32 C
Phnom Penh

លោក ហ៊ុន សែន ថា​មិន​បាន​ដឹង​អំពី​ទំហំ​នៃ​ការ​រឹបអូស​ផ្ទះ​ពី​ម្ចាស់​បុរី​ដែល​ជា​ឧកញ៉ា​លើ​អតិថិជន

ដោយ ឌឹ ខេមបូឌា ដេលី

បទវិភាគ

មេដឹកនាំ​ខ្មែរ​ក្រាញ​អំណាច​ជិត ៤​ទសវត្សរ៍ លោក ហ៊ុន សែន សារភាព​ថា លោក​ពិត​ជា​មិន​បាន​ដឹង​អំពី​ទំហំ​នៃ​ការ​រឹបអូស​ផ្ទះសម្បែង​ពី​ម្ចាស់​បុរី​ដែល​ជា​ឧកញ៉ា​លើ​អតិថិជន​ដែល​ជា​អ្នក​បង់​រំលស់ ថា​មាន​ចំនួន​ប៉ុន្មាន​នោះ​ទេ ដូច្នេះ​លោក​បញ្ជា​ឱ្យ​មន្ត្រី​ក្រោម​ឱវាទ​ធ្វើ​របាយការណ៍​អំពី​បញ្ហា​នេះ​ឲ្យ​លោក​នូវ​ចំនួន​ជាក់លាក់​ជាបន្ទាន់ ដើម្បី​ឱ្យ​លោក​អាច​ដោះស្រាយ​បញ្ហា​នេះ​បាន​ជូន​ជនរងគ្រោះ។

នាយករដ្ឋមន្ត្រី​កម្ពុជា​ដែល​កំពុង​ដឹកនាំ​រដ្ឋាភិបាល​ដោយ​ឯក​បក្ស លោក ហ៊ុន សែន លើកឡើង​ក្នុង​ពិធី​ជួប​ជាមួយ​កម្មករ​និយោជិត​នៅ​ខេត្ត​កំពង់ឆ្នាំង នៅ​ថ្ងៃទី​៩ ខែ​មិថុនា ឆ្នាំ​២០២៣ នេះ ដោយ​អំពាវនាវ​ឱ្យ​ម្ចាស់​បុរី​ទាំងអស់​នៅ​កម្ពុជា​យោគយល់​ដល់​អ្នក​បង់​រំលស់​ផ្ទះ​ពី​ខ្លួន​ទាំងអស់ ដោយ​ការ​សម្រួល​គណនី​ឥណទាន​ដល់​អ្នក​ទាំងនោះ​ឡើងវិញ តាមរយៈ​នៃ​ការ​បន្ធូរបន្ថយ​រយៈពេល​បង់​ឱ្យ​វែង​ជាង​មុន និង​បន្ធូរបន្ថយ​ចំនួន​លុយ​បង់​ឲ្យ​តិច​ជាង​មុន ដើម្បី​ចៀសវាង​រឹបអូស​ផ្ទះ​របស់​ពួកគេ ដោយសារតែ​អ្នក​ទិញ​ផ្ទះ​បង់​រំលស់​ទាំងនោះ​ខ្វះ​លទ្ធភាព​បង់​លុយ​តាម​កាលកំណត់​ក្នុង​រយៈពេល​ណា​មួយ​នោះ។

មេដឹកនាំ​បក្ស​កាន់​អំណាច​ដែល​ក្តោប​ក្តាប់​អំណាច​ផ្តាច់​មុខ​នៅ​កម្ពុជា លោក ហ៊ុន សែន លើកឡើង​ថា លោក​បាន​ទទួល​ព័ត៌មាន​អំពី​ការ​រឹបអូស​ផ្ទះ​របស់​ម្ចាស់​បុរី​ចំពោះ​អ្នក​ដែល​ខ្វះ​លទ្ធភាព​បង់​លុយ​ជា​បន្តបន្ទាប់​ក្នុង​រយៈពេល​ចុងក្រោយ​នេះ ខណៈ​អ្នក​ទិញ​ផ្ទះ​បង់​រំលស់​បាន​បង់​លុយ​អស់​រយៈពេល​ច្រើន​ឆ្នាំ​មក​ហើយ ក្នុង​នោះ​អ្នក​ខ្លះ​ក៏​បាន​បង់​អស់ ២​ភាគ​៣ នៃ​តម្លៃ​ផ្ទះ​ដែល​ខ្លួន​បាន​ទិញ​នោះ​ដែរ ប៉ុន្តែ​ដោយសារ​គ្មាន​លទ្ធភាព​បង់​លុយ​ក្នុង​រយៈពេល​ណា​មួយ​នោះ ស្រាប់តែ​ត្រូវ​ម្ចាស់​បុរី​រឹបអូស​យក​ផ្ទះ និង​លុយ​ដែល​គាត់​បាន​បង់​នោះ​ទាំងអស់​តែម្តង។

បុរស​ដែល​មាន​អំណាច​បំផុត​នៅ​កម្ពុជា លោក ហ៊ុន សែន អំពាវនាវ​ឱ្យ​ម្ចាស់​បុរី​ទាំងអស់​ដែល​បាន​រឹបអូស​ផ្ទះ​ពី​អតិថិជន​របស់​ខ្លួន​កាលពី​ពេល​ថ្មីៗ​នេះ ត្រូវតែ​ផ្តល់​ផ្ទះ​នោះ​ឱ្យ​ពួកគេ​វិញ ខណៈ​ផ្ទះ​ខ្លះ​ដែល​បាន​រឹបអូស​ជា​យូរ​មក​ហើយ​នោះ គួរ​តែ​ផ្តល់​លុយ​ឱ្យ​ពួកគេ​ចំនួន​ពាក់កណ្តាល​នៃ​លុយ​ដែល​ពួកគេ​បាន​បង់​នា​ពេល​កន្លងមក​ផង​ដែរ។

ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ ការ​សាងសង់​បុរី​លំនៅឋាន​ដើម្បី​លក់ បាន​កើតឡើង​ព្រោងព្រាត ប៉ុន្តែ​ប្រតិបត្តិការ​នៃ​ការ​លក់​បុរី ឬ​លំនៅឋាន​ទាំងនោះ ត្រូវ​ធ្វើឡើង​តាមរយៈ​នៃ​ការ​បង់​រំលស់​ភាគច្រើន ប៉ុន្តែ​អតិថិជន​ដែល​ទិញ​បុរី ឬ​លំនៅឋាន​ដោយ​ការ​បង់​រំលស់​តែង​រង​នូវ​ការ​រឹបអូស​ផ្ទះ​ពី​ម្ចាស់​ក្រុមហ៊ុន​ត្រឡប់​ទៅវិញ នៅ​ពេល​ដែល​ពួកគេ​អាក់ខាន​បង់​លុយ​តាម​ពេល​កំណត់​ទៅ​តាម​កិច្ចសន្យា ដែល​ធ្វើ​ឲ្យ​ពួកគេ​ខាត​ទាំង​លុយ​ដែល​បាន​បង់​រំលស់ និង​ផ្ទះ​ដែល​ខ្លួន​កំពុង​បង់​រំលស់​នោះ​ថែម​ទៀត ខណៈ​អតិថិជន​ខ្លះ​បង់​លុយ​ជិត​គ្រប់​ចំនួន​ឆ្នាំ​ទៅ​ហើយ​នោះ។

ទាក់ទិន​នឹង​បញ្ហា​នេះ គេ​ក៏​សង្កេត​ឃើញ​មាន​ម្ចាស់​ក្រុមហ៊ុន​បុរី និង​លំនៅឋាន​ខ្លះ មិន​បាន​គោរព​ទៅ​តាម​កិច្ចព្រមព្រៀង​ជាមួយ​អតិថិជន​ដែរ ដូចជា​ការ​មិន​បាន​សាងសង់​ផ្ទះ​ឲ្យ​អតិថិជន​ទៅ​តាម​ពេល​កំណត់ ជាដើម ប៉ុន្តែ​ម្ចាស់​ក្រុមហ៊ុន​ទាំងនោះ​មិន​បាន​ខាតបង់​អ្វី​ទេ គ្រាន់តែ​ផ្តល់​ហេតុផល​ថា ពួកគេ​សុំ​ពន្យារ​ពេល​ប៉ុណ្ណោះ ខណៈ​អតិថិជន​ក៏​មិន​បាន​ចាត់​វិធានការ​ណា​មួយ​លើ​ពួកគេ​ដែរ។

ជាក់ស្តែង ក្រុមហ៊ុន​អចលនទ្រព្យ ឡេង ណាវ៉ាត្រា របស់​អ្នកឧកញ៉ា ឡេង ណាវ៉ាត្រា ជាដើម បាន​រំលោភ​កិច្ចសន្យា​មិន​សាងសង់​លំនៅឋាន​ជូន​អតិថិជន​តាម​កិច្ចព្រមព្រៀង​នា​ពេល​កន្លងមក ដែល​អតិថិជន​ខ្លះ​បាន​នាំគ្នា​ចេញ​តវ៉ា​លើ​បណ្ដាញ​សង្គម​ហ្វេសប៊ុក​ព្រោងព្រាត​ក្នុង​រយៈពេល​ចុងក្រោយ​នេះ។

អ្នក​ប្រឹក្សា​យោបល់​ផ្នែក​អភិវឌ្ឍ​ផ្នត់គំនិត និង​ការ​ស្រាវជ្រាវ លោក សេក សុជាតិ ប្រាប់​សារព័ត៌មាន The Cambodia Daily នៅ​ថ្ងៃទី​៩ មិថុនា នេះ​ថា ប្រសិនបើ​ប្រមុខ​រាជរដ្ឋាភិបាល​កម្ពុជា​អាច​ដោះស្រាយ​បញ្ហា​នេះ​បាន គឺជា​រឿង​ល្អ​សម្រាប់​ប្រជាពលរដ្ឋ​ដែល​បាន​ខាតបង់​ដោយសារ​ត្រូវ​ក្រុមហ៊ុន​រឹបអូស​ផ្ទះ​របស់​ពួកគេ​កន្លងមក ទាំង​ដែល​ខ្លួន​បាន​បង់​លុយ​ជិត​គ្រប់​ឆ្នាំ​ទៅ​ហើយ​នោះ។

លោក​បន្ថែម​ថា នៅ​ពេលនេះ​មិនមែន​មាន​តែ​ប្រជាពលរដ្ឋ​ដែល​អត់​លុយ​បង់​ហើយ​ក្រុមហ៊ុន​បាន​រឹបអូស​ផ្ទះ​យក​នោះ​ទេ ប៉ុន្តែ​ក៏​មាន​បញ្ហា​ក្រុមហ៊ុន​មិន​សាងសង់​ផ្ទះ​ឲ្យ​អតិថិជន​ដែរ ដូច្នេះ​បើ​រដ្ឋាភិបាល​ជួយ​ជំរុញ​ឲ្យ​ក្រុមហ៊ុន​អចលនទ្រព្យ​ទាំងនោះ​ជួយ​សាងសង់​ផ្ទះ​ដែល​ភាគី​ខាង​ក្រុមហ៊ុន​មិន​បាន​សាងសង់​ជូន​អតិថិជន​ទៅ​តាម​កិច្ចព្រមព្រៀង​នោះ គឺ​រឹតតែ​ល្អ ព្រោះ​ថា​កន្លងមក អតិថិជន​មិន​អាច​ធ្វើ​អ្វី​លើ​ក្រុមហ៊ុន​បាន​ទេ ក្រៅតែ​ពី​រង់ចាំ​ក្រុមហ៊ុន​សាងសង់​ឲ្យ​នោះ ដែល​បញ្ហា​នេះ​ធ្វើ​ឲ្យ​អតិថិជន​ខាតបង់​លុយ​កាក់​អស់​រាប់​ម៉ឺន​ដុល្លារ​ក្នុង​ម្នាក់ៗ។

លោក សេក សុជាតិ លើកឡើង​បន្ត​ថា បញ្ហា​ខាងលើ​នេះ​មិនមែន​ទើប​តែ​នឹង​កើតមាន​ទេ ប៉ុន្តែ​មិន​មាន​មន្ត្រី​រដ្ឋាភិបាល​ណា​ម្នាក់​លើក​យក​បញ្ហា​នេះ​មក​ដោះស្រាយ​ឡើយ ផ្ទុយទៅវិញ​ទាល់តែ​នាយករដ្ឋមន្ត្រី​ចាត់​វិធានការ ទើប​បញ្ហា​នេះ​ត្រូវ​បាន​ដោះស្រាយ ដូច្នេះ​ប្រសិនបើ​មន្ត្រី​ពាក់ព័ន្ធ​នៅតែ​ប្រកាន់​ឥរិយាបថ​ការងារ​ដូច​ពេល​កន្លងមក នោះ​ប្រជាពលរដ្ឋ​មិន​ដឹង​ថា​ត្រូវ​សង្ឃឹម​លើ​មន្ត្រី​រដ្ឋាភិបាល​ដូចម្តេច​ទេ​ទៅ​ថ្ងៃ​មុខ។

អ្នក​ផ្តល់​ប្រឹក្សា​ផ្នែក​អភិវឌ្ឍ​ផ្នត់គំនិត​រូប​នេះ​អំពាវនាវ​ឲ្យ​ប្រមុខ​រាជរដ្ឋាភិបាល​កម្ពុជា ជំរុញ​ឲ្យ​មន្ត្រី​ក្រោម​ឱវាទ​របស់​ខ្លួន​តាមដាន និង​ដោះស្រាយ​បញ្ហា​នេះ​ឲ្យ​មាន​ប្រសិទ្ធភាព ចៀសវាង​គ្រាន់តែ​បង្កើត​ព្រឹត្តិការណ៍​នៅ​មុន​ការ​បោះឆ្នោត​ដើម្បី​ទាក់ទាញ​សន្លឹកឆ្នោត និង​ទឹកចិត្ត​របស់​ប្រជាពលរដ្ឋ ប៉ុន្តែ​ក្រោយ​ពេល​បោះឆ្នោត​រួច បែរជា​លែង​អើពើ​ទៅវិញ ដែល​ជា​ហេតុ​ធ្វើ​ឲ្យ​ប្រជាពលរដ្ឋ​លែង​មាន​ទំនុក​ចិត្ត​លើ​រដ្ឋាភិបាល​ទៅ​ថ្ងៃ​មុខ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស