រដ្ឋការប្រធានាធិបតីសហរដ្ឋអាមេរិក លោក ចូ បៃដិន នៅទីបំផុតបានអនុញ្ញាតឱ្យអ៊ុយក្រែន ប្រើប្រាស់អាវុធផ្ដល់ដោយសហរដ្ឋអាមេរិក ដើម្បីវាយប្រហារចូលជ្រៅក្នុងទឹកដីរុស្ស៊ី ខណៈប្រទេសអង់គ្លេស និងបារាំង ក៏បានអនុញ្ញាតដូចនឹងអាមេរិកដែរ។
នេះជាការផ្លាស់ប្ដូរគោលនយោបាយសន្តិសុខអន្តរជាតិដ៏សំខាន់មួយរបស់សហរដ្ឋអាមេរិក ចំពោះសង្គ្រាមរុស្ស៊ី ដែលរុស្ស៊ី ឈ្លានពានប្រទេសអ៊ុយក្រែន។
មីស៊ីល ATTAMS ជាមីស៊ីលរបស់សហរដ្ឋអាមេរិក មីស៊ីល SCALP និង Storm Shadow ជាមីស៊ីលរបស់បារាំង និងអង់គ្លេស។ មីស៊ីលរបស់ប្រទេសមហាអំណាចទាំបីនេះ ជាមីស៊ីលរយៈចម្ងាយឆ្ងាយដែលវាអាចរត់បានពី ៣០០គីឡូម៉ែត្រទៅ ៣៥០គីឡូម៉ែត្រ។
កាសែត The New York Times បានចុះផ្សាយថា មន្ត្រីសហរដ្ឋអាមេរិក ២រូបនៅមន្ទីរប៉ុងតាហ្គោនក្នុងលក្ខខណ្ឌមិនបញ្ចេញឈ្មោះ កាលពីថ្ងៃអាទិត្យ ទី១៧ ខែវិច្ឆិកា បានឱ្យដឹងថា អ៊ុយក្រែនមានផែនការដឹកនាំការវាយប្រហាររយៈចម្ងាយឆ្ងាយលើដែនដីខាងក្នុងប្រទេសរុស្ស៊ី ជាលើកដំបូងរបស់ខ្លួននៅប៉ុន្មានថ្ងៃខាងមុខនេះ។
ការផ្លាស់ប្ដូរជំហរជាយុទ្ធសាស្ត្ររបស់ប្រទេសមហាអំណាចបីនេះ កើតមានឡើងទំនងជាឆ្លើយតបទៅនឹងការដាក់ពង្រាយកងទ័ពកូរ៉េខាងជើង ទៅជួយកងទ័ពរុស្ស៊ី ក្នុងសង្គ្រាមប្រឆាំងអ៊ុយក្រែន និងបន្ទាប់ពីរុស្ស៊ី បាញ់មីស៊ីលរយៈចម្ងាយឆ្ងាយបាលីស្ទិកជាង ១២០គ្រាប់លើរដ្ឋធានីគៀវ និងទីក្រុងផ្សេងៗទៀតនៅទូទាំងប្រទេសអ៊ុយក្រែន កាលពីព្រឹកព្រលឹមថ្ងៃទី១៧ ខែវិច្ឆិកា។
ការសម្រេចចិត្តខាងលើរបស់រដ្ឋការលោក បៃដិន រដ្ឋាភិបាលអង់គ្លេស និងបារាំង ធ្វើឡើងតែជាង ២ខែប៉ុណ្ណោះ មុននឹងលោក ដូណាល់ ត្រាំ ស្បថចូលកាន់តំណែងជាប្រធានាធិបតីនៅថ្ងៃទី២០ ខែមករា ឆ្នាំ២០២៥ និងបន្ទាប់ពីអ៊ុយក្រែន បានទទូចសុំជាច្រើនខែមកហើយ ដើម្បីអាចប្រើប្រាស់អាវុធរយៈចម្ងាយឆ្ងាយវាយប្រហារលើគោលដៅយោធាស្ថិតនៅជ្រៅក្នុងទឹកដីរុស្ស៊ី។
រុស្ស៊ី តែងតែព្រមានថាខ្លួននឹងចាត់ទុកថាការវាយប្រហាររយៈចម្ងាយឆ្ងាយលើប្រទេសរុស្ស៊ី ពីសំណាក់អាវុធផ្ដល់ពីសហរដ្ឋអាមេរិក ឬ NATO ដែលបើកការវាយប្រហារដោយកងទ័ពអ៊ុយក្រែន វាយប្រហារលើទឹកដីរុស្ស៊ី គឺជាការបង្កើនជម្លោះដែលក្រុងមូស្គូ មានសិទ្ធិស្របច្បាប់ក្នុងករណីសងសឹក។
មន្ត្រីជាន់ខ្ពស់ និងសមាជិកសភារុស្ស៊ី បាននិយាយថា ការសម្រេចចិត្តរបស់ទីក្រុងវ៉ាស៊ីនតោន ដោយអនុញ្ញាតឱ្យអ៊ុយក្រែន វាយប្រហារចូលជ្រៅក្នុងទឹកដីរុស្ស៊ី ជាមួយអាវុធផ្ដល់ដោយពួកបស្ចិមប្រទេស ជាការបង្ខំឱ្យក្រុងមូស្គូ ចាត់វិធានការឆ្លើយតបយ៉ាងខ្លាំងក្លា។
សមាជិកសភារុស្ស៊ីមួយរូបបាននិយាយថា រដ្ឋការប្រធានាធិបតីអាមេរិក លោក ចូ បៃដិន កំពុងបង្កើនហានិភ័យទៅរកសង្គ្រាមលោកលើកទី៣ ប្រសិនបើអ៊ុយក្រែនប្រើប្រាស់អាវុធទាំងនោះវាយប្រហារជ្រៅចូលក្នុងទឹកដីរុស្ស៊ី។
សមាជិកសភារុស្ស៊ីរូបនេះ គឺអ្នកស្រី Maria Butina ដែលបានលើកឡើងថា រដ្ឋការលោក បៃដិន កំពុងតែព្យាយាមបង្កើនកម្តៅនៃស្ថានការណ៍ឱ្យដល់កម្រិតខ្ពស់។ អ្នកស្រីសមាជិកសភារុស្ស៊ី ជឿថា លោក ដូណាល់ ត្រាំ នឹងអាចជម្នះបាននូវការដកមកវិញសេចក្ដីសម្រេចរបស់លោក បៃដិន នេះវិញ។
ប្រធានាធិបតីរុស្ស៊ី លោក វ៉្លាឌីមៀ ពូទីន ធ្លាប់បាននិយាយថា ការអនុញ្ញាតរបស់លោកខាងលិចឱ្យអ៊ុយក្រែន ប្រើប្រាស់អាវុធរបស់ពួកគេ វាយប្រហារជ្រៅចូលមកក្នុងទឹកដីប្រទេសរុស្ស៊ី វាមានន័យថា ជាការចូលរួមដោយផ្ទាល់របស់ប្រទេសអង្គការ NATO សហរដ្ឋអាមេរិក ក៏ដូចជាអឺរ៉ុប នៅក្នុងសង្គ្រាមអ៊ុយក្រែន។
កាលពីចុងខែតុលា លោក ពូទីន បាននិយាយថា ក្រសួងការពារជាតិរុស្ស៊ី កំពុងពិចារណាលើមធ្យោបាយផ្សេងៗដើម្បីឆ្លើយតប ប្រសិនបើសហរដ្ឋអាមេរិក និងសម្ព័ន្ធមិត្ត NATO សម្រេចចិត្តជួយអ៊ុយក្រែន វាយប្រហារចូលជ្រៅក្នុងដីរុស្ស៊ី។
ទាំងអង់គ្លេស និងបារាំង ជាម្ចាស់ជំនួយមីស៊ីលរយៈចម្ងាយឆ្ងាយបានថ្កោលទោសរុស្ស៊ី ដែលបន្តវាយប្រហារទ្រង់ទ្រាយធំដោយមីស៊ីលបាលីស្ទិក កាលពីថ្ងៃអាទិត្យ ទី១៧ ខែវិច្ឆិកា លើប្រទេសអ៊ុយក្រែន បណ្ដាលឱ្យដាច់ចរន្តអគ្គិសនីសឹងទូទាំងប្រទេស។
ប្រធានាធិបតីបារាំង លោក អេម៉ានុយអែល ម៉ាក្រុង និយាយថា ការវាយប្រហារតាមផ្លូវអាកាសទ្រង់ទ្រាយធំរបស់រុស្ស៊ី ប្រឆាំងនឹងអ៊ុយក្រែន បង្ហាញថាប្រធានាធិបតីរុស្ស៊ី លោក វ៉្លាឌីមៀ ពូទីន មិនចង់បានសន្តិភាពនោះទេ ហើយក៏មិនទាន់ត្រៀមខ្លួនសម្រាប់កិច្ចចរចានោះដែរ។
ថ្លែងប្រាប់អ្នកសារព័ត៌មាននៅក្រុងប៉ារីស លោក ម៉ាក្រុង បានសង្កត់ធ្ងន់ថា អាទិភាពរបស់បារាំង នោះគឺបំពាក់អាវុធ គាំទ្រ និងជួយដល់ការតស៊ូរបស់ប្រជាជនអ៊ុយក្រែន។
នៅពេលត្រូវបានសួរពីកិច្ចសន្ទនាតាមទូរសព្ទរវាងលោក ពូទីន និងអធិការបតីអាល្លឺម៉ង់ លោក Olaf Scholz កាលពីសប្ដាហ៍មុន លោក ម៉ាក្រុង និយាយថា សម្ព័ន្ធមិត្តរបស់អ៊ុយក្រែនត្រូវតែរួបរួមសាមគ្គីគ្នាដើម្បីសន្តិភាពពិតប្រាកដ ជាសន្តិភាពមួយដែលប្រកបដោយយុត្តិធម៌ មិនមែនមានន័យថាអ៊ុយក្រែន ត្រូវចុះចាញ់អ្នកឈ្លានពាននោះទេ។
នៅក្នុងការសន្ទនាតាមទូរសព្ទជាមួយលោកប្រធានាធិបតីរុស្ស៊ី វ៉្លាឌីមៀ ពូទីន លោក Olaf Scholz អធិការបតីអាល្លឺម៉ង់ បានទាមទារឲ្យលោក ពូទីន ដកទ័ពទាំងអស់ចេញពីទឹកដីអ៊ុយក្រែនជាមួយនឹងការព្រមានថា អាល្លឺម៉ង់នឹងបន្តជួយគាំទ្រអ៊ុយក្រែនជានិច្ច ដរាបណារុស្ស៊ីនៅតែបន្តធ្វើសង្គ្រាម។
លោកអធិការបតីអាល្លឺម៉ង់ បានប្រាប់ទៅលោក ពូទីន ទៀតថា រុស្ស៊ីត្រូវតែបង្ហាញជំហរពិតប្រាកដក្នុងការបិទបញ្ចប់សង្គ្រាមតាមរយៈការបើកផ្លូវចរចា ដើម្បីកសាងសន្តិភាពសម្រាប់អ៊ុយក្រែន វិញ។
នៅក្នុងកិច្ចសន្ទនាគ្នានោះ លោក Olaf Scholz ក៏បានថ្កោលទោសចំពោះវត្តមានកងទ័ពកូរ៉េខាងជើង ដែលមកជួយច្បាំងឱ្យកងទ័ពរុស្ស៊ី នៅក្នុងសមរភូមិប្រឆាំងនឹងទ័ពអ៊ុយក្រែន ដោយចាត់ទុកថាជាការរុញឱ្យស្ថានភាពសង្គ្រាមកាន់តែធ្ងន់ធ្ងរ។
កងទ័ពកូរ៉េខាងជើង មាន ១ម៉ឺន ១ពាន់នាក់បានកំពុងជួយច្បាំងកងទ័ពរុស្ស៊ី នៅក្នុងសមរភូមិតំបន់ Kursk ខាងក្នុងទឹកដីរុស្ស៊ី ខណៈទ័ពរុស្ស៊ី មាន ៤០០០០នាក់។
លោក ពូទីន បានបញ្ជាឱ្យទ័ពរបស់លោកវាយយកឱ្យបានវិញនូវទីតាំងក្នុងតំបន់ Kursk ដែលកងទ័ពអ៊ុយក្រែន វាយកាន់កាប់តាំងពីដើមខែសីហា ឆ្នាំ២០២៤ ឱ្យបាននៅមុនលោក ដូណាល់ ត្រាំ ទៅកាន់សេតវិមានវិញនៅថ្ងៃទី២០ ខែមករា ឆ្នាំ២០២៥៕
© 2024, ឌឹ ខេមបូឌា ដេលី. All rights reserved.