង​ចែកចាយ​យ៉ាង​អនាធិបតេយ្យ​នៅ​តាម​ក្លឹប​រាត្រី រង្គសាល ហាង​ខារ៉ាអូខេ និង​ផ្ទះសំណាក់​ផ្សេងៗ​នៅ​កម្ពុជា។

ចំណែក​អ្នក​ដែល​ចែកចាយ​ធំ​វិញ គឺជា​ជនជាតិ​វៀតណាម និង​ជនជាតិ​ចិន ដែល​អាច​និយាយ​ភាសា​ខ្មែរ​បាន​ប៉ៃឡាំៗ​តាមរយៈ​បណ្ដាញ​សង្គម​តេឡេក្រាម ដោយ​គ្មាន​សមត្ថកិច្ច​ទទួល​បន្ទុក​បង្ក្រាប​គ្រឿងញៀន​ណា​ម្នាក់ ឬ​ថ្នាក់​ដឹកនាំ​រដ្ឋាភិបាល​ណា​មួយ​ហ៊ាន​ប៉ះពាល់​ឡើយ ដោយសារតែ​ពួកគេ​ខ្លាច​អំណាច​របស់​លោក ហ៊ុន សែន៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស