31 C
Phnom Penh

ក្រុម​អង្គការ​នៅ​ក្រៅ​ស្រុក​ប្រកាស​ធ្វើ​យុទ្ធនាការ​ថ្កោលទោស​រដ្ឋាភិបាល​លោក ហ៊ុន ម៉ាណែត រហូត​ចុង​ខែ​កញ្ញា

ដោយ ឌឹ ខេមបូឌា ដេលី

បទវិភាគ

អង្គការ​សង្គម​ស៊ីវិល​ដែល​មាន​មូលដ្ឋាន​នៅ​ក្រៅ​ស្រុក ប្រកាស​ធ្វើ​យុទ្ធនាការ​ថ្កោលទោស​រដ្ឋាភិបាល​ថ្មី​របស់​លោក ហ៊ុន ម៉ាណែត ឱ្យ​ដូច​ភ្លៀង​រលឹម ដើម្បី​ឱ្យ​អង្គការ​សហប្រជាជាតិ​បាន​ឃើញ​កាន់តែ​ច្បាស់​ពី​ការ​តវ៉ា​របស់​ពលរដ្ឋ​កម្ពុជា​ចាប់ពី​ពេលនេះ​តទៅ រហូត​ដល់​ថ្ងៃ​បើក​កិច្ចប្រជុំ​មហាសន្និបាត​អង្គការ​សហប្រជាជាតិ នៅ​ថ្ងៃទី​២២ ខែ​កញ្ញា ឆ្នាំ​២០២៣ ខាងមុខ​នេះ។

អង្គការ​សង្គ្រោះ​កម្ពុជា (Save Cambodia) បាន​សរសេរ​លើ​ទំព័រ​ហ្វេសប៊ុក​របស់​ខ្លួន​កាលពី​ថ្ងៃទី​៣០ ខែ​សីហា ឆ្នាំ​២០២៣ នេះ​ថា សំឡេង​របស់​ពលរដ្ឋ​ខ្មែរ​ដែល​ប្រឆាំង​នឹង​រដ្ឋាភិបាល​របស់​លោក ហ៊ុន ម៉ាណែត បាន​ឮ​ដល់​អង្គការ​សហប្រជាជាតិ​ហើយ ដូច្នេះ​ពលរដ្ឋ​ទាំងអស់​ត្រូវតែ​នាំគ្នា​ធ្វើ​យុទ្ធនាការ​ផ្ញើ​លិខិត​ថ្កោលទោស​ឱ្យ​បាន​ច្រើន​បន្ត​ទៀត រហូត​ដល់​ថ្ងៃទី​២១ ខែ​កញ្ញា ឆ្នាំ​២០២៣ មុន​នឹង​អង្គការ​សហប្រជាជាតិ​បើក​កិច្ចប្រជុំ​មហាសន្និបាត​នៅ​ថ្ងៃ​បន្ទាប់។

ការ​អះអាង​នេះ ធ្វើឡើង​ដើម្បី​ជំរុញ​ឱ្យ​អង្គការ​ក្រៅ​រដ្ឋាភិបាល ក្រុម​អ្នក​ប្រជាធិបតេយ្យ គណបក្ស​នយោបាយ​ដែល​មាន​និន្នាការ​ប្រឆាំង អាច​ចូលរួម​ក្នុង​យុទ្ធនាការ​ថ្កោលទោស​រដ្ឋាភិបាល​ថ្មី​របស់​កម្ពុជា​ដែល​កំពុង​ដឹកនាំ​ប្រទេស​នៅ​ពេលនេះ។

កាលពី​ថ្ងៃទី​២៩ ខែ​សីហា ឆ្នាំ​២០២៣ នាយករដ្ឋមន្ត្រី​ថ្មី​របស់​កម្ពុជា​ដែល​ទើប​នឹង​ត្រូវ​បាន​លើក​បន្តុប​ពី​ឪពុក គឺ​លោក ហ៊ុន ម៉ាណែត បាន​លើកឡើង​នៅ​ក្នុង​ពិធី​ជួប​ជាមួយ​កម្មករ​នៅ​ក្នុង​រាជធានី​ភ្នំពេញ​ថា ផែនការ​របស់​ក្រុម​ប្រឆាំង​នៅ​អាមេរិក​ដែល​ទាមទារ​មិន​ឲ្យ​អង្គការ​សហប្រជាជាតិ (UN) ទទួលស្គាល់​លោក​ជា​ប្រមុខ​ដឹកនាំ​កំពូល​របស់​រាជរដ្ឋាភិបាល​កម្ពុជា គឺជា​ផែនការ​បរាជ័យ។

លោក ហ៊ុន ម៉ាណែត លើកឡើង​ថា អង្គការ​សហប្រជាជាតិ (UN) បាន​ទទួលស្គាល់​លោក​ជា​មេដឹកនាំ​របស់​កម្ពុជា​រួច​ទៅ​ហើយ ទើប​គេ​អញ្ជើញ​លោក​ឱ្យ​ទៅ​ថ្លែង​សុន្ទរកថា​នៅ​ថ្ងៃទី​២២ ខែ​កញ្ញា ខាងមុខ​នេះ ដូច្នេះ​ហើយ​បាន​ជា​លោក​ចាត់ទុក​ផែនការ​នៃ​ការ​ធ្វើ​បាតុកម្ម​របស់​ក្រុម​ប្រឆាំង​ថា​ជា​ផែនការ​បរាជ័យ​នោះ។

ជុំវិញ​បញ្ហា​នេះ វេទិកា​ប្រជាធិបតេយ្យ​ខ្មែរ (Khmer Democracy Forum) បាន​លើកឡើង​កាលពី​ពេល​ថ្មីៗ​នេះ​ថា ដើម្បី​ប្រឆាំង​តវ៉ា​នឹង​រដ្ឋាភិបាល​ដែល​កើត​ចេញពី​ការ​បោះឆ្នោត​មិន​ស្រប​ច្បាប់ នៅ​ថ្ងៃទី​២៣ ខែ​កញ្ញា ឆ្នាំ​២០២៣ ក្រុម​អង្គការ​សង្គម​ស៊ីវិល​នឹង​ដាក់​ស្នើ​លិខិត​ជា​លាយលក្ខណ៍​អក្សរ​ទៅ​កាន់​ក្រុមប្រឹក្សា​សិទ្ធិមនុស្ស​របស់​អង្គការ​សហប្រជាជាតិ (UNHRC) ដើម្បី​ឱ្យ​អង្គការ​សហប្រជាជាតិ​ទទួល​បន្ទុក​សិទ្ធិមនុស្ស​ពិនិត្យ​ពី​ស្ថានភាព​សិទ្ធិមនុស្ស​នៅ​កម្ពុជា។

អង្គការ​ដដែល​នេះ​បញ្ជាក់​ថា ចាប់ពី​ខែ​កញ្ញា ដល់​ខែ​តុលា ឆ្នាំ​២០២៣ ឧត្ដមក្រុមប្រឹក្សា​សិទ្ធិមនុស្ស​នៃ​អង្គការ​សហប្រជាជាតិ នឹង​ដំណើរការ​ពិចារណា​របាយការណ៍​នានា​ពាក់ព័ន្ធ​នឹង​បញ្ហា​សិទ្ធិមនុស្ស ដូច្នេះ​ក្រុម​អ្នក​ប្រជាធិបតេយ្យ គណបក្ស​នយោបាយ​ដែល​មាន​និន្នាការ​ប្រឆាំង ត្រូវតែ​ចាប់​យក​ឱកាស​ទាំងនេះ​ដើម្បី​ពង្រឹង​ភាព​ជា​ដៃគូ​ជាមួយ​អង្គការ​សហប្រជាជាតិ និង​បញ្ជូន​សារ​តវ៉ា​របស់​ខ្លួន​ទៅ​កាន់​ក្រុមប្រឹក្សា​សិទ្ធិមនុស្ស​នៃ​អង្គការ​សហប្រជាជាតិ​ឱ្យ​កាន់​តែ​មាន​ប្រសិទ្ធភាព។

ជុំវិញ​បញ្ហា​នេះ ពលរដ្ឋ​ខ្មែរ​នៅ​ក្រៅ​ស្រុក​បាន​ចេញ​លិខិត​មួយ​កាលពី​ថ្ងៃទី​២៨ ខែ​សីហា កន្លងទៅ​ថា ពួកគេ​នឹង​ធ្វើ​បាតុកម្ម​នៅ​មុខ​ទីស្នាក់ការ​អង្គការ​សហប្រជាជាតិ​ក្នុង​ទីក្រុង​ញ៉ូវយ៉ក លើ​ទឹកដី​សហរដ្ឋ​អាមេរិក នៅ​ថ្ងៃទី​២២ ខែ​កញ្ញា ឆ្នាំ​២០២៣ ខាងមុខ​នេះ។ ការ​ធ្វើ​បាតុកម្ម​នេះ គឺ​ដើម្បី​ប្រឆាំង​វត្តមាន​របស់​លោក ហ៊ុន ម៉ាណែត ដែល​មក​ចូលរួម​កិច្ចប្រជុំ​នៅ​អង្គការ​សហប្រជាជាតិ និង​ការ​បដិសេធ​មិន​ទទួលស្គាល់​លោក ហ៊ុន ម៉ាណែត ជា​នាយករដ្ឋមន្ត្រី​ស្រប​ច្បាប់​របស់​កម្ពុជា​នោះ​ទេ។

ការ​ប្រមូលផ្ដុំ​របស់​ពលរដ្ឋ​ខ្មែរ​នៅ​ក្រៅ​ស្រុក​ទាំងនេះ គឺ​ដើម្បី​ទាមទារ​ឱ្យ​អង្គការ​សហប្រជាជាតិ​កុំ​ទទួលស្គាល់​រដ្ឋាភិបាល​របស់​លោក ហ៊ុន ម៉ាណែត ដែល​កើត​ចេញពី​ការ​បោះឆ្នោត​ក្លែងក្លាយ និង​ស្នើ​ឱ្យ​អង្គការ​សហប្រជាជាតិ​ព្យួរ​កៅអី​របស់​កម្ពុជា​នៅ​អង្គការ​សហប្រជាជាតិ​ជា​បណ្ដោះអាសន្ន​ផង​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស