35 C
Phnom Penh

លោក ហ៊ុន ម៉ាណែត ណែនាំ​ឱ្យ​ពលរដ្ឋ​វាយ​គង​ទូង​ស្គរ​នៅ​ថ្ងៃទី​២០​កញ្ញា​ស្វាគមន៍​ប្រាសាទ​កោះកេរ​ដែល​ចូល​ក្នុង​បញ្ជី​សម្បត្តិ​បេតិកភណ្ឌ​ពិភពលោក

ដោយ ឌឹ ខេមបូឌា ដេលី

បទវិភាគ

នាយករដ្ឋមន្ត្រី​ត​ពូជ​លោក ហ៊ុន ម៉ាណែត ណែនាំ​ឱ្យ​ស្ថាប័ន​ជាតិ និង​ស្ថាប័ន​ថ្នាក់​ក្រោម​ជាតិ អាជ្ញាធរ​គ្រប់​ឃុំ-សង្កាត់ រួម​ទាំង​ព្រះសង្ឃ​គ្រប់​វត្ត​អារាម វាយ​គង ទូង​ស្គរ ទះ​ប៉ោត គោះ​ត្រឡោក តាម​គ្រប់​មធ្យោបាយ​ដែល​ខ្លួន​មាន​នៅ​ថ្ងៃទី​២០ ខែ​កញ្ញា វេលា​ម៉ោង ៧​ព្រឹក ដើម្បី​ស្វាគមន៍​ប្រាសាទ​កោះកេរ របស់​កម្ពុជា​ដែល​ត្រូវ​បាន​ដាក់​ចូល​ជា​សម្បត្តិ​បេតិកភណ្ឌ​ពិភពលោក​កាលពី​ថ្ងៃទី​១៧ ខែ​កញ្ញា ឆ្នាំ​២០២៣។

លោក ហ៊ុន ម៉ាណែត បាន​ចេញ​លិខិត​អបអរ​សាទរ​កាលពី​ថ្ងៃទី​១៧ ខែ​កញ្ញា ឆ្នាំ​២០២៣ ថា ថ្ងៃទី​១៧ ខែ​កញ្ញា បាន​ក្លាយ​ជា​ទិវា​ប្រវត្តិសាស្ត្រ​ដ៏​សំខាន់​មួយ​ទៀត​សម្រាប់​ប្រទេស​កម្ពុជា និង​ពលរដ្ឋ​ខ្មែរ ដោយសារតែ​គណៈកម្មាធិការ​បេតិកភណ្ឌ​ពិភពលោក​របស់​អង្គការ​យូណេស្គូ (UNESCO) បាន​សម្រេច​ជា​ឯកច្ឆន្ទ ដាក់​បញ្ចូល​រមណីយដ្ឋាន​ប្រាសាទ​កោះកេរ ក្នុង​បញ្ជី​បេតិកភណ្ឌ​ពិភពលោក​ក្នុង​សម័យ​ប្រជុំ​លើក​ទី​៤៥ តាម​សំណើ​រដ្ឋាភិបាល​កម្ពុជា នៅ​ទីក្រុង​រីយ៉ាដ ប្រទេស​អារ៉ាប៊ីសាអ៊ូឌីត ក្នុង​ឆ្នាំ​២០២៣ នេះ។

លោក ហ៊ុន ម៉ាណែត អះអាង​ថា មហា​សមិទ្ធផល​នេះ គឺជា​កិត្យានុភាព​ដ៏​ខ្ពស់​រុងរឿង​ថ្មី​មួយ​ទៀត​របស់​កម្ពុជា​លើ​ឆាក​អន្តរជាតិ ដែល​កើត​ចេញពី​កិច្ច​ខិតខំ​ប្រឹងប្រែង​របស់​រាជរដ្ឋាភិបាល​ដែល​បាន​ដាក់​សំណើ​ជា​ផ្លូវការ​ទៅ​មជ្ឈមណ្ឌល​បេតិកភណ្ឌ​ពិភពលោក​ចាប់តាំងពី​ដើម​ឆ្នាំ​២០២១ មក រហូត​ទទួល​បាន​ការ​ចុះបញ្ជី​ជា​ផ្លូវការ​នៅ​ខែ​កញ្ញា ឆ្នាំ​២០២៣ នេះ។

កេរ​មរតក​វប្បធម៌​អតីត​រាជធានី​ខ្មែរ​បុរាណ​មុន​រាជធានី​អង្គរ​មាន​ឈ្មោះ​ថា ឆូក-គៈ-គ-យៈ (ឆោកគគ៌្យរ) ឬ​លិង្គបុរៈ ដែល​បច្ចុប្បន្ន​ហៅថា រមណីយដ្ឋាន​ប្រាសាទ​កោះកេរ ត្រូវ​បាន​កសាង​ឡើង​ក្នុង​សតវត្ស​ទី​១០ ចន្លោះ​ពី​ឆ្នាំ​៩២៨ ដល់​ឆ្នាំ​៩៤៤ ដោយ​ព្រះបាទ​ជ័យវរ្ម័នទី៤ ដែល​ត្រូវ​បាន​ក្រុមប្រឹក្សា​អន្តរជាតិ​ស្ដីពី​ប្រាង្គ​ប្រាសាទ និង​រមណីយដ្ឋាន (ICOM OS) ទទួល​ស្គាល់​ថា​ជា​កំពូល​ស្នាដៃ​ដ៏​អស្ចារ្យ​នៃ​ស្ថាបត្យកម្ម​ខ្មែរ។

ឈ្មោះ​ដើម​របស់​រមណីយដ្ឋាន​កោះកេរ គឺ ឆោកគគ៌្យរ មាន​ន័យ​ថា កោះ​ដើម​គគីរ ចំណែក​ពាក្យ​ថា លិង្គបុរៈ ប្រែ​ថា បុរី​លិង្គ ដែល​មាន​ន័យ​ថា ប្រាសាទ​ដែល​តម្កល់​លិង្គ​ព្រះឥសូរ​សម្រាប់​គោរព​បូជា​តាម​បែប​ព្រហ្មញ្ញសាសនា​នា​សម័យ​នោះ។

រមណីយដ្ឋាន​កោះកេរ គឺជា​ទីតាំង​ប្រាសាទ​បុរាណ​ហ៊ុមព័ទ្ធ​ទៅ​ដោយ​ព្រៃ​ដ៏​សែន​ក្រាស់ ដែល​បាន​បន្សល់​ទុក​នូវ​សំណល់​បុរាណវិទ្យា​ជាង ១០០​ប្រភេទ (១៦៩​ប្រភេទ) រួម​មាន​ប្រាសាទ​ចំនួន ៧៦ ហេដ្ឋារចនាសម្ព័ន្ធ​ស៊ីវិល ដូចជា ស្រះ​ទឹក កសិណ និង​ផ្លូវ​បុរាណ ជាដើម ហើយ​ប្រាសាទ​ធំ​មាន​កម្ពស់ ៣៥​ម៉ែត្រ រាង​ពីរ៉ាមីត ឈរ​លើ​ផ្ទៃដី​ទំហំ​ជាង ៨​ពាន់​ហិកតារ (៨៧៨៩,៤៣​ហិកតារ) ដែល​មាន​លំនៅឋាន​ពលរដ្ឋ​រស់នៅ​ក្នុង​តំបន់​ទ្រនាប់​ចំនួន ២៥៩​ខ្នង និង​ចំនួន​ប្រជាជន​ជាង ៨០០​នាក់ (៨១៦​នាក់) ផង​ដែរ​សព្វថ្ងៃ​នេះ។

មន្ត្រី​ជាន់ខ្ពស់​ទទួល​បន្ទុក​សិទ្ធិមនុស្ស​របស់​សមាគម​អាដហុក លោក ស៊ឹង សែនករុណា ប្រាប់​សារព័ត៌មាន The Cambodia Daily នៅ​ថ្ងៃទី​១៨ កញ្ញា នេះ​ថា ជា​រឿង​ល្អ និង​គួរ​ឱ្យ​អបអរ​សាទរ​ដែល​ប្រាសាទ​បុរាណ​ខ្មែរ​បន្ថែម​ទៀត​ត្រូវ​បាន​ដាក់​បញ្ចូល​ក្នុង​បញ្ជី​បេតិកភណ្ឌ​ពិភពលោក ដែល​នឹង​ក្លាយ​ជា​សម្បត្តិ​សកល​របស់​ពិភពលោក ប៉ុន្តែ​ក្រៅពី​គួរ​ឱ្យ​អបអរ​សាទរ ក៏​នៅតែ​មាន​ការ​ព្រួយបារម្ភ​ដែរ ព្រោះ​កន្លង​មក តំបន់​បេតិកភណ្ឌ​ពិភពលោក​ខ្លះ​បាន​ធ្វើ​ទុក្ខបុកម្នេញ​លើ​ពលរដ្ឋ​ដែល​រស់នៅ​ក្បែរ​តំបន់​នោះ​ជា​ហូរហែ ក្រោម​វិធានការ​របស់​រដ្ឋាភិបាល​ដែល​គ្មាន​ភាព​ជាក់លាក់។

លោក ស៊ឹង សែនករុណា អំពាវនាវ​ឱ្យ​រដ្ឋាភិបាល​កម្ពុជា​យក​ចិត្ត​ទុកដាក់​ពី​ជីវភាព​របស់​ពលរដ្ឋ​ដែល​រស់នៅ​ក្បែរ​តំបន់​ប្រាសាទ​ដែល​បាន​ដាក់​ចូល​ក្នុង​បញ្ជី​សម្បត្តិ​បេតិកភណ្ឌ​ពិភពលោក​ឱ្យ​បាន​ត្រឹមត្រូវ ត្បិត​គំរូ​អាក្រក់​មួយ​ធ្លាប់​បាន​កើត​មាន​ចំពោះ​ពលរដ្ឋ​ដែល​រស់នៅ​ក្នុង​តំបន់​រមណីយដ្ឋាន​អង្គរ​កាលពី​ពេល​ថ្មីៗ​នេះ។ ពលរដ្ឋ​ទាំងនោះ​បាន​រងគ្រោះ​យ៉ាង​ធ្ងន់ធ្ងរ​ក្រោម​វិធានការ​ជម្លៀស​របស់​រដ្ឋាភិបាល​នា​ពេល​កន្លង​មក។

ចំណែក​អ្នក​ផ្តល់​ប្រឹក្សា​យោបល់​ផ្នែក​អភិវឌ្ឍ​ផ្នត់គំនិត និង​ការ​ស្រាវជ្រាវ លោក សេក សុជាតិ ប្រាប់​សារព័ត៌មាន The Cambodia Daily នៅ​ថ្ងៃទី​១៨ កញ្ញា នេះ​ថា លោក​សូម​ចូលរួម​អបអរ​សាទរ​ជាមួយ​ពលរដ្ឋ​ទូទាំង​ប្រទេស​ដែល​ប្រាសាទ​បុរាណ​របស់​ខ្មែរ​ត្រូវ​បាន​ដាក់​បញ្ចូល​ក្នុង​បញ្ជី​បេតិកភណ្ឌ​ពិភពលោក ប៉ុន្តែ​លោក​ក៏​សូម​អំពាវនាវ​ឱ្យ​រដ្ឋាភិបាល​បំពេញ​កាតព្វកិច្ច​របស់​ខ្លួន​ក្នុង​ការ​ថែរក្សា​តំបន់​បេតិកភណ្ឌ​នេះ​ឱ្យ​ល្អ​ស្រប​តាម​លក្ខខណ្ឌ​របស់​អង្គការ​យូណេស្កូ​ដែរ ដើម្បី​ចៀសវាង​ការ​ធ្វើ​ឱ្យ​តំបន់​បេតិកភណ្ឌ​ពិភពលោក​មួយ​នេះ​ក្លាយ​ទៅ​ជា​ការ​បង្ក​ការ​លំបាក​ដល់​ពលរដ្ឋ​ដែល​រស់នៅ​ក្បែរ​នោះ​ទៅវិញ ជាពិសេស​ដូច​នៅ​តំបន់​រមណីយដ្ឋាន​អង្គរ ដែល​កំពុង​មាន​ការ​ធ្វើ​ទុក្ខបុកម្នេញ​ដល់​ពលរដ្ឋ​តាមរយៈ​ការ​ជម្លៀស​ចេញពី​លំនៅឋាន​ដោយ​បង្ខំ។

ចាប់តាំងពី​ឆ្នាំ​១៩៩២ មក ប្រាសាទ​បុរាណ​ខ្មែរ​ត្រូវ​បាន​ចុះបញ្ជី​ជា​សម្បត្តិ​បេតិកភណ្ឌ​ពិភពលោក​បាន​ចំនួន ៤ ហើយ រួម​មាន​តំបន់​ប្រាសាទ​អង្គរវត្ត ប្រាសាទ​ព្រះវិហារ ប្រាសាទ​សំបូរព្រៃគុក និង​ប្រាសាទ​កោះកេរ ដែល​ទើប​ត្រូវ​បាន​ចុះបញ្ជី​ជា​ផ្លូវការ​នៅ​ឆ្នាំ​២០២៣ នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស