កូដករក្រុមហ៊ុនណាហ្គាវើលដ៍ បន្តទទូចទៅក្រសួងការងារ និងក្រសួង-ស្ថាប័នពាក់ព័ន្ធ ឱ្យជួយពន្លឿនដំណោះស្រាយ និងរកយុត្តិធម៌ ហើយធ្វើយ៉ាងណាឲ្យកម្មករខ្មែរមានការងារធ្វើ ដើម្បីពួកគេមានលទ្ធភាពទៅជួបជុំធ្វើបុណ្យនៅរដូវភ្ជុំបិណ្ឌដូចគេដូចឯង។
ការបន្តទទូចរបស់ក្រុមកូដករណាហ្គាវើលដ៍ កាលពីថ្ងៃទី០១ ខែតុលា ឆ្នាំ២០២៣ នៅចំថ្ងៃកាន់បិណ្ឌទី២ នៃរដូវបុណ្យភ្ជុំបិណ្ឌ។
យោងតាមហ្វេសប៊ុក Labor Rights Supported Union – LRSU ដោយលើកឡើងថា ថ្ងៃកាន់បិណ្ឌទី២ នេះ ពួកគេបានធ្វើចង្ហាន់ ហើយតាមស្រាក់របស់ពួកគេមានបិទអក្សរដោះលែងកញ្ញា ឈឹម ស៊ីថរ និងទាមទារឲ្យថៅកែក្រុមហ៊ុនណាហ្គាវើលដ៍ទទួលយកអ្នកតវ៉ាឲ្យចូលធ្វើការវិញ ដោយចាត់ទុកការដោះលែង និងបញ្ឈប់ការរើសអើងសហជីពនេះថាជាចង្ហាន់យុត្តិធម៌ ជាដើម។
ការដែលពួកគេធ្វើរូបភាពចានស្រាក់ និងចង្ហាន់ ភ្ជាប់ជាមួយការទាមទារនេះ ដោយក្រុមកូដករថាកម្មករដែលកំពុងតវ៉ានៅមុខក្រុមហ៊ុនណាហ្គាវើលដ៍ គ្មានលទ្ធភាពយកចង្ហាន់ទៅប្រគេនព្រះសង្ឃនៅតាមទីវត្តអារាម ឬទៅដាក់បិណ្ឌជួបជុំគ្រួសារនោះទេ ខណៈថ្ងៃទី០១ ខែតុលា ជាថ្ងៃដែលប្រជាជនខ្មែរប្រារព្ធពិធីកាន់បិណ្ឌភ្ជុំបិណ្ឌ។
មួយវិញទៀត ពួកគេចង់បង្ហាញក្រសួងពាក់ព័ន្ធទាំងអស់ ជាពិសេសក្រសួងការងារជួយពន្លឿនដំណោះស្រាយ និងរកយុត្តិធម៌ឲ្យកម្មករខ្មែរមានការងារធ្វើ ដើម្បីពួកគេមានលទ្ធភាពទៅជួបជុំធ្វើបុណ្យដូចគេដូចឯងដែរ។
ក្រៅពីឲ្យជួយរកដំណោះស្រាយហើយ ពួកគេក៏ទាមទារឲ្យដោះលែងមេដឹកនាំសហជីពនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ឲ្យមានសេរីភាពជួបជុំគ្រួសារក្នុងឱកាសភ្ជុំបិណ្ឌ និងទទួលយកអ្នកតវ៉ាឲ្យចូលធ្វើការវិញដោយគ្មានការរើសអើង ដោយថាពួកគេធ្វើកូដកម្ម ៦៥៣ថ្ងៃនេះ មិនមែនជាការស៊ីឈ្នួល ហើយក៏មិនមែនបទល្មើស «ញុះញង់» ផ្ទុយមកវិញថាការធ្វើកូដកម្មនេះ គឺដើម្បីសិទ្ធិសហជីពតែប៉ុណ្ណោះ។
ពាក់ព័ន្ធនឹងរឿងនេះ កន្លងមក ក្រុមកូដករក្រុមហ៊ុនណាហ្គាវើលដ៍ក៏ធ្លាប់ស្នើទៅលោក ហ៊ុន ម៉ាណែត នាយករដ្ឋមន្ត្រីថ្មីរបស់កម្ពុជា ឲ្យជួយដោះស្រាយវិវាទការងាររបស់ពួកគេជាមួយក្រុមហ៊ុនល្បែងស៊ីសងណាហ្គាវើលដ៍ ដើម្បីបញ្ចប់វិវាទការងារនៅក្រុមហ៊ុនណាហ្គាវើលដ៍ ដែលបានអូសបន្លាយអស់រយៈពេលជិត ២ឆ្នាំមកនេះ។
ចាប់តាំងពីផ្ទុះការតវ៉ាកាលពីថ្ងៃទី១៨ ខែធ្នូ ឆ្នាំ២០២១ មក តំណាងក្រុមកូដករបានស្វែងរកការចរចាជាមួយតំណាងក្រុមហ៊ុនណាហ្គាវើលដ៍ជាច្រើនលើកច្រើនសា និងបានដាក់ញត្តិទៅក្រសួងការងារ ខុទ្ទកាល័យនាយករដ្ឋមន្ត្រី ក៏ដូចជាភាគីពាក់ព័ន្ធផងដែរ ប៉ុន្តែរហូតមកទល់នឹងពេលនេះ មិនទាន់មានដំណោះស្រាយណាមួយដើម្បីបញ្ចប់វិវាទនេះនៅឡើយទេ។
ក្រៅពីមិនដោះស្រាយហើយ នាយករដ្ឋមន្ត្រីថ្មីលោក ហ៊ុន ម៉ាណែត បែរជាតែងតាំងថៅកែក្រុមហ៊ុនណាហ្គាវើលដ៍ គឺលោក ចេន លីបគង់ (Chen Lip Keong) ឲ្យធ្វើជាទីប្រឹក្សារបស់រដ្ឋាភិបាលលោកដែរផង។
ចំណែកលោក ហ៊ុន សែន អតីតនាយករដ្ឋមន្ត្រី និងជាឪពុកលោក ហ៊ុន ម៉ាណែត កាលពីខែមិថុនា ឆ្នាំ២០២៣ បានចោទប្រកាន់ទៅអតីតបុគ្គលិកណាហ្គាវើលដ៍បន្តធ្វើសកម្មភាពតវ៉ាខាងមុខក្រុមហ៊ុនថា ពួកគេកំពុងស៊ីឈ្នួលបាតុកម្មទៅវិញ។
ទោះជាបែបនេះក្តី ក្រុមសហជីព និងសង្គមស៊ីវិលធ្វើការលើកកម្ពស់សិទ្ធិមនុស្ស និងការងារ ចាត់ទុកការចោទប្រកាន់របស់លោក ហ៊ុន សែន លើក្រុមកូដករទាំងនោះថាគ្រាន់តែលេសដើម្បីគេចវេះពីការទទួលខុសត្រូវក្នុងការដោះស្រាយវិវាទនេះប៉ុណ្ណោះ ពីព្រោះនរណាក៏គេដឹងដែរថា ក្រុមហ៊ុនល្បែងស៊ីសងណាហ្គាវើលដ៍ក៏មានភាគហ៊ុនមួយចំណែកធំរបស់ក្រុមគ្រួសារត្រកូលហ៊ុនដែរ ដូច្នេះការខាតបង់របស់ក្រុមហ៊ុនល្បែង៕