30 C
Phnom Penh

លោក មុត ចន្ថា ថា​នាយករដ្ឋមន្ត្រី​កម្ពុជា​មិន​ទាន់​រក​ផល​ប្រយោជន៍​ឱ្យ​ពលរដ្ឋ​ដូច​នាយករដ្ឋមន្ត្រី​ថៃ​នោះ​ទេ

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​អតីត​គណបក្ស​សង្គ្រោះ​ជាតិ​អះអាង​ថា នាយករដ្ឋមន្ត្រី​កម្ពុជា​មិន​ទាន់​បាន​រក​ផល​ប្រយោជន៍​សម្រាប់​ពលរដ្ឋ​ខ្មែរ​ដូច​នាយករដ្ឋមន្ត្រី​ថៃ រក​ផល​ប្រយោជន៍​ឱ្យ​ពលរដ្ឋ​ថៃ​ឡើយ ក្នុង​ឋានៈ​ជា​មេដឹកនាំ​ប្រទេស​អាណត្តិ​ថ្មី​ដូច​គ្នា។

នាយក​ខុទ្ទកាល័យ​ប្រធាន​គណបក្ស​សង្គ្រោះ​ជាតិ​លោក មុត ចន្ថា បាន​សរសេរ​លើ​គណនី​ហ្វេសប៊ុក​របស់​លោក​កាលពី​ថ្ងៃទី​១ ខែ​តុលា នេះ​ថា ក្រោយ​ឡើង​កាន់​តំណែង នាយករដ្ឋមន្ត្រី​ថៃ លោក ស្រេតថា ថាវីស៊ីន បាន​ដាក់​ចេញ​នូវ​គោលនយោបាយ​ជាច្រើន​ជួយ​ដល់​ពលរដ្ឋ​ថៃ ក្នុង​នោះ​មាន​ដូចជា ការ​លើកលែង​ទិដ្ឋាការ​ភ្ញៀវ​ទេសចរ​មកពី​ប្រទេស​ចិន និង​កាហ្សាក់ស្ថាន កាត់​បន្ថយ​ពន្ធ​ប្រេងឥន្ធនៈ (ប្រេង​ម៉ាហ្សូត) ដើម្បី​បញ្ចុះ​តម្លៃ​ប្រេង​ម៉ាហ្សូត​លើ​ទីផ្សារ​ក្នុង​ប្រទេស និង​ការ​ដាក់​ផែនការ​កំណត់​ទិសដៅ​ស្រូប​យក​ភ្ញៀវ​ទេសចរ​បរទេស​ឱ្យ​បាន ២៨​លាន​នាក់​ក្នុង​ឆ្នាំ​២០២៣ និង ៤០​លាន​នាក់​ក្នុង​ឆ្នាំ​២០២៤ ជាដើម។

លោក មុត ចន្ថា បន្ថែម​ថា ក្រៅពី​ផែនការ​ខាងលើ មេដឹកនាំ​ថៃ​ក៏​បាន​ដាក់​ចេញ​នូវ​គោលនយោបាយ​រក្សា​ពន្ធ​លើ​តម្លៃ​បន្ថែម (VAT) ក្នុង​អត្រា​បច្ចុប្បន្ន ៧% សម្រាប់​រយៈពេល ១​ឆ្នាំ និង​ចែក​ថវិកា ១​ម៉ឺន​បាត ដែល​ស្មើ​នឹង ២៨០​ដុល្លារ​អាមេរិក ជា​រូបិយប័ណ្ណ​ឌីជីថល​ដល់​ពលរដ្ឋ​ថៃ​ក្នុង​ម្នាក់ ដែល​មាន​អាយុ ១៦​ឆ្នាំ​ឡើង​ទៅ ដែល​សរុប​ជា​សាច់ប្រាក់ ៥៦០​ពាន់​លាន​បាត ឬ ២,៩% នៃ GDP របស់​ប្រទេស​ថៃ ផង​ដែរ។

លើស​ពី​នេះ មេដឹកនាំ​ថៃ ក៏​មាន​ផែនការ​ចំណាយ​ថវិកា​ជាតិ ៣០០​ពាន់​លាន​បាត ដែល​ស្មើ​នឹង ១,៦% នៃ GDP ក្នុង​ស្រុក​ទៅ​លើ​សុខុមាលភាព​សម្រាប់​មនុស្ស​ចាស់​ជាច្រើន​ឆ្នាំ​ទៅ​មុខ និង​ផែនការ​បង្កើន​ថ្លៃឈ្នួល​អប្បបរមា​ដល់​កម្មករ​និយោជិត និង​ចំណូល​កសិករ​ឱ្យ​បាន ៥% ប្រចាំ​ឆ្នាំ ដែល​ជា​ផ្នែក​មួយ​នៃ​កិច្ច​ខិតខំ​ប្រឹងប្រែង​ក្នុង​ការ​បង្កើន​កំណើន GDP របស់​ថៃ​ផង​ដែរ។

អតីត​មន្ត្រី​ជាន់ខ្ពស់​គណបក្ស​សង្គ្រោះ​ជាតិ​រូប​នេះ​លើកឡើង​ថា ចំណែក​រដ្ឋាភិបាល​ថ្មី​ដែល​ដឹកនាំ​ដោយ​លោក ហ៊ុន ម៉ាណែត វិញ ក្រៅតែ​ពី​អួត គឺ​មាន​តែ​កុហក​ពលរដ្ឋ​ខ្មែរ​ប៉ុណ្ណោះ ដូចជា​កុហក​ថា កម្ពុជា​មាន​អត្រា​ការងារ​រហូត​ដល់​ជាង ៩៩% ជាដើម ប៉ុន្តែ​ក្នុង​ពេល​ជាមួយ​គ្នា​នោះ ការ​ដំឡើង​ប្រាក់​ឈ្នួល​ដល់​កម្មករ​បាន​ត្រឹមតែ ៣​ដុល្លារ​ប៉ុណ្ណោះ​ក្នុង ១​ខែ និង​ដំឡើង​ប្រាក់ខែ​អប្បបរមា​ដល់​កម្មករ​ខាង​វិស័យ​កាត់ដេរ​បាន​ត្រឹមតែ ០,០៦​ដុល្លារ​អាមេរិក​ប៉ុណ្ណោះ​ក្នុង ១​ថ្ងៃ។

លោក មុត ចន្ថា បន្ថែម​ថា ក្រៅពី​អួត​រឿង​អត្រា​ការងារ​នៅ​កម្ពុជា មន្ត្រី​រដ្ឋាភិបាល​អាណត្តិ​ថ្មី​នេះ​ក៏​បន្ត​អួត​ពី​កំណើន​ភ្ញៀវ​ទេសចរ​ផង​ដែរ ដែល​បាន​អះអាង​ថា កម្ពុជា​ទទួល​បាន​ភ្ញៀវ​ទេសចរ ២៥០% ដែល​ស្មើ​នឹង ៣​លាន ៥​សែន​ក្នុង​រយៈពេល ០៨​ខែ​នៃ​ឆ្នាំ​២០២៣ នេះ ប៉ុន្តែ​ការពិត វិស័យ​ទេសចរណ៍​នៅ​កម្ពុជា​គឺ​ស្ងាត់ជ្រងំ។

អតីត​មន្ត្រី​ជាន់ខ្ពស់​គណបក្ស​សង្គ្រោះ​ជាតិ​រូប​នេះ​បញ្ជាក់​ថា វិស័យ​នានា​នៅ​កម្ពុជា​មិន​ទាន់​អាច​ធ្វើ​ឱ្យ​ដំណើរការ​បាន​នៅឡើយ​ទេ​ក្រោម​ការ​ដឹកនាំ​នៃ​រដ្ឋាភិបាល​ថ្មី​ដែល​គ្រប់គ្រង​ដោយ​លោក ហ៊ុន ម៉ាណែត នៅ​ពេលនេះ ប៉ុន្តែ​រដ្ឋាភិបាល​ដ៏​ក្មេង​ខ្ចី​នេះ​បែរ​ជា​ត្រៀម​អនុវត្ត​ការ​ប្រមូល​ពន្ធ​ពី​ពលរដ្ឋ​ទៅ​វិញ ដូចជា​ពន្ធ​លើ​ប្រាក់ចំណូល ពន្ធ​មូលធន ពន្ធ​អចលនទ្រព្យ ដី​ស្រែ ដី​កសិកម្ម និង​ការ​បង្កើន​ពន្ធ​តម្លៃ​បន្ថែម ជាដើម។

លោក​បន្ថែម​ថា ក្រៅពី​ត្រៀម​ខ្លួន​ប្រមូល​ពន្ធ រដ្ឋាភិបាល​ថ្មី​នេះ​ក៏​បាន​ដំឡើង​តម្លៃ​ប្រេងឥន្ធនៈ​ជា​បន្តបន្ទាប់​ផង​ដែរ​ក្រោយ​ការ​បោះឆ្នោត​ជាតិ​រួច។ ដូច្នេះ បញ្ហា​នេះ​បង្ហាញ​ឱ្យ​ឃើញ​ថា ការ​ដឹកនាំ​រវាង​រដ្ឋាភិបាល​ថៃ និង​រដ្ឋាភិបាល​កម្ពុជា គឺ​រដ្ឋាភិបាល​ថៃ បាន​បម្រើ​ប្រយោជន៍​ឱ្យ​ប្រជាជន​ថៃ​បាន​ច្រើន​ជាង​រដ្ឋាភិបាល​កម្ពុជា ក្នុង​រយៈពេល​នៃ​ការ​ឡើង​កាន់​តំណែង​ជា​នាយករដ្ឋមន្ត្រី​ដូច​គ្នា​នៅ​ពេលនេះ។

អ្នកជំនាញ​ខាង​កិច្ចការ​រដ្ឋបាល​លោក ឱក សេរីសោភក្តិ៍ បាន​លើកឡើង​កាលពី​ពេល​ថ្មីៗ​នេះ​ថា សន្ទុះ​នៃ​ការ​ប្រកួតប្រជែង​សេដ្ឋកិច្ច​រវាង​រដ្ឋាភិបាល​វៀតណាម និង​រដ្ឋាភិបាល​ថៃ ចាប់ពី​ពេលនេះ​តទៅ នឹង​ជះ​ឥទ្ធិពល​ដ៏​អាក្រក់​ដល់​វិស័យ​ជាច្រើន​របស់​កម្ពុជា​ដោយ​ចៀស​មិន​ផុត​ឡើយ។

លោក​បញ្ជាក់​ថា ដើម្បី​ជំរុញ​នយោបាយ​ខ្មែរ​ឱ្យ​បោះ​ជំហាន​ទៅ​មុខ និង​អាច​ប្រកួតប្រជែង​ជាមួយ​ប្រទេស​ជិតខាង​បាន ដាច់ខាត មេដឹកនាំ​ខ្មែរ​ត្រូវតែ​កសាង​ម៉ាស៊ីន​បច្ចេកទេស​របស់​រដ្ឋ​មួយ​ដែល​មិន​រណប​ផល​ប្រយោជន៍​គណបក្ស តាមរយៈ​នៃ​ការ​បណ្តុះបណ្តាល​មន្ត្រី​ស្អាតស្អំ និង​មាន​សមត្ថភាព។ បន្ថែម​ពី​នេះ ក៏​ត្រូវ​ធ្វើការ​វះកាត់​ជំងឺ​រលេះរលួយ​ដែល​ខ្លួន​មាន​ចេញ​ដែរ ពីព្រោះ​ជំងឺ​នេះ​នឹង​ធ្វើ​ឱ្យ​ស្លាប់​ប្រទេស​ជាតិ​ទៅ​ថ្ងៃ​មុខ​យ៉ាង​ពិតប្រាកដ។

ក្រុម​អ្នក​សង្កេតការណ៍​លើកឡើង​ថា សមត្ថភាព​ដឹកនាំ​របស់​រដ្ឋាភិបាល​កម្ពុជា​ដែល​ដឹកនាំ​ដោយ​លោក ហ៊ុន ម៉ាណែត សម្រាប់​អាណត្តិ​ថ្មី​នេះ មិន​អាច​ប្រៀបធៀប​នឹង​មេដឹកនាំ​ប្រទេស​ជិតខាង​បាន​ទេ។ ជាក់ស្តែង អំឡុង​ពេល​ចូលរួម​កិច្ចប្រជុំ​នៅ​អង្គការ​សហប្រជាជាតិ មេដឹកនាំ​ប្រទេស​ផ្សេងៗ ដូចជា ថៃ វៀតណាម និង​កម្ពុជា ជាដើម បាន​នាំគ្នា​មក​ចូលរួម​មហាសន្និបាត​នៅ​អង្គការ​សហប្រជាជាតិ​ដូច​គ្នា​កាលពី​ថ្ងៃទី​២២ ខែ​កញ្ញា ឆ្នាំ​២០២៣ កន្លង​ទៅ​ថ្មីៗ​នេះ ក្នុង​នោះ​កម្ពុជា​ទទួល​បាន​ជំនួយ ១៨​លាន​ដុល្លារ​ពី​សហរដ្ឋ​អាមេរិក ជា​ថ្នូរ​នឹង​ការ​ព្រម​ទទួល​ពលរដ្ឋ​ខ្មែរ​ដែល​មាន​ទោស​ឱ្យ​ត្រឡប់​ទៅ​រស់នៅ​ប្រទេស​កម្ពុជា​វិញ ប៉ុន្តែ​នាយករដ្ឋមន្ត្រី​ថ្មី​របស់​កម្ពុជា លោក ហ៊ុន ម៉ាណែត ចាត់ទុក​ថា​នេះ​គឺជា​ជោគជ័យ​ដ៏​ធំធេង​ក្នុង​បេសកកម្ម​របស់​ខ្លួន​ដែល​មក​ចូលរួម​កិច្ចប្រជុំ​នៅ​អង្គការ​សហប្រជាជាតិ​ទៅ​វិញ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស