37 C
Phnom Penh

ទីប្រឹក្សា​និង​ជំនួយការ​រដ្ឋាភិបាល​ថ្មី​របស់​លោក ហ៊ុន ម៉ាណែត ហក់​ឡើង​ដល់​ជាង ២​ពាន់​នាក់​គិត​ត្រឹម​ចុង​ខែ​កញ្ញា​នេះ

ដោយ ឌឹ ខេមបូឌា ដេលី

បទវិភាគ

ការ​តែងតាំង​ទីប្រឹក្សា និង​ជំនួយការ​សម្រាប់​រដ្ឋាភិបាល​ថ្មី​របស់​លោក ហ៊ុន ម៉ាណែត បាន​ហក់​ឡើង​ដល់​ជាង ២​ពាន់​នាក់ (២២៧៦​នាក់) ហើយ គិត​ត្រឹម​ចុង​ខែ​កញ្ញា នេះ ប៉ុន្តែ​ចំនួន​នេះ​គេ​នៅ​មិន​ទាន់​រាប់​បញ្ចូល​ចំនួន​ទីប្រឹក្សា និង​ជំនួយការ​របស់​មន្ត្រី​ជាន់ខ្ពស់​រដ្ឋាភិបាល និង​ទីប្រឹក្សា ជំនួយការ​អម​ក្រសួង​នានា និង​រដ្ឋលេខាធិការដ្ឋាន​ដែល​មាន​ចំនួន​រាប់​រយ​នាក់​ទៀត​នៅឡើយ​ទេ។

កាលពី​ថ្ងៃទី​២០ ខែ​កញ្ញា ឆ្នាំ​២០២៣ ប្រមុខ​រដ្ឋ​ស្តីទី​លោក សាយ ឈុំ បាន​ចុះហត្ថលេខា​លើ​ព្រះរាជក្រឹត្យ​មួយ​ដោយ​តែងតាំង​មុខតំណែង​ជា​ទីប្រឹក្សា​អម​ស្ថាប័ន​ក្រុមប្រឹក្សា​អភិវឌ្ឍន៍​កម្ពុជា​ចំនួន ៥​នាក់​បន្ថែម​ទៀត បន្ទាប់ពី​ទីប្រឹក្សា​ចំនួន ៨​នាក់​ត្រូវ​បាន​តែងតាំង​កាលពី​ថ្ងៃទី​៥ ខែ​កញ្ញា កន្លងទៅ ដែល​ធ្វើ​ឱ្យ​ចំនួន​ទីប្រឹក្សា​អម​ស្ថាប័ន​ក្រុមប្រឹក្សា​អភិវឌ្ឍន៍​កម្ពុជា​កើន​ឡើង​បន្ថែម​ទៀត​នៅ​ពេលនេះ។

គិត​ត្រឹម​ថ្ងៃទី​២៥ ខែ​កញ្ញា ឆ្នាំ​២០២៣ នេះ សមាជិក​រដ្ឋាភិបាល​អាណត្តិ​ទី​៧ ដែល​ដឹកនាំ​ដោយ​នាយករដ្ឋមន្ត្រី​ត​ពូជ​លោក ហ៊ុន ម៉ាណែត បាន​កើន​ឡើង​ដល់​ជាង ១៥០០​នាក់​ហើយ (១៥៤៧​នាក់) ដោយ​គិត​ត្រឹម​ឋានៈ​ចាប់ពី​អនុរដ្ឋលេខាធិការ​ឡើង​ទៅ​ដល់​នាយករដ្ឋមន្ត្រី ដូច្នេះ​បើ​បូក​សរុប​ទាំង​ចំនួន​ទីប្រឹក្សា​ដែល​រដ្ឋាភិបាល​ផ្សព្វផ្សាយ​ជា​សាធារណៈ និង​សមាជិក​រដ្ឋាភិបាល​អាណត្តិ​ថ្មី​នេះ គឺ​មាន​ចំនួន​ដល់​ទៅ​ជាង ៣៨០០​នាក់​ហើយ (៣៨២៣​នាក់) នៅ​ពេលនេះ។

កម្ពុជា​មាន​ចំនួន​ប្រជាជន​ប្រមាណ ១៧​លាន​នាក់ ប៉ុន្តែ​ការ​តែងតាំង​សមាជិក​រដ្ឋាភិបាល​អាណត្តិ​ទី​៧ សម្រាប់​ដឹកនាំ​ប្រទេស ត្រូវ​គេ​មើល​ឃើញ​ថា​មាន​ទំហំ​ច្រើន​លើសលប់ ដែល​ត្រូវ​គេ​ចាត់ទុក​ថា​ជា​រដ្ឋាភិបាល​ដែល​មាន​ក្បាល​ធំ​ជាងគេ​នៅ​លើ​ពិភពលោក ព្រោះ​ថា​បើ​យក​សមាជិក​រដ្ឋាភិបាល​ប្រទេស​ចំនួន​៣ ដូចជា​ប្រទេស​ថៃ ដែល​មាន​សមាជិក​រដ្ឋាភិបាល ៣១៤​នាក់ ប្រទេស​អូស្ត្រាលី ដែល​មាន​សមាជិក​រដ្ឋាភិបាល ៣៦​នាក់ និង​ប្រទេស​វៀតណាម មាន​ចំនួន ១០៥​នាក់ បូក​បញ្ចូល​គ្នា គឺ​បាន​ត្រឹមតែ​ជាង ៤០០​នាក់ (៤៥៥​នាក់) ប៉ុណ្ណោះ ដែល​ស្មើ​នឹង ៧,០៣% នៃ​សមាជិក​រដ្ឋាភិបាល​កម្ពុជា​អាណត្តិ​ទី​៧ នេះ។

ទាក់ទិន​នឹង​បញ្ហា​នេះ តំណាងរាស្ត្រ​អតីត​គណបក្ស​សង្គ្រោះ​ជាតិ​លោក អ៊ុំ សំអាន សរសេរ​លើ​គណនី​ហ្វេសប៊ុក​របស់​ខ្លួន​នៅ​ថ្ងៃទី​២៥ កញ្ញា នេះ​ថា ចំនួន​សមាជិក​រដ្ឋាភិបាល​របស់​រដ្ឋាភិបាល​លោក ហ៊ុន ម៉ាណែត គឺជា​រដ្ឋាភិបាល​ដែល​មាន​ក្បាល​ធំ​ជាងគេ​នៅ​លើ​ពិភពលោក ដែល​បញ្ហា​នេះ​បាន​ក្លាយ​ជា​បន្ទុក​របស់​ពលរដ្ឋ​ក្នុង​ការ​បង់​ពន្ធ​យ៉ាង​ធ្ងន់ធ្ងរ ខណៈ​ការ​តែងតាំង​សមាជិក​ជាន់ខ្ពស់​នៃ​រដ្ឋាភិបាល​នេះ​រហូត​ដល់​ទីប្រឹក្សា សុទ្ធតែ​ធ្វើឡើង​តាមរយៈ​សែស្រឡាយ​បក្ខពួក​ទាំងអស់។

ចំណែក​សកម្មជន​កិច្ចព្រមព្រៀង​ក្រុង​ប៉ារីស​លោក ស្រ៊ុន ស្រ៊ន បាន​លើកឡើង​កាលពី​ពេល​ថ្មីៗ​នេះ​ថា រដ្ឋាភិបាល​ថ្មី​របស់​កម្ពុជា នឹង​ទទួល​ថ្ម​បាក់​យ៉ាង​ធ្ងន់ធ្ងរ ប្រសិនបើ​ការ​តែងតាំង​មន្ត្រី​របស់​ខ្លួន​ដោយ​ការ​ប្រើ​បក្សពួក និង​គ្រួសារ​នោះ ព្រោះ​ថា​ការ​ធ្វើ​បែប​នេះ គឺជា​រោគសញ្ញា​ដ៏​ធ្ងន់ធ្ងរ​ក្នុង​សង្គម​ដែល​បង្ហាញ​ពី​ការ​កើតមាន​អំពើពុករលួយ អំពើ​និទណ្ឌភាព និង​អំពើ​អយុត្តិធម៌​សង្គម​ជា​ប្រព័ន្ធ​ដែល​នឹង​រីក​រាលដាល​ពេញ​ប្រទេស​កម្ពុជា​ទៅ​ថ្ងៃ​មុខ។

ចាប់តាំងពី​ថ្ងៃ​ប្រកាស​តែងតាំង​សមាសភាព​រដ្ឋាភិបាល​ថ្មី​កាលពី​ថ្ងៃទី​២២ ខែ​សីហា មក ព្រះមហាក្សត្រ​បាន​ចេញ​ព្រះរាជក្រឹត្យ​តែងតាំង​សមាសភាព​រដ្ឋាភិបាល​ថ្មី និង​ត្រាស់​បង្គាប់​តែងតាំង​ទីប្រឹក្សា​អម​ក្រសួង​ស្ថាប័ន​នានា​ជា​បន្តបន្ទាប់ រហូត​ដល់​ពេលនេះ​មាន​ចំនួន​ជិត ៤​ពាន់​នាក់​ហើយ (៣៨២៣​នាក់) ដែល​គេ​មើល​ឃើញ​ថា ថវិកា​ជាតិ​នឹង​ត្រូវ​ចំណាយ​ទ្វេដង​ទៅ​លើ​មន្ត្រី​រដ្ឋាភិបាល​ថ្មី​ទាំងនេះ។

អ្នក​ប្រឹក្សា​យោបល់​ផ្នែក​អភិវឌ្ឍ​ផ្នត់គំនិត និង​ការ​ស្រាវជ្រាវ លោក សេក សុជាតិ ប្រាប់​សារព័ត៌មាន The Cambodia Daily នៅ​ថ្ងៃទី​២៥ កញ្ញា នេះ​ថា ចំនួន​សមាជិក​រដ្ឋាភិបាល​ដែល​ច្រើន​លើសលប់​បែប​នេះ បង្ហាញ​ឱ្យ​ឃើញ​ថា ថវិកា​ដែល​ប្រជាពលរដ្ឋ​បង់​ពន្ធ​នឹង​ត្រូវ​ដក​មួយ​ភាគ​ធំ​សម្រាប់​ធ្វើ​ជា​ប្រាក់ខែ​ឱ្យ​មន្ត្រី​រដ្ឋាភិបាល និង​ទីប្រឹក្សា​ទាំងនោះ ស្រប​ពេល​ដែល​កម្ពុជា​កំពុង​ជាប់​បំណុល​បរទេស​ធ្ងន់ធ្ងរ​នៅឡើយ ដែល​បញ្ហា​នេះ​នឹង​ក្លាយ​ជា​បន្ទុក​ដែល​រដ្ឋាភិបាល​នឹង​ទម្លាក់​មក​លើ​ពលរដ្ឋ​តាមរយៈ​នៃ​ការ​ប្រមូល​ពន្ធ​ជា​មិនខាន។

កាលពី​ថ្ងៃទី​២៩ ខែ​កក្កដា ឆ្នាំ​២០២៣ មេដឹកនាំ​ខ្មែរ​ក្រាញ​អំណាច​ត​ត្រកូល​លោក ហ៊ុន សែន បាន​ប្រកាស​មុន​នឹង​លោក​លាឈប់​ពី​តំណែង​ជា​នាយករដ្ឋមន្ត្រី​ថា អ្នក​ដែល​មាន​ឋានៈ​ជា​រដ្ឋមន្ត្រី រដ្ឋលេខាធិការ អនុរដ្ឋលេខាធិការ និង​ទីប្រឹក្សា​ទាំងអស់ នឹង​ត្រូវ​បញ្ចប់​មុខតំណែង​សម្រាប់​អាណត្តិ​រដ្ឋាភិបាល​ចាស់​របស់​លោក ប៉ុន្តែ​មុខតំណែង​ទាំងនេះ​នឹង​ត្រូវ​រៀបចំ​តែងតាំង​ជា​ថ្មី​សម្រាប់​អាណត្តិ​រដ្ឋាភិបាល​ថ្មី​ឡើងវិញ​ទាំងអស់។

ជាង​នេះ​ទៀត កាលពី​ចុង​ខែ​សីហា ឆ្នាំ​២០២៣ លោក ហ៊ុន សែន បាន​ព្រមាន​រដ្ឋាភិបាល​ថ្មី​ដែល​កំពុង​ដឹកនាំ​ដោយ​កូនប្រុស​របស់​គាត់​ថា ដើម្បី​ជោគជ័យ​ក្នុង​ឆាក​ជីវិត​នយោបាយ មេដឹកនាំ​ត្រូវតែ​ចេះ​រក្សា​សមាជិក​ចាស់ ហើយ​ត្រូវ​បង្កើន​សមាជិក​ថ្មី ទោះ​ត្រូវ​ធ្វើ​កំណែ​ទម្រង់​បែប​ណា​ក៏ដោយ ដែល​បញ្ហា​នេះ​ត្រូវ​គេ​មើល​ឃើញ​ថា សមាជិក​រដ្ឋាភិបាល​ថ្មី​របស់​លោក ហ៊ុន ម៉ាណែត មាន​ចំនួន​ច្រើន​ជាង​សមាជិក​រដ្ឋាភិបាល​ចាស់​របស់​លោក ហ៊ុន សែន ដល់​ទៅ​ជិត ១​ពាន់​នាក់ (៨៣៩​នាក់) ឯណោះ​នៅ​ពេលនេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស