28 C
Phnom Penh

លោក សម រង្ស៊ី ចោទ​រដ្ឋាភិបាល​លោក ហ៊ុន ម៉ាណែត ថា​កំពុង​ឃុបឃិត​ជាមួយ​ធនាគារ​និង​មីក្រូហិរញ្ញវត្ថុ​ច្របាច់​ក​ពលរដ្ឋ​ខ្មែរ

ដោយ ឌឹ ខេមបូឌា ដេលី

បទវិភាគ

អតីត​មេដឹកនាំ​បក្ស​ប្រឆាំង​លោក សម រង្ស៊ី ចោទ​ថា​រដ្ឋាភិបាល​ដែល​បាន​ដឹកនាំ​ដោយ​លោក ហ៊ុន សែន និង​កំពុង​ដឹកនាំ​ដោយ​លោក ហ៊ុន ម៉ាណែត ដែល​ជា​នាយករដ្ឋមន្ត្រី​ត​ពូជ​ថ្មី​របស់​កម្ពុជា​នៅ​ពេលនេះ កំពុងតែ​ឃុបឃិត​គ្នា​ជាមួយ​ធនាគារ និង​គ្រឹះស្ថាន​មីក្រូហិរញ្ញវត្ថុ ច្របាច់​ក​ពលរដ្ឋ​ក្រីក្រ​ដើម្បី​ទទួល​បាន​ប្រាក់​ចំណេញ​កប់​ពពក ដោយ​មិន​ខ្វល់​ពី​ទុក្ខសោក​របស់​ពលរដ្ឋ​ខ្មែរ​ឡើយ។

លោក សម រង្ស៊ី បាន​សរសេរ​លើ​ទំព័រ​ហ្វេសប៊ុក​របស់​លោក​កាលពី​ថ្ងៃទី​២៦ ខែ​តុលា ថា ដោយសារ​តែ​មាន​ការ​ឃុបឃិត​គ្នា​រវាង​រដ្ឋាភិបាល​ក្រុង​ភ្នំពេញ​ជាមួយ​ធនាគារ និង​គ្រឹះស្ថាន​មីក្រូហិរញ្ញវត្ថុ ដើម្បី​ច្របាច់​ក​ពលរដ្ឋ​ក្រីក្រ​នេះ​ហើយ បាន​ធ្វើ​ឱ្យ​ពលរដ្ឋ​ដែល​ជំពាក់​បំណុល​ធនាគារ​វ័ណ្ឌក​រើ​ខ្លួន​មិន​រួច ក្នុង​នោះ​កូនបំណុល​មួយ​ចំនួន​សុខចិត្ត​សម្លាប់​ខ្លួន។

កាលពី​ថ្ងៃទី​២៣ ខែ​តុលា ឆ្នាំ​២០២៣ កាសែត​អង់គ្លេស The Guardian បាន​ចុះផ្សាយ​អំពី​ការ​ធ្វើ​អត្តឃាត​របស់​ពលរដ្ឋ​ជនជាតិ​ដើម​ភាគតិច បន្ទាប់ពី​ពួកគេ​បាន​ជំពាក់​បំណុល​ធនាគារ និង​គ្រឹះស្ថាន​មីក្រូហិរញ្ញវត្ថុ​វ័ណ្ឌក ក្នុង​នោះ​ក៏​មាន​អ្នក​ជំពាក់​បំណុល​ផ្សេង​ទៀត​ចង់​ធ្វើ​អត្តឃាត​ដែរ ដោយសារតែ​ខ្លួន​គ្មាន​លទ្ធភាព​រក​ប្រាក់​ចំណូល​សម្រាប់​សង​ត្រឡប់​ទៅ​គ្រឹះស្ថាន​មីក្រូហិរញ្ញវត្ថុ​ទាំងនោះ​វិញ ខណៈ​ស្ថាប័ន​ទាំងនោះ​បាន​បង្ខំ​ឱ្យ​ពួកគេ​ត្រូវតែ​សង​លុយ​ត្រឡប់​ទៅវិញ ទោះ​ដឹង​ថា​កូនបំណុល​របស់​ខ្លួន​មិន​ទាន់​មាន​លទ្ធភាព​សង​ក៏ដោយ។

កាសែត The Guardian បាន​ចុះផ្សាយ​ថា ស្ថាប័ន​ចំនួន​បួន​ដែល​ស្ថិត​នៅ​ក្រោម​ការ​ស៊ើបអង្កេត​របស់​សាជីវកម្ម​ហិរញ្ញវត្ថុ​អន្តរជាតិ ឬ The International Finance Corporation (IFC) ដែល​ជា​ស្ថាប័ន​អន្តរជាតិ​មាន​គោលដៅ​ជួយ​ធ្វើ​ឱ្យ​ប្រសើរ​ឡើង​នូវ​ជីវភាព​រស់នៅ​របស់​ពលរដ្ឋ​ក្នុង​ប្រទេស​កំពុង​អភិវឌ្ឍ ដោយ​ការ​វិនិយោគ​ក្នុង​កំណើន​វិស័យ​ឯកជន ដូចជា គ្រឹះស្ថាន​មីក្រូហិរញ្ញវត្ថុ​អម្រឹត គ្រឹះស្ថាន​មីក្រូហិរញ្ញវត្ថុ LOLC ខេមបូឌា ធនាគារ​ហត្ថា និង​ធនាគារ​ស្ថាបនា ដែល​យ៉ាងហោច​ណាស់​កូនបំណុល​ម្នាក់​នៃ​ស្ថាប័ន​ទាំងនេះ​បាន​សម្លាប់​ខ្លួន និង​ប៉ុនប៉ង​ធ្វើ​អត្តឃាត ដោយសារតែ​រង​នូវ​សម្ពាធ​ពី​ស្ថាប័ន​ទាំងនេះ។

ទិន្នន័យ​សង្គម​ស៊ីវិល បង្ហាញ​ថា ក្នុង​ឆ្នាំ​២០២៣ នេះ កម្ចី​មីក្រូហិរញ្ញវត្ថុ​របស់​ពលរដ្ឋ​ខ្មែរ​បាន​ហក់​ឡើង​ទៅ​ដល់​ប្រមាណ ១៦​ពាន់​លាន​ដុល្លារ​អាមេរិក​ហើយ ខណៈ​ឆ្នាំ​២០២១ និង​ឆ្នាំ​២០២២ កន្លង​ទៅ គឺ​មាន​ត្រឹមតែ​ប្រមាណ ១០​ពាន់​លាន​ដុល្លារ​អាមេរិក​ប៉ុណ្ណោះ ហើយ​ទំហំ​កម្ចី ១៦​ពាន់​លាន​ដុល្លារ​អាមេរិក​នេះ គឺជា​ទំហំ​លើស​ពី​ពាក់កណ្តាល​នៃ​ផលិតផល​ក្នុង​ស្រុក​សរុប (GDP) របស់​ប្រទេស​កម្ពុជា​ទៅ​ហើយ។ ដូច្នេះ បំណុល​នេះ​ក៏​ជា​សញ្ញា​នៃ​ការ​បំផ្លាញ​សេដ្ឋកិច្ច​របស់​ប្រទេស​កម្ពុជា​ទាំងមូល​ដែរ​នា​ពេល​អនាគត។

ទិន្នន័យ​ដដែល​បង្ហាញ​ថា ក្នុង​ចំណោម​ពលរដ្ឋ​ខ្មែរ​សរុប ១៧​លាន​នាក់ គឺ​មាន​អ្នក​ដែល​មាន​គ្រួសារ​ចំនួន​ជាង ៣​លាន ៦​សែន​គ្រួសារ ខណៈ​បំណុល​ដែល​កើត​ចេញពី​កម្ចី​មីក្រូហិរញ្ញវត្ថុ​គឺ​មាន​ដល់​ទៅ ៣​លាន​កម្ចី​ឯណោះ ហើយ​តួលេខ​នេះ​បាន​បង្ហាញ​ថា កម្ពុជា​ជាប់​ចំណាត់ថ្នាក់​លេខ​១ លើ​ពិភពលោក​ដែល​បាន​ជំពាក់​បំណុល​ច្រើន​ជាងគេ​ក្នុង​ចំណោម​ស្ថាប័ន​មីក្រូហិរញ្ញវត្ថុ​ជាង ៨០​ស្ថាប័ន (៨៦​ស្ថាប័ន) ដែល​កំពុង​រក​ប្រាក់​ចំណេញ​ក្នុង​ប្រទេស​កម្ពុជា​សព្វថ្ងៃ​នេះ។

ទាក់ទិន​នឹង​បញ្ហា​នេះ អង្គការ​សម្ព័ន្ធ​ខ្មែរ​ជំរឿន និង​ការពារ​សិទ្ធិមនុស្ស ដែល​ហៅ​កាត់​ថា លីកាដូ បាន​ចេញ​របាយការណ៍​ស៊ើបអង្កេត​របស់​ខ្លួន​ជុំវិញ​បំណុល​របស់​ពលរដ្ឋ​ក្នុង​ខេត្ត​កំពង់ស្ពឺ កាលពី​អំឡុង​ខែ​សីហា ឆ្នាំ​២០២៣ នេះ​ថា ខ្លួន​បាន​សម្ភាស​ពលរដ្ឋ​ជាង ៧០០​គ្រួសារ (៧១៧​គ្រួសារ) ក្នុង​ចំណោម​ប្រជាពលរដ្ឋ​ជិត ២​សែន​គ្រួសារ (១៩៥៨៨២​គ្រួសារ) ទូទាំង​ខេត្ត​កំពង់ស្ពឺ ហើយ​បាន​រក​ឃើញ​ថា​ជាង ២៧% នៃ​អ្នក​ខ្ចី​លុយ​មីក្រូហិរញ្ញវត្ថុ គឺ​លើស​ពី​សមត្ថភាព​របស់​ខ្លួន​ដែល​អាច​សង​លុយ​ត្រឡប់​ទៅវិញ​បាន។

អង្គការ​លីកាដូ បញ្ជាក់​ថា ២៧% នៃ​អ្នក​ខ្ចី​លុយ​មីក្រូហិរញ្ញវត្ថុ​នេះ គឺ​ត្រូវ​សង​ត្រឡប់​ទៅវិញ​លើស​ពី​ចំណូល​របស់​ខ្លួន​រហូត​ដល់​ទៅ ៧០% ឯណោះ ដែល​តួលេខ​នេះ​បង្ហាញ​ថា គ្រឹះស្ថាន​មីក្រូហិរញ្ញវត្ថុ​បាន​បំពាន​ទៅ​លើ​គោលការណ៍​របស់​ខ្លួន​ធ្ងន់ធ្ងរ ខណៈ​ប័ណ្ណ​កម្មសិទ្ធិ​ដីធ្លី​របស់​កូនបំណុល​ទាំងនោះ​ជិត ១៥​ម៉ឺន​គ្រួសារ (១៤៤៨១៩​គ្រួសារ) ត្រូវ​បាន​ដាក់​បញ្ចាំ​ឱ្យ​ស្ថាប័ន​ដែល​ខ្លួន​បាន​ខ្ចី​លុយ ហើយ​ក្នុង​នោះ​ជិត ១​ម៉ឺន​គ្រួសារ (៩៦០២​គ្រួសារ) ក៏​បាន​លក់​ដី​យក​លុយ​សង​ដល់​ស្ថាប័ន​ផ្តល់​ប្រាក់កម្ចី​ទាំងនោះ​វិញ​ដែរ។

អង្គការ​សម្ព័ន្ធ​ខ្មែរ​ជំរឿន និង​ការពារ​សិទ្ធិមនុស្ស អំពាវនាវ​ឱ្យ​រដ្ឋាភិបាល​កម្ពុជា​អនុវត្ត​ច្បាប់​ដែល​មាន​ស្រាប់ និង​ធ្វើ​កំណែ​ទម្រង់​វិស័យ​មីក្រូហិរញ្ញវត្ថុ ដើម្បី​កុំ​ឱ្យ​គ្រឹះស្ថាន​មីក្រូហិរញ្ញវត្ថុ​នៅ​កម្ពុជា​លក់​ដី​ដោយ​បង្ខំ​ក្រៅ​ប្រព័ន្ធ​តុលាការ បញ្ឈប់​ការ​អនុវត្ត​ការ​ផ្តល់​កម្ចី​ឥណទាន​បែប​កេងប្រវ័ញ្ច និង​ចាត់​វិធានការ​ចាំបាច់ ដើម្បី​កាត់បន្ថយ​ចំនួន​នៃ​ការ​លក់​ដី​ដែល​តម្រូវ​ឱ្យ​បង់​សង​បំណុល និង​កែប្រែ​បទបញ្ជា​ផ្ទៃក្នុង​របស់​គ្រឹះស្ថាន​មីក្រូហិរញ្ញវត្ថុ ដោយ​ការ​បញ្ឈប់​តម្រូវ​ឱ្យ​ដាក់​ប័ណ្ណ​កម្មសិទ្ធិ​ដីធ្លី​ជា​ទ្រព្យ​ធានា ជាដើម។

សាជីវកម្ម​ហិរញ្ញវត្ថុ​អន្តរជាតិ ឬ The International Finance Corporation (IFC) គឺជា​ស្ថាប័ន​ដ៏​សំខាន់​មួយ​របស់​ធនាគារ​ពិភពលោក (World Bank) ដែល​បាន​ផ្តល់​កម្ចី​ដល់​គ្រឹះស្ថាន​មីក្រូហិរញ្ញវត្ថុ​ក្នុង​ស្រុក​សម្រាប់​ប្រទេស​ដែល​កំពុង​អភិវឌ្ឍ ដូចជា​ប្រទេស​កម្ពុជា ជាដើម ដោយ​យក​ការប្រាក់​ទាប​បំផុត ក្នុង​បំណង​ឱ្យ​គ្រឹះស្ថាន​មីក្រូហិរញ្ញវត្ថុ​ទាំងនោះ​ជួយ​ដល់​ពលរដ្ឋ​ខ្មែរ​ដែល​ក្រីក្រ ឲ្យ​ទទួល​បាន​នូវ​ឥណទាន ដើម្បី​បង្កើត​មុខរបរ​ចិញ្ចឹម​ជីវិត ប៉ុន្តែ​គ្រឹះស្ថាន​មីក្រូហិរញ្ញវត្ថុ​ទាំងនេះ​បាន​អនុវត្ត​ផ្ទុយ​ពី​គោលបំណង​របស់ IFC ទៅ​វិញ ដោយ​យក​ការប្រាក់​ខ្ពស់​ពី​អ្នក​ខ្ចីបុល និង​រឹបអូស​យក​ទ្រព្យសម្បត្តិ​របស់​ពួកគេ​ថែម​ទៀត នៅ​ពេល​ដែល​កូនបំណុល​ទាំងនោះ​ខ្វះ​លទ្ធភាព​សង​ត្រឡប់​ទៅវិញ​ទាន់​ពេល ខណៈ​រដ្ឋាភិបាល​គ្មាន​វិធានការ​ទប់ស្កាត់​លើ​បញ្ហា​នេះ​ឡើយ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស