30 C
Phnom Penh

អ្នកវិភាគ៖ រដ្ឋាភិបាល​ថ្មី​ប្រឈម​ខ្វះ​លុយ​ធ្ងន់ធ្ងរ​សម្រាប់​ចំណាយ​ក្នុង​ឆ្នាំ​២០២៤ ជាង ៦​ពាន់​លាន​ដុល្លារ​អាមេរិក

ដោយ ឌឹ ខេមបូឌា ដេលី

បទវិភាគ

ក្រុម​អ្នកវិភាគ​ថា​រដ្ឋាភិបាល​ថ្មី​របស់​កម្ពុជា​គ្មាន​សមត្ថភាព​រក​ចំណូល​ដើម្បី​ផ្គត់ផ្គង់​ការ​ចំណាយ​របស់​ខ្លួន​ដែល​បាន​អនុម័ត​រហូត​ដល់​ជាង ៩​ពាន់​លាន​ដុល្លារ​អាមេរិក​សម្រាប់​ឆ្នាំ​២០២៤ ទេ ព្រោះ​ថា​ផ្អែក​តាម​ស្ថានភាព​សេដ្ឋកិច្ច​កម្ពុជា​សព្វថ្ងៃ​នេះ បើ​ទោះបីជា​រដ្ឋាភិបាល​អាច​ប្រមូល​ពន្ធ​បាន​ត្រឹមត្រូវ​ក៏ដោយ ក៏​អាច​ទទួល​បាន​ចំណូល​ត្រឹមតែ​រង្វង់​ប្រមាណ​ជាង ៣​ពាន់​លាន​ដុល្លារ​ប៉ុណ្ណោះ។

អ្នកវិភាគ​នយោបាយ និង​ជា​ប្រធាន​វេទិកា​ពលរដ្ឋ​លោក គឹម សុខ ប្រាប់​សារព័ត៌មាន The Cambodia Daily នៅ​ថ្ងៃទី​៣ វិច្ឆិកា នេះ​ថា ថវិកា​ជាង ៩​ពាន់​លាន​ដុល្លារ​អាមេរិក​ដែល​រដ្ឋាភិបាល​កម្ពុជា​បាន​អនុម័ត​សម្រាប់​ឆ្នាំ​បន្ទាប់ បើ​រដ្ឋាភិបាល​អាច​ប្រមូល​ពន្ធ​បាន​ពេញលេញ​នោះ នឹង​មិន​ធ្វើ​ឲ្យ​រដ្ឋាភិបាល​ខ្វះ​ថវិកា​ក្នុង​ចរន្ត​ចំណាយ​ធ្ងន់ធ្ងរ​ទេ ប៉ុន្តែ​ចំណុច​គន្លឹះ​នៅ​ត្រង់​ថា តើ​រដ្ឋាភិបាល​នឹង​ប្រមូល​បាន​ថវិកា​ឱ្យ​គ្រប់​ការ​ចំណាយ​ជាង ៩​ពាន់​លាន​ដុល្លារ​អាមេរិក​ពី​ប្រភព​ណា បើ​សេដ្ឋកិច្ច​កម្ពុជា​សព្វថ្ងៃ​នេះ​កំពុងតែ​ដុនដាប​ទៅ​ហើយ​នោះ។

លោក គឹម សុខ លើកឡើង​ថា បើ​និយាយ​ពី​ការ​រំពឹង​កម្ចី​បរទេស​វិញ តើ​ប្រទេស​ណា​នឹង​ផ្តល់​កម្ចី​ឲ្យ​កម្ពុជា​ទៀត ដូចជា ជប៉ុន អឺរ៉ុប អាមេរិក និង​ប្រទេស​សម្ព័ន្ធមិត្ត​សេរី​ប្រជាធិបតេយ្យ​ដទៃ​ទៀត គេ​នឹង​មិន​ឲ្យ​កម្ពុជា​ខ្ចី​ទៀត​ទេ ហើយ​យ៉ាង​ច្រើន​បំផុត គេ​ផ្ដល់​ត្រឹម​ជំនួយ​ក្នុង​គម្រោង​អភិវឌ្ឍន៍​តែ​បន្តិចបន្តួច​ប៉ុណ្ណោះ។

លោក​បន្ថែម​ថា ចំណែក​មិត្ត​ដែកថែប​ចិន វិញ តាំងពី​ឆ្នាំ​២០២០ មក មិន​ទាន់​សន្យា​ផ្តល់​កម្ចី​ឲ្យ​រដ្ឋាភិបាល​ត្រកូល​ហ៊ុន​ខ្ចី​បន្ត​ទៀត​ទេ ព្រោះ​ចិន​ហាក់ដូចជា​ដឹង​ថា​រដ្ឋាភិបាល​ត្រកូល​មួយ​នេះ​កំពុង​ប្រឈម​នឹង​វិបត្តិ​ធ្ងន់ធ្ងរ​នៅ​ពេលនេះ ដូច្នេះ​បើ​ចិន​ឲ្យ​ខ្ចី វា​អាច​កើត​មាន​តែ​ក្នុង​គម្រោង​ខ្សែក្រវាត់ និង​ផ្លូវ​របស់​ចិន​ប៉ុណ្ណោះ ដែល​ត្រូវ​សាងសង់​ផ្លូវ​គមនាគមន៍​ឆ្លងកាត់​ទឹកដី​កម្ពុជា ហើយ​ក៏​ដើម្បី​ជា​ផល​ប្រយោជន៍​របស់​ចិន​ដែរ។

អ្នកវិភាគ​រូប​នេះ​បញ្ជាក់​ថា រដ្ឋាភិបាល​លោក ហ៊ុន ម៉ាណែត ប្រាកដ​ជា​នឹង​ត្រូវ​ប្រឈមមុខ​ចំពោះ​វិបត្តិ​ខ្វះ​លុយ​រហូត​ដល់​ប្រមាណ​ជាង ៦​ពាន់​លាន​ដុល្លារ​អាមេរិក​ឯណោះ​ក្នុង​ផែនការ​ចំណាយ​សម្រាប់​ឆ្នាំ​២០២៤ ដូច្នេះ​លោក​សង្ឃឹម​ថា​រដ្ឋាភិបាល​ក្មេង​ខ្ចី​មួយ​នេះ​នឹង​មិន​យក​គំរូ​តាម​យោធា​ភូមា ដែល​លក់​គ្រឿងញៀន និង​ធនធាន​ធម្មជាតិ ដើម្បី​ចិញ្ចឹម​រដ្ឋាភិបាល​របស់​ខ្លួន​ដោយ​មិន​គិត​ពី​ប្រយោជន៍​ជាតិ​នោះ​ទេ។

ការ​អះអាង​នេះ ធ្វើឡើង​បន្ទាប់ពី​រដ្ឋាភិបាល​កម្ពុជា​បាន​សម្រេច​អនុម័ត​ថវិកា​ចំណាយ​សម្រាប់​ឆ្នាំ​២០២៤ ក្នុង​ទំហំ​ទឹកប្រាក់​ប្រមាណ​ជាង ៩​ពាន់​លាន​ដុល្លារ​អាមេរិក​នៅ​ឆ្នាំ​ក្រោយ​នេះ។

កាលពី​ថ្ងៃទី​២៧ ខែ​តុលា ឆ្នាំ​២០២៣ រដ្ឋាភិបាល​ថ្មី​កម្ពុជា​ដែល​ដឹកនាំ​ដោយ​លោក ហ៊ុន ម៉ាណែត បាន​អនុម័ត​ក្នុង​កិច្ចប្រជុំ​ពេញ​អង្គ​គណៈរដ្ឋមន្ត្រី​នូវ​សេចក្តី​ព្រាងច្បាប់​ស្ដីពី​ហិរញ្ញវត្ថុ​សម្រាប់​ការ​គ្រប់គ្រង​ឆ្នាំ​២០២៤ ឬ​ហៅ​ម្យ៉ាង​ទៀត​ថា ច្បាប់​ថវិកា​ជាតិ​ឆ្នាំ​២០២៤ ក្នុង​ទំហំ​ទឹកប្រាក់​សរុប​ជាង ៣៨​ពាន់​លាន​រៀល (៣៨៨២៩​ប៊ី​លាន​រៀល) ដែល​ស្មើ​នឹង​ប្រមាណ​ជាង ៩​ពាន់​លាន​ដុល្លារ​អាមេរិក។

ការ​អនុម័ត​ច្បាប់​ស្ដីពី​ហិរញ្ញវត្ថុ​សម្រាប់​ការ​គ្រប់គ្រង​ចំណាយ​ប្រចាំ​ឆ្នាំ​២០២៤ នេះ រដ្ឋាភិបាល​កម្ពុជា​តែង​ធ្វើឡើង​រៀងរាល់​មុន​ដំណាច់​ឆ្នាំ​នីមួយៗ​រហូត​មក។ ជាក់ស្តែង កាលពី​ថ្ងៃទី​៩ ខែ​វិច្ឆិកា ឆ្នាំ​២០២២ កន្លង​ទៅ រដ្ឋសភា​ឯក​បក្ស​របស់​គណបក្ស​ប្រជាជន​កម្ពុជា ក៏​បាន​អនុម័ត​សេចក្តី​ព្រាងច្បាប់​ថវិកា​ជាតិ​សម្រាប់​ឆ្នាំ​២០២៣ ចំនួន ៩,៦​ពាន់​លាន​ដុល្លារ​អាមេរិក​ផង​ដែរ។

សេចក្តី​ព្រាងច្បាប់​ថវិកា​ជាតិ​សម្រាប់​ឆ្នាំ​២០២៣ កន្លង​ទៅ​នោះ រដ្ឋាភិបាល​រំពឹង​ថា​ខ្លួន​នឹង​អាច​ប្រមូល​ចំណូល​ត្រឡប់​មក​វិញ​បាន​ប្រមាណ ៧,២​ពាន់​លាន​ដុល្លារ​អាមេរិក ប៉ុន្តែ​ជាក់ស្តែង ក្នុង​រយៈពេល ៧​ខែ​នៅ​ដើម​ឆ្នាំ​២០២៣ នេះ រដ្ឋាភិបាល​ប្រមូល​ចំណូល​ពន្ធ​បាន​ត្រឹមតែ​ជាង ២,៣​ពាន់​លាន​ដុល្លារ​អាមេរិក​ប៉ុណ្ណោះ ដែល​បង្ហាញ​យ៉ាង​ច្បាស់​ថា រដ្ឋាភិបាល​គ្មាន​លទ្ធភាព​ជួយ​ឱ្យ​សេដ្ឋកិច្ច​របស់​កម្ពុជា​ងើប​ពី​ឱនភាព​បាន​ទេ​សម្រាប់​ឆ្នាំ​២០២៣ នេះ ខណៈ​ឆ្នាំ​២០២៤ ខាងមុខ​នេះ ត្រូវ​គេ​មើល​ឃើញ​ថា​ការ​ប្រមូល​ចំណូល​ត្រឡប់​មក​វិញ គឺ​កាន់តែ​យ៉ាប់យ៉ឺន​ជាង​ឆ្នាំ​២០២៣ ទៅ​ទៀត។

អ្នក​ស្រាវជ្រាវ​ការ​អភិវឌ្ឍ​សង្គម បណ្ឌិត មាស នី បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​ដើម​ខែ​តុលា ឆ្នាំ​២០២៣ នេះ​ថា សេដ្ឋកិច្ច​របស់​ប្រទេស​កម្ពុជា​ក្នុង​ឆ្នាំ​២០២៣ នេះ កំពុង​ប្រឈម​នឹង​ការ​ធ្លាក់​ចុះ​ធ្ងន់ធ្ងរ ព្រោះ​ថា​ឆ្នាំ​២០២៣ នេះ រដ្ឋាភិបាល​កម្ពុជា​នៅ​ខ្វះ​ថវិកា​រាប់​ពាន់​លាន​ដុល្លារ​អាមេរិក​ទៀត ដើម្បី​បង្គ្រប់​ផែនការ​ចំណាយ​របស់​ខ្លួន។

បណ្ឌិត មាស នី បញ្ជាក់​ថា កម្ពុជា​នៅ​ពេលនេះ​កុំ​ថា​ឡើយ​ប្រមូល​ថវិកា​ឱ្យ​គ្រប់​ការ​ចំណាយ​របស់​ខ្លួន​ដែល​មាន​ចំនួន​ជាង ៩​ពាន់​លាន​ដុល្លារ​នោះ សូម្បី​ប្រមូល​ឱ្យ​បាន​គ្រប់ ៧,២​ពាន់​លាន​ដុល្លារ​អាមេរិក ក៏​ប្រមូល​មិន​បាន​ផង​សម្រាប់​ឆ្នាំ​២០២៣ នេះ។

ជុំវិញ​ការ​លើកឡើង​ពី​ការ​ធ្លាក់​ចុះ​នៃ​ស្ថានភាព​សេដ្ឋកិច្ច​កម្ពុជា​នេះ គឺ​ហាក់​មាន​ខ្លឹមសារ​ស្រប​គ្នា​នឹង​ការ​លើកឡើង​របស់​នាយករដ្ឋមន្ត្រី​ថ្មី​របស់​កម្ពុជា​លោក ហ៊ុន ម៉ាណែត ដែល​គាត់​បាន​អះអាង​ក្នុង​ពិធី​ជួប​ជាមួយ​កម្មករ​កាលពី​ពេល​ថ្មីៗ​នេះ​ថា លោក​បាន​បញ្ជាក់​ក្នុង​កិច្ចប្រជុំ​ជាមួយ​គណៈរដ្ឋមន្ត្រី​កាលពី​ថ្ងៃទី​២៧ តុលា កន្លង​ទៅ​រួច​ហើយ​ថា ឆ្នាំ​២០២៤ ខាងមុខ​នេះ គឺ​ឆ្នាំ​ដែល​ចាប់​ហ្វ្រាំង ដែល​មាន​ន័យ​ថា រដ្ឋាភិបាល​នឹង​មិន​ដាក់​ផែនការ​អភិវឌ្ឍ​អ្វី​ទាំងអស់៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស