30 C
Phnom Penh

លោក បៃដិន គាំទ្រ​អ៊ីស្រាអែល​ក្នុង​ការ​បោស​សម្អាត​ពួក​ហាម៉ាស-ប៉ាឡេស្ទីន តែ​មិន​គាំទ្រ​ការ​វាយ​កាន់កាប់​តំបន់​ហ្កាហ្សា

ដោយ ឌឹ ខេមបូឌា ដេលី

បទវិភាគ

នៅ​ក្នុង​ដំណើរ​ទស្សនកិច្ច​ទៅ​កាន់​ទីក្រុង​តែលអាវីវ នៃ​ប្រទេស​អ៊ីស្រាអែល របស់​លោក ចូ បៃដិន កាលពី​ថ្ងៃ​ពុធ ទី​១៨ តុលា គឺជា​ការ​បង្ហាញ​សាមគ្គីភាព​របស់​សហរដ្ឋ​អាមេរិក​ជាមួយ​អ៊ីស្រាអែល កំពុង​ធ្វើ​សង្គ្រាម​បោស​សម្អាត​ពួក​សកម្ម​ប្រយុទ្ធ​ហាម៉ាស-ប៉ាឡេស្ទីន នៅ​តំបន់​ហ្កាហ្សា។

លោក​ប្រធានាធិបតី ចូ បៃដិន បង្ហាញ​ជំហរ​គាំទ្រ​ដ៏​ឥត​ងាករេ​របស់​សហរដ្ឋ​អាមេរិក​សម្រាប់​អ៊ីស្រាអែល ដែល​ជា​សម្ព័ន្ធមិត្ត​ដ៏​សំខាន់​បំផុត​នៅ​មជ្ឈិម​បូព៌ា ខណៈ​ប្រទេស​នេះ​រង​ការ​វាយប្រហារ​យ៉ាង​ធ្ងន់ធ្ងរ​ដោយ​ក្រុម​ហាម៉ាស នៅ​ក្នុង​ដែនដី​ហ្កាហ្សា ដែល​បាន​បាញ់​គ្រាប់​រ៉ុក្កែត​ប្រមាណ​ជា ៥​ពាន់​គ្រាប់​ចូល​ទឹកដី​អ៊ីស្រាអែល បណ្ដាល​ឱ្យ​ប្រជាជន​អ៊ីស្រាអែល​ប្រហែល ១៤០០​នាក់​ស្លាប់ និង​របួស​រាប់​ពាន់​នាក់​កាលពី​ថ្ងៃទី​៧ តុលា។

នៅ​ក្នុង​ដំណើរ​ទស្សនកិច្ច​នៅ​ទីក្រុង​តែលអាវីវ ជា​ទី​ដែល​លោក​បាន​ជួប​ពិភាក្សា​ផ្ទាល់​ជាមួយ​នាយករដ្ឋមន្ត្រី​អ៊ីស្រាអែល លោក បេនចាមីន នេតាន់យ៉ាហ៊ូ លោក ចូ បៃដិន បាន​បង្ហាញ​ជំហរ​គាំទ្រ​ការ​វាយ​កម្ទេច​ពួក​ហាម៉ាស បើ​ទោះ​អ៊ីស្រាអែល​រង​ការ​ចោទប្រកាន់​ពី​ក្រុម​ប្រទេស​អារ៉ាប់ ថា​នៅ​ក្រោយ​ហេតុការណ៍​វាយប្រហារ​លើ​មន្ទីរពេទ្យ​មួយ​កន្លែង​នៅ​ក្នុង​ទីក្រុង​ហ្កាហ្សា ដែល​បាន​សម្លាប់​មនុស្ស​ជិត ៥០០​នាក់​ក៏ដោយ​នោះ។

លោក បៃដិន យល់ស្រប​ជាមួយ​អ៊ីស្រាអែល ដែល​ថា​ការ​បាញ់​បំផ្លាញ​មន្ទីរពេទ្យ Ahli Arab កាលពី​យប់​ថ្ងៃ​អង្គារ តាម​ពិត​គឺជា​ស្នាដៃ​របស់​ពួក​ជីហាត​អ៊ីស្លាម នៅ​ហ្កាហ្សា។ លោក ចូ បៃដិន បាន​អះអាង​ថា ដោយ​ផ្អែក​ទៅ​លើ​ព័ត៌មាន​ទទួល​បាន​ពី​មន្ទីរ​ប៉ុងតាហ្គូន គឺ​មន្ទីរពេទ្យ Ahli Arab ក្នុង​ដែនដី​ហ្កាហ្សា រង​ការ​វាយប្រហារ​ដោយសារ​ក្រុម​ជីហាត បាញ់​គ្រាប់​រ៉ុក្កែត​ខុស​គោលដៅ ហើយ​ក៏​ធ្លាក់​ទៅ​លើ​មន្ទីរពេទ្យ​នោះ។

លោក បៃដិន បាន​ប្រាប់​នាយករដ្ឋមន្ត្រី​អ៊ីស្រាអែល ថា ក្រុង​វ៉ាស៊ីនតោន​នឹង​ផ្តល់​ឱ្យ​អ៊ីស្រាអែល​នូវ​អ្វី​គ្រប់​យ៉ាង​ដែល​អ៊ីស្រាអែល​ត្រូវការ​ដើម្បី​ការពារ​ខ្លួន។

លោក បៃដិន បាន​និយាយ​ថា ក្រុម​ហាម៉ាស គឺ​អាក្រក់​ជាង​ក្រុម ISIS ទៅ​ទៀត។ ប្រធានាធិបតី​អាមេរិក​បាន​និយាយ​ថា លោក​មាន​ការ​សោកស្ដាយ​ចំពោះ​ការ​វាយប្រហារ​ទៅ​លើ​មន្ទីរពេទ្យ​មួយ​កន្លែង​ក្នុង​តំបន់​ហ្កាហ្សា កាលពី​ថ្ងៃ​អង្គារ។

ចំណែក​លោក នេតាន់យ៉ាហ៊ូ បាន​ប្រាប់​លោក បៃដិន ថា អ៊ីស្រាអែល​នឹង​ព្យាយាម​ជៀសវាង​ការ​ស្លាប់ និង​របួស​ជនស៊ីវិល​នៅ​ក្នុង​សង្គ្រាម​ក្នុង​ដែនដី​ហ្កាហ្សា ដែល​លោក​ថា​ការ​វាយប្រហារ​លើ​មន្ទីរពេទ្យ​នោះ គឺជា​កលល្បិច​របស់​ក្រុម​ហាម៉ាស។

សហរដ្ឋ​អាមេរិក និង​អ៊ីស្រាអែល គឺជា​សម្ព័ន្ធមិត្ត​ដែល​ខ្វះ​គ្នា​មិន​បាន​ឡើយ។

នៅ​ក្នុង​ជំនួប​ទ្វេភាគី​កាលពី​ថ្ងៃ​ពុធ ទី​១៨ តុលា លោក ចូ បៃដិន បាន​បញ្ជាក់​ប្រាប់​ទៅ​លោក​នាយករដ្ឋមន្ត្រី នេតាន់យ៉ាហ៊ូ ថា ពេល​ត្រឡប់​ទៅ​អាមេរិក​វិញ លោក​នឹង​សុំ​ឲ្យ​សភា​សហរដ្ឋ​អាមេរិក​បោះឆ្នោត​នូវ​កញ្ចប់​ជំនួយ​យោធា ១០​ពាន់​លាន​ដុល្លារ​តាម​សំណើ​របស់​អ៊ីស្រាអែល។

ខណៈ​លោក ចូ បៃដិន កំពុង​មាន​វត្តមាន​នៅ​ប្រទេស​អ៊ីស្រាអែល តំណាង​ក្រុង​វ៉ាស៊ីនតោន​បាន​ចេញ​មុខ​ការពារ​អ៊ីស្រាអែល នៅ​ឯ​ក្រុមប្រឹក្សា​សន្តិសុខ​អង្គការ​សហប្រជាជាតិ ដោយ​បោះឆ្នោត​វេតូ​ប្រឆាំង​សេចក្តី​សម្រេច​ដែល​ទាមទារ​ឲ្យ​អ៊ីស្រាអែល ផ្អាក​ការ​វាយប្រហារ​លើ​ដែនដី​ហ្កាហ្សា ដើម្បី​បុព្វហេតុ​មនុស្សធម៌។

តំណាង​សហរដ្ឋ​អាមេរិក​បាន​លើក​ហេតុផល​ថា ការ​បោះឆ្នោត​ប្រឆាំង ព្រោះ​សេចក្តី​ស្នើ​ដំណោះស្រាយ​ដែល​តំណាង​របស់​រុស្ស៊ី បាន​ស្នើ​ឡើង វា​មិន​បាន​ចែង​ពី​សិទ្ធិ​ការពារ​ខ្លួន​របស់​អ៊ីស្រាអែល នោះ​ទេ។

នៅ​ក្នុង​កិច្ចប្រជុំ​នៃ​ក្រុមប្រឹក្សា​សង្គ្រាម​នៃ​ប្រទេស​អ៊ីស្រាអែល ដែល​ត្រូវ​បង្កើត​ឡើង​នៅ​ក្រោយ​ការ​វាយប្រហារ​របស់​ក្រុម​ហាម៉ាស កាលពី​ថ្ងៃទី​៧ តុលា លោក ចូ បៃដិន បាន​ទាមទារ​ផង​ដែរ​ឲ្យ​អ៊ីស្រាអែល បង្ហាញ​ផែនការ និង​ភាព​ជាក់លាក់​អំពី​គោលដៅ​ធ្វើ​សង្គ្រាម​របស់​ខ្លួន​នៅ​ហ្កាហ្សា។ លោក​បាន​ប្រាប់​ថា លោក​ពិត​ជា​គាំទ្រ​អ៊ីស្រាអែល​សម្រេច​បោស​សម្អាត​ពួក​ហាម៉ាស តែ​សូម​កុំ​វាយ​កាន់កាប់​តំបន់​នេះ។

តែ​បើ​តាម​កាសែត​របស់​អ៊ីស្រាអែល កងទ័ព​របស់​ប្រទេស​នៅ​មជ្ឈិម​បូព៌ា​មួយ​នេះ នឹង​ចាប់ផ្ដើម​វាយលុក​ទ្រង់ទ្រាយ​ធំ​ដោយ​កងទ័ព​ថ្មើរ​ជើង​ចូល​ដែនដី​ហ្កាហ្សា នៅ​ពេល​ខាងមុខ​ឆាប់ៗ​នេះ ហើយ​បើ​វាយ​កាន់កាប់​បាន គឺ​អ៊ីស្រាអែល នឹង​គ្រប់គ្រង​ដែនដី​នេះ​រយៈពេល​តែ ១៨​ខែ ហើយ​ដក​ទ័ព​ត្រឡប់​មក​វិញ។ ពួក​មន្ត្រី​អ៊ីស្រាអែល​ថា ធ្វើ​ដូចនេះ​ដើម្បី​បោស​សម្អាត​ពួក​ហាម៉ាស នៅ​ក្នុង​តំបន់​ហ្កាហ្សា។ ការ​បោស​សម្អាត​ពួក​ហាម៉ាស នេះ ត្រូវ​គេ​មើល​ឃើញ​ថា ក្រោម​ហេតុផល​កម្ទេច​ពួក​ភេរវករ។

តែ​សម្រាប់​លោក ចូ បៃដិន បាន​បង្ហើប​ថា សហរដ្ឋ​អាមេរិក​កំពុង​បញ្ចុះបញ្ចូល​អ៊ីស្រាអែល ឱ្យ​រក​ផ្លូវ​ផ្សេង​ក្រៅពី​ការ​វាយប្រហារ​ដោយ​ទ័ព​ថ្មើរ​ជើង​ចូល​តំបន់​ហ្កាហ្សា ព្រោះ​ថា​ប្រតិបត្តិការ​សឹក​ជើងគោក​ទៅ​ក្នុង​ទឹកដី​ហ្កាហ្សា អាច​នាំ​ទៅ​រក​ការ​បង្ក​មហន្តរាយ​សម្លាប់​ជីវិត​មនុស្ស​យ៉ាង​សម្បើម ដែល​ក្រុង​វ៉ាស៊ីនតោន បារម្ភ​ពី​ការ​បង្ក​រាលដាល​ទៅ​ជា​សង្គ្រាម​តំបន់។ ដូច​នេះ​ហើយ មើល​ទៅ​បាន​ជា​សហរដ្ឋ​អាមេរិក និង​ពួក​បស្ចិម​ប្រទេស ព្រមាន​អ៊ីរ៉ង់ កុំ​ចូល​ពាក់ព័ន្ធ​ក្នុង​សង្គ្រាម​អ៊ីស្រាអែល និង​ពួក​ហាម៉ាស-ប៉ាឡេស្ទីន ឱ្យ​សោះ ដែល​អាមេរិក​ប្រកាស​ថា​កងទ័ព​អាមេរិក​នៅ​មជ្ឈិម​បូព៌ា បាន​ត្រៀម​រួច​ហើយ​ដើម្បី​ជួយ​កងទ័ព​អ៊ីស្រាអែល បើ​សង្គ្រាម​នេះ​ត្រូវ​អ៊ីរ៉ង់ ចូល​ពាក់ព័ន្ធ។

អ៊ីរ៉ង់​ជា​ប្រទេស​តែ​មួយ​គត់​នៅ​មជ្ឈិម​បូព៌ា ដែល​ពួក​បស្ចិម​ប្រទេស​ចោទ​ថា​ជា​អ្នក​នៅ​ពីក្រោយ​ការ​វាយប្រហារ​របស់​ពួក​ហាម៉ាស-ប៉ាឡេស្ទីន ដែល​បាញ់​រ៉ុក្កែត ៥​ពាន់​គ្រាប់​ចូល​ដែនដី​អ៊ីស្រាអែល កាលពី​ថ្ងៃទី​៧ តុលា តែ​អ៊ីរ៉ង់ បាន​បដិសេធ​ដោយ​អះអាង​ថា​ខ្លួន​មិន​ជាប់​ពាក់ព័ន្ធ​ឡើយ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស