40.3 C
Phnom Penh

អាវុធហត្ថ​ខេត្ត​ស្វាយរៀង​បញ្ជូន​ជនជាតិ​វៀតណាម​និង​ខ្មែរ​៩​នាក់​ទៅ​តុលាការ​ករណី​ចាប់​បង្ខាំង​មនុស្ស

ដោយ ឌឹ ខេមបូឌា ដេលី

បទវិភាគ

អាវុធហត្ថ​ខេត្ត​ស្វាយរៀង អះអាង​ថា កម្លាំង​សមត្ថកិច្ច​ចម្រុះ​បាន​ចុះ​ប្រតិបត្តិការ​ដោយ​ចាប់ និង​បញ្ជូន​មនុស្ស​ចំនួន ៩​នាក់​ទៅ​តុលាការ​ខេត្ត​នេះ ពាក់ព័ន្ធ​នឹង​ករណី​ចាប់​ឃុំឃាំង និង​បង្ខាំង​មនុស្ស​ក្រោយពី​ចុះ​អនុវត្ត​ការ​បង្ក្រាប​រយៈពេល​ប្រមាណ ៣​ថ្ងៃ។

យោង​តាម​ការ​ចុះផ្សាយ​របស់​សារព័ត៌មាន​ក្នុង​ស្រុក​ថា មនុស្ស​ទាំង ៩​នាក់​ចាប់​ខ្លួន​បាន​នៅ​ភូមិ​តាបឹប និង​ចំណុច​មុខ​ផ្ទះ​សំណាក់​ថៃ​អាង ភូមិ​បាវិតកណ្ដាល សង្កាត់​បាវិត ក្រុង​បាវិត ខេត្ត​ស្វាយរៀង បន្ទាប់ពី​កម្លាំង​ចម្រុះ​បាន​ចុះ​ប្រតិបត្តិការ​បង្ក្រាប​កាលពី​ថ្ងៃទី​២៣ ខែ​សីហា ឆ្នាំ​២០២៣។

មនុស្ស​ទាំង ៩​នាក់​ដែល​អាវុធហត្ថ​ចាប់ និង​បញ្ជូន​ទៅ​តុលាការ​កាលពី​ថ្ងៃទី​២៦ ខែ​សីហា ឆ្នាំ​២០២២ ពាក់ព័ន្ធ​នឹង​ករណី​ចាប់​ឃុំឃាំង និង​បង្ខាំង​មនុស្ស​ដោយ​ខុស​ច្បាប់។ ក្នុង​ចំណោម​ជន​សង្ស័យ​ចំនួន ៩​នាក់ ក្នុង​នោះ​មាន​ខ្មែរ ៨​នាក់ និង​ជនជាតិ​វៀតណាម​ម្នាក់​ឈ្មោះ ហ្វាម អាន់ហ្វឿក ស្នាក់នៅ​បណ្ដោះអាសន្ន​ក្នុង​សង្កាត់​បាវិត ក្រុង​បាវិត ខេត្ត​ស្វាយរៀង។

ក្រៅពី​ចាប់​ខ្លួន​មនុស្ស​ទាំង ៩​នាក់ កម្លាំង​សមត្ថកិច្ច​ចម្រុះ​ក៏​ដកហូត​វត្ថុ​តាង ក្នុង​នោះ​មាន​ទូរសព្ទ​ដៃ​ចំនួន ១០​គ្រឿង រថយន្ត​ចំនួន ០២​គ្រឿង ពិល​ឆក់​ចំនួន ០៣​គ្រឿង ដំបង​ឈើ​ចំនួន​០១ កូនកាំបិត​ចំនួន​០១ ថ្នាំ​ក្រាម​ស​ថ្លា​ចំនួន ០១​កញ្ចប់ និង​សម្ភារៈ​ប្រើប្រាស់​គ្រឿងញៀន​មួយ​ចំនួន​ផង​ដែរ។

ជុំវិញ​រឿង​នេះ អតីត​រដ្ឋមន្ត្រី​ក្រសួង​មហាផ្ទៃ​លោក ស ខេង កាលពី​ខែ​កញ្ញា ឆ្នាំ​២០២២ បាន​ទទួលស្គាល់​ថា កម្ពុជា​ពិត​ជា​មាន​ការ​ជួញដូរ និង​បង្ខាំង​មនុស្ស​ជាច្រើន​ករណី​មែន បន្ទាប់ពី​ចុះ​អនុវត្ត​ការ​បង្ក្រាប​ជាក់ស្ដែង​ជា​បន្តបន្ទាប់​តាម​ពាក្យ​បណ្តឹង​ដែល​អាជ្ញាធរ​ទទួល​បាន​ប្រមាណ ៩៥​ភាគរយ។

លោក​បញ្ជាក់​ថា បណ្ដឹង​ដែល​ក្រសួង​ទទួល​បាន​សរុប ២៨៩​ករណី​ពី​សាមីជន សាច់ញាតិ ស្ថានទូត និង​អង្គការ​អន្តរជាតិ គិត​ចាប់ពី​ថ្ងៃទី​១៨ ខែ​សីហា ដល់​ថ្ងៃទី​១៨ ខែ​កញ្ញា ឆ្នាំ​២០២២ ដែល​ករណី​បទល្មើស​ទាំងអស់​នេះ​កើតឡើង​នៅ​ក្នុង​ទឹកដី​កម្ពុជា​ជាច្រើន ក្នុង​នោះ​មាន​ខេត្ត​ព្រះសីហនុ ខេត្ត​ពោធិ៍សាត់ ខេត្ត​ស្វាយរៀង ខេត្ត​កោះកុង ខេត្ត​ប៉ៃលិន ខេត្ត​ឧត្តរមានជ័យ ខេត្ត​កណ្ដាល ខេត្ត​សៀមរាប ខេត្ត​បន្ទាយមានជ័យ និង​រាជធានី​ភ្នំពេញ។

ការ​លើក​ឡើង​របស់​លោក ស ខេង បន្ទាប់ពី​ក្រសួង​ការបរទេស​អាមេរិក​ចេញ​ផ្សាយ​របាយការណ៍​មួយ​ស្ដីពី​ការ​ជួញដូរ​មនុស្ស​ឆ្នាំ​២០២២ កាលពី​ខែ​កក្កដា ដោយ​បាន​ទម្លាក់​ចំណាត់ថ្នាក់​កម្ពុជា​ចុះ​មក​លំដាប់​ទី​៣ ដែល​មាន​ន័យ​ថា អាក្រក់​បំផុត និង​ពុំ​ធ្លាប់​មាន​ទេ​ចាប់តាំងពី​ឆ្នាំ​២០១៥ មក។

របាយការណ៍​អាមេរិក​បញ្ជាក់​ថា កម្ពុជា​ដើរ​ថយក្រោយ និង​គ្មាន​ឆន្ទៈ​ក្នុង​ការ​លុបបំបាត់​ការ​ជួញដូរ​មនុស្ស ដោយសារតែ​បញ្ហា​អំពើពុករលួយ​ជា​ប្រព័ន្ធ​ដែល​បាន​រារាំង​ដល់​ការ​អនុវត្ត​ច្បាប់​លើ​ក្រុម​ជនល្មើស​ដែល​ជាប់​ពាក់ព័ន្ធ​នឹង​ករណី​ជួញដូរ​មនុស្ស​នៅ​កម្ពុជា៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស