36 C
Phnom Penh

លោក បៃដិន សន្យា​ធ្វើ​ឱ្យ​វៀតណាម​មាន​ស្ថិរភាព​ដោយ​ព្រមាន​ប្រឆាំង​ការ​គំរាមកំហែង​ពី​ចិន ករណី​សមុទ្រ​ចិន​ខាងត្បូង

ដោយ ឌឹ ខេមបូឌា ដេលី

បទវិភាគ

ប្រធានាធិបតី​សហរដ្ឋ​អាមេរិក លោក ចូ បៃដិន ដែល​បាន​ទៅ​ដល់​ប្រទេស​វៀតណាម កាលពី​រសៀល​ថ្ងៃ​អាទិត្យ ទី​១០ ខែ​កញ្ញា ក្រោយពី​លោក​ចូលរួម​ជំនួប​កំពូល​នៃ​ប្រទេស​សេដ្ឋកិច្ច​ជឿនលឿន G-20 នៅ​ក្នុង​ទីក្រុង​ញូវដែលី ប្រទេស​ឥណ្ឌា។

លោក ចូ បៃដិន គឺជា​មេដឹកនាំ​សហរដ្ឋ​អាមេរិក​ទី​៤ ដែល​ទៅ​ទស្សនកិច្ច​ផ្លូវ​រដ្ឋ​លើ​ទឹកដី​ប្រទេស​សង្គម​និយម​មួយ​នៅ​អាស៊ី​អាគ្នេយ៍ ខណៈ​មន្ត្រី​កំពូលៗ​របស់​អាមេរិក​ជាច្រើន​នាក់​ទៀត​តែងតែ​ធ្វើ​ទស្សនកិច្ច​ទៅ​កាន់​ប្រទេស​នេះ​ផង​ដែរ​ក្នុង​រយៈពេល ៣​ទសវត្ស​មក​នេះ ក្រោយពី​ក្រុង​វ៉ាស៊ីនតោន និង​ទីក្រុង​ហាណូយ បង្កើត​ទំនាក់ទំនង​ការទូត​ជាមួយ​គ្នា។

ក្នុង​ដំណើរ​ទស្សនកិច្ច​របស់​លោក បៃដិន ទៅ​កាន់​ប្រទេស​វៀតណាម គេ​សង្កេត​ឃើញ​មេដឹកនាំ​បក្ស​កុម្មុយនីស្ត​វៀតណាម លោក Nguyen Phu Trong បាន​រៀបចំ​កម្មវិធី​យ៉ាង​អធិកអធម​ដើម្បី​ទទួល​ស្វាគមន៍​លោក បៃដិន ឋានៈ​ជា​ប្រធានាធិបតី​សហរដ្ឋ​អាមេរិក។

ដំណើរ​ទស្សនកិច្ច​ក្នុង​ប្រទេស​វៀតណាម​របស់​លោក បៃដិន នេះ ត្រូវ​បាន​រៀបចំ​ឡើង​ដើម្បី​បង្កើន​ទំនាក់ទំនង​រវាង​រដ្ឋាភិបាល​ក្រុង​វ៉ាស៊ីនតោន និង​រដ្ឋាភិបាល​ក្រុង​ហាណូយ ជាពិសេស​ផ្នែក​ពាណិជ្ជកម្ម ប៉ុន្តែ​មិន​ចោល​ដាច់ខាត​ការ​ផ្ដោត​លើ​ឥទ្ធិពល​ចិន ដែល​ប្រទេស​ធំ​នេះ​កំពុង​ពង្រឹង​ឥទ្ធិពល​ខ្លួន​ក្នុង​តំបន់​នេះ។

ក្រុម​អ្នក​សារព័ត៌មាន​បាន​បន្ត​ចងក្រង​កំណត់ត្រា​ប្រវត្តិសាស្ត្រ​ជា​ថ្មី​ទៀត​នៃ​ដំណើរ​ទស្សនកិច្ច​លោក បៃដិន ជាន់​ទឹកដី​វៀតណាម ជា​ប្រទេស​មួយ​នៅ​ក្នុង​សមាគម​អាស៊ី​អាគ្នេយ៍​ដែល​ប្រទេស​មួយ​នេះ​ធ្លាប់​ជា​សត្រូវ​ស៊ី​សាច់​ហុត​ឈាម​នឹង​គ្នា​ក្នុង​សង្គ្រាម​វៀតណាម​ខាងត្បូង។

ភ្នាក់ងារ​សារព័ត៌មាន​បារាំង AFP ឲ្យ​ដឹង​ថា មេដឹកនាំ​សហរដ្ឋ​អាមេរិក និង​មេដឹកនាំ​វៀតណាម នៅ​ថ្ងៃ​ចន្ទ នេះ បាន​រួម​គ្នា​ព្រមាន​ប្រឆាំង​ការ​គំរាមកំហែង ឬ​ការ​ប្រើប្រាស់​កម្លាំង​បាយ​ករណី​ជម្លោះ​ក្នុង​តំបន់​សមុទ្រ​ចិន​ខាងត្បូង ដែល​ជា​សារ​ផ្ញើ​ទៅ​ឲ្យ​ប្រទេស​ចិន។

លោក ចូ បៃដិន និង​អគ្គលេខាធិការ​បក្ស​កុម្មុយនីស្ត​វៀតណាម លោក Nguyen Phu Trong បាន​លើកឡើង​ថា បញ្ហា​នៃ​ការ​ទាមទារ​ដែន​អធិបតេយ្យ​នៅ​តំបន់​សមុទ្រ​ចិន​ខាងត្បូង ចាំបាច់​ត្រូវតែ​ដោះស្រាយ​នៅ​ក្រោម​បទដ្ឋាន​អន្តរជាតិ​នៃ​អនុសញ្ញា​អន្តរជាតិ ឬ​ច្បាប់​សមុទ្រ​ឆ្នាំ​១៩៨២។

លោក បៃដិន និង​លោក Nguyen Phu Trong បាន​សង្កត់​ធ្ងន់​ក្នុង​សេចក្តី​ថ្លែងការណ៍​រួម​ថា មេដឹកនាំ​អាមេរិក-វៀតណាម នៅតែ​ប្រកាន់​ជំហរ​គាំទ្រ​ឥត​ងាករេ​ចំពោះ​ការ​ស្វែងរក​ដំណោះស្រាយ​ដោយ​សន្តិវិធី​ចំពោះ​បញ្ហា​ជម្លោះ ស្រប​តាម​ច្បាប់​អន្តរជាតិ ដោយ​ពុំ​មាន​ការ​គំរាមកំហែង ឬ​ការ​ប្រើប្រាស់​កម្លាំង​បាយ​ឡើយ។

សេចក្តី​ថ្លែងការណ៍​នេះ​ធ្វើឡើង​មួយ​ថ្ងៃ​បន្ទាប់ពី​លោក បៃដិន និង​លោក Phu Trong បាន​ចុះ​កិច្ចព្រមព្រៀង​ដើម្បី​ធ្វើ​ឱ្យ​កិច្ច​សហប្រតិបត្តិការ​ប្រទេស​ទាំង​ពីរ​កាន់តែ​ស៊ីជម្រៅ​ថែម​ទៀត ដែល​ជា​កិច្ច​ប្រឹងប្រែង​មួយ​ដើម្បី​ព្យាយាម​ទប់ទល់​ការ​កើន​ឡើង​ឥទ្ធិពល​របស់​ចិន​នៅ​ក្នុង​តំបន់។

ប៉ុន្តែ​សម្រាប់​លោក បៃដិន បាន​សន្យា​នៅ​ចំពោះ​មុខ​មេដឹកនាំ​វៀតណាម លោក Nguyen Phu Trong ក្នុង​ការ​ជួយ​វៀតណាម​ឱ្យ​មាន​ស្ថិរភាព​រឹងមាំ ហើយ​ក៏​ព្រមាន​ប្រឆាំង​ការ​គំរាមកំហែង​ពី​សំណាក់​ប្រទេស​ចិន ករណី​សមុទ្រ​ចិន​ខាងត្បូង​ដែរ។

ប្រទេស​នៅ​ក្នុង​តំបន់​អាស៊ី​អាគ្នេយ៍​ដែល​មាន​ជម្លោះ​ជាមួយ​ចិន ករណី​សមុទ្រ​ចិន​ខាងត្បូង មាន​វៀតណាម ហ្វីលីពីន ម៉ាឡេស៊ី ឥណ្ឌូនេស៊ី និង​ប្រ៊ុយណេ។ ប្រទេស ៥ នេះ រួម​ទាំង​ឥណ្ឌា និង​កោះ​តៃវ៉ាន់ កំពុងតែ​ប្រឆាំង​ចិន ដែល​បាន​គូស​ផែនទី​ថ្មី​ហៅថា​ផែនទី ៩​ឆ្នូត​នៃ​សមុទ្រ​ចិន​ខាងត្បូង ដោយ​ចោទ​ក្រុង​ប៉េកាំង ថា​ព្យាយាម​រំលោភ​ដែន​ទឹក​របស់​ប្រទេស​ទាំង ៧ នេះ ហើយ​បាន​ទាមទារ​ឱ្យ​ចិន បោះបង់​ចោល​ផែនទី​នេះ ដោយ​ត្រូវ​គោរព​ច្បាប់​សមុទ្រ​អន្តរជាតិ​ឆ្នាំ​១៩៨២។

ចំណែក​សហរដ្ឋ​អាមេរិក បាន​ហៅ​សមុទ្រ​ចិន​ខាងត្បូង​ជា​តំបន់​ផ្លូវទឹក​អន្តរជាតិ ដែល​ប្រទេស​ចិន ពុំ​មាន​សិទ្ធិ​កាន់កាប់​ផ្ដាច់មុខ​ឡើយ។

ភាព​តានតឹង​នៅ​តំបន់​សមុទ្រ​ចិន​ខាងត្បូង បាន​កើនឡើង​គួរ​ឱ្យ​កត់សម្គាល់​ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ ជាពិសេស​រវាង​ចិន និង​ហ្វីលីពីន និង​រវាង​ចិន និង​វៀតណាម។ ក្រៅពី​លើកឡើង​អំពី​ករណី​សមុទ្រ​ចិន​ខាងត្បូង លោក ចូ បៃដិន បាន​សាទរ​ចំពោះ​ទំនាក់ទំនង​ជិតស្និទ្ធ​ជាមួយ​វៀតណាម ខណៈ​ប្រទេស​ទាំង​ពីរ​បាន​ចុះ​កិច្ចព្រមព្រៀង​ពង្រឹង​កិច្ច​សហប្រតិបត្តិការ​ឱ្យ​កាន់តែ​ស៊ីជម្រៅ ជាពិសេស​លើ​វិស័យ​ពាណិជ្ជកម្ម សេដ្ឋកិច្ច និង​ឧស្សាហកម្ម​បច្ចេកវិទ្យា។

សេចក្ដី​ថ្លែងការណ៍​រួម​របស់​មេដឹកនាំ​ទាំង​ពីរ​បាន​ឈាន​ដល់​ការ​លើក​កម្ពស់​ភាព​ជា​ដៃគូ​យុទ្ធសាស្ត្រ​គ្រប់​ជ្រុងជ្រោយ​រវាង​ប្រទេស​ទាំង​ពីរ ដែល​ជា​ផ្នែក​មួយ​នៃ​កិច្ច​ខិតខំ​ប្រឹងប្រែង​របស់​ទីក្រុង​វ៉ាស៊ីនតោន ក្នុង​ការ​បង្កើត​បណ្ដាញ​សម្ព័ន្ធមិត្ត​អាស៊ី និង​ប៉ាស៊ីហ្វិក ចំពោះ​មុខ​ការ​កើន​ឡើង​នៃ​ឥទ្ធិពល​ចិន។

ភាព​ជា​ដៃគូ​ថ្មី​រវាង​សហរដ្ឋ​អាមេរិក និង​វៀតណាម ក្នុង​នោះ​សហរដ្ឋ​អាមេរិក​បាន​ប្ដេជ្ញា​ចិត្ត​ជួយ​វៀតណាម ដើម្បី​អភិវឌ្ឍ​សមត្ថភាព​របស់​ខ្លួន និង​ពង្រីក​ការ​ផលិតផល​គ្រឿង​អេឡិចត្រូនិក។

ក្នុង​សេចក្ដី​ថ្លែងការណ៍​នេះ ក៏​មាន​កិច្ចព្រមព្រៀង​ស្ដីពី​ការ​វិនិយោគ​លើ​ធនធាន​រ៉ែ​សម្រាប់​ប្រើប្រាស់​ក្នុង​ការ​ផលិត​ឧបករណ៍​ទំនើបៗ​ដូចជា​ទូរសព្ទ​ស្មាតហ្វូន និង​រថយន្ត​អគ្គិសនី ជាដើម។

លោក ចូ បៃដិន បាន​ប្រាប់​អ្នក​សារព័ត៌មាន​បន្ទាប់​ពី​ជំនួប​ជាមួយ​មេដឹកនាំ​វៀតណាម ថា ភាព​ជា​ដៃគូ​ជាមួយ​វៀតណាម គឺជា​ផ្នែក​មួយ​នៃ​រដ្ឋការ​របស់​លោក ដើម្បី​បង្ហាញ​ដល់​ប្រទេស​ជា​ដៃគូ​ក្នុង​តំបន់​ឥណ្ឌូ​ប៉ាស៊ីហ្វិក និង​ពិភពលោក​ថា សហរដ្ឋ​អាមេរិក​ក៏​ជា​ប្រជាជាតិ​ប៉ាស៊ីហ្វិក​មួយ​ដែរ។

ក្រុម​អ្នក​សង្កេតការណ៍​បាន​ហៅ​កិច្ចព្រមព្រៀង​ដែល​សម្រេច​ឡើង​អំឡុង​ដំណើរ​ទស្សនកិច្ច​របស់​លោក ចូ បៃដិន នៅ​ទីក្រុង​ហាណូយ ថា​បាន​ធ្វើ​ឱ្យ​សហរដ្ឋ​អាមេរិក​ក្លាយ​ជា​ប្រទេស​មួយ​ដែល​មាន​ឋានៈ​ខ្ពស់​នៅ​ក្នុង​ទំនាក់ទំនង​ការទូត​ជាមួយ​វៀតណាម អតីត​សត្រូវ​ចាស់​របស់​ខ្លួន។

ជាមួយ​គ្នា​នេះ ទស្សនកិច្ច​របស់​លោក បៃដិន ដោយសារតែ​ក្រុង​វ៉ាស៊ីនតោន មាន​ផែនការ​លើក​រោងចក្រ​មួយ​ចំនួន​របស់​អាមេរិក​ដែល​នៅ​ប្រទេស​ចិន មក​ដាក់​ក្នុង​ប្រទេស​វៀតណាម​វិញ ដែល​ស្ថិត​ក្នុង​គោលដៅ​ជួយ​ពង្រឹង​វិស័យ​ឧស្សាហកម្ម​បច្ចេកវិទ្យា​ដល់​ប្រទេស​ដ៏​មាន​ឥទ្ធិពល​មួយ​នៅ​អាស៊ី​អាគ្នេយ៍​នេះ។

ចាប់តាំងពី​បង្កើត​ទំនាក់ទំនង​ការទូត​នៅ​ឆ្នាំ​១៩៩៥ មក​ដល់​ឆ្នាំ​២០២០ សហរដ្ឋ​អាមេរិក​ទទួល​ទំនិញ​ពី​វៀតណាម ហក់​ឡើង ១២៧​ពាន់​លាន​ដុល្លារ ដែល​ទំហំ​ពាណិជ្ជកម្ម​នេះ សហរដ្ឋ​អាមេរិក​មាន​លើស​ចិន ជា​ប្រទេស​ជាប់​វៀតណាម ដល់​ទៅ ៤​ដង។ រហូត​មក​ទល់​ពេលនេះ វៀតណាម និង​អាមេរិក មាន​កិច្ចព្រមព្រៀង​ពាណិជ្ជកម្ម​សេរី​នឹង​គ្នា ហើយ​វៀតណាម និង​សហភាព​អឺរ៉ុប ក៏​មាន​កិច្ចព្រមព្រៀង​ពាណិជ្ជកម្ម​សេរី​ជាមួយ​គ្នា​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស